Евангелие от Иоанна, зачало 36.

Рече́ Госпо́дь ко прише́дшым к Нему́ иуде́ем: Аз есмь дверь: Мно́ю а́ще кто вни́дет, спасе́тся, и вни́дет, и изы́дет, и па́жить обря́щет. Тать не прихо́дит, ра́зве да укра́дет, и убие́т, и погуби́т: аз приидо́х, да живо́т и́мут и ли́шше и́мут. Аз есмь па́стырь до́брый: па́стырь до́брый ду́шу свою́ полага́ет за о́вцы. А нае́мник, и́же несть па́стырь, ему́же не суть о́вцы своя́, ви́дит во́лка гряду́ща и оставля́ет о́вцы, и бе́гает, и волк расхи́тит их, и распу́дит о́вцы. А нае́мник бежи́т, я́ко нае́мник есть и неради́т о овца́х. Аз есмь па́стырь до́брый, и зна́ю Моя́, и зна́ют Мя Моя. Я́коже зна́ет Мя Оте́ц, и Аз зна́ю Отца́, и ду́шу Мою́ полага́ю за о́вцы. И и́ны о́вцы и́мам, я́же не суть от двора́ сего́, и ты́я Ми подоба́ет привести́: и глас Мой услы́шат, и бу́дет еди́но ста́до, и еди́н па́стырь.

Ин 10:9–16

По 50-м псалме.

Слава: Моли́твами святи́теля Васи́лия Вели́кого, / Ми́лостиве, очи́сти / мно́жества согреше́ний на́ших.

И ныне: Моли́твами Богоро́дицы, / Ми́лостиве, очи́сти / мно́жества согреше́ний на́ших.

Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

И стихира самогласна, глас 6:

Излия́ся благода́ть во устна́х твои́х, преподо́бне о́тче, / и был еси́ па́стырь Христо́вы Це́ркве, / уча́ слове́сныя о́вцы / ве́ровати в Тро́ицу Единосу́щную / во Еди́ном Божестве́.

Канон праздника. Творение Стефаново. Ирмос по дважды, тропари же на 4, глас 2.

Песнь 1.

Ирмос: Гряди́те, лю́дие, / пои́м песнь Христу́ Бо́гу, / разде́льшему мо́ре и наста́вльшему лю́ди, / я́же изведе́ из рабо́ты еги́петския, / я́ко просла́вися.

Осмери́ца дней, нося́щая о́браз бу́дущаго, / Твое́ю, Христе́, просвеща́ется и освяща́ется во́льною нището́ю, / в сей бо зако́нно обре́зался еси́ пло́тию.

Обре́зание прие́млет осмодне́вное Христо́с Своего́ рождества́, / и сего́ днесь сень спря́тает, / свет возсиява́я но́выя благода́ти.

Ин канон святителя Василия, на 8.
Творение Иоанна Дамаскина,
глас и ирмос тойже.

Твоему́ гла́су подоба́ше приити́, Васи́лие, нача́ти хотя́щим хвалы́ твоя́, / но, о́тче, мольбу́ прие́м, благода́ть подава́й незави́стно нам.

Доброде́телей ты жесто́кий ше́ствовал еси́ путь, / в гла́дкий дости́гл еси́ и несопроти́вный Небе́сный восхо́д / и всем яви́лся еси́ о́браз, Васи́лие.

Страстно́е взыгра́ние, томя́щее плоть, любому́дрия жела́нием наказа́л еси́, / те́мже в нетле́нных водворя́ешися Ца́рствиих, / о́тче Васи́лие.

Душе́вныя стра́сти благопотре́бно, Васи́лие, / вку́пе же и теле́сныя, духо́вным посе́кл еси́ мече́м, / себе́ же Влады́це же́ртву прине́сл еси́.

Ты, быв неизрече́нных таи́нник, Васи́лие, / Христо́ву Ца́рствию тайнонаучи́л еси́, свяще́нне о́тче, / я́ве Тро́йческий свет облиста́л еси́ нам.

Богородичен: Кто изрещи́ Твое́ по досто́инству возмо́жет, е́же па́че сло́ва зача́тие? Бо́га бо родила́ еси́ пло́тию, Всечи́стая, / нам я́вльшася Спа́са и Го́спода.

