Евангелие от Матфея, зачало 6.

Во вре́мя о́но прии́де Иису́с от Галиле́и на Иорда́н ко Иоа́нну крести́тися от него́. Иоа́нн же возбраня́ше Ему́, глаго́ля: аз тре́бую Тобо́ю крести́тися, и Ты ли гряде́ши ко мне? Отвеща́в же, Иису́с рече́ к нему́: оста́ви ны́не, та́ко бо подо́бно есть нам испо́лнити вся́ку пра́вду. Тогда́ оста́ви Его́. И, крести́вся, Иису́с взы́де а́бие от воды́, и се отверзо́шася Ему́ Небеса́, и ви́де Ду́ха Бо́жия, сходя́ща, я́ко го́лубя, и гряду́ща на Него́. И се глас с Небесе́, глаго́ля: Сей есть Сын Мой возлю́бленный, о Не́мже благоволи́х.

Мф 3:13–17

Таже: Не преда́ждь нас до конца́ И́мене Твоего́ ра́ди, / и не разори́ заве́та Твоего́, / и не отста́ви ми́лости Твоея́ от нас / Авраа́ма ра́ди, возлю́бленнаго от Тебе́, / и за Исаа́ка, раба́ Твоего́, / и Изра́иля, свята́го Твоего́.

Трисвятое, и по О́тче наш: Священник: Я́ко Твое́ есть Ца́рство:

Кондак, глас 4:

Во струя́х днесь Иорда́нских быв, Госпо́дь / Иоа́нну вопие́т: / не убо́йся крести́ти Мя, / спасти́ бо приидо́х / Ада́ма первозда́ннаго.

Го́споди, поми́луй, 40.

И молитва:

И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Го́споди, поми́луй (3).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

И́менем Госпо́дним благослови́, о́тче.

Священник: Бо́же, уще́дри ны и благослови́ ны, просвети́ лице́ Твое́ на ны и поми́луй ны.

Таже молитва:

Влады́ко Го́споди, Иису́се Христе́, Бо́же наш, долготерпе́вый о на́ших согреше́ниих и да́же до ны́нешняго часа́ приведы́й нас, в о́ньже, на Животворя́щем Дре́ве ви́ся, благоразу́мному разбо́йнику и́же в рай путесотвори́л еси́ вход и сме́ртию смерть разруши́л еси́: очи́сти нас, гре́шных и недосто́йных раб Твои́х, согреши́хом бо и беззако́нновахом и не́смы досто́йни возвести́ очеса́ на́ша и воззре́ти на высоту́ Небе́сную, зане́ оста́вихом путь пра́вды Твоея́ и ходи́хом в во́лях серде́ц на́ших. Но мо́лим Твою́ безме́рную бла́гость: пощади́ нас, Го́споди, по мно́жеству ми́лости Твоея́, и спаси́ нас И́мене Твоего́ ра́ди свята́го, я́ко исчезо́ша в суете́ дни́е на́ши, изми́ нас из руки́ сопроти́внаго, и оста́ви нам грехи́ на́ша, и умертви́ плотско́е на́ше мудрова́ние, да, ве́тхаго отложи́вше челове́ка, в но́ваго облеце́мся и Тебе́ поживе́м, на́шему Влады́це и Благоде́телю. И та́ко, Твои́м после́дующе повеле́нием, в ве́чный поко́й дости́гнем, иде́же есть всех веселя́щихся жили́ще. Ты бо еси́ вои́стинну и́стинное весе́лие и ра́дость лю́бящих Тя, Христе́ Бо́же наш, и Тебе́ сла́ву возсыла́ем со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не, и при́сно, и во ве́ки веко́в, ами́нь.

ИЗОБРАЗИТЕЛЬНЫЕ

Таже псалом 102.

Благослови́, душе́ моя́, Го́спода, и вся вну́тренняя моя́ И́мя свято́е Его́. Благослови́, душе́ моя́, Го́спода и не забыва́й всех воздая́ний Его́. Очища́ющаго вся беззако́ния твоя́, исцеля́ющаго вся неду́ги твоя́. Избавля́ющаго от истле́ния живо́т твой, венча́ющаго тя ми́лостию и щедро́тами. Исполня́ющаго во благи́х жела́ние твое́, обнови́тся, я́ко о́рля, ю́ность твоя́. Творя́й ми́лостыни Госпо́дь и судьбу́ всем обиди́мым. Сказа́ пути́ Своя́ Моисе́ови, сыново́м Изра́илевым хоте́ния Своя́. Щедр и ми́лостив Госпо́дь, долготерпели́в и многоми́лостив. Не до конца́ прогне́вается, ниже́ в век вражду́ет. Не по беззако́нием на́шим сотвори́л есть нам, ниже́ по грехо́м на́шим возда́л есть нам. Я́ко по высоте́ Небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть, есмы́. Челове́к, я́ко трава́, дни́е его́, я́ко цвет се́льный, та́ко оцвете́т. Я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́. И пра́вда Его́ на сыне́х сыно́в, храня́щих заве́т Его́ и по́мнящих за́поведи Его́ твори́ти я́. Госпо́дь на Небеси́ угото́ва престо́л Свой, и Ца́рство Его́ все́ми облада́ет. Благослови́те Го́спода, вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода, вся си́лы Его́, слуги́ Его́, творя́щии во́лю Его́. Благослови́те Го́спода, вся дела́ Его́, на вся́ком ме́сте Влады́чества Его́; благослови́, душе́ моя́, Го́спода.

