Инъ канонъ преподобнаго на 4, гласъ и ирмосъ тойже.

Твоя́ похвалы́ нача́ти хотя́щу ми́, / пода́ждь тво́й ны́нѣ гла́съ медото́чный, преподо́бне, / и́мже правосла́вную уясни́лъ еси́ Це́рковь пѣ́сньми, о́тче Іоа́нне, / я́же твою́ почита́етъ па́мять.

Яко му́дръ и остроу́менъ судія́, / изря́днѣйше су́щихъ естество́ смотря́я, / нестоя́щихъ предразсуди́лъ еси́ вѣ́чнующая: / привре́менными бо измѣни́лъ еси́ пребыва́ющая, о́тче Іоа́нне, / идѣ́же тя́ и ны́нѣ Христо́съ просла́ви.

Богородиченъ: Превы́шши яви́лася еси́, Чи́стая, вся́кія тва́ри, / ви́димыя же и неви́димыя, Приснодѣ́во. / Зижди́теля бо родила́ еси́, / я́коже благоволи́ воплоти́тися во утро́бѣ Твое́й, / Его́же со дерзнове́ніемъ моли́ спасти́ пою́щія Тя́.

Катавасія: Христо́съ ражда́ется – сла́вите, / Христо́съ съ небе́съ – сря́щите. / Христо́съ на земли́ – возноси́теся. / По́йте Го́сподеви, вся́ земля́, / и весе́ліемъ воспо́йте, лю́діе, / я́ко просла́вися.

Пѣснь 3.

Ирмосъ: Процвѣла́ е́сть пусты́ня я́ко крíнъ Го́споди, / язы́ческая неплодя́щая це́рковь, прише́ствіемъ Твои́мъ, / въ не́йже утверди́ся мое́ се́рдце.

Уязвля́ема любо́вію Твое́ю, я́ко женихо́вою, Влады́ко, / неоде́ржнымъ стремле́ніемъ страстоте́рпица Варва́ра / все́ оте́ческое безбо́жіе возненави́дѣ.

Ни сла́дости красота́, ни цвѣ́тъ добро́ты, ни бога́тство же, / ни сла́дости ю́ностныя услади́ша тя́, Варва́ро сла́вная, / Христу́ уневѣ́стившуюся, до́брая дѣ́во.

Къ соверше́ннымъ подвиго́мъ ничто́же яви́ся возбране́ніе не́мощи же́нстѣй, / ни ю́ность во́зраста, Христе́: / неви́димою бо Твое́ю си́лою укрѣпля́ема.

 

Инъ, преподобнаго:

Расточи́лъ еси́ бога́тство, Бо́гу взаи́мъ дая́, / тѣ́мже тебѣ́ на небесѣ́хъ угото́вася Ца́рство; / но и ны́нѣ воздая́ніе, Іоа́нне, прія́лъ еси́ многокра́тное.

Прему́дрости тала́нтъ пріе́мъ, / дѣя́ньми украша́я, уясни́лъ еси́, Іоа́нне, Це́рковь Христо́ву, / его́же многоусугубля́еши, и житіе́ оста́вивъ.

Богородиченъ: Чи́ни удиви́шася а́нгельстіи, Пречи́стая, / и человѣ́ческая устраши́шася сердца́ о Рождествѣ́ Твое́мъ. / Тѣ́мже Тя́, Богоро́дицу, вѣ́рою чти́мъ.

Катавасія: Пре́жде вѣ́къ отъ Отца́ рожде́нному нетлѣ́нно Сы́ну / и въ послѣ́дняя отъ Дѣ́вы / воплоще́нному безсѣ́менно, / Христу́ Бо́гу возопіи́мъ: / вознесы́й ро́гъ на́шъ, / свя́тъ еси́, Го́споди.

Кондакъ преподобнаго, гласъ 4.
Подобенъ: Вознесыйся на Крестъ:

Пѣснопи́сца и честна́го Богоглаго́льника, / Це́ркве наказа́теля и учи́теля, / и враго́въ сопротивоборца́ Іоа́нна воспои́мъ: / ору́жіе бо взе́мъ – Кре́стъ Госпо́день, / всю́ отрази́ ересе́й пре́лесть / и я́ко те́плый предста́тель къ Бо́гу / всѣ́мъ подае́тъ прегрѣше́ній проще́ніе.