Катавасия, первый лик поет ирмос: Глубины́ откры́л есть дно / и су́шею Своя́ влече́т, / в ней покры́в проти́вныя, / кре́пкий во бране́х Госпо́дь, / я́ко просла́вися.

Другий лик, ирмос: Ше́ствует морску́ю волня́щуюся бу́рю, / су́шу а́бие Изра́иль я́вльшуюся. / Чермны́й же понт триста́ты еги́петския покры́ ку́пно, / водостла́нен гроб, / си́лою кре́пкою десни́цы Влады́чни.

Песнь 3.

Ирмос: Утверди́ нас в Тебе́, Го́споди, / Дре́вом умерщвле́й грех, / и страх Твой всади́ / в сердца́ нас, пою́щих Тя.

Сло́во вопло́щшееся Пресу́щественное в преста́тие зако́на обре́зася, / нача́ток же Боже́ственныя благода́ти и жи́зни нетле́нныя нам подаде́.

Зако́на исполни́тель, не я́ко сопроти́вен Бо́гу сый, Христо́с воплоти́выйся показа́ся / и сподо́бися во́лею обре́затися осмодне́вен.

 

Ин, преподобнаго.

Спритече́ Христо́ву и спросия́ па́мять твоя́, о́тче, Рождеству́, / Его́же несказа́нное та́инство твои́ми уче́ньми я́ве сотвори́л еси́.

Стра́хом Госпо́дним утвержда́ем, нача́ло бо му́дрости сей есть, / любо́вию лу́чшею впери́лся еси́ прему́дрости, о Васи́лие.

Наказа́ния быв вся́каго испо́лнен, / не то́кмо до́льнаго и попира́емаго, мно́го же па́че лу́чшаго, / показа́лся еси́ ми́ру свет, Васи́лие.

Васи́лие прему́дре, вшел еси́ дея́нием, / и дея́ние вше́ствие виде́ния Боже́ственнейшаго показа́л еси́, / и су́щих ра́зуму научи́лся еси́ я́ве.

Богородичен: Безсе́менно во чре́ве Бо́га зачала́ еси́ / и ражда́еши несказа́нно воплоще́нна, / на Него́же зре́ти не сме́ют, Чи́стая, Небе́сных си́лы, Присноде́во.

Катавасия, лик первый: Кре́пость дая́й царе́м на́шим Госпо́дь / и рог пома́занных Свои́х вознося́й / от Де́вы ражда́ется, гряде́т же ко Креще́нию. / Тому́, ве́рнии, возопие́м: / несть свят, я́ко Бог наш.

Другий: Ели́цы дре́вних изреши́хомся се́тей / бра́шен львов, сотре́нных члено́вными, / ра́дуимся и разшири́м уста́, сло́во плету́ще от слове́с сладкопе́ния, / и́мже к нам наслажда́ется дарова́ний.

Кондак праздника, глас 3.
Подобен: Де́ва днесь:

Всех Госпо́дь обре́зание терпи́т / и челове́ческая прегреше́ния, я́ко Благ, обре́зует, / дае́т спасе́ние днесь ми́ру. / Ра́дуется же в Вы́шних и Созда́телев иера́рх, / и светоно́сный, Боже́ственный таи́нник Христо́в Васи́лий.

Таже седален святаго, глас 8.
Подобен: Прему́дрости:

Прему́дрости сло́ва навы́к и писа́ние зако́на отложи́в, / всем пропове́дал еси́ благода́ти сло́во / и душ скрижа́ли угла́дил еси́ словесы́ твои́ми, / в ни́хже начерта́л еси́ Боже́ственная уче́ния. / Те́мже и мрак проше́д о́блаком покро́ва телесе́, / и просия́л еси́ ду́хом, святи́телю Васи́лие. / Моли́ Христа́ Бо́га / грехо́в оставле́ние пода́ти / чту́щим любо́вию святу́ю па́мять твою́. (2)

Слава, и ныне, праздника, глас 4.
Подобен: Яви́лся еси́ днесь:

Я́ко Сый бе́здна человеколю́бия, / оде́ялся еси́, Влады́ко, в зрак ра́бий / и пло́тию обре́зался еси́, / да́руя всем челове́ком вели́кую Твою́ ми́лость.

Песнь 4.

Ирмос: Услы́шах, Го́споди, / слух Твоего́ смотре́ния, / и просла́вих Тя, / Еди́не Человеколю́бче.

