На стиховне стихиры воскресны.

Слава, глас 6: Свяще́нных па́мять, и царе́й держа́ва, / и весе́лие быстъ Рождество́ Твое́, / и в нем, хва́лящеся, глаго́лем: / О́тче наш, И́же еси́ на Небесе́х, / да святи́тся И́мя Твое́, Человеколю́бче.

И ныне, глас тойже: Днесь неви́димое Естество́ / челове́ком от Де́вы совокупля́ется; / днесь безме́рное Существо́ в Вифлее́ме пелена́ми обвива́ется; / днесь Бог звездо́ю волхвы́ в поклоне́ние приво́дит, / провозвеща́я Свое́ тридне́вное погребе́ние, / я́ко в зла́те, и сми́рне, и лива́не. / Ему́же пое́м: / воплоти́выйся от Де́вы, Христе́ Бо́же, / спа́си ду́ши на́ша.

На благословении хлебов тропарь, глас 4:

Рождество́ Твое́, Христе́ Бо́же наш, / возсия́ ми́рови свет ра́зума, / в нем бо звезда́м служа́щии / звездо́ю уча́хуся / Тебе́ кла́нятися, Со́лнцу Пра́вды, / и Тебе́ ве́дети с высоты́ восто́ка. / Го́споди, сла́ва Тебе́. (2)

И святых, глас 2, единожды:

Благовеству́й, Ио́сифе, Дави́ду чудеса́, Богоотцу́: / Де́ву ви́дел еси́ ро́ждшую, / с па́стыри славосло́вил еси́, / с волхвы́ поклони́лся еси́, / А́нгелом весть прие́м. / Моли́ Христа́ Бо́га спасти́ ду́ши на́ша.

А идеже несть всенощнаго бдения, на повечерии по трисвятом кондак Богоотцев. Сла́ва, и ны́не, праздника.

НА УТРЕНИ

На Бог Госпо́дь: тропарь воскресен дважды.
Слава, святых, глас 2:

Благовеству́й, Ио́сифе, Дави́ду чудеса́, Богоотцу́: / Де́ву ви́дел еси́ ро́ждшую, / с па́стыри славосло́вил еси́, / с волхвы́ поклони́лся еси́, / А́нгелом весть прие́м. / Моли́ Христа́ Бо́га спасти́ ду́ши на́ша.

И ныне, тропарь праздника, глас 4:

Рождество́ Твое́, Христе́ Бо́же наш, / возсия́ ми́рови свет ра́зума, / в нем бо звезда́м служа́щии / звездо́ю уча́хуся / Тебе́ кла́нятися, Со́лнцу Пра́вды, / и Тебе́ ве́дети с высоты́ восто́ка. / Го́споди, сла́ва Тебе́.

По кафизмах, седальны воскресны, с Богородичны их. И чтение во Евангелии толковом от Матфея, Неделя по Рождестве Христове; или слово Григория Нисскаго о Святей Троице и о Аврааме, на две части. И поем непорочны, и тропари их. Ипакои гласа. Степенна и прокимен гласа. Евангелие воскресное. Воскресе́ние Христо́во ви́девше: По 50-м псалме стихира воскресна.

Канон воскресен со ирмосом на 4, и Богородице на 2, и праздника на 4.

И канон св. Иосифу Обручнику, глас 1,
егоже акростих: «Христо́ва тя пою́ десна́го предстоя́теля. Ио́сиф».
Песнь 1.

Ирмос: Христо́с ражда́ется:

Христо́в уго́дниче, блаже́нне, / Христа́ вопло́щшагося служи́телю, / отце́м Христо́вым почита́емый; / Ему́же со дерзнове́нием предстоя́, / испроси́ мир и лю́тых избавле́ние / хва́лящим тя.

Глаго́л боже́ственных послу́шателю, / дел пресла́вных служи́телю, / обру́чниче Де́вы Богоотрокови́цы, / пра́веден во всем и и́стинен / яви́лся еси́, Ио́сифе, / и в селе́ниих пра́ведных упоко́ился еси́.

Узре́ти Христа́ сподо́бился еси́, / о́бразом е́же по нам младе́нствующа, / и Того́ отце́м именова́ся. / Велича́йша сла́ва твоя́ я́ко вои́стину! / Вели́ко па́че всех досто́инство! / Сего́ ра́ди хва́лим тя.

Богородичен: Пло́тию Христа́ породи́ла еси́ / в Вифлее́ме, Чи́стая, неискусобра́чная, / пелена́ми Его́ пови́вши; / Того́ прише́ствию изуми́вся, / Ио́сиф со стра́хом велича́ет / и покланя́ется Его́ си́ле.

И настоящий канон на 4, глас 4.
Творение Космы монаха. Песнь 1.

Ирмос: Воспою́ Тебе́, Го́споди Бо́же мой, / я́ко изве́л еси́ лю́ди из рабо́ты еги́петския, / покры́л же еси́ колесни́цы фарао́новы и си́лу.

Ели́цы рожде́ственная сотворя́ем Вопло́щшагося нас ра́ди, / ра́достию воспои́м Иа́кова Богобра́та и Дави́да Богоотца́.

Сла́ва в Вы́шних, ли́цы а́нгельстии в Вифлее́ме Ио́сифу предста́ша, глаго́люще, / с ни́миже Благоизво́лившаго воплоти́тися воспои́м.

Дави́де Богоо́тче, с гу́сльми, / от ко́рене Иессе́ова вопло́щшася Го́спода, / Иа́кова пра́веднаго привле́к, воспо́й.

