Слава, глас тойже, самогласен.

Киприаново: Ра́дуйтеся, проро́цы честни́и, и́же зако́н Госпо́день до́бре учини́вше / и ве́рою я́вльшеся непобеди́мии столпи́ и непрекло́ннии; / вы бо и хода́таи яви́стеся Но́ваго Заве́та Христо́ва / и, преста́вльшеся к Небеси́, / Того́ моли́те умири́ти мир и спасти́ ду́ши на́ша.

И ныне, предпразднства, глас тойже:

Киприаново: Се вре́мя прибли́жися спасе́ния на́шего, / гото́вися, верте́пе, Де́ва приближа́ется роди́ти, / Вифлее́ме, земле́ Иу́дова, красу́йся и весели́ся, / я́ко из тебе́ возсия́ Госпо́дь наш. / Услы́шите, го́ры, и хо́лми, / и окре́стныя страны́ Иуде́йския, / я́ко гряде́т Христо́с, / да спасе́т, его́же созда́, челове́ка, / я́ко Человеколю́бец.

Аще вне 20-го. И ныне, Богородичен: О, чудесе́ но́ваго всех дре́вних чуде́с! / Кто бо позна́ Ма́терь, без му́жа ро́ждшую / и на руку́ нося́щую всю тварь Содержа́щаго; / Бо́жие есть изволе́ние Ро́ждшееся. / Его́же я́ко Младе́нца Пречи́стая, / Твои́ма рука́ма носи́вшая, / и ма́тернее дерзнове́ние к Нему́ иму́щая, / не преста́й моля́щи о чту́щих Тя, / уще́дрити и спасти́ ду́ши на́ша.

 

На благословении хлебов Богоро́дице Де́во, ра́дуйся: (2)

И отцев тропарь, глас 2:

Ве́лия ве́ры исправле́ния: / во исто́чнице пла́мене, я́ко на воде́ упокое́ния, / святи́и трие́ о́троцы ра́довахуся, / и проро́к Дании́л львом па́стырь, я́ко овца́м, явля́шеся. / Тех моли́твами, Христе́ Бо́же, спаси́ ду́ши на́ша.

Аще же случится в 24 день. На благословении хлебов тропари отцев: Ве́лия ве́ры: дважды.

И тропарь предпразднства, глас 4:

Написова́шеся иногда́ со ста́рцем Ио́сифом, / я́ко от се́мене Дави́дова, в Вифлее́ме Мариа́м, / чревонося́щи безсе́менное Рожде́ние. / Наста́ же вре́мя рождества́, / и ме́сто ни еди́ноже бе обита́лищу, / но, я́коже кра́сная пала́та, / верте́п Цари́це показа́шеся. / Христо́с ражда́ется пре́жде па́дший воскреси́ти о́браз. Единожды.

И чтение.

НА УТРЕНИ

На Бог, Госпо́дь: тропарь воскресен дважды:
Слава, отцев, глас 2:

Ве́лия ве́ры исправле́ния: / во исто́чнице пла́мене, я́ко на воде́ упокое́ния, / святи́и трие́ о́троцы ра́довахуся, / и проро́к Дании́л львом па́стырь, я́ко овца́м, явля́шеся. / Тех моли́твами, Христе́ Бо́же, спаси́ ду́ши на́ша.

И ныне, Богородичен: Вся па́че смы́сла, / вся пресла́вная Твоя́, Богоро́дице, та́инства, / чистоте́ запеча́танной и де́вству храни́му, / Ма́ти позна́лася еси́ нело́жна, / Бо́га ро́ждши И́стиннаго; / Того́ моли́ спасти́ся душа́м на́шим.

Или предпразднства, глас 4

Гото́вися, Вифлее́ме: / отве́рзися всем, Еде́ме, / красу́йся, Евфра́фо, / я́ко дре́во живота́ в верте́пе процвете́ от Де́вы: / рай бо О́ноя чре́во яви́ся мы́сленный, / в не́мже Боже́ственный сад, / от него́же я́дше, жи́ви бу́дем, / не я́коже Ада́м у́мрем. / Христо́с ражда́ется пре́жде па́дший возста́вити о́браз.

И обычныя кафизмы, и седальны воскресны, и Богородичны их, и чтение во Евангелии толковом.

Аще же в 24-й день, поем настоящия седальны.

По 1-м стихословии седален, глас 4.
Подобен: Удиви́ся Ио́сиф:

Во отце́х, Бо́же, предвозгласи́л еси́ та́инственно / хотя́щее бы́ти на земли́ Богоявле́ние та́инственне / преве́чнаго Сы́на Твоего́ от Де́вы / во Авраа́ме, Исаа́ке и Иа́кове, Иу́де и про́чих, / Иессе́и, и Дави́де, и проро́цех всех, / Ду́хом предвозвеща́я в Вифлее́ме Христа́ я́вльшася, / су́щия в ми́ре вся взыва́юща.

Сла́ва, и ны́не, тойже.

По 2-м стихологии седален, глас 8.
Подобен: Прему́дрости:

Пра́здник пра́зднуим, ве́рнии, отце́в Боже́ственных ра́достно: / Ада́ма, А́веля чту́ще, Си́фа, Ено́са блажа́ще, / Ено́ха, Ноя, Си́ма же, Иафе́та воспои́м, / Авраа́ма, пре́жде зако́на ве́рою просия́вша, / и Боже́ственнаго Исаа́ка, Иа́кова и Иу́ду, / Леви́ю и целому́дреннаго Ио́сифа восхва́лим и ве́рно возопии́м: / Богоно́снии пра́отцы, моли́те Христа́ Бо́га, грехо́в оставле́ние дарова́ти / пра́зднующим любо́вию святу́ю па́мять ва́шу.

