На стиховне стихиры святаго, самогласны, глас 1.

Византиево: О, Боже́ственная и свяще́нная Христо́вы Це́ркве пчело́, / Васи́лие всеблаже́нне! / Ты бо Боже́ственнаго жела́ния жа́лом тебе́ вооружи́в, / богоме́рзких ересе́й хулы́ уязви́л еси́ / и душа́м ве́рных благоче́стия сла́дость сокро́виществовал еси́. / И ны́не Боже́ственнаго рая́ нетле́нныя проходя́ па́жити, / помина́й и нас, предстоя́ Тро́ице Единосу́щней.

Стих: Уста́ моя́ возглаго́лют прему́дрость, / и поуче́ние се́рдца моего́ ра́зум.

Василия монаха: Всех святы́х собра́л еси́ доброде́тели, / о́тче наш Васи́лие: / Моисе́еву кро́тость и Илиину́ ре́вность, / Петро́во испове́дание, Иоа́нново Богосло́вие. / Я́ко Па́вел, вопия́, не преста́л еси́: / кто изнемога́ет, и аз не изнемога́ю? / Кто соблажня́ется, и аз не разжиза́юся? / Те́мже, с ни́ми водворя́яся, / моли́ спасти́ся душа́м на́шим.

Стих, глас 2: Уста́ пра́веднаго поуча́тся прему́дрости, / и язы́к его́ возглаго́лет суд.

Иоанна монаха: Су́щих извы́к естество́ / и всех усмотри́в настоя́тельное, / Еди́наго обре́л непоколе́блема, / Пресу́щнаго су́ща Соде́теля всех, / Ему́же и па́че приложи́вся, / не су́щих жела́ние отве́ргл еси́, / моли́ и нам Боже́ственнаго жела́ния получи́ти, / священноявле́нне Васи́лие.

Слава, глас 6: Благода́ть чуде́с с Небесе́ прие́м / и лесть и́дольскую обличи́в уче́ньми, / святи́телей еси́ сла́ва и утвержде́ние, / всеблаже́нне Васи́лие, / и всех преподо́бных уче́ния о́браз. / Дерзнове́ние име́я к Бо́гу, / Того́ моли́ спасти́ся душа́м на́шим.

И ныне, глас 8: Не устыде́ся Всеблаги́й Бог / плотски́м обре́занием обре́затися, / но даде́ Самаго́ Себе́ о́браз и начерта́ние всем ко спасе́нию, / и́бо зако́на Творе́ц зако́нная исполня́ет / и проро́ков прорече́ния, я́же о Нем. / И́же вся содержа́й го́рстию и пелена́ми пови́выйся, / Го́споди, сла́ва Тебе́.

Тропарь святаго, глас 1:

Во всю зе́млю изы́де веща́ние твое́, / я́ко прие́мшую сло́во твое́, / и́мже боголе́пно научи́л еси́, / естество́ су́щих уясни́л еси́, / челове́ческия обы́чаи украси́л еси́, / ца́рское свяще́ние, о́тче преподо́бне, / моли́ Христа́ Бо́га / спасти́ся душа́м на́шим.

Слава, и ныне, праздника, глас тойже:

На Престо́ле огнезра́чнем / в Вы́шних седя́й со Отце́м Безнача́льным и Боже́ственным Твои́м Ду́хом, / благоволи́л еси́ роди́тися на земли́ / от Отрокови́цы Неискусому́жныя, Твоея́ Ма́тере, Иису́се, / сего́ ра́ди и обре́зан был еси́, я́ко Челове́к осмодне́вный. / Сла́ва всеблаго́му Твоему́ сове́ту, / сла́ва смотре́нию Твоему́, / сла́ва снизхожде́нию Твоему́, Еди́не Человеколю́бче.

И отпуст.

На повечерии кондак святаго. Сла́ва, и ны́не, праздника. Полунощницу же поем, по обычаю, с кафизмою. По 1-м трисвятом тропарь праздника. По 2-м трисвятом кондак праздника же. Молитвы же Помяни́, Го́споди, в наде́жди Воскресе́ния: не глаголем, точию: Го́споди, поми́луй, 12. И отпуст.