Икосъ: Церко́вному наста́внику и учи́телю, и жерцу́, / я́ко таи́ннику неизглаго́ланныхъ, возопіе́мъ согла́сно: / и́же къ Бо́гу твои́ми моли́твами отве́рзи уста́ на́ша / и сподо́би глаго́лати словеса́ уче́ній твои́хъ, / ты́ бо Тро́ицѣ яви́лся еси́ соприча́стникъ, / я́ко друго́е со́лнце облиста́я въ мíрѣ, / чудесы́ и уче́ніи просія́въ, я́ко Моисе́й, / въ зако́нѣ Госпо́дни поуча́яся всегда́, / сло́вомъ и дѣ́ломъ бы́лъ еси́ свѣти́льникъ / и моля́ непреста́нно всѣ́мъ пода́ти прегрѣше́ній проще́ніе.

Сѣдаленъ, гласъ 3. Подобен: Красотѣ дѣвства:

Въ страда́ніи твое́мъ вся́ удиви́ла еси́, / я́ко претерпѣ́вши мучи́телей ра́ны, / вяза́нія, му́ки и темни́цы, Варва́ро прехва́льная. / Тѣ́мже и вѣне́цъ съ небесе́ тебѣ́ даде́ Христо́съ, / къ Нему́же, возжелѣ́вши усе́рдно, притекла́ еси́; / То́й благода́ть подаде́ тебѣ́, му́ченице, / врачева́нія источа́ти человѣ́комъ.

Слава, преподобнаго, гласъ тойже: Труба́ благогла́сна освяще́на, свяще́ннѣйше, на́мъ яви́лся еси́, / пѣснопою́щи обра́зно уче́нія Го́спода и Спа́са конце́мъ, / и твои́ми словесы́ мíръ просвѣти́лъ еси́, Іоа́нне преподо́бне, / Христа́ Бо́га моли́ дарова́ти на́мъ ве́лію ми́лость.

И нынѣ, богородиченъ: Боже́ственная ски́нія была́ еси́, Сло́ва, / еди́на Пречи́стая Ма́ти Дѣ́во, чистото́ю а́нгелы превозше́дшая; / па́че всѣ́хъ мене́, пе́рсть бы́вша, / оскверне́на плотски́ми прегрѣше́ньми, / очи́сти моли́твъ Твои́хъ Боже́ственными вода́ми, / подаю́щи, Чи́стая, ве́лію ми́лость.

Крестобогородиченъ: Нескве́рная Агница Сло́ва, нетлѣ́нная Дѣ́ва Ма́ти, / на Крестѣ́ зря́щи повѣ́шена изъ Нея́ безъ болѣ́зни прозя́бшаго, / ма́терски подо́бно рыда́ющи, вопія́ше: / увы́ Мнѣ́, Ча́до Мое́, ка́ко стра́ждеши во́лею, / хотя́ изба́вити отъ страсте́й безче́стія человѣ́ка?

Пѣснь 4.

Ирмосъ: Прише́лъ еси́ отъ Дѣ́вы не хода́тай, ни а́нгелъ, / но Са́мъ Го́споди вопло́щся, / и спа́слъ еси́ всего́ мя человѣ́ка; / тѣ́мъ зову́ ти́: / сла́ва си́лѣ Твое́й, Го́споди.

Изъ Дѣ́вы ро́ждься, / дарова́лъ еси́ отрокови́цамъ дѣ́вамъ киче́ніе низложи́ти льсти́ваго: / тѣ́мже добропобѣ́дная Варва́ра сего́ горды́ни поруга́ся.

Прама́ти, хитростьми́ льсти́ваго прельсти́вшися пе́рвѣе, / пи́щи изгна́на бы́сть ра́йскія: / Варва́ра же, сему́ поруга́вшися, / въ небе́снѣмъ черто́зѣ ны́нѣ водворя́ется.