Богородичен: Воспою́ Тебе́, Го́споди Бо́же мой, / я́ко роди́лся еси́ из Ма́тере Де́вы Святы́я / и Сию́ показа́л еси́ наде́жду душ на́ших.

Катавасия: Христо́с ражда́ется – сла́вите! / Христо́с с Небе́с – сря́щите! / Христо́с на земли́ – возноси́теся! / По́йте Го́сподеви, вся земля́, / и весе́лием воспо́йте, лю́дие, / я́ко просла́вися.

Песнь 3.

Ирмос: Пре́жде век от Отца́:

Пре́жде век от Отца́ неизрече́нно Возсия́вшаго / и от Де́вы в после́дняя вопло́щшагося несказа́нно / оте́ц наре́клся еси́, пресла́вне, / и стра́шнаго та́инства зри́тель / был еси́, блаже́нне.

Его́же вы́шния чи́ны, / я́ко Бо́га неопи́саннаго трепе́щут, / Сего́, от Де́вы рожде́нна, Ио́сифе, / рука́ма свои́ма держи́ши, му́дре, / освяща́яся стра́шным осяза́нием; / сего́ ра́ди тя почита́ем.

Высота́ та́инства, / родо́м не позна́нна дре́вним, / ти вве́рися, се́рдце чи́сто показа́вшу, / и́мже вси́ спасе́ни есмы́, / светоно́сную и боже́ственную па́мять твою́ / ве́рно пра́зднующе.

Богородичен: Плоть прие́мша от чи́стых крове́й Твои́х, Де́во чи́стая, / и в верте́пе рожде́нна, и в я́слех возле́гша / узре́в Ио́сиф пра́ведный, / Бо́га, ви́дима подо́бно нам, / велича́ше пе́сньми.

 

Ин. Ирмос: Утвержде́ние на Тя наде́ющихся, Христе́ Бо́же, / в ве́ре Правосла́вней Твое́й утверди́ нас, / я́ко Человеколю́бец.

Ро́ждшагося пло́тию от Де́вы без се́мене Христа́ Бо́га со А́нгелы вси воспое́м, / сла́ва в Вы́шних Бо́гу, взыва́юще.

Всепра́зднственный нас ра́ди Истощи́вшагося, ве́рнии, пра́здник / с Дави́дом же и Иа́ковом пе́сньми по достоя́нию почти́м.

Я́ко жениху́ от черто́га, из ма́терних ложе́сн / Дави́д рече́ Го́споду изы́ти, / его́же ны́не со Иа́ковом воспое́м.

Богородичен: Безневе́стную и Богоро́дицу Мари́ю почти́м: / Тоя́ бо ра́ди нам возсия́ Пра́вды Со́лнце.

Катавасия: Пре́жде век от Отца́ рожде́нному нетле́нно Сы́ну / и в после́дняя от Де́вы / воплоще́нному безсе́менно, / Христу́ Бо́гу возопии́м: / вознесы́й рог наш, / свят еси́, Го́споди.

Кондак праздника, глас 3:

Де́ва днесь Пресу́щественнаго ражда́ет, / и земля́ верте́п Непристу́пному прино́сит. / А́нгели с па́стырьми славосло́вят, / волсви́ же со звездо́ю путеше́ствуют: / нас бо ра́ди роди́ся / Oтроча́ Мла́до, Преве́чный Бог.

Икос: Еде́м Вифлее́м отве́рзе, / прииди́те, ви́дим, пи́щу в та́йне обрето́хом; / прииди́те, прии́мем су́щая ра́йская внутрь верте́па: / та́мо яви́ся ко́рень ненапое́н, / прозяба́я отпуще́ние; / та́мо обре́теся кла́дезь неиско́пан, / из Него́же Дави́д пи́ти дре́вле возжада́ся; / та́мо Де́ва ро́ждши Младе́нца, / жа́жду уста́ви а́бие Ада́мову и Дави́дову. / Сего́ ра́ди к Нему́ и́дем, / где роди́ся Отроча́ Мла́до, Преве́чный Бог.

Седален, глас 3.
Подобен: Де́ва днесь:

Ио́сифа пра́веднаго, Де́вы обру́чника, / с Дави́дом Иа́кова достодо́лжно воспое́м: / си́и бо, пра́ведною ходи́вше стезе́ю, достиго́ша Небе́сныя оби́тели, / досто́йно лику́юще со А́нгелы, / нам про́сят согреше́ний оставле́ние.

Слава, глас и подобен тойже:

Де́ва роди́ Творца́ вся́ческих, / и волсви́ гряду́т Сему́ пло́тию поклони́тися; / челове́цы со А́нгелы славосло́вят; / верте́п яке и я́сли дароно́сят, / воспева́юще ро́ждшагося Отроча́ Мла́до, Преве́чнаго Бо́га.

И ныне, глас 1.
Подобен: Лик А́нгельский:

Лик проро́ческий пра́зднует Боже́ственне чу́до, в Тебе́ бы́вшее, о Де́во! / Бо́га бо, вопло́щшася на земли́, породила́ еси́. / Те́мже А́нгели с па́стырьми пою́т, / волсви́ же ве́рою со Ио́сифом вопию́т Дави́ду чудеса́, Богоотцу́.

Песнь 4.

Ирмос: Жезл из ко́рене Иессе́ева:

Иму́щи помышле́ние / послу́шно боже́ственным повеле́нием, / и чист весь быв, / Еди́ней в жена́х Чи́стей и Непоро́чней / обруче́н был еси, Иосифе блаженне, / храня́щи Де́ву чи́стую / к прия́тию Сотво́ршаго.