Обре́зание преста́, отне́леже Христо́с во́лею обре́зася, / язы́к мно́жество спаса́я благода́тию.

Бу́дущаго непреста́нную осма́го ве́ка жизнь изобража́ет, / в ню́же Влады́ка обре́зася пло́тию.

 

Ин, преподобнаго.

Украша́ется я́коже Рождество́м Христо́ва неве́ста Це́рковь, / та́ко и па́мятию твое́ю, всеблаже́нне.

Непребори́м яви́лся еси́, по Бо́зе боря́, Васи́лие, / во всех Того́ повеле́нию покаря́яся.

Це́ркви подаде́ся от Бо́га огражде́ние и стена́ тверда́, / Васи́лие всеблаже́нне.

Сопротивобо́жным се́чиво ты сека́тельное / и огнь, пояда́яй пре́лесть, яви́лся еси́, о́тче Васи́лие.

Богородичен: Мо́лим Тя, Чи́стая, / я́же Бо́га безсе́менно заче́нши, / при́сно моли́ти за рабы́ Твоя́.

Катавасия: Услы́шах, Го́споди, глас Твой, его́же рекл еси́, / глас вопию́щаго в пусты́ни, / я́ко возгреме́л еси́ над вода́ми мно́гими, / Твоему́ свиде́тельствуяй Сы́ну, / весь быв соше́дшаго Ду́ха, возопи́: / Ты еси́ Христо́с, Бо́жия му́дрость и си́ла.

Другий: Огне́м очи́щся та́йнаго зре́ния, / поя́ проро́к челове́ков новоде́йство, / возглаша́ет глас, Ду́хом пле́щущ, / воплоще́ние явля́ющ Неизрече́нна Сло́ва, / И́мже си́льных держа́вы сотро́шася.

Песнь 5.

Ирмос: Све́та Пода́телю / и веко́в Тво́рче, Го́споди, / во све́те Твои́х повеле́ний наста́ви нас, / ра́зве бо Тебе́, ино́го бо́га не зна́ем.

Ты, от Де́вы Ма́тере несказа́нно проше́д, Го́споди, / и в челове́ческий не не сподо́бился еси́ оде́ятися о́браз, / я́ко Младе́нец зако́нно зако́н испо́лнил еси́.

Но́щи уподо́бися, я́ко сень зако́нную лю́бящи Изра́иля, Ро́ждшая, / из Нея́же облиста́вший Свет ми́ра, Христо́с, яви́ся.

 

Ин, преподобнаго.

Во́дит вои́стинну сугу́б Це́рковь пра́здник днесь обре́зания, / я́ко младе́нца Влады́ки, я́вльшагося на земли́, / и па́мять раба́, му́дра и треблаже́нна.

Непостижи́мый свет почи́в в тебе́, преподо́бне, / пресве́тлу свещу́ ми́ру тя показа́ Христо́с, / те́мже па́мять твою́ пое́м, Васи́лие.

Всете́мно напи́санное в Сина́и бытие́ Моисе́ем, / ты, сказу́я от Боже́ственных сокро́вищ, / начерта́л еси́ всем, преблаже́нне Васи́лие.

Ни законополо́жник Моисе́й, ни пе́рвее зако́на Ио́сиф бысть, / и́же по тебе́ пи́щи пшеницоме́ритель: / Боже́ственныя бо пло́ти сам раздроби́тель яви́лся еси́, Васи́лие.

Богородичен: Тебе́, ро́ждшей Христа́, всех Соде́теля, зове́м: / ра́дуйся, Чи́стая, ра́дуйся, Свет возсия́вшая нам, / ра́дуйся, вмести́вшая Бо́га Невмести́маго.

Катавасия: Иису́с, живота́ Нача́льник, / разреши́ти осужде́ние гряде́т Ада́ма первозда́ннаго, / очище́ний же, я́ко Бог, не тре́буя, / па́дшаго очища́ет во Иорда́не, / в не́мже вражду́ уби́в, / преиму́щ всяк ум мир да́рует.

Другий: Врага́ те́мнаго и оскверне́ннаго я́да очище́нием Ду́ха измове́ни, / к но́вой приста́хом небла́зненной стези́, / водя́щей в непристу́пную ра́дость, еди́нем присту́пну, / и́мже Бог примири́ся.

Песнь 6.