Кресто́мъ Твои́мъ сме́рти си́лу разори́лъ еси́, / тѣ́мже, тѣлесе́ отрокови́ца, Христе́, не пощадѣ́вши, / терпи́тъ до́блественнѣйше ра́ны, Варва́ра, / тве́рдымъ умо́мъ.

 

Инъ, преподобнаго:

Повелѣ́нію Христо́ву повину́вся, оста́вилъ еси́ мірску́ю красоту́, / бога́тство, сла́дость, свѣ́тлость, / Его́же ра́ди, взе́мъ тво́й кре́стъ, / послѣ́довалъ еси́, Іоа́нне му́дре.

Сообнища́въ обнища́вшему Христу́, человѣ́ческаго ра́ди спасе́нія, / спросла́вился еси́, я́коже То́й обѣща́ся, / и сца́рствуеши же присноца́рствующему, Іоа́нне.

Богородиченъ: Тя́, приста́нище спасе́нія и стѣ́ну необори́му, / Богоро́дице Влады́чице, вси́ вѣ́рніи вѣ́мы: / Ты́ бо моли́твами Твои́ми отъ бѣ́дъ избавля́еши ду́ши на́ша.

Катавасія: Же́злъ изъ ко́рене Іессе́ева / и цвѣ́тъ отъ него́, Христе́, / отъ Дѣ́вы прозя́блъ еси́, / изъ горы́, Хва́льный, пріосѣне́нныя ча́щи, / прише́лъ еси́, вопло́щся / отъ Неискусому́жныя, Невеще́ственный и Бо́же: / сла́ва си́лѣ Твое́й, Го́споди.

Пѣснь 5.

Ирмосъ: Хода́тай Бо́гу и человѣ́комъ бы́лъ еси́, Христе́ Бо́же: / Тобо́ю бо Влады́ко, къ свѣтонача́льнику Отцу́ Твоему́, / отъ но́щи невѣ́дѣнія, / приведе́ніе и́мамы.

Око́нцы треми́ ба́ни просвѣща́тися повелѣ́вши, / та́инственно написа́ла еси́ креще́ніе, Варва́ро, / Тро́ичнымъ свѣ́томъ души́ свѣтоно́сное су́щее очище́ніе.

Су́щаго Бо́га разже́гшися ре́вностію, / лжеиме́нныхъ бого́въ скверна́вая оплева́ ли́ца, Варва́ра всехва́льная, / руга́ющися отрокови́ца внѣ́шнему міроде́ржцу.

Неи́стовства лю́таго о́тча укло́ншуюся Варва́ру, / разсту́пльшися, а́біе гора́ прія́тъ, / я́коже дре́вле приснопа́мятную первому́ченицу Ѳе́клу, / Христу́ чудодѣ́йствовавшу.

 

Инъ, преподобнаго:

Стра́хомъ Христо́вымъ, о́тче, утвержда́емь къ Боже́ственнѣй жи́зни, / плотско́е мудрова́ніе все́ покори́лъ еси́ ду́ху, / твоя́, Іоа́нне, чу́вства очища́я.

Очи́стивъ вся́кія скве́рны тѣ́ло, / и у́мъ, и ду́шу тщали́во, Богому́дре, / зарю́ прія́лъ еси́ трисо́лнечную, Іоа́нне, / свѣ́тлыми тя́ богатя́щую дарова́ніи.

Богородиченъ: Моли́ Твоего́ Сы́на и Го́спода, Дѣ́во Чи́стая, / плѣне́ннымъ избавле́ніе отъ проти́внаго обстоя́нія, / на Тя́ надѣ́ющимся, ми́рное дарова́ти.

Катавасія: Бо́гъ сы́й ми́ра, Оте́цъ щедро́тъ, / Вели́каго совѣ́та Твоего́ Ангела, / ми́ръ подава́юща, посла́лъ еси́ на́мъ: / тѣ́мъ, богоразу́мія къ свѣ́ту наста́вльшеся, / отъ но́щи у́тренююще, / славосло́вимъ Тя́, Человѣколю́бче.

Пѣснь 6.

Ирмосъ: Во глубинѣ́ грѣхо́внѣй содержи́мь е́смь, Спа́се, / и въ пучи́нѣ жите́йстѣй обурева́емь, / но, я́коже Іо́ну отъ звѣ́ря, / и мене́ отъ страсте́й возведи́ и спаси́ мя.