Еди́ному Гаврии́лу на небеси́ / и тебе́ еди́ному, приснопа́мятне, / с еди́ней Неискусобра́чней / еди́ное по премно́гу стра́шное та́инство, / Ио́сифе блаже́нне вве́рися, / еди́наго тлетво́рнаго – кня́зя тьмы́ гоня́щее.

Одушевле́н храм светови́ден быв Сотво́ршаго / тща́нием веще́й боже́ственных, / от свята́го хра́ма Храм святы́й / сподо́бился еси́ прия́ти, Ио́сифе блаже́нне, / – еди́ную в жена́х Присноде́ву.

Богородичен: Разреша́я я́ве / все ума́ твоего́ смуще́ние, / предста́ неви́димый, глаго́люще ти: / «Не убо́йся, Ио́сифе, Мариа́м пречи́стую / ны́не прия́ти, во чре́ве бо но́сит / боже́ственною Свое́ю си́лою Нося́щаго вся!»

 

Ин. Ирмос: Твоего́ на земли́ явле́ния, Христе́ Бо́же, / пропове́дая проро́к прише́ствие, / с весе́лием вопия́ше: / сла́ва си́ле Твое́й, Го́споди.

С волхвы́ Ро́ждшемуся поклони́мся / и со А́нгелы и Ио́сифом лику́им, боголе́пно взыва́юще: / сла́ва в Вы́шних Христу́ Бо́гу.

Ца́рствуяй все́ми царьми́ Христо́с, / по пло́ти от се́мене Дави́дова рожде́йся, / избра́ннаго Иа́кова прия́т, бра́та, я́коже изво́ли.

От Де́вы Госпо́дь яви́выйся во пло́ти, спросла́ви па́мять ва́шу, сняти́и, / апо́столов лу́чший, Иа́кове, и Дави́де всеблаже́нне.

Богородичен: Херуви́мских чино́в преиму́щи / и Бо́га, на руку́ носи́ма, с пло́тию поне́сши, / ра́дуйся, Богоро́дице Безневе́стная.

Катавасия: Жезл из ко́рене Иессе́ева / и цвет от него́, Христе́, / от Де́вы прозя́бл еси́, / из горы́, Хва́льный, приосене́нныя ча́щи, / прише́л еси́, вопло́щся от Неискусому́жныя, / Невеще́ственный и Бо́же: / сла́ва си́ле Твое́й, Го́споди.

Песнь 5.

Ирмос: Бог сый ми́ра:

Крото́стию сия́ющи, му́дре Ио́сифе, / в зе́млю кро́тких всели́лся еси́, / Христа, кро́ткаго словесы́, оте́ц именова́ся. / Его́же во объя́тиих твои́х держа́, освяти́лся еси́ / и просла́вися, узре́в / пло́тию челове́ческою Обло́лкшася.

Я́ко боже́ственый Облак, / Со́лнце в не́дрех Своих сокры́вый, / преве́л еси́ еди́ну Чи́стую / из гра́да Дави́дова во Еги́пет, / разсе́яти в нем тьму / идолонеи́стовства, Ио́сифе, / та́йны, вы́сшия постиже́ния служи́телю.

Пра́веден быв, ше́ствовал еси́ / пра́выми путя́ми Влады́ки пра́веднаго, / пра́ведно суди́вшему ти, всеблаже́нне, / ве́рно послужи́ти толи́ко страшному та́инству / неизрече́нного рождества́, / и́мже, челове́цы, оправди́хомся.

Богородичен: Обрела́ся еси́, я́ко рече́ Иса́иа проро́к, / Де́ва, во чре́ве вмести́вшая / неопи́саннаго естество́м Бога – Емману́ила, / е́же не ве́дый Иосифбоже́ственный, / науче́н бысть от А́нгела / но́щию спя́щи, приснопа́мятный.

 

Ин. Ирмос: Возсия́вый Свет, / и просвети́вый у́тро, / и показа́вый день, / сла́ва Тебе́, сла́ва Тебе́, / Иису́се, Сы́не Бо́жий.

От Де́вы Чи́стыя благоволи́вый роди́тися, Бо́же воплоти́выйся, / сла́ва Тебе́, сла́ва Тебе́, Ио́сиф вопия́ше.

От Де́вы рожде́йся и па́мять уясни́вый Дави́да и Иа́кова, / сла́ва Тебе́, сла́ва Тебе́, Иису́се, Сы́не Бо́жий.

Его́же проро́к Дави́д Дождь на Руно́ нарица́ше Богодохнове́нно, / Иа́ков пропове́да Иису́са, Сы́на Бо́жия.

Богородичен: А́нгела глас немо́лчно тварь прино́сит Тебе́, Де́во: / ра́дуйся, Ма́ти Чи́стая Иису́са, Сы́на Бо́жия.

Катавасия: Бог сый ми́ра, Оте́ц щедро́т, / Вели́каго Сове́та Твоего́ А́нгела, / мир подава́юща, посла́л еси́ нам: / тем, Богоразу́мия к све́ту наста́вльшеся, / от но́щи у́тренююще, / славосло́вим Тя, Человеколю́бче.

Песнь 6.

Ирмос: Из утро́бы Ио́ну младе́нца:

Стра́нным рождество́м / от Де́вы-Богоотрокови́цы, / к нам, стра́нным, прише́дшаго Бо́га, / – присносу́щное Сло́во О́тчее, / прие́мши, Ио́сифе всеблаже́нне, / во Еги́пет путеше́ствие стра́нное / с Ним, ра́дуяся, соверши́л еси́, / повину́яся боже́ственным повеле́нием.