Сла́ва Отцу́ и Сы́ну и Свято́му Ду́ху.

Псалом 145.

Хвали́, душе́ моя́, Го́спода, восхвалю́ Го́спода в животе́ мое́м. Пою́ Бо́гу моему́, до́ндеже есмь. Не наде́йтеся на кня́зи, на сы́ны челове́ческия, в ни́хже несть спасе́ния. Изы́дет дух его́ и возврати́тся в зе́млю свою́, в той день поги́бнут вся помышле́ния Его́. Блаже́н, ему́же Бог Иа́ковль помо́щник его́, упова́ние его́ на Го́спода Бо́га своего́, сотво́ршаго Не́бо и зе́млю, мо́ре и вся, я́же в них, храня́щаго и́стину в век, творя́щаго суд оби́димым, даю́щаго пи́щу а́лчущим. Госпо́дь реши́т окова́нныя, Госпо́дь умудря́ет слепцы́, Госпо́дь возво́дит низве́рженныя, Госпо́дь лю́бит пра́ведники, Госпо́дь храни́т прише́льцы, си́ра и вдову́ прии́мет и путь гре́шных погуби́т. Воцари́тся Госпо́дь во век, Бог Твой, Сио́не, в род и род.

И ны́не и при́сно и во ве́ки веко́в, ами́нь.

Единоро́дный Сы́не и Сло́ве Бо́жий, Безсме́ртен Сый / и изво́ливый спасе́ния на́шего ра́ди / воплоти́тися от Святы́я Богоро́дицы и Присноде́вы Мари́и, / непрело́жно вочелове́чивыйся, / распны́йся же, Христе́ Бо́же, / сме́ртию смерть попра́вый, / Еди́н Сый Святы́я Тро́ицы, / спрославля́емый Отцу́ и Свято́му Ду́ху, / спаси́ нас.

Блаженна, без пения:

Во Ца́рствии Твое́м помяни́ нас, Го́споди, егда́ прии́деши, во Ца́рствии Твое́м.

Блаже́ни ни́щии ду́хом, я́ко тех есть Ца́рство Небе́сное.

Блаже́ни пла́чущии, я́ко ти́и уте́шатся.

Блаже́ни кро́тции, я́ко ти́и насле́дят зе́млю.

Блаже́ни а́лчущии и жа́ждущии пра́вды, я́ко ти́и насы́тятся.

Блаже́ни ми́лостивии, я́ко ти́и поми́ловани бу́дут.

Блаже́ни чи́стии се́рдцем, я́ко ти́и Бо́га у́зрят.

Блаже́ни миротво́рцы, я́ко ти́и сы́нове Бо́жии нареку́тся.

Блаже́ни изгна́ни пра́вды ра́ди, я́ко тех есть Ца́рство Небе́сное.

Блаже́ни есте́, егда́ поно́сят вам, и изжену́т, и реку́т всяк зол глаго́л на вы, лжу́ще Мене́ ра́ди.

Ра́дуйтеся и весели́теся, я́ко мзда ва́ша мно́га на Небесе́х.

Сла́ва, и ны́не:

Помяни́ нас, Го́споди, егда́ прии́деши, во Ца́рствии Твое́м.

Помяни́ нас, Влады́ко, егда́ прии́деши, во Ца́рствии Твое́м.

Помяни́ нас, Святы́й, егда́ прии́деши, во Ца́рствии Твое́м.

Лик Небе́сный пое́т Тя и глаго́лет: Свят, Свят, Свят Госпо́дь Савао́ф, испо́лнь Не́бо и земля́ сла́вы Твоея́.

Стих: Приступи́те к Нему́ и просвети́теся, и ли́ца ва́ша не постыдя́тся.

Лик Небе́сный пое́т Тя и глаго́лет: Свят, Свят, Свят Госпо́дь Савао́ф, испо́лнь Не́бо и земля́ сла́вы Твоея́.

Сла́ва Отцу́ и Сы́ну и Свято́му Ду́ху.

Лик святы́х А́нгел и Арха́нгел со все́ми Небе́сными си́лами пое́т Тя и глаго́лет: Свят, Свят, Свят Госпо́дь Савао́ф, испо́лнь Не́бо и земля́ сла́вы Твоея́.

И ны́не и при́сно и во ве́ки веко́в, ами́нь.

Исповедание Православныя веры:

(Аще есть Литургия, зде не глаголем, но по И ны́не, глаголем: Осла́би, оста́ви: и прочая.)