Я́коже обѣща́лся еси́ му́дрость дарова́ти, Спа́се, Богонауче́ну, / Тебе́ ра́ди стоя́щимъ предъ суди́щемъ мучи́телей, / ея́же му́ченица Варва́ра испо́лнися.

Безбо́жныхъ ле́сть изобличи́ла еси́ сло́вомъ богому́дрымъ, Варва́ро сла́вная, / терпѣ́ніемъ же дѣ́лъ мучи́телей мудрова́нія удиви́ла еси́.

Ра́намъ неща́дно строга́тися, / ру́бы же власяны́ми тве́рдо востира́тися Христа́ ра́ди / непоро́чная страстоте́рпица тѣ́ло предаде́.

 

Инъ, преподобнаго:

Просвѣти́вся Ду́ха благода́тію, / Боже́ственныхъ и человѣ́ческихъ зна́ніемъ веще́й я́сно обогати́вся, / тре́бующимъ, Іоа́нне, незави́стно препо́далъ еси́.

Подо́бнѣ лико́мъ небе́снымъ, му́дре, / Це́рковь правосла́вно украси́лъ еси́, / ликостоя́нныя пѣ́сни приглаша́я Тро́ицѣ Боговѣща́нныя.

Богородиченъ: Неискусому́жно, Дѣ́во, родила́ еси́ и вѣ́чнуеши Дѣ́ва, / явля́ющи и́стиннаго Божества́, Сы́на и Бо́га Твоего́, о́бразы.

Катавасія: Изъ утро́бы Іо́ну младе́нца изблева́ морскíй звѣ́рь, / якова́ прія́тъ, / въ Дѣ́ву же все́льшееся Сло́во / и пло́ть пріе́мшее про́йде сохра́ншее нетлѣ́нну. / Его́же бо не пострада́ истлѣ́нія, / Ро́ждшую сохрани́ неврежде́нну.

Кондакъ, гласъ 4.
Подобен: Вознесыйся на Крестъ:

Въ Тро́ицѣ благоче́стно пѣва́емому, / послѣ́довавши Бо́гу, страстоте́рпице, / и́дольская притупи́ла еси́ чти́лища; / посредѣ́ же по́двига страда́льчествующи, Варва́ро, / мучи́телей преще́нія не устраши́лася еси́, мужему́дренная, / велегла́сно пою́щи при́сно: / Тро́ицу чту́, еди́но Божество́.

Икосъ: Уневѣ́стившуюся Христу́ муче́ніемъ Варва́ру, / соше́дшеся, почти́мъ досто́йно: / я́ко да, тоя́ моли́твами па́губы душетлѣ́нныя изба́вльшеся / и губи́тельства, тру́са и паде́жа, житіе́ въ ми́рѣ препрово́димъ, / сподо́бившеся со всѣ́ми святы́ми, отъ вѣ́ка Бо́гу благоугоди́вшими, / ходи́ти во свѣ́тѣ и пѣ́ти съ ни́ми, / удиви́лъ еси́, Спа́се, твоя́ ми́лости / всѣ́мъ человѣ́комъ, вѣ́рою исповѣ́дающимъ: / Тро́ицу чти́мъ, еди́но Божество́.

Пѣснь 7.

Ирмосъ: Богопроти́вное велѣ́ніе беззако́ннующаго мучи́теля / высо́къ пла́мень вознесло́ е́сть: / Христо́съ же простре́ Богочести́вымъ отроко́мъ ро́су духо́вную, / Сы́й Благослове́нъ и Препросла́вленъ.

Иже зе́млю погуби́ти и потреби́ти мо́ре мучи́тель, су́етно свирѣ́пствуя, / я́ко игра́лище, лежи́тъ Варва́ры отрокови́цы подъ нога́ми: / сего́ бо попра́въ, Христо́съ, я́коже пти́цу ху́ду, связа́.

Ра́нами нестерпи́мыми твоему́ стру́жему тѣ́лу всему́, / обагре́ну же крове́й ка́плями, / свѣща́ми, претерпѣ́ла еси́, пали́ма по ре́бромъ, / му́ченице всехва́льная, / Христа́ благодаря́щи, Варва́ро сла́вная.

