Крестобогородичен, глас тойже.

Подобен: О пресла́внаго чудесе́!

Я́ко ви́де Тя распина́ема на ло́бнем Спа́се, / изменя́шеся вся тварь, / и содрога́шеся дви́жущеся не терпя́щи. / Де́ва же Чи́стая и Ма́ти Твоя́, / рыда́ющи Тебе́ вопия́ше: / увы́ мне, о Ча́до Мое́, Спа́се Мой сладча́йший, / что но́вое сие́ и пресла́вное и стра́нное виде́ние?

Чтец: Благо есть исповедатися Господеви и пети имени Твоему, Вышний, возвещати заутра милость Твою и истину Твою на всяку нощь. (Дважды.)

Трисвятое по Отче наш: Священник: Яко Твое есть Царство: Чтец: Аминь.

И тропарь: В храме стояще славы Твоея, на небеси стояти мним, Богородице, Дверь Небесная, отверзи нам двери милости Твоея.

Господи, помилуй. (40 раз.)

Слава: И ныне:

Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.

Именем Господним благослови, отче.

Священник: Сый благословен Христос Бог наш всегда, ныне и присно и во веки веков.

Чтец: Аминь.

Небесный Царю, веру утверди, языки укроти, мир умири, святый храм сей добре сохрани: прежде отшедшия отцы и братию нашу, в селениих праведных учини: и нас в покаянии и исповедании приими, яко Благий и Человеколюбец.

И глаголет священник молитву святаго Ефрема:

Господи и Владыко живота моего, дух праздности, уныния, любоначалия и празднословия не даждь ми. (Поклон великий.)

Дух же целомудрия, смиренномудрия, терпения и любве даруй ми, рабу Твоему. (Поклон великий.)

Ей Господи Царю, даруй ми зрети моя прегрешения и не осуждати брата моего, яко благословен еси во веки веков. Аминь. (Поклон великий.)

Таже малых 12, глаголюще в себе на кийждо поклон: Боже, очисти мя, грешнаго.

И паки: Господи и Владыко живота моего, дух праздности, уныния, любоначалия и празднословия не даждь ми.

Дух же целомудрия, смиренномудрия, терпения и любве даруй ми, рабу Твоему.

Ей Господи Царю, даруй ми зрети моя прегрешения и не осуждати брата моего, яко благословен еси во веки веков. (И поклон един великий.)

Чтец: Аминь.

ЧАС ПЕРВЫЙ

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем Самому Христу, Цареви и Богу нашему.

Псалом 5 (Глаголы моя внуши, Господи…).

Псалом 89 (Господи, прибежище был еси нам в род и род…).

Псалом 100 (Милость и суд воспою Тебе, Господи…).

Слава: И ныне:

Аллилуиа, аллилуиа, аллилуиа, слава Тебе, Боже. (Трижды.)

Господи, помилуй. (Трижды.)

[В понедельник и пятницу кафисма не читается.]

[Во вторник:

Слава: И ныне:

И чтется КАФИСМА 13-я (пс. 91-100).

 

В среду:

Слава: И ныне:

И чтется КАФИСМА 2-я (пс. 9-16).

 

В четверг:

Слава: И ныне:

И чтется КАФИСМА 9-я (пс. 64-69). ]

 

Посем священник, став пред царскими дверьми, глаголет настоящий тропарь со стихи, во глас 6:

Заутра услыши глас мой, Царю мой и Боже мой. (Поклон великий.)

Лик: Заутра услыши глас мой, Царю мой и Боже мой.

Стих 1: Глаголы моя внуши, Господи, разумей звание мое. (Поклон великий.)

Лик: Заутра услыши глас мой, Царю мой и Боже мой.

Стих 2: Яко к Тебе помолюся, Господи. (Поклон великий.)

Лик: Заутра услыши глас мой, Царю мой и Боже мой.

Священник: Слава:

Чтец: И ныне: Что Тя наречем, о Благодатная? Небо, яко возсияла еси Солнце Правды. Рай, яко прозябла еси Цвет Нетления. Деву, яко пребыла еси нетленна. Чистую Матерь, яко имела еси на святых Твоих объятиях Сына, всех Бога. Того моли спастися душам нашим.

Таже поем на оба лика:

Стопы моя направи по словеси Твоему, и да не обладает мною всякое беззаконие. (Дважды.)

Избави мя от клеветы человеческия, и сохраню заповеди Твоя. (Дважды.)