Сла́ва, и ны́не, тойже.

По непорочных тропари их.

И седальны отцев, глас 8.
Подобен: Прему́дрости:

Авраа́ма, Исаа́ка же и Иа́кова восхва́лим вси пе́сненно, / Дави́да кро́ткаго, Иису́са и двана́десять патриа́рхи / вку́пе с треми́ ю́ношами, угаси́вшими о́гненный пла́мень си́лою духо́вною: / ра́дуйтеся, – вопию́ще к ним, – / пре́лесть до́блественне обличи́вше царя́ безу́мнаго, / и Христу́ моли́теся согреше́ний оставле́ние дарова́ти / пра́зднующим любо́вию святу́ю па́мять ва́шу.

Слава, и ныне,
другий, глас и подобен тойже.

Из недр Оте́ческих низше́л еси́ / и несказа́нным истоща́нием ю́же по нам нищету́ восприя́л еси́, / па́че естества́, Человеколю́бче, / в верте́п всели́тися благоволи́л еси́, Го́споди, / и я́ко Младе́нец сосцы́ пита́ешися, Зижди́тель и Госпо́дь. / Те́мже, звездо́ю наставля́еми, волсви́ да́ры Тебе́ прино́сят, я́ко Влады́це тва́ри, / па́стырие и А́нгели дивля́хуся, зову́ще: / сла́ва в Вы́шних Бо́гу, на зе́млю гряду́щему роди́тися я́ко Челове́ку.

Аще же вне предпразднства,
Богородичен глаголи сей.

Благода́рственное похвале́ние до́лжне, / я́коже вдови́ца о́ная два ле́пта, приношу́ Тебе́, Влады́чице, о всех дарова́ниих Твои́х: / Ты бо яви́лася еси́ покро́в ку́пно и по́мощь, / напа́стей и скорбе́й при́сно мя изыма́ющи. / Те́мже я́ко от среды́ горя́щия пе́щи изба́влься оскорбля́ющих мя, / от се́рдца взыва́ю Тебе́: / Богоро́дице, помози́ ми, моля́щи Христа́ Бо́га прегреше́ний оставле́ние да́ти мне, / Тя бо име́ю наде́жду, раб Твой.

Степенна, и прокимен гласа.

Канона два, отцев на 8. Ирмосы по дважды. Тропари на 6. В нихже предваряют воскресны тропаря два, сего ради, аще в 24-й день, во Октоихе не поется, и предпразднства на 6.

Канон воскресен, глас 6.
Песнь 1.

Ирмос: Волно́ю морско́ю / Скры́вшаго дре́вле / гони́теля мучи́теля – под земле́ю скры́ша спасе́нных о́троцы; / но мы, я́ко отрокови́цы, / Го́сподеви пои́м, / сла́вно бо просла́вися.

Стра́хом Тебе́ сме́ртная отверза́ются врата́, / и сокруша́ются вереи́ ве́чныя: / честны́м бо Твои́м схожде́нием воста́ша дре́внии мертвецы́, / весе́лием пою́ще, Христе́, Воскресе́ние Твое́.

Суди́щу Пила́тову предсто́ит хотя́й, беззако́нному суду́, / я́ко осу́жденник, Судия́, и от руки́ непра́ведныя в лице́ ударя́ется Бог, / Его́же трепе́щут земна́я и Небе́сная.

Канон отцев.

Аще вне 20-го случится Неделя святых отец, канон Октоиха воскресен со ирмосом на 4, и Крестовоскресен на 2, и Богородицы 2, и отцем от зде чтется на 6. Такожде и во прочих песнех отцем.

Днесь собо́р Боже́ственных оте́ц Христо́во Рождество́ предпра́зднует све́тло, / и пропису́ет сие́ пресла́вная благода́ть: / Авраа́м бо о́браз зако́на и о́троцы суть.

Дре́вле прие́млет Божество́ Еди́но Триипоста́сное свяще́нный Авраа́м, / ны́не же сопресто́льное Сло́во О́тчее Боже́ственным Ду́хом к де́тем прихо́дит, / сла́вно восхваля́емое.

Число́м и ве́рою Боже́ственныя Тро́ицы безбо́жие низве́ргше, / в пещи́ де́ти о́бразы чу́вственными сокрове́нныя Бо́жия та́йны ми́ру прояви́ша.

Авраа́м изба́вися от руки́ непра́ведныя, / пла́мене же пе́щнаго Боже́ственнии о́троцы иногда́, / и Дании́л проро́к от звере́й и ро́ва спасе́ся. / Те́мже ны́не Рождество́ Христо́во предпра́зднуем.

Богородичен: Обра́дованная, Безневе́стная Ма́ти, Де́во нетле́нная, блажи́м Тя: / и́бо от ро́да Авраа́мля и пле́мене Дави́дова процвела́ еси́, / Христа́ же родила́ еси́, проро́ки пропове́даннаго пре́жде.

Канон предпразднства, глас 1.
(Аще вне 20-го числа – оставляется.)
Песнь 1

Ирмос: Христо́с ражда́ется:

Христа́, пло́тию младе́нствовавшаго, / Христа́, во́лею обнища́вшаго, / Христа́, ви́дима бы́вша, гряде́т Де́ва в Вифлее́ме ны́не роди́ти, / Не́бо же и земля́ да ра́дуются.