Ирмос: Бе́здна мя мно́га грехо́вная окружа́ет, / и вопию́ Ти, проро́ка подража́яй: / от тли мя, Го́споди, возведи́.

Прия́т коне́ц зако́н, отне́леже Христо́с, младе́нствовав, / исполни́тель зако́на Сый, обре́зание восприя́т / и разреши́ зако́нную кля́тву.

Суббо́тство, обре́зание же шата́ния евре́йскаго / я́вльшагося Христа́ манове́нием преста́, / и возсия́ благода́ти весна́.

 

Ин, преподобнаго.

Напита́л еси́ ду́ши, та́ющия гла́дом, ни́щих оби́льно / и а́лчущих сердца́ вся́каго испо́лнил еси́, Васи́лие, Боже́ственнаго весе́лия.

Напита́л еси́ бога́тно а́лчущия пи́щею Небе́сною: / хлеб бо А́нгельский есть сло́во твое́, Васи́лие, / и́мже изря́ден пшеницода́вец был еси́.

Собра́л еси́ пче́льный, Васи́лие, люботру́дно доброде́тели вся́кия цвет / и, худо́г быв, в ни́хже ублажа́ешися.

Потща́лся еси́ ми́ра отлучи́тися и с Бо́гом пожи́ти, / те́мже нестоя́тельная и тле́нная, всеблаже́нне Васи́лие, оста́вль, / пребыва́ющая, я́ко мудр, стяжа́л еси́.

Богородичен: Спаси́ от бед рабы́ Твоя́, Богоро́дице, / я́ко вси по Бо́зе к Тебе́ прибега́ем, / я́ко к Неруши́мей Стене́ и Предста́тельству.

Катавасия: Глас Словесе́, свети́льник Све́та, / денни́ца Со́лнца, Предте́ча в пусты́ни, – / пока́йтеся! – всем вопие́т лю́дем, – и предочи́ститеся: / се бо предстои́т Христо́с, / от тли мир избавля́яй.

Другий: Вожделе́ннаго я́вствова со всеблаже́нным гла́сом Оте́ц, / Его́же из чре́ва отры́гну. / Ей, – глаго́лет, – Сей соесте́ствен Сын, / Сый светоза́рен, произни́че из челове́ча ро́да, / Сло́во же мое́ жи́во, и Челове́к промышле́нием.

Кондак, глас 4.
Подобен: Яви́лся еси́ днесь:

Яви́лся еси́ основа́ние непоколеби́мое Це́ркве, / подая́ всем некрадо́мое госпо́дьство челове́ком, / запечатле́я твои́ми веле́ньми, / небоявле́нне Васи́лие преподо́бне.

Икос: Целому́дрия ча́ша, уста́ прему́дрости / и степе́нь уче́ний, Васи́лий Вели́кий всем облиста́ет мы́сленно. / Прииди́те у́бо, и ста́нем в дому́ Бо́жии, те́пле взира́юще, / чудесы́ сего́ крася́щеся, я́коже луче́ю, облиста́вшеся жития́, / чи́стым ду́хом прохла́ждшеся, / подо́бящеся того́ ве́ре, и теплоте́, и смире́нию, / и́миже дом яви́ся естества́ Бо́жия. / К нему́же вопию́ще, пое́м: / небоявле́нне Васи́лие преподо́бне.

Песнь 7.

Ирмос: О́бразу злато́му, на по́ле Деи́ре служи́му, / три́е Твои́ о́троцы небрего́ша безбо́жнаго веле́ния, / посреде́ же огня́ вве́ржени, ороша́еми, поя́ху: / благослове́н еси́, Бо́же оте́ц на́ших.

Све́тло и пресве́тло Рождество́ Христо́во, / и бу́дущаго обновле́ния подписа́вшее та́инство днесь, / я́ко зако́нным чи́ном Спас обре́зуется, / не я́ко Бог, но я́ко Челове́к и зако́на исполне́ние.

Зако́н исполня́я, зако́на Творе́ц, пло́тию днесь во́лею обре́зуется, / обре́зание содева́я грехо́вныя зимы́ и зва́ти да́руя: / благослове́н еси́, Бо́же оте́ц на́ших.

 

Ин, преподобнаго.

О́браз Отца́ Сын, и Сы́на Дух есть. / Ты же Ду́ха, о Васи́лие, нескве́рнено зерца́ло, дом же всея́ Тро́ицы. / Блаже́нна па́мять твоя́, и сла́вящии ю́ воспрославля́ются.