Ве́рую во Еди́наго Бо́га Отца́ Вседержи́теля, Творца́ Не́бу и земли́, ви́димым же всем и неви́димым. И во Еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, не сотворе́нна, Единосу́щна Отцу́, И́мже вся бы́ша. Нас ра́ди челове́к, и на́шего ра́ди спасе́ния сше́дшаго с Небе́с, и воплоти́вшагося от Ду́ха Свя́та и Мари́и Де́вы, и вочелове́чшася. Распя́таго же за ны при Понти́йстем Пила́те, и страда́вша, и погребе́нна, и воскре́сшаго в тре́тий день, по писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но Креще́ние во оставле́ние грехо́в. Ча́ю воскресе́ния ме́ртвых и жи́зни бу́дущаго ве́ка, ами́нь.

Молитва:

Осла́би, оста́ви, прости́, Бо́же, прегреше́ния на́ша, во́льная и нево́льная, я́же в сло́ве и в де́ле, я́же в ве́дении и не в ве́дении, я́же во дни и в нощи́, я́же во уме́ и в помышле́нии, вся нам прости́, я́ко Благ и Человеколю́бец.

Посем, О́тче наш, И́же еси́ на Небесе́х! Да святи́тся И́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный даждь нам днесь, и оста́ви нам до́лги на́ша, я́коже и мы оставля́ем должнико́м на́шим, и не введи́ нас во искуше́ние, но изба́ви нас от лука́ваго.

Священник: Я́ко Твое́ есть Ца́рство: Чтец: Аминь.

Кондак, глас 4:

Во струя́х днесь Иорда́нских быв, Госпо́дь / Иоа́нну вопие́т: / не убо́йся крести́ти Мя, / спасти́ бо приидо́х / Ада́ма первозда́ннаго.

Го́споди, поми́луй, 40.

И молитву сию:

Всесвята́я Тро́ице, Единосу́щная Держа́во, Неразде́льное Ца́рство, всех благи́х Вина́: благоволи́ же и о мне, гре́шнем, утверди́, вразуми́ се́рдце мое́ и всю мою́ отыми́ скве́рну. Просвети́ мою́ мысль, да вы́ну сла́влю, пою́, и покланя́юся, и глаго́лю: Еди́н Свят, Еди́н Госпо́дь, Иису́с Христо́с во сла́ву Бо́га Отца́, ами́нь.

Аще есть Литургия, глаголем:

Досто́йно есть я́ко вои́стинну блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем. И отпуст.

Аще же несть Литургии, глаголем зде:

Бу́ди И́мя Госпо́дне благослове́но от ны́не и до ве́ка. (3)

Сла́ва, и ны́не: псалом 33.

Благословлю́ Го́спода на вся́кое вре́мя, вы́ну хвала́ Его́ во усте́х мои́х. О Го́споде похва́лится душа́ моя́, да услы́шат кро́тции и возвеселя́тся. Возвели́чите Го́спода со мно́ю, и вознесе́м И́мя Его́ вку́пе. Взыска́х Го́спода, и услы́ша мя и от всех скорбе́й мои́х изба́ви мя. Приступи́те к Нему́ и просвети́теся, и ли́ца ва́ша не постыдя́тся. Сей ни́щий воззва́, и Госпо́дь услы́ша и, и от всех скорбе́й его́ спасе́ и. Ополчи́тся А́нгел Госпо́день о́крест боя́щихся Его́ и изба́вит их. Вкуси́те и ви́дите, я́ко благ Госпо́дь. Блаже́н муж, и́же упова́ет Нань. Бо́йтеся Го́спода вси святи́и Его́, я́ко несть лише́ния боя́щимся Его́. Бо́га́тии обнища́ша и взалка́ша, взыска́ющии же Го́спода не лиша́тся вся́каго бла́га. Прииди́те, ча́да, послу́шайте мене́, стра́ху Госпо́дню научу́ вас. Кто есть челове́к, хотя́й живо́т, любя́й дни ви́дети бла́ги? Удержи́ язы́к твой от зла и устне́ твои́, е́же не глаго́лати льсти. Уклони́ся от зла и сотвори́ бла́го; взыщи́ ми́ра и пожени́ и. О́чи Госпо́дни на пра́ведныя и у́ши Его́ в моли́тву их. Лице́ же Госпо́дне на творя́щия зла́я, е́же потреби́ти от земли́ па́мять их. Воззва́ша пра́веднии, и Госпо́дь услы́ша их и от всех скорбе́й их изба́ви их. Близ Госпо́дь сокруше́нных се́рдцем, и смире́нныя ду́хом спасе́т. Мно́ги ско́рби пра́ведным, и от всех их изба́вит я́ Госпо́дь. Храни́т Госпо́дь вся ко́сти их, ни еди́на от них сокруши́тся. Смерть гре́шников люта́, и ненави́дящии пра́веднаго прегреша́т. Изба́вит Госпо́дь ду́ши раб Свои́х, и не прегреша́т вси, упова́ющии на Него́.

Досто́йно есть:

Таже отпуст. И бывает расход до часа вечерняго. Вечерня же бывает с Литургиею Василия Великаго во свое время.