О, безчеловѣ́чнаго и немилосе́рдаго / мучи́телей суровства́ и мно́жайшаго безбо́жества! / Сосцы́ бо му́ченицы, я́коже въ мясосѣ́чницѣ, лю́тѣ мечи́ отсѣца́ху, / у́мъ утвержда́ющія Подвигополо́жнику Христу́.

 

Инъ, преподобнаго:

Ре́вностію разжига́емь, / богобо́рныхъ ересе́й вся́кое злоу́міе возрази́лъ еси́ свѣ́тлыми писа́ніи, / убѣли́въ всѣ́мъ я́сно дре́вле сѣ́янная, / му́дрыми, о Іоа́нне, напи́санныя то́нко.

Те́плѣ обличи́лъ еси́ злоиме́нныхъ ученико́въ Ма́нента ху́льное нече́стіе, / разврати́ти покуси́вшееся Це́рковь Христо́ву, / словесы́ и догма́ты твои́ми, о Іоа́нне, / я́же счини́лъ еси́.

Богородиченъ: Святы́хъ святѣ́йшую поразумѣва́емъ Тя́, / я́ко еди́ну ро́ждшую Бо́га непремѣ́ннаго, / Дѣ́во нескве́рная, Ма́ти безневѣ́стная: / всѣ́мъ бо источи́ла еси́ вѣ́рнымъ нетлѣ́ніе, / Боже́ственнымъ Рождество́мъ Твои́мъ.

Катавасія: Отроцы, благоче́стію совоспита́ни, / злочести́ваго велѣ́нія небре́гше, / о́гненнаго преще́нія не убоя́шася, / но, посредѣ́ пла́мене стоя́ще, поя́ху: / отце́въ Бо́же, благослове́нъ еси́.

Пѣснь 8.

Ирмосъ: Пе́щь иногда́ о́гненная въ Вавило́нѣ дѣ́йства раздѣля́ше, / Бо́жіимъ велѣ́ніемъ халде́и опаля́ющая, / вѣ́рныя же ороша́ющая, пою́щія: / благослови́те, вся́ дѣла́ Госпо́дня Го́спода.

Яви́ся тебѣ́ Христо́съ во Свѣ́тѣ непристу́пнѣмъ, / заключе́ннѣй, о Варва́ро, въ темни́цѣ, / дерза́ти повелѣва́я, и ра́ны врачу́я, и ра́дость да́руя: / тѣ́мже впери́лася еси́ твоего́ Жениха́ раче́ніемъ.

Яви́ся, Христе́, явле́нно прорече́ніе Твое́ испо́лнено: / оте́цъ бо ча́до на сме́рть предае́тъ, / самодѣ́латель же закла́нія бы́въ окая́нный роди́тель Твоея́ му́ченицы. / Тѣ́мже съ небесе́ огне́мъ истреби́ся.

Áнгелъ свѣ́телъ оде́ждею свѣтови́дною / тя́, Христа́ ра́ди обнаже́нную, честна́я Варва́ро, одѣ́яше, / я́коже невѣ́сту, обходя́щу стра́сти: / оде́жди бо, му́ченице, совлекла́ся еси́, боже́ственное пріе́мши измѣне́ніе.

 

Инъ, преподобнаго:

Обличи́лъ еси́ я́вѣ, треблаже́нне Іоа́нне, / Несто́ріево раздѣле́ніе, Севи́рово слія́ніе, единово́льное пребезу́міе; / вѣ́ру же единодѣ́йственну, / сія́ніе Правосла́вія всѣ́мъ облиста́въ конце́мъ.

Всѣ́я вра́гъ пле́велы обы́чно ерети́ческія въ Це́ркви Христо́вѣ, / сего́ поклоне́нія отмета́тися во ико́нахъ честны́хъ, / но обрѣ́те недре́млюща тя́, всеблаже́нне Іоа́нне, / вся́кое сѣ́мя зло́е искореня́юща.