Богу, пло́тию младе́нствующу, / я́ко А́нгел служа́й был еси́, Ио́сифе му́дре, / и несре́дственно зрел еси́ к Нему́ я́ве, / лучи́ невеще́ственныя прие́млющи, блаже́нне, / и светообра́зен и душе́ю и се́рдцем показу́ем.

Весь освяще́н боже́ственным осяза́нием / душе́ю и те́лом, всехвальне, / преше́л еси к невеще́ственным оби́телем, / освяща́яй ны́не соверша́ющих твою́ па́мять, / вои́стину пра́ведный Ио́сифе всесвяты́й, / обру́чниче всесвяты́я Богома́тере.

Богородичен: Младо́е Отроча́ на земли́ узре́л еси́, / от Де́вы чи́стыя ражда́ема Соверше́ннаго, / и пре́жде всех век ро́ждшася от Отца́, / и А́нгелов, Его́ воспева́вших, услы́шал еси́, / внутрь верте́па в я́слех лежа́щаго, / Ио́сифе всехва́льне.

 

Ин. Ирмос: Возопи́, прообразу́я погребе́ние тридне́вное, / проро́к Ио́на, в ки́те моля́ся: / от тли изба́ви мя, Иису́се, Царю́ сил.

Предстоя́ху, ужаса́ющеся, чи́ни Небе́снии верте́пу / и Рождество́ пречи́стое воспе́ша немо́лчно: / сла́ва в Вы́шних Бо́гу ро́ждшуся.

Сел еси́ на Престо́ле, я́коже кля́лся еси́, Влады́ко, проро́ку Дави́ду, / от Плода́ чре́ва Его́ проше́д, / Иа́кову же Це́ркве пре́дал еси́ престо́л, Христе́.

Царь у́бо Дави́д, и проро́к чу́ден, / и пра́отец показа́ся Боже́ственнаго воплоще́ния, / первоепи́скоп же учени́к Иа́ков Иису́сов.

Богородичен: Мо́лимся, о рабе́х Твои́х, Де́во Богоро́дице, / из Тебе́ Воплоще́ннаго моли́, / я́ко Тя и Еди́ну Предста́тельницу на́шу ве́мы.

Катавасия: Из утро́бы Ио́ну младе́нца изблева́ морски́й зверь, / якова́ прия́т, / в Де́ву же все́льшееся Сло́во / и плоть прие́мшее про́йде сохра́ншее нетле́нну. / Его́же бо не пострада́ истле́ния, / Ро́ждшую сохрани́ неврежде́нну.

Кондак, глас 3.
Подобен: Де́ва днесь:

Весе́лия днесь Дави́д исполня́ется Боже́ственный, / Ио́сиф же хвале́ние со Иа́ковом прино́сит: / вене́ц бо сро́дством Христо́вым прие́мше, ра́дуются, / и неизрече́нно на земли́ Ро́ждшагося воспева́ют, и вопию́т: / Ще́дре, спаса́й Тебе́ чту́щия.

Икос: Неизрече́нным сове́том ражда́ется пло́тию, / Безпло́тный опису́ется ны́не те́лом, неопи́санный, / и спаса́ет непрело́жно о́ба существа́; / нача́ло прие́млет, И́же естество́м Безнача́льный и Еди́н Безле́тен; / зри́тся Младе́нец, Сый всесоверше́нный; / но́сится рука́ми, нося́й вся́ческая. / Те́мже Того́ сро́дством почте́нныя / я́ко Бог венча́ет Свои́м Рождество́м, / я́же прославля́юще ве́рою, немо́лчно вопие́м: / Ще́дре, спаса́й Тебе́ чту́щия.

Песнь 7.

Ирмос: О́троцы, благоче́стию совоспита́ни:

Прорече́ний коне́ц боже́ственных проро́к узре́л еси́: / Его́же бо ти́и пропове́даша / – Христа́, гряду́ща от Отрокови́цы чи́стыя, осяза́л еси́, / и Младе́нца Того́ уразуме́л еси́, / я́ко чи́стый душе́ю, Христо́в уго́дниче.

Непоро́чным жи́тельством украси́вся, Ио́сифе сла́вне, / страж де́вства Непоро́чныя был еси́ вои́стину, / и оте́ц ражда́ема Отроча́те нарече́ся, / возвели́чен быв честны́м именова́нием.

И́же глаго́лом Устро́ивый не́бо, и зе́млю, и мо́ре / Сын текто́на нарече́ся – тя, всеблаже́нне, чу́дне, / Отцу́ безнача́льну тя вои́стину просла́вльшу, / я́ко слугу́ свяще́нна / превы́сших сло́ва.

Свя́то житие́ твое́ сконча́в, / Ио́сифе предо́бльственне, / ны́не во све́тлостех святы́х всели́лся еси́, / освяща́яй ве́рно соверша́ющия всегда́ / твою́ всесвяту́ю и боже́ственную па́мять.

Богородичен: О́бразы свяще́нными прообразу́ему / Тя ве́дый, Богоблагода́тная, Чи́стая, / Ио́сиф пра́ведный, же́злом унасле́дова / честно́е Твое́ обруче́ние, / помина́яй процве́тший иногда́ / святы́й Ааро́нов жезл.

 

Ин. Ирмос: Авраа́мстии иногда́ в Вавило́не о́троцы / пе́щный пла́мень попра́ша, / пе́сньми взыва́юще: / оте́ц на́ших Бо́же, благослове́н еси́.

Па́че сло́ва Рождеству́ Богоро́дицы Мари́и ли́цы А́нгельстии дивя́щеся, Ио́сифу вопия́ху: / в Вы́шних сла́ва, и на земли́ мир.