НА УТРЕНИ

На Бог Госпо́дь:
тропарь праздника, дважды, глас 1:

На Престо́ле огнезра́чнем / в Вы́шних седя́й со Отце́м Безнача́льным и Боже́ственным Твои́м Ду́хом, / благоволи́л еси́ роди́тися на земли́ / от Отрокови́цы Неискусому́жныя, Твоея́ Ма́тере, Иису́се, / сего́ ра́ди и обре́зан был еси́, я́ко Челове́к осмодне́вный. / Сла́ва всеблаго́му Твоему́ сове́ту, / сла́ва смотре́нию Твоему́, / сла́ва снизхожде́нию Твоему́, Еди́не Человеколю́бче. (2)

Слава святаго, глас тойже:

Во всю зе́млю изы́де веща́ние твое́, / я́ко прие́мшую сло́во твое́, / и́мже боголе́пно научи́л еси́, / естество́ су́щих уясни́л еси́, / челове́ческия обы́чаи украси́л еси́, / ца́рское свяще́ние, о́тче преподо́бне, / моли́ Христа́ Бо́га / спасти́ся душа́м на́шим.

И ныне, праздника.

По 1-й кафизме седален, глас 5.
Подобен: Собезнача́льное:

Я́ко ца́рское украше́ние Це́ркве, Васи́лия вси да восхва́лим, / уче́ний сокро́вище неоску́дное, / си́ми бо той наказа́ нас Тро́ицу почита́ти Святу́ю, / соедине́ну у́бо Существо́м, разделе́ну же Ипоста́сьми.

Слава, глас 1.
Подобен: Гроб Твой:

Васи́лие прему́дре, предстоя́й Тро́ице, / моли́ся получи́ти в День суда́ нам, пою́щим тя и чту́щим па́мять твою́, / благода́ть, ми́лость и очище́ние прегреше́ний, / я́ко да усты́ прославля́ем и се́рдцем Еди́наго Человеколю́бца.

И ныне: Всех Творе́ц и Влады́ка ми́ра, / Сый со Отце́м и Ду́хом горе́, / я́ко Младе́нец обре́зуется на земли́ осмодне́вен. / И́стинно Боже́ственна же и чу́дна дела́ Твоя́: / Ты бо, Влады́ко, нас ра́ди обре́зался еси́, / я́ко Сый зако́на исполне́ние.

И чтем во Евангелии толковом поучение Великаго Василия монахом.

По 2-й кафизме седален, глас 8.
Подобен: Прему́дрости:

Неизрече́нныя прему́дрости Богови́дне поче́рпл еси́ бога́тство та́йное, / всем источи́л еси́ правосла́вия во́ды, / ве́рных у́бо сердца́ Боже́ственне веселя́щия, / неве́рных же веле́ния досто́йне потопля́ющия. / Отню́дуже обою́ду благоче́стия по́ты / показа́лся еси́ непобеди́м Тро́ицы побо́рник, святи́телю Васи́лие. / Моли́ся Христу́ Бо́гу прегреше́ний оставле́ние дарова́ти / пра́зднующим любо́вию святу́ю па́мять твою́.

Слава, глас 3.
Подобен: Боже́ственныя ве́ры:

Всю напои́л еси́ вселе́нную, я́коже вода́ми, / уче́нии твои́ми, благоче́стия собра́нными догма́ты, / жи́зни бо Исто́чник в тебе́ препочива́ше вои́стинну, Васи́лие. / Его́же моли́, я́ко дерзнове́ние стяжа́вый, Богодохнове́нне, / дарова́ти нам ве́лию ми́лость.

И ныне, глас 4: И́же естество́м Неви́димый, ны́не ви́дим есть пло́тию: / Сло́во Несозда́нное, ны́не из Де́вы Чи́стыя ражда́емо, зи́ждется. / Те́мже и по зако́ну нас ра́ди, челове́ков, / я́коже осмодне́вен, обре́зуется Младе́нец. / Тому́ у́бо поклони́мся, я́ко Спа́су на́шему.

Величание Обрезанию:

Велича́ем Тя, / Живода́вче Христе́, / и почита́ем пречи́стыя пло́ти Твоея́ / зако́нное обре́зание.

Величание святителю общее:

Велича́ем тя, / святи́телю о́тче Васи́лие, / и чтим святу́ю па́мять твою́, / ты бо мо́лиши за нас / Христа́, Бо́га на́шего.