Углуби́в ум во глубины́ Бо́жия непостижи́мыя / и собра́в многоце́нный ты би́сер ра́зума, / напо́лнил еси́ мир прему́дростию и зва́ти научи́л еси́: / благослове́н еси́, Бо́же оте́ц на́ших.

О, еди́но дохнове́ние ума́ свяще́нных сопру́г, / я́коже еди́на душа́ во двою́ телесе́х неразде́льно: / в Григо́рии Васи́лий, жела́нием Боже́ственным совоку́плени, в Васи́лии же Григо́рий, / ны́не моли́те Христа́ о ста́де ва́шем.

Оте́ц сиро́т, и вдов защи́тник, и бога́тство ни́щих, / боля́щих утеше́ние и су́щих в бога́тстве окормле́ние, / ста́рости жезл яви́лся еси́, и наказа́ние ю́ности, / и мона́шествующих доброде́тели пра́вило, Васи́лие.

Очи́стив от вся́каго ти́ннаго скверне́ния ум, Васи́лие, / сразсмотри́л еси́ духо́вная жела́нным твои́м ду́хом. / Те́мже, воспева́я Тро́ицу, со дерзнове́нием взыва́л еси́: / благослове́н еси́, Бо́же оте́ц на́ших.

Богородичен: Тя купину́ Моисе́й в горе́ Сина́йстей огнепали́му, Чи́стая, прови́дяше, / прие́мшую неопа́льно нестерпи́мую зарю́ Неизглаго́ланнаго Существа́, / соедини́вшагося дебельству́ пло́ти еди́ныя в Нем святы́х Ипоста́сей.

Катавасия: Ю́ноши благочести́выя, пе́щи о́гненней приобщи́вшияся, / шумя́щ дух ро́сный невреди́мы сохрани́ / и Бо́жия А́нгела снизхожде́ние. / Те́мже, в пла́мени ороша́еми, благода́рственно воспева́ху: / препе́тый оте́ц Го́споди и Бо́же, благослове́н еси́.

Другий: Опали́ струе́ю зми́евы главы́ пе́щный высо́кий пла́мень, / ю́ноши нося́щ благочести́выя, / Ути́шивый, неудободержи́мую мглу из греха́ / всю же омыва́ет росо́ю Ду́ха.

Песнь 8.

Ирмос: Неизрече́нною му́дростию соста́вльшаго вся́ческая Бо́га Сло́ва / и от не су́щих во е́же бы́ти приве́дшаго, / благослови́те, дела́, я́ко Го́спода, / и превозноси́те во вся ве́ки.

Во осмы́й день обре́зуется я́ко Младе́нец Влады́ка, / Иису́са же прие́млет именова́ние, / я́ко ми́ра есть Спас и Госпо́дь.

Ко Христо́ву Рождеству́ досто́йно осмы́й спряже́ся, / святи́теля всесла́вная па́мять, / ю́же почита́юще ве́рою, пое́м Го́спода и превозно́сим во ве́ки.

 

Ин, преподобнаго.

Несказа́нным Про́мыслом дарова́вшаго Васи́лия ми́ру, / свет благоче́стия, трубу́ же Богосло́вия, / благослови́те, дела́ Госпо́дня, Го́спода.

Бо́га́тным де́йством все́льшася в му́драго Васи́лия / и тем благоче́стно Богосло́вившаго, / благослови́те, дела́ Госпо́дня, Го́спода.

Боже́ственных твои́х слове́с наслади́вшиися, Васи́лие, / непреста́нно в твое́й па́мяти торжеству́юще, вопие́м: / благослови́те, дела́ Госпо́дня, Го́спода.

Лучи́ слове́с испусти́л еси́, Васи́лие, ми́ру, / све́том наставля́ющия Еди́но чествова́ти Тро́йческое Естество́: / благослови́те, дела́ Госпо́дня, Го́спода.

Богородичен: Из Отца́, проше́дшаго пре́жде век, и безле́тнаго Бо́га Сло́ва / и в после́дняя возсия́вша из Де́вы, / благослови́те, дела́ Госпо́дня, Го́спода.