Невестово́дец у́бо Дави́д, / черто́жник же Боже́ственныя Це́ркве Иа́ков бы́вше, глаго́лаху: / воплоще́йся нас ра́ди, Бо́же, благослове́н еси́.

И́же во проро́цех царь и во царе́х проро́к, / со Иа́ковом Богому́дрым и нам воспо́й: / воплоще́йся нас ра́ди, Христе́, благослове́н еси́.

Богородичен: В неопа́льней купине́ и росода́тельней пе́щи Ты прописа́вшися, Ма́ти Пречи́стая, / без се́мене родила́ еси́ воплоще́ннаго Бо́га, Присноблагослове́нная.

Катавасия: О́троцы, благоче́стию совоспита́ни, / злочести́ваго веле́ния небре́гше, / о́гненнаго преще́ния не убоя́шася, / но, посреде́ пла́мени стоя́ще, поя́ху: / отце́в Бо́же, благослове́н еси́.

Песнь 8.

Ирмос: Чу́да преесте́ственнаго:

Честна́ я́ко вои́стину сме́рть твоя́ / яви́ся пред Го́сподем, Ио́сифе всеблаже́нне, / ты бо весь освяти́ся от Младе́нца, / страж свяще́нный был еси́ Благослове́нней, / с Не́йже пое́ши: / «Да благослови́т тварь вся Го́спода / и превозно́сит во вся ве́ки!»

Его́же тре́пещут вси ли́цы А́нгельстии – Бо́га и Соде́теля, / Ио́сиф пра́ведный со дерзнове́нием всеблагоче́стно / объе́млет я́ко Младе́нца, и лобза́ет, / и свет у́мный прие́млет, зовы́й: / «Да благослови́т тварь вся Го́спода / и превозно́сит во вся ве́ки!»

Уя́звлен сладча́йшим жела́нием, блаже́нне, / и я́ко А́нгел Вопло́щшемуся предстоя́, / повеле́нием боже́ственным повину́ешися, от А́нгела извеща́ем / из Еги́пта в зе́млю Изра́илеву возврати́тися / с Са́мым Младе́нцем и Ма́терию Его́; / с Ни́миже и возврати́лся еси́, сла́вяще Го́спода.

Богородичен: Зако́на се́ни узре́л еси / разсе́явшияся благода́ти све́тлостию, / о́блак же све́тлый – Де́ву ви́дел еси́, / возсиява́ющ пло́тию Со́лнце у́мное, / и я́коже звезда́ вся просвети́л еси́, му́дре Ио́сифе, / взыва́ющия вы́ну: / «Тя превозно́сим, Христе́, во ве́ки!»

 

Ин. Ирмос: Царя́ Христа́, / Его́же испове́даша плене́ннии о́троцы, / в пещи́ глаго́люще ве́лиим гла́сом: / вся дела́, по́йте Го́спода.

Вопло́щшагося Христа́, Его́же славосло́виша Небе́сныя си́лы / и Ио́сиф обру́чник непреста́нно воспева́ет: / вся дела́, Го́спода по́йте и превозноси́те Его́ во ве́ки.

Вопло́щшагося Христа́, Его́же прорече́ Дави́д Богооте́ц / и лю́дем пропове́да Иа́ков, вопия́: / вся дела́, Го́спода по́йте и превозноси́те Его́ во ве́ки.

От Де́вы ро́ждшагося Христа́ / и возвели́чившаго Дави́дову и Иа́ковлю свяще́нную па́мять, я́ко друго́в Его́, / вся дела́, Го́спода по́йте и превозноси́те Его́ во ве́ки.

Богородичен: Царя́ Христа́, Его́же нам роди́ Богоро́дица Мари́я, / и по Рождестве́ пребы́сть Де́ва Чи́стая, / вся дела́, Го́спода по́йте и превозноси́те Его́ во ве́ки.

Катавасия: Чу́да преесте́ственнаго / росода́тельная изобрази́ пещь о́браз: / не бо, я́же прия́т, пали́т ю́ныя, / я́ко ниже́ огнь Божества́ Де́вы, / в Ню́же вни́де утро́бу. / Тем воспева́юще, воспое́м: / да благослови́т тварь вся Го́спода / и превозно́сит во вся ве́ки.

На 9-й песни поем: Честне́йшую:

Песнь 9.

Ирмос: Та́инство стра́нное ви́жу:

Равноче́стен А́нгелом был еси́, / проро́ком и му́чеником, блаже́нне, / и му́дрым Апо́столом вои́стину собесе́дниче; / сего́ ра́ди с ни́ми тя блажа́ще, му́дре Ио́сифе, / свяще́нную твою́ па́мять почита́ем.

Я́ко от ро́да ца́рскаго происше́дый, / Цари́це чи́стей, иму́щей Иису́са Царя́ роди́ти неизрече́нно, / обруче́н был еси́, прему́дре, / предизбра́нный на земли́ / па́че всех земноро́дных, блаже́нне.

Укрепля́ем си́лою Ду́ха, / доброде́тельми украси́лся еси́, блаже́нне, / и в ста́рости глубо́це ко отце́м свои́м / преста́вися све́тло, Ио́сифе, / почита́ем я́ко велича́йший оте́ц / И́же от Бо́га Отца́ Возсия́вшаго.

Па́мять твоя́ созыва́ет концы́ / к ра́дости и хвале́нию, / Сло́ву просла́вльшу, тя, блаже́нне. / Ему́же со дерзнове́нием при́сно предстоя́, / непреста́нно моли́ изба́витися от искуше́ний / нам, хва́лящим тя.