 

Ведомо же буди: Аще случится навечерие Богоявления в субботу или неделю, пост не бывает. И тропари царских часов со чтениями в субботу и неделю не поются, но поем часы царския прежде в пяток, по обычаю, якоже указано на ряду, глаголем же и псалом 33: Благословлю́ Го́спода: И отпуст. И в той день ядим сыр и яица. Аще будет навечерие в субботу: прокимен, аллилуиа и причастен дне: Апостол же и Евангелие прежде субботе пред Богоявлением и потом ряд. По Изря́дно: же, поем Досто́йно: По отпущении же Литургии ядим укрухи, и пием по единой чаши вина. Совершенно же ядим по отпусте вечерни со елеем, сыра же, и яиц, и рыб никакоже дерзнем коснутися.

Аще Просвещений день случится в неделю, воскресно ничтоже поем, но все последование праздника: вечер, и утро, и на Литургии.

 

СВЯТОЕ БОГОЯВЛЕНИЕ. КРЕЩЕНИЕ ГОСПОДА БОГА
И СПАСА НАШЕГО ИИСУСА ХРИСТА.
НА ВЕЛИЦЕЙ ВЕЧЕРНИ

При часе 5-м дне знаменует в великое и потом во вся тяжкая. И собравшеся во храм, начинаем вечерню и поем обычный псалом. Таже, ектения великая, и по ектении, аще будет в субботу, стихословим, Блаже́н муж: кафизму всю. Аще же в неделю, поем 1-й антифон. Аще ли во иныя дни, стихология не бывает, но абие поем: Го́споди, воззва́х: на глас 2. Иерей же творит проскомидию. Диакон кадит церковь, по обычаю.

И мы поем стихиры праздника на 8,
глас 2, самогласны Иоанна монаха:

Просвети́теля на́шего, / просвеща́ющаго вся́каго челове́ка, / ви́дев Предте́ча крести́тися прише́дша, / ра́дуется душе́ю и трепе́щет, / руко́ю показу́ет Eго́ и глаго́лет лю́дем. / Сей, избавля́яй Изра́иля, / свобожда́яй нас от истле́ния. / О безгре́шный Христе́ Бо́же наш, сла́ва Тебе́. (2)

Изба́вителю на́шему, от раба́ креща́ему / и Ду́ха прише́ствием свиде́тельствуему, / ужасо́шася, зря́ще, А́нгельская во́инства. / Глас же с Небесе́ принесе́ся от Oтца́: / Сей, Eго́же Предте́ча руко́ю креща́ет, / Сын Мой eсть возлю́бленный, о Не́мже благоволи́х. / Христе́ Бо́же наш, сла́ва Тебе́. (2)

Иoрда́нския струи́ Тебе́, Исто́чника, прия́ша, / и Уте́шитель в ви́де голуби́не схожда́ше. / Приклоня́ет верх Приклони́вый Небеса́. / Зове́т и вопие́т бре́ние Зижди́телю: / что́ ми повелева́еши, я́же вы́ше мене́? / Аз тре́бую Твоего́ Креще́ния. / О безгре́шный Христе́ Бо́же наш, сла́ва Тебе́. (2)

Спасти́ хотя́ заблу́ждшаго челове́ка, / не не сподо́бился eси́ в ра́бий зрак облещи́ся: / подоба́ше бо Тебе́, Влады́це и Бо́гу, восприя́ти на́ша за ны, / Тебе́ бо кре́щшуся пло́тию, Изба́вителю, / оставле́ния сподо́бил eси́ нас. / Те́мже вопие́м Ти: / Христе́ Бо́же наш, сла́ва Тебе́. (2)

Слава, и ныне, глас тойже. Византиево:

Приклони́л eси́ главу́ Предте́чи, / сокруши́л eси́ главы́ змиéв. / Прише́д в струи́, просвети́л eси́ вся́чeская, / éже сла́вити Тя, Спа́се, / Просвети́теля душ на́ших.

Вход со Евангелием. Прокимен дне.

Бытия́ чте́ние.

В нача́ле сотвори́ Бог Не́бо и зе́млю. Земля́ же бе неви́дима и неустро́ена, и тьма верху́ бе́здны, и Дух Бо́жий ноша́шеся верху́ воды́. И рече́ Бог: да бу́дет свет. И бысть свет. И ви́де Бог свет, я́ко добро́; и разлучи́ Бог между́ све́том и между́ тьмо́ю. И нарече́ Бог свет день, и тьму нарече́ нощь. И бысть ве́чер, и бысть у́тро, день еди́н. И рече́ Бог: да бу́дет твердь посреде́ воды́, и да бу́дет разлуча́ющи посреде́ воды́ и воды́. И бысть та́ко. И сотвори́ Бог твердь; и разлучи́ Бог между́ водо́ю, я́же бе под тве́рдию, и между́ водо́ю, я́же бе над тве́рдию. И нарече́ Бог твердь не́бо; и ви́де Бог, я́ко добро́. И бысть ве́чер, и бысть у́тро, день вторы́й. И рече́ Бог: да собере́тся вода́, я́же под небесе́м, в собра́ние еди́но, и да яви́тся су́ша. И бысть та́ко. И собра́ся вода́, я́же под небесе́м, в собра́ния своя́, и яви́ся су́ша. И нарече́ Бог су́шу зе́млю и собра́ния вод нарече́ моря́. И ви́де Бог, я́ко добро́. И рече́ Бог: да прорасти́т земля́ бы́лие травно́е, се́ющее се́мя по ро́ду и по подо́бию, и дре́во плодови́тое, творя́щее плод, ему́же се́мя его́ в нем, по ро́ду на земли́. И бысть та́ко. И изнесе́ земля́ бы́лие травно́е, се́ющее по ро́ду и по подо́бию, и дре́во плодови́тое, творя́щее плод, ему́же се́мя его́ в нем по ро́ду на земли́. И ви́де Бог, я́ко добро́. И бысть ве́чер, и бысть у́тро, день тре́тий.