Го́ры и хо́лми, взыгра́йте, / проро́цы Богогла́снии, лику́йте, / лю́дие и язы́цы, восплещи́те: / всех Спасе́ние и Просвеще́ние близ наста́, / во гра́де Вифлее́мсте ражда́емое.

Богородичен: Нищ бога́тый быва́ет, / обогаща́я и́же зло́бою обнища́вшия, / Челове́к Бог познава́ется от Де́вы Неискусобра́чныя кроме́ преложе́ния; / вси хвала́ми воспое́м Его́, я́ко просла́вися.

Катавасия: Христо́с ражда́ется – сла́вите! / Христо́с с Небе́с – сря́щите! / Христо́с на земли́ – возноси́теся! / По́йте Го́сподеви, вся земля́, / и весе́лием воспо́йте, лю́дие, / я́ко просла́вися.

Песнь 3.

Ирмос: Тебе́, на вода́х / пове́сившаго всю зе́млю неодержи́мо, / тварь, ви́девши на ло́бнем ви́сима, / у́жасом мно́гим содрога́шеся, / несть свят, / ра́зве Тебе́, Го́споди, взыва́ющи.

Во гро́бе тридне́вствовавый / воскреси́л еси́ животво́рным воста́нием уме́ршия от ве́ка, / и, осужде́ния разре́шшеся, ве́село ра́довахуся: / се избавле́ние прише́л еси́, Го́споди, взыва́юще.

Сла́ва Твоему́ воста́нию, Спа́се наш, / я́ко нас от а́да, тли и сме́рти изба́вил еси́, я́ко Всеси́лен, / и, воспева́юще, глаго́лем: / несть свят, ра́зве Тебе́, Го́споди Человеколю́бче.

 

Ин, отцем.

Ю́же по о́бразу сла́ву и по подо́бию Бо́жию ве́рно соблюда́юще, / злата́го о́браза пла́мень огне́м духо́вным страда́льчески угаси́ша о́троцы, пою́ще: / Еди́наго Го́спода зна́ем.

Му́дростию обложе́ни и Ду́ха си́лою, о́троцы / мудрецы́ Вавило́нския плене́ннии посрами́ша и де́рзостне взыва́ху: / несть свят, ра́зве Тебе́, Го́споди Человеколю́бче.

Ра́дуется и сликовству́ет с детьми́ и проро́ки зако́н / и предъигра́ет Госпо́дню Боже́ственному прише́ствию днесь, / и Авраа́м ра́дуется, я́ко от се́мене его́ ви́де Го́спода воплоща́ема.

Богородичен: Зача́тие без стра́сти, / прия́тие па́че сло́ва про́йде Рождества́ Твоего́, Богоро́дице: / проро́ки бо пропове́данное па́че естества́ та́инство нам яви́ся, / Сло́во Бо́жие, Сый Бог.

 

Ин. Ирмос: Пре́жде век:

И́же пре́жде век из Отца́ ро́ждся па́че мы́сли, / из Де́вы напосле́док воплоти́ся, я́коже весть Сам, / хотя́ челове́чество обнови́ти, истле́вшее лука́ваго зми́я сове́том.

И́же в Вы́шних соседя́й Отцу́ и Ду́ху, / смири́вшееся естество́ челове́ческое ви́дев, / Сын Бо́жий Безнача́льный нача́ло прие́млет / и хо́щет пло́тию роди́тися, я́ко челове́к.

Богородичен: Святе́йши А́нгел и всея́ тва́ри / Сове́та Вели́каго ны́не А́нгела без се́мене ражда́ет пло́тию / на воззва́ние всем, пою́щим непреста́нно Ему́: / Свят еси́, Го́споди.

Катавасия: Пре́жде век от Отца́ рожде́нному нетле́нно Сы́ну / и в после́дняя от Де́вы / воплоще́нному безсе́менно, / Христу́ Бо́гу возопии́м: / вознесы́й рог наш, / Свят еси́, Го́споди.

Ипакои, глас 8:

А́нгел отроко́в ороси́ пещь, / ны́не же жен плач разреши́, глаго́ля: / Что прино́сите ми́ра? / Кого́ и́щете во гро́бе? / Воста́ Христо́с и Бог: / есть бо Жизнь и Спасе́ние ро́да челове́ческаго.

Песнь 4.

Ирмос: На Кресте́ Твое́ Боже́ственное истоща́ние прови́дя, / Авваку́м, ужа́сся, вопия́ше: / Ты си́льных пресе́кл еси́ держа́ву, Бла́же, / приобща́яся су́щим во а́де, / я́ко Всеси́лен.

Во ад Боже́ственное низше́ствие Твое́, Христе́ Бо́же, ме́ртвым жизнь яви́ся: / Ты бо врага́ связа́л еси́ держа́ву до́ле, Благи́й, / и Небе́сную стезю́ челове́ком отве́рзл еси́.

Не истле́ во гро́бе пречи́стое те́ло Изба́вителя лежа́що, / но, я́ко си́лен, сокруши́ а́довы вереи́ / и воскре́се во сла́ве, Христе́, тридне́вно.

 

Ин, отцем.

Отце́в нача́ток: Авраа́ма, Исаа́ка и Иа́кова почти́м, / я́ко из тех се́мене возсия́ Христо́с, / вопло́щься из Де́вы, я́ко Всеси́лен.