Богородиченъ: Ты́ отъ Отца́ неразлу́чнаго, во чре́вѣ, богому́жно пожи́вшаго, / безсѣ́менно зачала́ еси́ и несказа́нно родила́ еси́, Богороди́тельнице Пречи́стая: / тѣ́мже Тя́, спасе́ніе всѣ́хъ на́съ, исповѣ́даемъ.

Катавасія: Чу́да преесте́ственнаго / росода́тельная изобрази́ пе́щь о́бразъ: / не бо́, я́же прія́тъ, пали́тъ ю́ныя, / я́ко ниже́ о́гнь Божества́ Дѣ́вы, / въ Ню́же вни́де утро́бу. / Тѣ́мъ воспѣва́юще, воспое́мъ: / да благослови́тъ тва́рь вся́ Го́спода / и превозно́ситъ во вся вѣ́ки.

Пѣснь 9.

Ирмосъ: Безнача́льна Роди́теля Сы́нъ, Бо́гъ и Госпо́дь, / вопло́щься отъ Дѣ́вы, на́мъ яви́ся, / омраче́нная просвѣти́ти, собра́ти расточе́нная, / тѣ́мъ Всепѣ́тую Богоро́дицу, велича́емъ.

Сла́вную иму́щи прія́ти кончи́ну мече́мъ, Варва́ро, муче́нія твоего́, / со Іуліанíею вѣнце́въ му́ченическихъ сподо́бльшися, / гла́съ Боже́ственный услы́шала еси́, / исполня́ющій моле́нія твоя́.

Твоему́ сочета́вшися ны́нѣ Всецарю́, Жениху́ Христу́, / облиста́ющися сла́вою, Варва́ро, Боже́ственнаго свѣ́та / въ Небе́сныхъ черто́зѣхъ, пѣвцы́ твоя́ назира́й, / страсте́й измѣня́ющи и приводя́щи живу́щему Бо́гу.

Исполня́я твое́ проше́ніе, Варва́ро страстоте́рпице, / Христо́съ врачева́нія подае́тъ соверша́ющимъ твою́ вѣ́рою лѣ́тнюю па́мять, / я́ко и́стинно морскíй песо́къ, твоя́ превзыдо́ша благосла́вная чудодѣ́йства.

 

Инъ, преподобнаго:

Научи́лъ еси́ вся́ церко́вныя пѣ́ти сы́ны правосла́вно еди́ницу въ Тро́ицѣ Честну́ю, / воплоще́ніе же Сло́ва Боже́ственное богосло́вити я́вѣ, Іоа́нне, / уясня́я неудобопости́жная мно́гимъ во Свяще́нныхъ Писа́ніихъ.

Святы́хъ чи́ны пѣсносло́вивъ, преподо́бне, / чи́стую Богоро́дицу, Христо́ва Предте́чу, / та́же апо́столы, проро́ки съ по́стники и му́дрыя учи́тели, / пра́ведники и му́ченики, / въ тѣ́хъ ны́нѣ водворя́ешися ски́ніихъ.

Богородиченъ: Черто́гъ была́ еси́ / и́же па́че ума́ воплоще́нія Сло́ва, Дѣ́во Богороди́тельнице, / одѣ́яна сла́вою добродѣ́телей и испещре́на. / Тѣ́мъ Тя́, Всенепоро́чная, Богоро́дицу возвѣща́емъ.

Катавасія: Та́инство стра́нное ви́жу и пресла́вное: / не́бо – верте́пъ, престо́лъ херуви́мскій – Дѣ́ву, / я́сли – вмѣсти́лище, / въ ни́хже возлеже́ Невмѣсти́мый – Христо́съ Бо́гъ, / Его́же, воспѣва́юще, велича́емъ.

Свѣтиленъ святыя. Подобенъ: Жены, услышите:

Я́ко шипо́къ краснѣ́йшій, / изъ терно́внаго израсла́ еси́ ко́рене, дѣ́во Варва́ро, / же́ртвою, му́ченице, свяще́ннаго страда́нія обагри́вшися кро́вію. / И ны́нѣ боже́ственную твою́ па́мять соверша́ющія любо́вію, спаса́й отъ бѣ́дъ.