Быт 1:1–13

Исхо́да чте́ние.

Рече́ Госпо́дь к Моисе́ю: что вопие́ши ко Мне? Глаго́ли сыново́м Изра́илевым, и да путеше́ствуют. И ты возми́ жезл твой, и простри́ ру́ку твою́ на мо́ре, и расто́ргни е́, и да вни́дут сы́нове Изра́илевы посреде́ мо́ря по су́ху. И се Аз ожесточу́ се́рдце фарао́ново, и слуг его́, и еги́птян всех, и вни́дут в след их, и просла́влюся в фарао́не, и во всем во́инстве его́, и в колесни́цах, и в ко́нех его́. И уразуме́ют вси еги́птяне, я́ко Аз Госпо́дь, прославля́ющу Ми ся в фарао́не, и в колесни́цах, и в ко́нех его́. Простре́ же Моисе́й ру́ку на мо́ре, и возгна́ Госпо́дь мо́ре ве́тром ю́жным си́льным всю нощь, и сотвори́ мо́ре су́хо, и разступи́ся вода́. И внидо́ша сы́нове Изра́илевы в посре́д мо́ря по су́ху, и вода́ им бысть стена́ одесну́ю и стена́ ошу́юю. Погна́ша же еги́птяне и внидо́ша созади́ их всяк конь фарао́нов, и колесни́цы, и вса́дницы посреде́ мо́ря. Простре́ же Моисе́й ру́ку на мо́ре, и устро́ися вода́ ко дню на ме́сто, еги́птяне же бежа́ша под водо́ю, и истрясе́ Госпо́дь еги́птяны посреде́ мо́ря. И, обрати́вшися, вода́ покры́ колесни́цы, и вса́дники, и триста́ты, и всю си́лу фарао́нову, вше́дших в след их в мо́ре, и не оста́ от них ни еди́н. Сы́нове же Изра́илевы проидо́ша по су́ху посреде́ мо́ря.

Исх 14:15–18, 21–23, 27–29

Исхо́да чте́ние.

Поя́т Моисе́й сы́ны Изра́илевы от мо́ря Чермна́го и веде́ их в пусты́ню Сур. И идя́ху три дни в пусты́ни, и не обрета́ху воды́, да бы́ша пи́ли. Приидо́ша же в Ме́рру, и не можа́ху пи́ти воды́ из Ме́рры, горька́ бо бе. Сего́ ра́ди нарече́ся и́мя ме́сту тому́ Го́ресть. И ропта́ху лю́дие на Моисе́я, глаго́люще: что пие́м? Возопи́ же Моисе́й ко Го́споду, и показа́ ему́ Госпо́дь дре́во. И вложи́ е́ в во́ду, и сладка́ бысть вода́. Та́мо положи́ ему́ Бог оправда́ния и суды́ и та́мо искуша́ше его́. И рече́: а́ще слу́хом услы́шиши глас Го́спода, Бо́га твоего́, и уго́дная пред Ним сотвори́ши, и внуши́ши за́поведи Его́, и сохрани́ши вся оправда́ния Его́, вся́ку боле́знь, ю́же наведо́х на еги́птяны, не наведу́ на тя. Аз бо есмь Госпо́дь, исцеля́яй тя. И приидо́ша во Ели́м, и бя́ху та́мо двана́десять исто́чников вод и се́дмьдесят стебль фи́ников, и ополчи́шася та́мо при вода́х. И воздви́гшеся от Ели́ма, и прии́де весь сонм сыно́в Изра́илевых в пусты́ню Син, я́же есть между́ Ели́мом и между́ Си́ною.

Исх 15:22–27; 16:1

Тропарь, глас 5:

Яви́лся еси́ в ми́ре, И́же мир Сотвори́вый, / да просвети́ши во тьме седя́щия, / Человеколю́бче, сла́ва Тебе́.

Стих 1: Бо́же, уще́дри ны и благослови́ ны, / просвети́ лице́ Твое́ на ны и поми́луй ны. / Позна́ти на земли́ путь Твой, / во всех язы́цех спасе́ние Твое́.

Да просвети́ши во тьме седя́щия, / Человеколю́бче, сла́ва Тебе́.

Стих 2: Да испове́дятся Тебе́ лю́дие, Бо́же, / да испове́дятся Тебе́ лю́дие вси. / Да возвеселя́тся и да возра́дуются язы́цы, / я́ко су́диши лю́дем правото́ю / и язы́ки на земли́ наста́виши.

Да просвети́ши во тьме седя́щия, / Человеколю́бче, сла́ва Тебе́.