Лице Твое просвети на раба Твоего и научи мя оправданием Твоим. (Дважды.)

Да исполнятся уста моя хваления Твоего, Господи, яко да воспою славу Твою, весь день великолепие Твое. (Трижды.)

Посем чтец глаголет:

Трисвятое по Отче наш: Священник: Яко Твое есть Царство: Чтец: Аминь.

В понедельник, вторник и четверг Богородичен: Преславную Божию Матерь, и святых Ангел Святейшую немолчно воспоим сердцем и усты, Богородицу Сию исповедающе, яко воистинну рождшую Бога воплощенна и молящуюся непрестанно о душах наших.

В среду и пятницу Богородичен: Скоро предвари, прежде даже не поработимся врагом хулящим Тя, и претящим нам, Христе Боже наш, погуби Крестом Твоим борющия нас, да уразумеют, како может православных вера, молитвами Богородицы, Едине Человеколюбче.

Господи, помилуй. (40 раз.)

Иже на всякое время и на всякий час, на небеси и на земли покланяемый и славимый Христе Боже, долготерпеливе, многомилостиве, многоблагоутробне, Иже праведныя любяй и грешныя милуяй, Иже вся зовый ко спасению, обещания ради будущих благ. Сам, Господи, приими и наша в час сей молитвы, и исправи живот наш к заповедем Твоим: души наша освяти, телеса очисти, помышления исправи, мысли очисти и избави нас от всякия скорби, зол и болезней. Огради нас святыми Твоими Ангелы, да ополчением их соблюдаеми и наставляеми, достигнем в соединение веры, и в разум неприступныя Твоея славы: яко благословен еси во веки веков. Аминь.

Господи, помилуй. (Трижды.)

Слава: И ныне: Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.

Именем Господним благослови, отче.

Священник: Боже, ущедри ны и благослови ны, просвети лице Твое на ны и помилуй ны.

Чтец: Аминь.

И глаголет священник молитву святаго Ефрема (с 16 поклонами).

Чтец: Аминь.

Трисвятое по Отче наш: Священник: Яко Твое есть Царство: Чтец: Аминь.

Господи, помилуй. (12 раз.)

Священник: Христе, Свете Истинный, просвещаяй и освящаяй всякаго человека, грядущаго в мир, да знаменается на нас свет лица Твоего, да в нем узрим Свет неприступный, и исправи стопы наша к деланию заповедей Твоих, молитвами Пречистыя Твоея Матере и всех Твоих святых. Аминь.

Лик: Взбранной Воеводе победительная, яко избавльшеся от злых, благодарственная восписуем Ти, раби Твои, Богородице; но яко имущая державу непобедимую, от всяких нас бед свободи, да зовем Ти: радуйся, Невесто Неневестная.

Священник: Слава Тебе, Христе Боже, Упование наше, слава Тебе.

Лик: Слава: И ныне:

Господи, помилуй. (Трижды.)

Благослови.

Священник глаголет отпуст:

Христос, Истинный Бог наш, молитвами Пречистыя Своея Матере, предстательствы честных небесных сил безплотных, святых славных и всехвальных апостол, (святых храма и дне), святых праведных Богоотец Иоакима и Анны, и всех святых, помилует и спасет нас, яко Благ и Человеколюбец.

Лик поет многолетие:

Великаго Господина и отца нашего Кирилла, Святейшаго Патриарха Московскаго и всея Руси, и Господина нашего Высокопреосвященнейшаго Иону, митрополита Астраханского, братию святаго храма сего и вся православныя христианы, Господи, сохрани их на многая лета.

ЛИТИЯ

В притворе (или в соответствующем месте храма) заранее устанавливается панихидный стол (тетрапо́д). По окончании 1-го часа или вечерни священник берет кадило и в предшествии двух свещеносцев исходит в притвор северными вратами (царские врата и завеса не открываются). За ним, при пении самогласной стихиры храма, следуют хор и молящиеся. Стихира берется из службы того праздника или святого, которому посвящен придел, где совершается служба. Это может быть стихира по 50-м псалме или одна из литийных стихир. (Если святой не имеет праздничного знака, шестеричный или славословный, и его служба не содержит указанных песнопений, стихира берется с «Господи, воззвах» или из другого цикла стихир.)

Иерей возглашает: Благословен Бог наш…

Певцы: Аминь.

Чтец: Трисвятое. По « Отче наш » иерей – возглас.

Певцы: Аминь.