Катавасия: Та́йну пресла́вную вавило́нская показа́ пещь, источи́вшая ро́су, / я́ко струя́ми имя́ше Невеще́ственный Огнь восприя́ти Иорда́н / и объя́ти пло́тию креща́ема Зижди́теля, / Его́же благословя́т лю́дие и превозно́сят во вся ве́ки.

Другий: Свобо́дна у́бо тварь познава́ется / и сы́нове Све́та, пре́жде омраче́ннии, / еди́н стене́т тьмы предста́тель. / Ны́не да благослови́т усе́рдно Вино́внаго / пре́жде окая́нное язы́ков всенасле́дие.

На 9-й песни Честне́йшую: не поем, но поем припевы Обрезания: Велича́й, душе́ моя́, / по закону пло́тию обре́завшагося Го́спода.

Песнь 9.

Ирмос: Я́же пре́жде со́лнца свети́льника Бо́га возсия́вшато, / пло́тски к нам прише́дшаго из боку́ Деви́чу, / неизрече́нно воплоти́вшая, Благослове́нная, Всечи́стая, / Тя, Богоро́дице, велича́ем.

Таже вторый лик поет тойже припев и ирмос. Прочия же три припеваем к тропарем.

Велича́й, душе́ моя́, / во осмы́й день обре́зание Прие́млюща (дважды).

Преше́д преде́лы Христо́с челове́ческаго всего́ естества́, / преесте́ственно из Де́вы ражда́ется, / и, писа́ние зако́нное я́коже повелева́ет, / пло́тию обре́зается, / и испо́лнитель зако́на явля́ется.

Днесь Влады́ка обре́зуется пло́тию я́ко Младе́нец, / исполня́я зако́н (единожды).

Днесь Влады́ка пло́тию обре́зася, / Иису́с нарече́ся (единожды).

Прииди́те, Влады́ки сла́вная Христо́ва именова́ния во святы́ни торжеству́им, / Иису́с бо Боголе́пно нарече́ся днесь. / С си́ми же и па́мять святи́теля велича́ем.

Таже святаго припевы к тропарем его:

Велича́й, душе́ моя́, во иера́рсех Васи́лия Вели́каго (дважды).

Пе́рваго па́стыря, я́ко овча́ ве́рное Христо́во, Васи́лие, / живоно́сным стопа́м после́довал еси́, / мучи́телю бо твою́ ду́шу, о́тче, пре́дал еси́, / до́блественне предбе́дствуя о Це́ркви, всеблаже́нне.

Велича́й, душе́ моя́, / вселе́нныя пресве́тлаго свети́льника (дважды).

Церко́вное всесвяще́нное Христо́во ви́дев совокупле́ние, / твои́м укра́шено святи́тельством, му́дре, / всегуби́тель, я́ко от гро́ма, треснове́н быв, паде́ся мучи́тель, / су́щия бо в тебе́ Ду́ха зари́ не стерпе́, Васи́лие.

Велича́й, душе́ моя́, / от Кесари́и Васи́лия Вели́каго (дважды).

Апо́столов седа́лища, ли́ка же страда́лец Христо́вых, / патриа́рхов ски́нии, и пра́ведных сла́дости, / и ра́дости проро́ков сподо́бился еси́, Васи́лие: / Богоро́дицы бо служи́тель и Тро́ицы таи́нник был еси́.

Сей же вместо Сла́ва: Велича́й, душе́ моя́, / украси́вшаго Христо́ву Це́рковь.

Вместо И ны́не: Велича́й, душе́ моя́, / Честне́йшую Небе́сных во́инств, / Де́ву Пречи́стую Богоро́дицу.

Превы́спренняя вода́ми покрыва́яй Еди́н Госпо́дь, / востязу́яй мо́ре, бе́здны же изсуша́яй, из Тебе́, Чи́стая, плоть восприе́мый, / от Вифлее́ма тщи́тся ко Иорда́ну крести́тися пло́тию.

Таже оба лика, сошедшеся вкупе, поют первый припев праздника и ирмос:

Велича́й, душе́ моя́, / по закону пло́тию обре́завшагося Го́спода.

Недоуме́ет всяк язы́к благохвали́ти по достоя́нию, / изумева́ет же ум и преми́рный пе́ти Тя, Богоро́дице, / оба́че Блага́я су́щи, ве́ру приими́, / и́бо любо́вь ве́си Боже́ственную на́шу: / Ты бо христиа́н еси́ Предста́тельница, Тя велича́ем.