Стих 3: Да испове́дятся Тебе́ лю́дие, Бо́же, / да испове́дятся Тебе́ лю́дие вси. / Земля́ даде́ плод свой, / благослови́ ны, Бо́же, Бо́же наш. / Благослови́ ны, Бо́же, и да убоя́тся Его́ вси концы́ земли́.

Да просвети́ши во тьме седя́щия, / Человеколю́бче, сла́ва Тебе́.

Слава, и ныне: Яви́лся еси́ в ми́ре, И́же мир сотвори́вый, / да просвети́ши во тьме седя́щия, / Человеколю́бче, сла́ва Тебе́.

Иису́са Нави́на чте́ние.

Рече́ Госпо́дь ко Иису́су: в день сей начина́ю вознести́ тя пред все́ми сы́нми Изра́илевыми, да разуме́ют, зане́ я́коже бех с Моисе́ом, та́ко бу́ду и с тобо́ю. И ны́не запове́ждь свяще́нником, взима́ющим ковче́г заве́та, глаго́ля: да я́ко вни́дите в часть воды́ Иорда́нския и ста́нете при Иорда́не. Я́коже идя́ху свяще́нницы, взе́мшии ковче́г заве́та Госпо́дня, во Иорда́н, и но́ги свяще́нников, нося́щих ковче́г, омочи́шася в ча́сти воды́ Иорда́нския. Иорда́н же исполня́шеся во всем ло́жи свое́м, я́коже во дни жа́твы пшени́цы. И ста́ша во́ды низходя́щия свы́ше в сонм еди́н, отстоя́щия дале́че зело́ от Адами́ гра́да, да́же до страны́ Кариафиари́м. Низходя́щая же сни́де на мо́ре Арави́тское, да́же до мо́ря соли́щнаго, до́ндеже вконе́ц оскуде́, и лю́дие стоя́ху пря́мо Иерихо́на. И ста́ша свяще́нницы, взе́мшии ковче́г заве́та Госпо́дня, на су́се, посреде́ Иорда́на, гото́вы. И вси сы́нове Изра́илевы преидо́ша по су́ху, до́ндеже сконча́ша вси лю́дие, преходя́ще Иорда́н.

Ис Нав 3:7–8, 15–17

Царств четве́ртых чте́ние.

Рече́ Илия́ к Елиссе́ю: седи́ у́бо зде, я́ко Госпо́дь посла́ мя до Иорда́на. И рече́ Елиссе́й: жив Госпо́дь, и жива́ душа́ твоя́, а́ще оста́влю тя. И поидо́ста о́ба, и пя́тдесят муже́й от сыно́в проро́ческих приидо́ша и ста́ша пря́мо издале́ча, о́ба же ста́ста при Иорда́не. И прия́т Илия́ ми́лоть свою́, и свит ю́, и порази́ е́ю во́ды, и раздели́ся вода́ сю́ду и сю́ду, и преидо́ста о́ба по су́ху. И бысть, я́ко преидо́ста, и рече́ Илия́ Елиссе́ю: проси́, что сотворю́ тебе́, пре́жде да́же не взят бу́ду от тебе́. И рече́ Елиссе́й: да бу́дет у́бо Дух, и́же в тебе́, сугу́б во мне. И рече́ Илия́: ожесточи́л еси́ проси́ти, оба́че а́ще уви́диши мя, взе́млема от тебе́, бу́дет ти тако; а́ще ли же не уви́диши, не бу́дет. И бысть иду́щим им и глаго́лющим, и се колесни́ца о́гненна, и ко́ни о́гненни, и раздели́ между́ обе́ма. И взя́тся Илия́ тру́сом, я́ко на не́бо. И Елиссе́й зря́ше, и той вопия́ше: о́тче, о́тче, колесни́ца Изра́илева, и ко́ни его́, и не ви́де его́ ктому́. И я́тся Елиссе́й за ри́зы своя́, и раздра́ я́ на дво́е, и взят ми́лоть Илиину́, па́дшую верху́ его́. И обрати́ся Елиссе́й, и ста на бре́зе Иорда́на. И прия́т Елиссе́й ми́лоть Илиину́, па́дшую верху́ его́, и уда́ри во́ды, и не раздели́шася. И рече́ Елиссе́й: где у́бо есть Бог Илии́н Апфо́? И уда́ри Елиссе́й во́ды второ́е, и раздели́шася во́ды, и пре́йде по су́ху.

4 Цар 2:6–14

Царств четве́ртых чте́ние.

Прии́де Неема́н, князь царя́ Ассири́йскаго, с колесни́цами и ко́ньми свои́ми и ста при две́рех хра́ма Елиссе́ева. И посла́ Елиссе́й к нему́ ве́стника, глаго́ля: шед, измы́йся во Иорда́не седми́жды, и обрати́тся плоть твоя́ к тебе́, и очи́стишися. И разгне́вася Неема́н, и оты́де, и рече́: се рех, да изы́дет ко мне, и призове́т о и́мени Го́спода Бо́га своего́, и положи́т ру́ку свою́ на прока́зу, и оты́мет ю́ от пло́ти моея́. Не добре́йши ли суть Арвана́ и Фарфа́, реце́ Дама́скове, па́че Иорда́на и всех вод Изра́илевых? Не шед ли, измы́юся в них и очи́щуся? И возврати́ся, и оты́де с гне́вом. И приступи́ша о́троцы его́ и ре́ша к нему́: го́споди, а́ще бы ве́лие сло́во глаго́лал к тебе́ проро́к, не бы ли сотвори́л, я́коже рече́ к тебе́: измы́йся и очи́стишися? И сни́де Неема́н, и погрузи́ся во Иорда́не седми́жды, по глаго́лу челове́ка Бо́жия, и обрати́ся плоть его́ к нему́, я́ко отроча́те ма́ла, и очи́стися.