Пропису́яй бу́дущая соше́ствию Христо́ву Дании́л / зве́ри, я́ко о́вцы, показа всем я́ве: / прови́де бо бу́дущее, я́ко проро́к Бо́жий.

Грехо́вным не привлече́ни я́дом, / от пла́мене изба́вистеся, де́ти: / зла́та бо чисте́йше су́ще му́дрии, в пещи́ пре́лести не слия́шася.

Богородичен: Велегла́сно пропове́дуется ожида́ние язы́ков / и спасе́ние ми́ра па́че естества́ Рождество́ Твое́, Пречи́стая, Честна́я, / его́же пое́т оте́ческая па́мять днесь.

 

Ин. Ирмос: Жезл из ко́рене:

Жезл из ко́рене Иессе́ова, Де́во, прозябла́ еси́, / цвет процве́тшая неувяда́емый, всех Соде́теля, / зе́млю цвета́ми всю я́ко Бо́га украша́ющаго, вопию́щую Ему́: / сла́ва си́ле Твое́й, Го́споди.

Сне́дию мя окра́дена лука́вою / и ра́зумом попо́лзшася и уподо́бльшася безслове́сным, Сло́ве Бо́жий, прише́л еси́, назида́я, / Младе́нец быв и во я́слех безслове́сных возле́г: / сла́ва си́ле Твое́й, Го́споди.

Богородичен: Из горы́ приосене́нныя, Иису́се, Де́вы, Тя, воплоще́ннаго, Авваку́м прови́де, / го́ры злы́я и хо́лмы сокруша́ющаго / и исчезнове́нию предаю́ща возноше́ния лука́ваго и де́монская возвыше́ния.

Катавасия: Жезл из ко́рене Иессе́ова / и цвет от него́, Христе́, / от Де́вы прозя́бл еси́, / из горы́, Хва́льный, приосене́нныя ча́щи / прише́л еси́, вопло́щся / от Неискусому́жныя, Невеще́ственный и Бо́же. / Сла́ва си́ле Твое́й, Го́споди.

Песнь 5.

Ирмос: Богоявле́ния Твоего́, Христе́, / к нам ми́лостивно бы́вшаго, / Иса́иа, Свет ви́дев Невече́рний, / из но́щи у́треневав, взыва́ше: / воскре́снут ме́ртвии, / и воста́нут су́щии во гробе́х, / и вси земноро́днии возра́дуются.

Блиста́яйся, ра́дость вообража́я я́вственне, А́нгел, / во гро́бе светлоно́сец показу́ется, / жена́м пропове́дая воста́ние, / и, оста́вльше плач, ра́довахуся Христу́ воскре́сшу, / от Него́же и непреста́нну ра́дость прия́ша.

За милосе́рдие Благи́й, И́же по нам прие́м зрак, / во́лею на Кресте́ пригвозди́лся еси́ мене́ ра́ди, / пе́рвее отве́ргша святу́ю Твою́ за́поведь сне́ди ра́ди в раи́, / и умира́еши человеколе́пно, живо́т подая́ мне.

 

Ин, отцем.

Отце́в нача́ток, я́ко началовожда́ зако́на и благода́ти, / от ро́да Авраа́мля днесь Дании́ла Боже́ственнаго почти́м: / я́ко проро́к бо Бо́жий предвозвести́ Христа́ от Де́вы / и Сего́ предусрета́ет Боже́ственное рожде́ние.

Прописа́вше я́сно к нам Госпо́дне прише́ствие А́нгеловым соше́ствием, / угаси́ша Авраа́мстии о́троцы пещь / и, тучеро́сен огнь соде́лавше, / в сем ве́рою о́браза злата́го сла́ву изнури́ша.

Загради́ уста́ звере́й Дании́л в ро́ве Ду́хом, / о́гненную же кре́пость угаси́ша Авраа́мстии о́троцы благода́тию / и, спа́сшеся си́и от тли, предвозвеща́ют Христа́ из Де́вы, / моля́ще я́ко Изба́вителя спасе́ния на́шего.

Богородичен: Боже́ственным Ду́хом явля́я от нас безстра́стно Твое́ прия́тие, Иса́иа вопия́ше, Го́споди, / бо́дрствуя зако́ном благода́ти: / от ро́да у́бо Авраа́мля, от пле́мене же Иу́дова по пло́ти Де́ва, / без се́мене, гряде́т ражда́ющи.

 

Ин. Ирмос: Бог Сый ми́ра:

Естество́м Влады́ка, в рабе́х соверше́нне, / Сын Бо́жий всесоверше́нный / благоволи́л за милосе́рдие зва́тися и Сын Челове́ческий Всеще́дрый. / Те́мже в верте́пе во́лею обнища́в, гряде́ши роди́тися, Пребла́же.

Невмести́мый естество́м, Христе́ Царю́, / ка́ко ма́лый Тя прии́мет верте́п? / Ка́ко я́сли возмо́гут Тя вмести́ти, / нас ра́ди от Ма́тере Неискусому́жныя пло́тию приходя́ща во Своя́? / Я́ко да устра́ншияся спасе́ши, Го́споди?

Богородичен: А́гница Па́стыря прии́де роди́ти, / гото́вися, святы́й верте́пе, / па́стырие, спеши́те, Па́стыря и А́гнца ро́ждшагося ви́дети, / волсви́, с да́ры угото́витеся, / Сему́ я́ко Царю́ поклони́тися пло́тию.