Богородичен: Сохра́ншую де́вство непоро́чное, / Чи́стую, соблю́л еси́, / от Нея́же Бог Сло́во воплоти́ся, / соблю́д Ю́ Де́ву по рождестве́ неизрече́нно. / С Не́юже, Ио́сифе богоно́се, / нас помина́й.

 

Ин. Ирмос: Моисе́й на горе́ неопали́мую купину́ ви́де, / Ио́сиф в верте́пе неизрече́нное Рождество́ слы́ша, / Нескве́рная Де́во, / Безму́жная Ма́ти, / пе́сньми Тя, Богоро́дице, велича́ем.

Ро́ждшемуся от Де́вы вся тварь тре́петом послужи́: / Небеса́ у́бо – звездо́ю, земля́ же – я́сльми, / гора́ – верте́пом, волсви́ – дарми́, / па́стырие – чудесе́м, А́нгели же – сла́ва в Вы́шних Бо́гу.

Царь от па́стырей дре́вле у́бо Дави́д бысть, / от коле́на же Иу́дова и ца́рскаго ты, Иа́кове, па́стырь па́ствы показа́лся еси́ / Вопло́щшагося, А́гнца Вы́шняго и Сы́на Бо́жия.

Вифлее́ме, ны́не весели́ся, град быв Но́ваго Дави́да, / и Сио́не, возвеща́й Церкве́й старе́йшинство, о́бщее весе́лие, всех Царя́, / и Того́ уго́дники ны́не восприе́мши.

Богородичен: А́нгельстии собо́ри Тя, Богороди́тельнице, сла́вят, / и челове́ческий род Тя непреста́нно пе́сньми почита́ет, / Ты бо Боже́ственным Рождество́м земны́я с Небе́сными совокупи́ла еси́. / Те́мже Тя почита́ем.

Катавасия: Та́инство стра́нное ви́жу и пресла́вное: / Не́бо – верте́п, Престо́л Херуви́мский – Де́ву, / я́сли – вмести́лище, / в ни́хже возлеже́ Невмести́мый – Христо́с Бог, / Его́же, воспева́юще, велича́ем.

Светилен воскресен.
Слава, святых. Подобен: Со ученики́:

Со Иа́ковом воспои́м, сла́вным Богобра́том, Дави́да Богоотца́, / Ио́сифа же Боже́ственнаго, Богоро́дицы обру́чника: / Христо́ву Боже́ственному Рождеству́ послужи́ша во гра́де Вифлее́ме боголе́пно, / со А́нгелы, волхвы́ же и па́стырьми Тому́ песнь пою́ще, / я́ко Бо́гу и Влады́це.

И ныне, праздника: Посети́л ны есть свыше Спас наш, Восто́к восто́ков, / и су́щии во тьме и се́ни обрето́хом и́стину, / и́бо от Де́вы роди́ся Госпо́дь.

На хвалитех стихиры воскресны 4
и праздника 4 самогласны,
Андрея Иерусалимскаго, глас 4:

Весели́теся, пра́веднии, / Небеса́, ра́дуйтеся, / взыгра́йте, го́ры, Христу́ ро́ждшуся; / Де́ва седи́т, Херуви́мов подо́бящися, / нося́щи в не́дрех Бо́га Сло́ва воплоще́нна; / па́стырие рожде́нному дивя́тся; / волсви́ Влады́це да́ры прино́сят, / А́нгели, воспева́юще, глаго́лют: / Непостижи́ме Го́споди, сла́ва Тебе́.

Богоро́дице Де́во, ро́ждшая Спа́са, / упраздни́ла eси́ пе́рвую кля́тву Éвину, / я́ко Ма́ти была́ eси́ благоволе́ния Óтча, / нося́щи в не́дрех Бо́жие Сло́во воплоще́нное. / Не терпи́т та́йна испыта́ния. / Ве́рою eди́ною Сию́ вси сла́вим, / зову́ще с Тобо́ю и глаго́люще: / Неизрече́нне Го́споди, сла́ва Тебе́.

Стих: Из чре́ва пре́жде денни́цы роди́х Тя: / кля́тся Госпо́дь и не раска́ется.

Прииди́те, воспои́м Ма́терь Спа́сову, / по Рождестве́ па́ки я́вльшуюся Де́ву: / ра́дуйся, гра́де одушевле́нный Царя́ и Бо́га, / в не́мже Христо́с пожи́в, спасе́ние соде́ла. / С Гаврии́лом воспое́м, / с па́стырьми просла́вим, зову́ще: / Богоро́дице, моли́ из Тебе́ Воплоще́ннаго спасти́ся нам.

Стих: Рече́ Госпо́дь Го́сподеви моему́: / седи́ одесну́ю Мене́.

Отец благоизво́ли, / Сло́во плоть бысть, / и Де́ва роди́ Бо́га вочелове́чшася; / звезда́ возвеща́ет, волсви́ покланя́ются, / па́стырие чудя́тся, и тварь ра́дуется.

Слава, глас 8: Кровь, и огнь, и куре́ние ды́ма, / чудеса́ на земли́, я́же прови́де Ио́иль: / кровь – воплоще́ние, огнь – Божество́, / куре́ние же ды́ма – Дух Святы́й, наше́дый на Де́ву / и мир облагоуха́вший. / Ве́лие та́инство Твоего́ вочелове́чения, / Го́споди, сла́ва Тебе́.

И ныне: Преблагослове́нна еси́, Богоро́дице Де́во:

Славословие великое. Тропарь воскресен и отпуст. Стихира Евангельская, час 1-й, и конечный отпуст. На часех тропарь воскресен. Сла́ва, праздника. И ны́не, Богородичен. И святых тропарь, пременяюще, глаголем. По О́тче наш: кондак праздника и святых, пременяюще, глаголем.