Таже припев: Велича́й, душе́ моя́, / Честне́йшую Небе́сных во́инств, / Де́ву Пречи́стую Богоро́дицу.

И ирмос: О, па́че ума́ Рождества́ Твоего́ чуде́с! / Неве́сто Всечи́стая, / Ма́ти Благослове́нная, / Е́юже получи́вше всесоверше́нное спасе́ние, / досто́йно хва́лим я́ко Благоде́теля, дар нося́ще песнь благодаре́ния.

Светилен.
Подобен: Ду́хом во святи́лищи:

Любому́дрия жела́нием обре́зал еси́, о́тче, души́ твоея́ покрыва́ло, / и ми́ру показа́лся еси́, я́ко со́лнце, чудесы́, / и ве́рных озари́л еси́ мы́сли, Богому́дре, / Тро́ицы таи́нниче, о Васи́лие му́дре, и служи́телю Богоро́дицы. (Дважды).

Слава, и ныне, праздника: Пло́тию обре́зуется зако́н испо́лнивый, я́ко Младе́нец осмодне́вен, веко́в Зижди́тель, / и пелена́ми повива́ется, я́ко Челове́к, и млеко́м пита́ется, / И́же вся безме́рною кре́постию я́ко Бог содержа́й / и манове́нием возводя́й.

На хвалитех стихиры, на 6, глас 5.
Подобен: Ра́дуйся:

Терпи́т обре́зание пло́тию / из Отца́ кроме́ сече́ния же и тле́ния / неизрече́нно ро́ждься я́ко Сло́во / и я́ко Бог от Бо́га, в непрело́жней пребыва́яй Божестве́. / Тем по зако́ну па́че зако́на бы́вый / кля́твы зако́нныя избавля́ет вся / и свы́шше благослове́ние да́рует. / Те́мже, преблаго́е Его́ схожде́ние восхваля́юще, / пое́м и благода́рственно прославля́ем, / Того́ моля́ще душа́м на́шим дарова́ти ве́лию ми́лость. (Дважды).

По благода́ти Сын Бо́жий быв / возрожде́нием Боже́ственнаго креще́ния, / естество́м и и́стиною, / и первове́чна Сы́на Бо́жия и Сло́ва, / Единосу́щна Отцу́ и Собезнача́льна испове́дал еси́, преподо́бне, / еретико́в же незатворе́нная уста́ / све́тлостию твои́х слове́с загради́л еси́. / Те́мже и в Ца́рства Вы́шняя всели́лся еси́, / сца́рствуяй Еди́ному и есте́ственне Ца́рствующему Христу́, / бога́тно раздаю́щему ми́ру ве́лию ми́лость.

Внутрь Небе́снаго хра́ма / я́ко святи́тель свяще́нен вмести́лся еси́, / дея́нием и виде́нием / прему́дрости нача́лами, я́ко оде́ждею свято́ю, обложе́н. / И ны́не в Вы́шнем же́ртвеннице, преподо́бне, свяще́нствуя, / и Бо́гу предстоя́, и невеще́ственную слу́жбу соверша́я, / помина́й ми́лостивно, всеблаже́нне Васи́лие, / соверша́ющия па́мять свяще́нную твою́ и всече́стную, / Христа́ моля́, / подаю́щаго ми́рови ве́лию ми́лость.

Весь освяще́н Бо́гу / и всеобра́зно от де́тства возложе́н, / Му́дрости Пребоже́ственныя озари́вся заря́ми, / су́щих разуме́ние уясни́л еси́, / све́тло сказу́я и му́дре пове́дая, / е́же в су́щих благочи́ние творя́ / позна́ния Боже́ственнейшаго де́ла. / Те́мже тя, Богоглаго́лива и Боже́ственна учи́теля / и светоно́сна свети́льника церко́внаго, пропове́дуем, / Христа́ моля́ща, / подаю́щаго ми́ру ве́лию ми́лость.

Стра́хом утверди́вся Бо́жиим, / нача́ло Прему́дрости разуме́л еси́, Васи́лие, / страх прему́дростию и жития́ пра́востию превозше́л еси́, о́тче, / любо́вию же Бо́гу сраствори́вся, / и сво́йственнейший был еси́. / Те́мже Боже́ственным наказа́вся оправда́нием и судьба́м, / челове́ков изучи́л еси́ обы́чаи / и украси́л еси́ ве́рных ра́зумы, / законоположе́ньми духо́вными уясни́в собо́р. / Христа́ у́бо моли́ / душа́м на́шим дарова́ти ве́лию ми́лость.