Катавасия: Бог Сый ми́ра, Оте́ц щедро́т, / Вели́каго Сове́та Твоего́ А́нгела, / мир подава́юща, посла́л еси́ нам; / тем, Богоразу́мия к све́ту наста́вльшеся, / от но́щи у́тренююще, / славосло́вим Тя, Человеколю́бче.

Песнь 6.

Ирмос: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, Многоми́лостиве.

Сме́рти умерщвле́ние и а́да, Бла́же, соде́лал еси́ разруше́ние / тридне́вным погребе́нием Твои́м, / жизнь же источи́л еси́, боголе́пно воскре́с, су́щим в ми́ре, / Иису́се благи́й. (2)

 

Ин, отцем.

Нрав страннолюби́в, ве́ра же высока́ Авраа́ма, су́ща пра́отца; / те́мже, Боже́ственное та́инство обра́зне прие́м, ра́довашеся, / пред Христо́м же теки́й ны́не весели́тся.

Тварь повину́ ны́не ве́ра отроко́м да́ром Зижди́теля: / огнь бо всея́дец и безсту́дный устыде́ся / чту́щих огня́ де́лателя, Иису́са Христа́.

Ми́ра свире́пство прише́ствием Христо́вым сочисля́тися изъяви́, / к ми́ру глубо́кому боголе́пно, загради́в уста́ львов, / Дании́л проро́к в ро́ве иногда́.

Богородичен: Из ложе́сн родила́ еси́ де́вственных Христа́, Марие́, Ма́ти безму́жная, / Его́же проро́цы ви́девше духо́вне, / Того предликовству́ют ны́не отцы́ рожде́ственная.

 

Ин. Ирмос: Из утро́бы Ио́ну:

Но́вое Не́бо су́щи, Влады́чице, из утро́бы Твоея́, я́ко из о́блака, / Христа́, сла́вы со́лнца, возсия́ти гряде́ши в верте́пе пло́тию, / я́ко хотя́ща сия́ньми Свои́ми све́тло вся земна́я исполне́ния озари́ти за милосе́рдие безме́рное.

Ви́дел еси́ на́шу боле́знь и озлобле́ние, Ще́дрый Христе́, / и не пре́зрил еси́ нас, но истощи́л еси́ Тебе́ Сама́го, не отступи́в Роди́теля, / и всели́лся еси́ во утро́бу Неискусобра́чную, / я́же неболе́зненно роди́ти Тя пло́тию в верте́пе предгряде́т.

Богородичен: Го́ры и хо́лми, поля́ и де́бри, / лю́дие и коле́на, язы́цы и вся́кое дыха́ние, воскли́кните, / весе́лия Боже́ственнаго исполня́еми: / прии́де и приспе́ всех избавле́ние, Сло́во Бо́жие Безле́тное, / под ле́том за милосе́рдие бы́вшее.

Катавасия: Из утро́бы Ио́ну младе́нца изблева́ морски́й зверь, / якова́ прия́т; / в Де́ву же все́льшееся Сло́во / и плоть прие́мшее про́йде, сохра́ншее нетле́нну. / Его́же бо не пострада́ истле́ния, / Ро́ждшую сохрани́ неврежде́нну.

Аще вне 20-го числа,
кондак отцев, глас 6:

Рукопи́саннаго о́браза не поче́тше, / но Неопи́санным Существо́м защити́вшеся, треблаже́ннии, / в по́двизе огня́ просла́вистеся; / среде́ же пла́мене нестерпи́маго стоя́ще, Бо́га призва́сте: / ускори́, о Ще́дрый! / И потщи́ся, я́ко ми́лостив, в по́мощь на́шу, / я́ко мо́жеши хотя́й.

Икос: Простри́ Твою́ ру́ку, / е́юже дре́вле прия́ша искуше́ние еги́птяне борю́щии и евре́и бори́мии, / не оста́ви нас, да не пожре́т нас смерть, жа́ждущая нас, / и сатана́, ненави́дяй нас; / но прибли́жися нам и пощади́ ду́ши на́ша, / я́коже пощади́л еси́ иногда́ о́троки Твоя́, су́щия в Вавило́не, / непреста́нно сла́вящия Тя, / и вве́рженныя Те́бе ра́ди в пещь, и от сея́ вопию́щия Ти: / ускори́, Ще́дрый, и потщи́ся, я́ко ми́лостив, на по́мощь на́шу, / я́ко мо́жеши хотя́й.

Аще же внутрь предпразднства,
кондак, глас 1.
Подобен: Лик а́нгельский:

Весели́ся, Вифлее́ме, Евфра́фо, гото́вися: / се бо А́гница, Па́стыря вели́каго во утро́бе нося́щи, е́же роди́ти тщи́тся, / Его́же зря́ще, Богоно́снии отцы́ веселя́тся, / с па́стырьми пою́ще Де́ву доя́щую.

Икос: Твоего́ Рождества́, Де́во, све́тлость зря́ще сия́ющую, / Авраа́м Боголюби́вый, Исаа́к приснопа́мятный, / Иа́ков и весь Богосо́бранный лик святы́х ра́дуется / и тварь приведо́ша к Твоему́ сре́тению ра́достными рече́нии: / ра́дости бо Хода́таица всем яви́лася еси́, / во утро́бе заче́ншая иногда́ в Вавило́не Ви́деннаго, / и о́троки, в пещь непра́ведне вве́рженныя, неопа́льны Соблю́дшаго, / и Тя Показа́вшаго па́че вся́каго ра́зума. / Тем и воспева́ют Зри́маго в рука́х Ю́ницы, / пою́ще Де́ву доя́щую.