НА ЛИТУРГИИ

Блаженны гласа на 4, и праздника на 4, и святых, песнь 6-я на 4.

По входе тропарь воскресен,
и праздника, глас 4:

Рождество́ Твое́, Христе́ Бо́же наш, / возсия́ ми́рови свет ра́зума, / в нем бо звезда́м служа́щии / звездо́ю уча́хуся / Тебе́ кла́нятися, Со́лнцу Пра́вды, / и Тебе́ ве́дети с высоты́ восто́ка. / Го́споди, сла́ва Тебе́.

И святых, глас 2:

Благовеству́й, Ио́сифе, Дави́ду чудеса́, Богоотцу́: / Де́ву ви́дел еси́ ро́ждшую, / с па́стыри славосло́вил еси́, / с волхвы́ поклони́лся еси́, / А́нгелом весть прие́м. / Моли́ Христа́ Бо́га спасти́ ду́ши на́ша.

Слава, кондак святых, глас 3.
Подобен: Де́ва днесь:

Весе́лия днесь Дави́д исполня́ется Боже́ственный, / Ио́сиф же хвале́ние со Иа́ковом прино́сит: / вене́ц бо сро́дством Христо́вым прие́мше, ра́дуются, / и неизрече́нно на земли́ Ро́ждшагося воспева́ют, и вопию́т: / Ще́дре, спаса́й Тебе́ чту́щия.

И ныне, праздника, глас 3:

Де́ва днесь Пресу́щественнаго ражда́ет, / и земля́ верте́п Непристу́пному прино́сит. / А́нгели с па́стырьми славосло́вят, / волсви́ же со звездо́ю путеше́ствуют: / нас бо ра́ди роди́ся / Oтроча́ Мла́до, Преве́чный Бог.

Прокимен гласа и святых, глас 4:

Ди́вен Бог во святы́х Свои́х, Бог Изра́илев.

Таже Апостол.
К Гала́том посла́ния свята́го апо́стола Па́вла чте́ние.

Бра́тие, сказу́ю вам, благовествова́ние благовеще́нное от мене́, я́ко несть по челове́ку. Ни бо аз от челове́ка прия́х е́, ниже́ научи́хся, но явле́нием Иису́с Христо́вым. Слы́шасте бо мое́ житие́ иногда́ в жидо́встве, я́ко попремно́гу гони́х Це́рковь Бо́жию и разруша́х ю́, и преспева́х в жидо́встве па́че мно́гих све́рстник мои́х в ро́де мое́м, и́злиха ревни́тель сый оте́ческих мои́х преда́ний. Егда́ же благоволи́ Бог, Избра́вый мя от чре́ва ма́тере моея́ и призва́вый благода́тию Свое́ю, яви́ти Сы́на Своего́ во мне, да благовеству́ю Его́ во язы́цех, а́бие не приложи́хся пло́ти и кро́ви, ни взыдо́х во Иерусали́м к пре́дним мене́ апо́столом, но идо́х во Арави́ю, и па́ки возврати́хся в Дама́ск. Пото́м же по трие́х ле́тех взыдо́х во Иерусали́м согля́дати Петра́, и пребы́х у него́ дний пятьна́десять. Ино́го же от апо́стол не ви́дех, то́кмо Иа́кова бра́та Госпо́дня.

Зачало 200. Гал 1:11–19

Аллилуия гласа и святых, глас 4:

Помяни́, Го́споди, Дави́да, и всю кро́тость его́.

Иерей: От Матфе́я свята́го Ева́нгелия чте́ние.

Отше́дшим волхво́м, се А́нгел Госпо́день во сне яви́ся Ио́сифу, глаго́ля: воста́в, поими́ Отроча́ и Ма́терь Его́, и бежи́ во Еги́пет, и бу́ди та́мо, до́ндеже реку́ ти: хо́щет бо И́род иска́ти Отроча́те, да погуби́т Е. Он же, воста́в, поя́т Отроча́ и Ма́терь Его́ но́щию и оты́де во Еги́пет. И бе та́мо до уме́ртвия И́родова, да сбу́дется рече́нное от Го́спода проро́ком, глаго́лющим: от Еги́пта воззва́х Сы́на Моего́. Тогда́ И́род, ви́дев, я́ко пору́ган бысть от волхво́в, разгне́вася зело́ и, посла́в, изби́ вся де́ти, су́щия в Вифлее́ме и во всех преде́лех его́, от двою́ ле́ту и нижа́йше по вре́мени, е́же изве́стно испыта́ от волхво́в. Тогда́ сбы́стся рече́нное Иереми́ем проро́ком, глаго́лющим: глас в Ра́ме слы́шан бысть, плачь, и рыда́ние, и вопль мног. Рахи́ль пла́чущися чад свои́х и не хотя́ше уте́шитися, я́ко не суть. Уме́ршу же И́роду, се А́нгел Госпо́день во сне яви́ся Ио́сифу во Еги́пте, глаго́ля: воста́в, поими́ Отроча́ и Ма́терь Его́ и иди́ в зе́млю Изра́илеву: изомро́ша бо и́щущии души́ Отроча́те. Он же, воста́в, поя́т Отроча́ и Ма́терь Его́ и прии́де в зе́млю Изра́илеву. Слы́шав же, я́ко Архела́й ца́рствует во Иуде́и вме́сто И́рода, отца́ своего́, убоя́ся та́мо ити́. Весть же прие́мь во сне, оты́де в преде́лы Галиле́йския. И, прише́д, всели́ся во гра́де, нарица́емем Назаре́т. Я́ко да сбу́дется рече́нное проро́ки, я́ко Назоре́й нарече́тся.