Слава, преподобнаго: Я́ко Боже́ственъ свѣ́тъ, о́тче на́шъ, Це́ркви возсія́лъ еси́, / пѣ́ній твои́хъ сію́ свѣ́тлостію облиста́въ / и свѣ́томъ нра́ва твоего́, и́мже Христо́вы догма́ты явля́еши укра́шены, / къ Нему́же не преста́й о на́съ моля́ся, Іоа́нне.

И нынѣ, Богородиченъ: Вои́стинну Тя́ Богоро́дицу исповѣ́дуемъ, Влады́чице, Тобо́ю спаса́еміи: / и́бо Бо́га неизрече́нно родила́ еси́, / разори́вшаго Кресто́мъ сме́рть / и къ Себѣ́ привле́кшаго преподо́бныхъ собо́ры, / съ ни́ми же восхваля́емъ Тя́, Дѣ́во.

На хвалитехъ стихиры святыя, гласъ 1.
Самогласенъ Анатоліево:

Земны́я пи́щи наслажде́ніе презрѣ́вши / и о́тчее бога́тство, / ку́пно же и сла́ву возненави́дѣвши, / Небе́снаго Жениха́ возлюби́ла еси́, / Варва́ро всесла́вная; / мече́мъ бо во главу́ отсѣ́кшися, / съ му́дрыми вошла́ еси́ дѣ́вами къ Жениху́ Христу́. / Тѣ́мже и губи́тельный неду́гъ отгоня́ющи, / вѣ́рныя врачу́еши дѣ́йствомъ Свята́го Ду́ха, / и мо́лишися непреста́нно о душа́хъ на́шихъ.

Гласъ 2. Византiево: Посрами́ся лука́вый вра́гъ, / отъ жены́ побѣжде́нъ, / я́ко прама́терь имя́ше дѣ́йство ко грѣху́: / отъ Дѣ́вы бо вопло́щшееся Сло́во Отчее / непрело́жно и несмѣ́сно, / я́ко вѣ́сть Еди́нъ Са́мъ, / кля́тву разруши́ Éѵину и Ада́мову Христо́съ, / вѣнча́вый досто́йно Варва́ру му́ченицу, / и тоя́ ра́ди да́руя мíру очище́ніе / и ве́лію ми́лость.

Богозва́нная му́ченица Варва́ра, / на суди́щи стра́ждущи, глаго́лаше: / лю́ты у́бо ны́нѣшнія му́ки, о мучи́теліе, / но ра́достно вѣ́чныя жи́зни воспрія́тіе; / не предпочту́ же отню́дъ земны́хъ па́че небе́сныхъ. / Сего́ ра́ди сѣцы́те, / стружи́те пло́ти и огню́ преда́йте мя́, / ра́дующися, отъиду́ къ Жениху́ моему́ Христу́. / Ея́же моли́твами, Христе́ Бо́же, / ми́лости Твоя́ низпосли́ / и спаси́ ны, тоя́ страда́нія соверша́ющія вѣ́рно.

Торжество́ дне́сь страстоте́рпицы Варва́ры, / пріиди́те, лю́діе, воспои́мъ: / тоя́ бо ниже́ ме́чь, ниже́ о́гнь, ниже́ ина́я му́ка, / ниже́ многоплете́нная веліа́ра ловле́нія побѣди́ша. / И къ не́й вѣ́рою возопіе́мъ: / Христа́ моли́, доброму́ченице всесла́вная, / дарова́ти на́мъ ве́лію ми́лость.

Слава, гласъ 6, Іоанна монаха: Страда́льческимъ ше́ствовавши путе́мъ, / прароди́тельнаго избѣжа́ла еси́ совѣ́та, Варва́ро всечестна́я, / и я́ко у́бо дѣ́ва мудра́, свѣщу́ нося́щи, / вошла́ еси́ во дворы́ Го́спода твоего́, / и я́ко му́ченица му́жественна, / благода́ть прія́ла еси́ цѣли́ти плотскíя стра́сти. / Но и на́съ, воспѣва́ющихъ тя́, / душе́вныхъ болѣ́зней изба́ви, / къ Бо́гу моли́твами твои́ми.