Песнь 7.

Ирмос: Неизрече́нное чу́до: / в пещи́ Изба́вивый преподо́бныя о́троки из пла́мене / во Гро́бе мертв, бездыха́нен полага́ется / во спасе́ние нас, пою́щих: / Изба́вителю Бо́же, благослове́н еси́.

О, стра́ннаго чудесе́! / В Вы́шних седя́й на Престо́ле Госпо́дь, / То́йже прия́тием пло́ти смерть претерпе́, / но воскре́се Божества́ кре́постию, / совоскреси́в ме́ртвыя су́щия от ве́ка.

Ты сме́ртную кре́пость сотрясе́ и воскре́се, / воста́ние дая́ Тебе́ вои́стинну Го́спода сла́вящим / и Правосла́вною ве́рою Тебе́ вопию́щим: / Изба́вителю Бо́же, благослове́н еси́.

 

Ин, отцем.

Христа́ роди́в по пло́ти, ве́рою, / родонача́льниче о́тче Авраа́ме, яви́лся еси́ язы́ков ду́хом оте́ц я́ве / во спасе́ние нас, пою́щих: / Изба́вителю Бо́же, благослове́н еси́.

Безду́шнаго шу́ма, вотще́ восклица́ющаго, / одушевле́нных посрами́ песнь: / пещь бо, огне́м горя́щую, телесы́ попира́юще, / о́троцы невре́дно Изба́вителю пою́т: / Бо́же, благослове́н еси́.

Виде́нием воззре́в духо́вным, проро́к дре́вле Дании́л / Христо́во яви́ второ́е прише́ствие / и я́же в нем стра́шная предвозвеща́ет, вопия́: / Изба́вителю Бо́же, благослове́н еси́.

Богородичен: Стра́нное чу́до, во проро́цех повеству́емое и отце́м дре́вле явле́нно: / Де́ва Чи́стая, роди́ти хотя́щи, прии́де на спасе́ние нас, песнопою́щих: / Изба́вителю Бо́же, благослове́н еси́.

 

Ин. Ирмос: О́троцы, благоче́стию:

Лоза́ Боже́ственная, нетле́нный грозд узре́ливши, / ближа́щися, и́дет роди́ти весе́лия вино́ точа́щаго / и напоя́ющаго нас, Ему́ вопию́щих: / отце́в на́ших Бо́же, благослове́н еси́.

Боже́ственная Мирополо́жница, благово́нное Ми́ро внутрь нося́щи, / в верте́пе Вифлее́мли истощи́ти сие́ гряде́т, / благово́ния та́инственнаго исполня́ющее пою́щия: / отце́в Бо́же, благослове́н еси́.

Богородичен: Клеща́, ю́же Иса́иа проро́к дре́вле ви́де, / Боже́ственный угль, Христа́, во чре́ве прихо́дит иму́щи, / вся́ку вещь грехо́вную попаля́ющий, / ве́рных же ду́ши просвеща́ющий.

Катавасия: О́троцы, благоче́стию совоспита́ни, / злочести́ваго веле́ния небре́гше, / о́гненнаго преще́ния не убоя́шася, / но, посреде́ пла́мене стоя́ще, поя́ху: / отце́в Бо́же, благослове́н еси́.

Песнь 8.

Ирмос: Ужасни́ся, боя́йся, Не́бо, / и да подви́жатся основа́ния земли́: / се бо в мертвеце́х вменя́ется в Вы́шних Живы́й / и во Гроб мал странноприе́млется. / Его́же, о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

О, неизрече́ннаго Твоего́, Христе́, снизхожде́ния нас ра́ди смире́нных! / Се бо сме́рти вкуси́в, Бог безсме́ртен Сый, / во Гро́бе я́ко Челове́к положи́лся еси́, / но воскре́сл еси́, Сло́ве, совоскреси́в до́льняя, / Тебе́ превознося́щия во вся ве́ки.

Ужасе́ся всяк слух, / ка́ко Вы́шний во́лею прии́де на зе́млю / а́дову кре́пость разори́ти Кресто́м и погребе́нием / и вся совозста́ви взыва́ти: / о́троцы, благослови́те, свяще́нницы, воспо́йте, / лю́дие, превозноси́те во вся ве́ки.

 

Ин, отцем.

Твое́ заколе́ние предъизобразу́я, Авраа́м, Христе́, / его́же роди́ сы́на, на горе́ повину́яся Тебе́, Влады́ко, / я́коже овча́, взы́де пожре́ти хотя́й ве́рою; / но возврати́ся, ра́дуяся, с ним, / и сла́вя, и превознося́ Тя, Изба́вителя ми́ра.

Пла́менем неутружде́нным, Христе́, облече́ну Ти, я́ко ри́зою Боже́ственною, / огнь святы́х о́трок Твои́х угаси́ зело́, / и роса́ Твои́м низхожде́нием пою́щим шумя́ше: / свяще́нницы, по́йте и превозноси́те Его́ во ве́ки.

Дае́тся львом в снедь судо́м непра́ведным проро́к Дании́л, / но имя́ше повеле́нием воздержа́ния спо́стники благоче́стно зве́ри во глубине́ ро́вища. / Того́ моли́твами, Авраа́ма же и отроко́в / спаси́ в ми́ре, Христе́, пою́щия Тя.

Богородичен: Его́же провозвести́ша ве́рно проро́честии гла́си, / Иису́са Емману́ила, в челове́честе о́бразе гряду́ща, / Бо́жия и О́тча Сы́на же и Собезнача́льное Сло́во, / от Ду́ха Свята́го Де́ва Мари́я ражда́ет неискусому́жно в Вифлее́ме гра́де.