Или сие:

Велича́ем тя, / святи́телю Христо́в Васи́лие, / благоче́стно Це́рковь Христо́ву сохра́ншаго.

Псалом избранный.

Лик 1: Услы́шите сия́ вси язы́цы, внуши́те вси́, живу́щии по вселе́нней. 2: Уста́ моя́ возглаго́лют прему́дрость, и поуче́ние се́рдца моего́ ра́зум. 1: Прииди́те, ча́да, послу́шайте мене́, стра́ху Госпо́дню научу́ вас. 2: Благовести́х пра́вду в це́ркви вели́цей. 1: И́стину Твою́ и спасе́ние Твое́ рех. 2: Пове́м И́мя Твое́ бра́тии мое́й, посреде́ це́ркве воспою́ Тя. 1: Услы́шати ми глас хвалы́ Твоея́ и пове́дати вся чудеса́ Твоя́. 2: Го́споди, возлюби́х благоле́пие до́му Твоего́, и ме́сто селе́ния сла́вы Твоея́. 1: Возненави́дех це́рковь лука́внующих, и с нечести́выми не ся́ду. 2: Я́ко сохрани́х пути́ Госпо́дни, и нече́ствовах от Бо́га моего́. 1: Уста́ пра́веднаго поуча́тся прему́дрости, и язы́к его́ возглаго́лет суд. 2: Пра́вда Его́ пребыва́ет в век ве́ка. 1: Свяще́нницы Твои́ облеку́тся пра́вдою, и преподо́бнии Твои́ возра́дуются. 2: Блаже́ни живу́щии в дому́ Твое́м, в ве́ки веко́в восхва́лят Тя.

Сла́ва, и ны́не: Аллилу́иа, трижды.

По полиелеи седален, глас 8.
Подобен: Прему́дрости:

Си́лою слове́с Боже́ственных е́реси низложи́л еси́ мра́чныя, / вся шата́ния Евно́миева погрузи́л еси́, / челове́ком бо Ду́ха Бо́га бы́ти пропове́дал еси́ / и рук возде́нием враги́ умертви́л еси́. / Все прогна́л еси́ Саве́ллиево служе́ние, / вся же мудрова́ния Несто́риева упраздни́л еси́, / святи́телю Васи́лие. / Моли́ся Христу́ Бо́гу / прегреше́ний оставле́ние дарова́ти / пра́зднующим любо́вию святу́ю па́мять твою́.

Слава: Благода́ть слове́с твои́х Боже́ственных и догма́т высота́ та́инственная / Боже́ственнаго нам бысть восхожде́ния ле́ствица: / Ду́ха бо, о́тче, стяжа́вый трубу́, / то́ю пропове́дал еси́ Боже́ственная уче́ния. / Те́мже и на ме́сте всели́лся еси́ зла́чне, / мзды по́двигов твои́х прие́м, преподо́бне иера́рше Васи́лие. / Моли́ся Христу́ Бо́гу / прегреше́ний оставле́ние дарова́ти / пра́зднующим любо́вию святу́ю па́мять твою́.

И ныне: Вся́ческих Влады́ка и Творе́ц, из пречи́стыя утро́бы Твоея́ плоть прие́мый, / Предста́тельницу Тя показа́ челове́ком, Всенепоро́чная. / Сего́ ра́ди вси к Тебе́ прибега́ем, / очище́ния прегреше́ний прося́ще, Влады́чице, / и ве́чнующия изба́витися му́ки, / и вся́каго озлобле́ния лю́таго мироде́ржца. / Сего́ ра́ди вопие́м Ти: / Моли́ся Твоему́ Сы́ну и Бо́гу / прегреше́ний оставле́ние дарова́ти / покланя́ющимся ве́рою всесвято́му Рождеству́ Твоему́.

И чтем надгробное слово Григория Богослова, еже о Велицем Василии, на четыре части.

Степенна, 1-й антифон 4-го гласа:

От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой.

Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.

Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Прокимен, глас 4:

Уста́ моя́ возглаго́лют прему́дрость, / и поуче́ние се́рдца моего́ ра́зум. Стих: Услы́шите сия́, вси язы́цы, / внуши́те, вси, живу́щии по вселе́нней.

Другий прокимен: Вся́кое дыха́ние / да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.