И нынѣ, Богородиченъ: Никто́же, притека́яй къ Тебѣ́, / посра́мленъ отъ Тебе́ исхо́дитъ, Пречи́стая Богоро́дице Дѣ́во, / но про́ситъ благода́ти / и пріе́млетъ дарова́ніе къ поле́зному проше́нію.

Или Крестобогородиченъ: Всечи́стая, я́ко ви́дѣ Тебе́, на Крестѣ́ повѣ́шена, / пла́чущи, вопія́ше ма́терски: / Сы́не Мо́й и Бо́же Мо́й, / сладча́йшее Мое́ Ча́до, / ка́ко терпи́ши стра́сть поно́сную?

На стиховнѣ октоиха.
Слава, преподобнаго, гласъ 8:

Мона́ховъ мно́жества / наста́вника тя́ почита́емъ, о́тче на́шъ Іоа́нне. / Твое́ю бо стезе́ю вои́стинну пра́во ходи́ти позна́хомъ. / Блаже́нъ еси́, Христу́ рабо́тавъ, / и вра́жію обличи́лъ еси́ си́лу, / а́нгеловъ собесѣ́дниче, преподо́бныхъ соприча́стниче и пра́ведныхъ; / съ ни́миже моли́ся Го́сподеви / поми́ловатися душа́мъ на́шимъ.

И нынѣ, Богородиченъ или Крестобогородиченъ.
Подобенъ: О, преславнаго чудесе:

Не терплю́, Ча́до, ви́дящи Тя́, на дре́вѣ усну́вша, / бо́дрость всѣ́мъ подаю́щаго, / я́ко да и́же дре́вле преступле́нія плодо́мъ / сно́мъ поги́бельнымъ усну́вшимъ, / Боже́ственную и спаси́тельную бо́дрость пода́си, / Дѣ́ва глаго́лаше, пла́чущи, Юже велича́емъ.

Славословіе великое [ектеніи и отпустъ].

НА ЛИТУРГІИ.

Блаженна отъ канона мученицы, пѣснь 3-я, и преподобнаго пѣснь 6-я.

Tропарь святыя, гласъ 8:

Варва́ру святу́ю почти́мъ: / вра́жія бо сѣ́ти сокруши́, / и я́ко пти́ца, изба́вися отъ ни́хъ / по́мощію и ору́жіемъ Креста́, всечестна́я.

Кондакъ святыя, гласъ 4.
Подобен: Вознесыйся на Крестъ:

Въ Тро́ицѣ благоче́стно пѣва́емому, / послѣ́довавши Бо́гу, страстоте́рпице, / и́дольская притупи́ла еси́ чти́лища; / посредѣ́ же по́двига страда́льчествующи, Варва́ро, / мучи́телей преще́нія не устраши́лася еси́, мужему́дренная, / велегла́сно пою́щи при́сно: / Тро́ицу чту́, еди́но Божество́.

Тропарь преподобнаго, гласъ 8:

Правосла́вія наста́вниче, / благоче́стія учи́телю и чистоты́, / вселе́нныя свѣти́льниче, / мона́шествующихъ богодохнове́нное удобре́ніе, Іоа́нне прему́дре, / уче́ньми твои́ми вся́ просвѣти́лъ еси́, цѣвни́це духо́вная, / моли́ Христа́ Бо́га спасти́ся душа́мъ на́шимъ.

Кондакъ преподобнаго, гласъ 4.
Подобенъ: Вознесыйся на Крестъ:

Пѣснопи́сца и честна́го Богоглаго́льника, / Це́ркве наказа́теля и учи́теля, / и враго́въ сопротивоборца́ Іоа́нна воспои́мъ: / ору́жіе бо взе́мъ – Кре́стъ Госпо́день, / всю́ отрази́ ересе́й пре́лесть / и я́ко те́плый предста́тель къ Бо́гу / всѣ́мъ подае́тъ прегрѣше́ній проще́ніе.

Прокименъ, гласъ 4: Ди́венъ Бо́гъ во святы́хъ Свои́хъ, / Бо́гъ Изра́илевъ. Стихъ: Въ це́рквахъ благослови́те Бо́га, Го́спода отъ исто́чникъ Изра́илевыхъ.