 

Ин. Ирмос: Чу́да преесте́ственнаго:

Сла́ва в Вы́шних Бо́гу, со А́нгелы возопии́м в весе́лии: / Спас ражда́ется, Влады́ка прихо́дит, Его́же звезда́ показу́ет, / волсви́ тща́тся Его́ в я́слех ви́дети; / да благослови́т тварь вся Го́спода / и превозно́сит во вся ве́ки.

С рабы́ написа́лся еси́ во́льно, Влады́ко, ке́сареву повину́яся зако́ну, / я́ко да челове́чество от рабо́ты лука́ваго, Бо́же, свободи́ши, Многоми́лостиве. / Те́мже, ра́дующеся, воспева́ем: / да благослови́т тварь вся Го́спода / и превозно́сит во вся ве́ки.

Богородичен: Младе́нца но́ва ношу́ Тя, Безнача́льне Сло́ве, / иску́са же му́жеска отню́д не позна́х, / Де́ва глаго́лаше, недоумева́ющися. / Кого́ на земли́ возъимену́ю Твоего́ Отца́? – не вем. / Те́мже со все́ми воспева́ю Ти: / да благослови́т тварь вся Го́спода / и превозно́сит во вся ве́ки.

Катавасия: Чу́да преесте́ственнаго / росода́тельная изобрази́ пещь о́браз: / не бо, я́же прия́т, пали́т ю́ныя, / я́ко ниже́ огнь Божества́ Де́вы, / в Ню́же вни́де утро́бу. / Тем, воспева́юще, воспое́м: / да благослови́т тварь вся Го́спода / и превозно́сит во вся ве́ки.

Песнь 9.

Ирмос: Не рыда́й Мене́, Ма́ти, / зря́щи во Гро́бе, / Его́же во чре́ве без се́мене зачала́ еси́, Сы́на: / воста́ну бо, и просла́влюся, / и вознесу́ со сла́вою непреста́нно я́ко Бог / ве́рою и любо́вию Тя велича́ющия.

Что рыда́еши, тва́ре, на Кресте́ ви́дящи и во гро́бе жи́зни Да́теля, я́ко зе́млена? / Воста́нет бо обновля́яй Тя све́тло, / тридне́вным воскресе́нием ад низложи́ / и ме́ртвыя совоздви́г, восхваля́ющия Его́.

А́ще и во Гроб низше́л еси́, я́ко мертв, Жизнода́вче, / но а́дову кре́пость разори́л еси́, Христе́, / совоздви́гнув ме́ртвыя, я́же пре́жде пожре́, / и воскресе́ние пода́л еси́, я́ко Бог, / ве́рою и любо́вию Тя велича́ющим.

 

Ин, отцем.

Су́щих пре́жде зако́на отце́в пра́здник соверша́юще, / от них боголе́пно почти́м Христа́: / Авраа́м бо, ку́пно и Исаа́к, и Иа́ков, проро́ков и зако́на яви́шася основа́ние / и благода́ти ве́рою Ду́ха пропове́дницы.

Огне́м показа́вый Моисе́ю в купине́ па́че ума́ богови́дне та́инство Бог, / во огнь к де́тем низше́д То́йже, / огне́м есте́ственным Божества́ Его́ пе́щный пла́мень ро́су показа́.

Со Авраа́мом, соше́дшеся, пресвяти́и де́ти / и Дании́л, ди́вный проро́к Бо́жий, / Исаа́к и Иа́ков с Моисе́ем и Ааро́н / Христо́ва пре́жде Рождества́ ликовству́ют ве́рно, / моля́щеся непреста́нно во е́же спасти́ся нам.

Богородичен: Сра́дуется вся тварь Твоему́ Рождеству́, Де́во: / Еде́ма бо Вифлее́м отве́рзе нам. / И се дре́ва жи́зни вси наслажда́ющеся ве́рно, вопие́м приле́жно: / моли́твы на́ша, Влады́чице, испо́лни.

 

Ин. Ирмос: Та́инство стра́нное:

Та́инства стра́нная, стра́шная и пресла́вная: / сла́вы Госпо́дь прии́де на зе́млю / и в верте́п, обнища́в, вни́де пло́тию, / Ада́ма воззва́ти ища́ и Е́ву боле́зней изба́вити.

Пелена́ми Твои́ми реши́ши плени́цы грехопаде́ний, / мно́гою же нището́ю вся обогаща́еши, Ще́дре: / безслове́сныя зло́бы, поло́жся в я́сли безслове́сных, челове́ки изменя́еши, / Бо́жий Сло́ве пребезнача́льне.

Богородичен: Про́поведи проро́ческия коне́ц прия́ша: / Его́же бо прореко́ша преити́ в сконча́ние лет, / прии́де и яви́ся, из Чи́стыя Де́вы воплоща́емь, / Того́ мы́слию чи́стою прии́мем.

Катавасия: Та́инство стра́нное ви́жу и пресла́вное: / Не́бо – верте́п, / престо́л Херуви́мский – Де́ву, / я́сли – вмести́лище, / в ни́хже возлеже́ Невмести́мый – Христо́с Бог, / Его́же, воспева́юще, велича́ем.