Слава, глас 6: Излия́ся благода́ть во устна́х твои́х, преподо́бне о́тче, / и был еси́ па́стырь Христо́вы Це́ркве, / уча́ слове́сныя о́вцы / ве́ровати в Тро́ицу Единосу́щную / во Еди́ном Божестве́.

И ныне, глас 8: Сходя́й Спас к ро́ду челове́ческому / прия́т пелена́ми пови́тие, / не возгнуша́ся плотска́го обре́зания, / осмодне́вен по Ма́тери, Безнача́льный по Отцу́. / Тому́, ве́рнии, возопии́м: / Ты еси́ Бог наш, поми́луй нас.

Славословие великое. По трисвятом тропарь Василия. Сла́ва, и ны́не, праздника. Ектении и отпуст.

Отпуст

И́же во осмы́й день пло́тию обре́затися изво́ливый на́шего ра́ди спасе́ния Христо́с, и́стинный Бог наш, моли́твами пречи́стыя Своея́ Ма́тере, святы́х сла́вных и всехва́льных Апо́стол, и́же во святы́х отца́ на́шего Васи́лия Вели́каго, архиепи́скопа Кесари́и Каппадоки́йския, его́же па́мять ны́не соверша́ем, святы́х пра́ведных Богооте́ц Иоаки́ма и А́нны, и всех святы́х, поми́лует и спасе́т нас, я́ко Благ и Человеколю́бец.

И знаменуются братия елеем от кандила святаго, аще изволит настоятель, и поем стихиру самогласну. На 1-м часе тропарь праздника. Сла́ва, Василия. И ны́не, Богородичен часов. По трисвятом кондак праздника. И прочая. И совершенный отпуст. На часех кондаки глаголем праздника и святаго, пременяюще.

НА ЛИТУРГИИ

Блаженны: от канона праздника, песнь 3-я на 4, и святаго, песнь 6-я на 4.

По входе тропарь праздника, глас 1:

На Престо́ле огнезра́чнем / в Вы́шних седя́й со Отце́м Безнача́льным и Боже́ственным Твои́м Ду́хом, / благоволи́л еси́ роди́тися на земли́ / от Отрокови́цы Неискусому́жныя, Твоея́ Ма́тере, Иису́се, / сего́ ра́ди и обре́зан был еси́, я́ко Челове́к осмодне́вный. / Сла́ва всеблаго́му Твоему́ сове́ту, / сла́ва смотре́нию Твоему́, / сла́ва снизхожде́нию Твоему́, Еди́не Человеколю́бче.

И тропарь святаго, глас тойже:

Во всю зе́млю изы́де веща́ние твое́, / я́ко прие́мшую сло́во твое́, / и́мже боголе́пно научи́л еси́, / естество́ су́щих уясни́л еси́, / челове́ческия обы́чаи украси́л еси́, / ца́рское свяще́ние, о́тче преподо́бне, / моли́ Христа́ Бо́га / спасти́ся душа́м на́шим.

Слава, кондак святаго, глас 4.
Подобен: Яви́лся еси́ днесь:

Яви́лся еси́ основа́ние непоколеби́мое Це́ркве, / подая́ всем некрадо́мое госпо́дьство челове́ком, / запечатле́я твои́ми веле́ньми, / небоявле́нне Васи́лие преподо́бне.

И ныне, кондак праздника, глас 3.
Подобен: Де́ва днесь:

Всех Госпо́дь обре́зание терпи́т / и челове́ческая прегреше́ния, я́ко Благ, обре́зует, / дае́т спасе́ние днесь ми́ру. / Ра́дуется же в Вы́шних и Созда́телев иера́рх, / и светоно́сный, Боже́ственный таи́нник Христо́в Васи́лий.

Прокимен, глас 6:

Спаси́, Го́споди, лю́ди Твоя́ / и благослови́ достоя́ние Твое́. Стих: К Тебе́, Го́споди, воззову́, Бо́же мой: да не премолчи́ши от мене́.

И святаго, глас 1: Уста́ моя́ возглаго́лют прему́дрость, и поуче́ние се́рдца моего́ ра́зум.