4 Цар 5:9–14

Тропарь, глас 6:

Гре́шником и мытаре́м / за мно́жество ми́лости Твоея́ / яви́лся еси́, Спа́се наш.

Где бо име́л бы свет Твой возсия́ти, / то́кмо на седя́щия во тьме? / Сла́ва Тебе́.

Стих 1: Госпо́дь воцари́ся, в ле́поту облече́ся, / облече́ся Госпо́дь в си́лу и препоя́сася, / и́бо утверди́ вселе́нную, я́же не подви́жится. / Гото́в престо́л Твой отто́ле, / от ве́ка Ты еси́.

Где бо име́л бы свет Твой возсия́ти, / то́кмо на седя́щия во тьме? / Сла́ва Тебе́.

Стих 2: Воздвиго́ша ре́ки, Го́споди, воздвиго́ша ре́ки гла́сы своя́. / Во́змут ре́ки сотре́ния своя́ от гласо́в вод мно́гих.

Где бо име́л бы свет Твой возсия́ти, / то́кмо на седя́щия во тьме? / Сла́ва Тебе́.

Стих 3: Ди́вны высоты́ морски́я, ди́вен в высо́ких Госпо́дь. / Свиде́ния Твоя́ уве́ришася зело́. / До́му Твоему́ подоба́ет святы́ня, Го́споди, в долготу́ дний.

Где бо име́л бы свет Твой возсия́ти, / то́кмо на седя́щия во тьме? / Сла́ва Тебе́.

Слава, и ныне: Гре́шником и мытаре́м / за мно́жество ми́лости Твоея́ / яви́лся еси́, Спа́се наш.

Где бо име́л бы свет Твой возсия́ти, / то́кмо на седя́щия во тьме? / Сла́ва Тебе́.

Проро́чества Иса́иина чте́ние.

Та́ко глаго́лет Госпо́дь: измы́йтеся и чи́сти бу́дете, отыми́те лука́вствия от душ ва́ших, пред очи́ма Мои́ма преста́ните от лука́вствий ва́ших. Научи́теся до́брое твори́ти, изыщи́те суда́, изба́вите оби́дима, суди́те си́ру, и оправди́те вдови́цу. И прииди́те, истя́жимся, – глаго́лет Госпо́дь, – и а́ще бу́дут греси́ ва́ши, я́ко багря́ное, я́ко снег, убелю́; а́ще же бу́дут, я́ко червле́ное, я́ко во́лну, убелю́. И а́ще хо́щете и послу́шаете Мене́, блага́я земли́ сне́сте. А́ще ли же не хо́щете, ниже́ послу́шаете Мене́, меч вас поя́ст. Уста́ бо Госпо́дня глаго́лаша сия́.

Ис 1:16–20

Бытия́ чте́ние.

Воззре́в Иа́ков и ви́де полк Бо́жий ополчи́вшийся, и срето́ша его́ А́нгели Бо́жии. Рече́ же Иа́ков, егда́ ви́де их: полк Бо́жий сей. И нарече́ и́мя ме́сту тому́ Полки́. Посла́ же Иа́ков ве́стники пред собо́ю ко Иса́ву, бра́ту своему́, в зе́млю Сии́р, во страну́ Едо́мскую. И запове́да им, глаго́ля: си́це рцы́те господи́ну моему́ Иса́ву: та́ко глаго́лет о́трок твой Иа́ков: с Лава́ном пожи́х и укосне́х до ны́не, и бы́ша ми о́вцы, и воло́ве, и осля́та, и рабы́, и рабы́ни. И посла́х возвести́ти го́сподеви моему́ Иса́вови, да обря́щет благода́ть о́трок твой пред тобо́ю. И возврати́шася ве́стницы ко Иа́кову, глаго́люще: идо́хом ко Иса́ву, бра́ту твоему́, и се сам гряде́т в сре́тение твое́ и четы́ре ста муже́й с ним. Убоя́ся же Иа́ков зело́, и недоумева́шеся, и раздели́ лю́ди, и́же с ним, и волы́, и о́вцы на два полка́. И рече́ Иа́ков: а́ще прии́дет Иса́в на полк еди́н и посече́т и, бу́дет полк вторы́й во спасе́ние. И рече́ Иа́ков: Бог отца́ моего́ Авраа́ма и Бог отца́ моего́ Исаа́ка, Го́споди, реки́й ми: отбежи́ в зе́млю бытия́ твоего́, и добро́ ти сотворю́. Дово́льно ми да бу́дет от вся́кия пра́вды и от вся́кия и́стины, ю́же сотвори́л еси́ о́троку Твоему́, с жезло́м бо мои́м сим преидо́х Иорда́н.