Светилен воскресен.
Слава, отцев. Подобен: Ученико́м:

Патриа́рхов избра́ннии и пре́жде зако́на отцы́ ве́рою предвозсия́ша, / Авраа́м, Исаа́к же и Иа́ков, я́ко свети́льницы: / вси бо проро́цы и пра́ведницы возсия́ша от них, я́ко свещи́ светови́дныя, / и тварь всю луча́ми просвети́ша честна́го проро́чества, / и приле́жно мо́лятся к Бо́гу о ми́ре.

И ныне: А́гница нескве́рная, А́гнца ро́ждшая, Сло́ва Пребезнача́льнаго в после́дняя времена́, / бя́ше сие́ чу́дно, Ада́мова вну́ка и Дави́дова по достоя́нию; / Ея́же несказа́нное Рождество́ отце́в мно́жество предпра́зднствует досто́йно.

Аще же в 24-й день,
воскресен светилен не глаголется, но отцев:

От се́мене вво́дится Авраа́мля / и Боже́ственнаго Дави́да Богоотца́ Пребезнача́льное Сло́во, / И́же о́троки равночи́сленныя пе́рвее Тро́ице / чу́дно А́нгела сше́ствием из пла́мене спасы́й / и рыда́ние в ра́дость преложи́вый жен.

Слава: Патриа́рхов избра́ннии и пре́жде зако́на отцы́ ве́рою предвозсия́ша, / Авраа́м, Исаа́к же и Иа́ков, я́ко свети́льницы: / вси бо проро́цы и пра́ведницы возсия́ша от них, я́ко свещи́ светови́дныя, / и тварь всю луча́ми просвети́ша честна́го проро́чества, / и приле́жно мо́лятся к Бо́гу о ми́ре.

И ныне: Весели́ся, Вифлее́ме, и ты, Евфра́фо гото́вися: / Богоро́дица бо прихо́дит в верте́пе и я́слех роди́ти Бо́га неизрече́нно. / О, стра́шнаго та́инства! / Его́же ны́не Боже́ственное Рождество́ Авраа́м, Исаа́к же и Иа́ков, / патриа́рси вси и проро́цы све́тло предпра́зднуют / и челове́цы со А́нгелы.

На хвалитех стихиры воскресны 4, и отцев 4.
Стихиры отцев, глас 5.
Подобен: Ра́дуйся, по́стников:

Возвы́си твой глас и́стинно, / Сио́не, Боже́ственный гра́де, / и пропове́ждь отце́в Боже́ственную па́мять, / со Авраа́мом Исаа́ка и Иа́кова почита́ющи присносла́внаго, / се со Иу́дою и Леви́ем велича́ем Моисе́я вели́каго и Ааро́на чу́днаго / и почита́ем с Дави́дом Иису́са и Самуи́ла вси. / Предпра́зднству Христо́ву Боже́ственную похвалу́ / пе́сньми Боже́ственными пле́щуще, / я́же от Него́ благода́ть улучи́ти про́сим / и ми́ру дарова́ти ве́лию ми́лость. (2)

Стих: Благослове́н еси́, Го́споди Бо́же оте́ц на́ших, / и хва́льно и просла́влено И́мя Твое́ во ве́ки.

Гряди́, на о́гненную иногда́ возсе́дый, Илие́, Боже́ственную колесни́цу, / и Богому́дре Елиссе́е со Езеки́ею во еди́но, / Оси́е, ку́пно сра́дуйтеся, / честна́я же двоенадеся́тице проро́ков Богодохнове́нная, / Рождеству́ Христо́ву сликовству́йте / и в пе́снех, вси пра́веднии, воспо́йте, / о́троцы всеблаже́ннии, / росо́ю Ду́ха угаси́вшии пла́мень пе́щный, / о нас моли́те Христа́ / низпосла́ти душа́м на́шим ве́лию ми́лость.

Стих: Я́ко пра́ведн еси́ о всех, / я́же сотвори́л еси́ нам.

Яви́ся, Я́же от ве́ка на земли́ / пропове́даемая проро́ки в веща́ниих, Де́ва Богоро́дица, / Ю́же патриа́рси му́дрии и пра́ведных собо́ри возвеща́ют, / с ни́ми же сликовству́ет и жен благоле́пие: / Са́рра, Реве́кка, Рахи́ль, и А́нна же, / и сла́вная Мариа́м Моисе́ева ку́пно. / С си́ми сра́дуются и ми́ра концы́, / вся тварь почита́ет, / я́ко Зижди́тель всех и Бог прихо́дит пло́тию роди́тися / и дарова́ти нам ве́лию ми́лость.

Слава, глас 8: Зако́нных уче́ний сосло́вие / во пло́ти явля́ет Христо́во Боже́ственное Рождество́, / пре́жде зако́на благода́ть благовеству́ющия, / я́ко па́че зако́на в ве́ре су́щия; / те́мже, тле́ния измене́нию су́щу хода́тайственно, / во а́де держи́мым душа́м предпропове́даху воскресе́ния ра́ди: / Го́споди, сла́ва Тебе́.

Ины стихиры, егда не поется воскресно, глас 4.
Подобен: Зва́нный свы́ше:

Иса́ии глас исполня́ется: / се бо Де́ва Необъя́тнаго, / опису́емаго пло́тию, / во утро́бе но́сит / и пресла́вно роди́ти прихо́дит. / Богоприя́тный верте́пе, украси́ся, / Вифлее́ме, угото́вися: / Царь бо тя изво́ли во оби́телище. / Приими́те, я́сли, / повива́ема Младе́нца Христа́, / хотя́ща реши́ти плени́цы согреше́ний челове́ков бла́гостию.