Зачало 4. Мф 2:13–23

Вместо Достойно:

Велича́й, душе́ моя́, / Честне́йшую и Сла́внейшую Го́рних во́инств, Де́ву Пречи́стую, Богоро́дицу.

И ирмос, глас 1: Люби́ти у́бо нам, я́ко безбе́дное стра́хом / удо́бее молча́ние, / любо́вию же, Де́во, / пе́сни тка́ти, спротяже́нно сложе́нныя, неудо́бно есть; / но и, Ма́ти, си́лу, ели́ко есть произволе́ние, даждь.

Причастен:

Хвали́те Го́спода с Небе́с, / хвали́те Его́ в Вы́шних. Другий: Ра́дуйтеся, пра́веднии, о Го́споде, / пра́вым подоба́ет похвала́. / Аллилу́иа, трижды.

 

В оглавление.

 

Месяца января в 1-й день

ЕЖЕ ПО ПЛОТИ ОБРЕЗАНИЕ
ГОСПОДА НАШЕГО ИИСУСА ХРИСТА
И ПАМЯТЬ ИЖЕ ВО СВЯТЫХ
ОТЦА НАШЕГО ВАСИЛИЯ ВЕЛИКАГО,
АРХИЕПИСКОПА КЕСАРИИ
КАППАДОКИЙСКИЯ

Аще храм святаго Василия, творим бдение.

НА МАЛЕЙ ВЕЧЕРНИ

На Го́споди, воззва́х:
стихиры на 4, глас 3, самогласны:

Христа́ всели́в в ду́шу твою́ чи́стым твои́м житие́м, / Исто́чника жи́зни, священноявле́нне Васи́лие, / ре́ки источи́л еси́ уче́ний благочести́вых вселе́нней, / от ни́хже напая́еми, ве́рнии церко́внии лю́дие / плоды́ усте́н, испове́дающих благода́ть, прино́сят / Просла́вльшему па́мять твою́ во век ве́ка. (2)

Ми́ро, излия́нное на тебе́ благода́ти, / пома́за тя священноде́йствовати Ева́нгелие Ца́рствия Небе́снаго, / Васи́лие Богоявле́нне, / Христо́во благоуха́ние быв, / воне́ю зна́ния Его́ вселе́нную испо́лнил еси́. / Те́мже, гла́сы раб твои́х благоприя́тне прие́мляй, / испроси́ нам, чту́щим тя, ве́лия ми́лости.

Византиево: Святи́тельскою оде́ждею оде́ян, / Тро́ицы побо́рниче Васи́лие, / престо́лу предста́л еси́ суди́щному, / беду́ прие́мляй о ве́ре, / и, страда́льческое противостоя́ние показа́в, / я́рость епа́рхову посрами́л еси́, / яря́щася держа́вою нече́стия / и неми́лостивным разсече́нием претя́ща, / усе́рдно, о́тче, проразсуди́в / и му́ченик быв произволе́нием, / вене́ц прия́л еси́ побе́ды от Христа́, / иму́щаго ве́лию ми́лость.

Слава, глас 2: Су́щих извы́к естество́ / и всех усмотри́в нестоя́тельное, / Еди́наго обре́л еси́ непоколе́блема, / Пресу́щнаго су́ща Соде́теля всех, / Ему́же и па́че приложи́вся, / не су́щих жела́ние отве́ргл еси́, / моли́ и нам Боже́ственнаго жела́ния получи́ти, / священноявле́нне Васи́лие.

И ныне, праздника.

На стиховне стихиры, глас 2.
Подобен: До́ме Евфра́фов:

Храм всесве́тел / трисо́лнечныя зари́ сый, / озаря́еши ду́ши / пита́ющихся / словесы́ твои́ми, Васи́лие.

Стих: Уста́ моя́ возглаго́лют прему́дрость, / и поуче́ние се́рдца моего́ ра́зум.

Труба́ с Небесе́ / шум гла́са твоего́ есть / и огнь, и́мже попаля́ются / ерети́ческая вся, / Васи́лие, уче́ния.

Стих: Уста́ пра́веднаго поуча́тся прему́дрости, / и язы́к его́ возглаго́лет суд.

Свет Еди́н Трисия́нный, / разделя́яй Ли́цы, / единя́яй же существо́м, / А́рия низложи́л еси́ / и Саве́ллия, Васи́лие.

Слава, и ныне: Плотско́е обре́зание / Боговочелове́чнаго Сло́ва / и па́мять Васи́лия / почита́юще Вели́каго, / Богоро́дицу почита́ем.

По О́тче наш: тропарь святаго, глас 1:

Во всю зе́млю изы́де веща́ние твое́, / я́ко прие́мшую сло́во твое́, / и́мже боголе́пно научи́л еси́, / естество́ су́щих уясни́л еси́, / челове́ческия обы́чаи украси́л еси́, / ца́рское свяще́ние, о́тче преподо́бне, / моли́ Христа́ Бо́га / спасти́ся душа́м на́шим.

Слава, и ныне, праздника, глас тойже:

На Престо́ле огнезра́чнем / в Вы́шних седя́й со Отце́м Безнача́льным и Боже́ственным Твои́м Ду́хом, / благоволи́л еси́ роди́тися на земли́ / от Отрокови́цы Неискусому́жныя, Твоея́ Ма́тере, Иису́се, / сего́ ра́ди и обре́зан был еси́, я́ко Челове́к осмодне́вный. / Сла́ва всеблаго́му Твоему́ сове́ту, / сла́ва смотре́нию Твоему́, / сла́ва снизхожде́нию Твоему́, Еди́не Человеколю́бче.

Екте