Быт 32:1–10

Исхо́да чте́ние.

Сни́де дщи фарао́нова измы́тися на реку́, и рабы́ни ея́ прехожда́ху при реце́, и ви́девши краби́йцу в лучи́це, посла́вши рабы́ню взят ю́. Отве́рзши же, ви́дит отроча́, пла́чущееся в краби́йце, и пощади́ е́ дщи фарао́нова, и рече́: от дете́й евре́йских сие́. И рече́ сестра́ его́ дще́ри фарао́нове: хо́щеши ли призову́ ти жену́ пита́тельницу от евре́й, и воздои́т ти отроча́? И рече́ ей дщи фарао́нова: иди́. Ше́дши же, отрокови́ца призва́ ма́терь отроча́те. Рече́ же к ней дщи фарао́нова: соблюди́ ми отроча́ сие́ и воздо́й ми е́, аз же дам ти мзду. Прие́мше же жена́ отроча́ и доя́ше е́. Устраби́вшуся же отроча́ти, введе́ е́ ко дще́ри фарао́нове, и бысть ей в сы́на. Именова́ же и́мя ему́ Моисе́й, глаго́лющи: от воды́ взях его́.

Исх 2:5–10

Суде́й чте́ние.

Рече́ Гедео́н к Бо́гу: а́ще спаса́еши руко́ю мое́ю Изра́иля, и́мже о́бразом рекл еси́: Се аз положу́ руно́ о́вчее на гумне́ и, а́ще бу́дет роса́ на руне́ то́кмо, по всей же земли́ су́ша, разуме́ю, я́ко спасе́ши руко́ю мое́ю Изра́иля, и́мже о́бразом рекл еси́. И бысть та́ко. И ура́нив Гедео́н нау́трие, и исцеди́ руно́, и истече́ роса́ от руна́, испо́лнен окри́н воды́. И рече́ Гедео́н к Бо́гу: да не прогне́вается у́бо я́рость Твоя́ на мя, и возглаго́лю еще́ еди́ною, и искушу́ еще́ еди́ною руно́м: да бу́дет у́бо су́ша на руне́ то́кмо, по всей же земли́ роса́. И сотвори́ Бог та́ко в нощи́ той, и бысть су́ша на руне́ то́кмо, по всей же земли́ бысть роса́.

Суд 6:36–40

Царств тре́тиих чте́ние.

Рече́ Илия́ к лю́дем: приступи́те ко мне. И приступи́ша вси лю́дие к нему́. И взят Илия́ двана́десять ка́мений, по числу́ двана́десяти коле́н сыно́в Изра́илевых, я́коже глаго́ла Госпо́дь к нему́, глаго́ляй: Изра́иль бу́дет и́мя твое́. И созда́ ка́мение, и исцели́ олта́рь Госпо́день раско́панный, и сотвори́ ров, вмеща́ющ по две ме́ры се́мени, о́крест олтаря́. И положи́ поле́на на олтари́, его́же сотвори́. И раздроби́ всесожже́ния, и положи́ на поле́на, и обы́де олта́рь. И рече́ Илия́: приими́те ми четы́ре водоно́сы воды́, и да пролию́тся на олта́рь, на всесожже́ние же и на поле́на. И рече́: удво́йте. И удво́иша. И рече́: утро́йте. И утро́иша. И идя́ше вода́ о́крест олтаря́, и ров испо́лнися воды́. И возопи́ Илия́ на не́бо, и рече́: Го́споди Бо́же Авраа́мов, и Исаа́ков, и Иа́ковль, услы́ши мене́ днесь огне́м, и разуме́ют вси лю́дие си́и, я́ко Ты еси́ Еди́н Госпо́дь Бог Изра́илев, и аз раб Твой и Тебе́ ра́ди сотвори́х сия́ вся, и Ты обрати́ сердца́ люде́й сих в след Тебе́. И паде́ огнь от Го́спода с Небесе́ и пояде́ всесожже́ния, и поле́на, и во́ду, я́же на них, и во́ду, я́же в ро́ве, и ка́мение, и персть полиза́ огнь. И падо́ша вси лю́дие на лице́ свое́м и ре́ша: вои́стину Госпо́дь Бог, Той есть Бог.

3 Цар 18:30–39

Царств четве́ртых чте́ние.

Реко́ша му́жие гра́да Иерихо́нска ко Елиссе́ю: се жили́ще гра́да сего́ добро́, я́коже ты, го́споди, ви́диши, и во́ды злы и безча́дны. И рече́ Елиссе́й: приими́те ми водоно́с нов и всы́плите ту соль. И прия́ша и́, и изы́де на исхожде́ние вод, и вве́рже та́мо соль, и рече́: та́ко глаго́лет Госпо́дь: исцели́х во́ды сия́, и не ктому́ бу́дет отню́д умира́я, ниже́ безча́дствующая си́ми. И исцеле́ша во́ды до дне сего́, по глаго́лу, и́же глаго́ла Елиссе́й.

4 Цар 2:19–22

Проро́чества Иса́иина чте́ние.