И тропари сия, глас 4:

Со духи праведных скончавшихся, / душу раба Твоего [ или рабы Твоея], Спасе, упокой, / сохраняя ю во блаженной жизни, / яже у Тебе, Человеколюбче.

В покоищи Твоем, Господи, / идеже вси святии Твои упокоеваются, / упокой и душу раба Твоего [ или рабы Твоея], яко един еси Человеколюбец.

Слава: Ты еси Бог сошедый во ад, и узы окованных разрешивый, / Сам и душу раба Твоего [ или рабы Твоея] упокой.

И ныне: Едина чистая и непорочная Дево, Бога без семене рождшая, / моли спастися души его [ или ея].

Сугубая заупокойная ектения: Помилуй нас, Боже…

Возглас: Яко Ты еси Воскресение…

Слава Тебе, Христе Боже…

Отпуст: Воскресый из мертвых…

По отпусте глаголется особый стих: Вечная ваша память, достоблаже́ннии отцы и братия наша, присно помина́емии (трижды).

Священник: Бог да ублажи́т и упоко́ит их и нас помилует, яко Благ и Человеколюбец.

ЧАС ТРЕТИЙ

Священник: Благословен Бог наш всегда, ныне и присно и во веки веков.

Чтец: Аминь.

Слава Тебе, Боже наш, слава Тебе.

Царю Небесный… Трисвятое по Отче наш: Священник: Яко Твое есть Царство: Чтец: Аминь. Господи, помилуй. (12 раз.) Слава: И ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем Самому Христу, Цареви и Богу нашему.

Псалом 16 (Услыши, Господи, правду мою…).

Псалом 24 (К Тебе, Господи, воздвигох душу мою…).

Псалом 50 (Помилуй мя, Боже, по велицей милости Твоей…).

Слава: И ныне: Аллилуиа, аллилуиа, аллилуиа, слава Тебе, Боже. (Трижды.) Господи, помилуй. (Трижды.) Слава:

Другой чтец: И ныне:

 

И чтется

В понедельник КАФИСМА 7-я (пс. 46-54).

Во вторник КАФИСМА 14-я (пс.101-104).

В среду КАФИСМА 3-я (пс.17-23).

В четверг КАФИСМА 10-я (пс.70-76).

В пятницу КАФИСМА 19-я (пс.134-142).

По кафисме священник, став пред царскими дверьми, глаголет настоящий тропарь со стихи, во глас 6:

Господи, Иже Пресвятаго Твоего Духа в третий час апостолом Твоим низпославый: Того, Благий, не отыми от нас, но обнови нас, молящих Ти ся. (Поклон великий.)

Лик: Господи, Иже Пресвятаго Твоего Духа в третий час апостолом Твоим низпославый: Того, Благий, не отыми от нас, но обнови нас, молящих Ти ся.

Стих 1: Сердце чисто созижди во мне, Боже, и дух прав обнови во утробе моей. (Поклон великий.)

Лик: Господи, Иже Пресвятаго Твоего Духа в третий час апостолом Твоим низпославый: Того, Благий, не отыми от нас, но обнови нас, молящих Ти ся.

Стих 2: Не отвержи мене от лица Твоего и Духа Твоего Святаго не отыми от мене. (Поклон великий.)

Лик: Господи, Иже Пресвятаго Твоего Духа в третий час апостолом Твоим низпославый: Того, Благий, не отыми от нас, но обнови нас, молящих Ти ся.

Священник: Слава:

Чтец: И ныне: Богородице, Ты еси лоза истинная, возрастившая нам плод живота: Тебе молимся, молися, Владычице, со святыми апостолы, помиловати души наша.

Господь Бог благословен, благословен Господь день дне, поспешит нам Бог спасений наших: Бог наш, Бог спасати.

Трисвятое по Отче наш: Священник: Яко Твое есть Царство: Чтец: Аминь.

Благословен еси, Христе Боже наш, Иже премудры ловцы явлей, низпослав им Духа Святаго, и теми уловлей вселенную, Человеколюбче, слава Тебе.

Слава: Скорое и известное даждь утешение рабом Твоим, Иисусе, внегда унывати духом нашим, не разлучайся от душ наших в скорбех, не удаляйся от мыслей наших во обстояниих: но присно нас предвари. Приближися нам, приближися, везде Сый, якоже со апостолы Твоими всегда еси, сице и Тебе желающим соедини Себе, Щедре, да совокуплени Тебе поем и славословим Всесвятаго Духа Твоего.

И ныне: Надежда и предстательство и прибежище христиан, необоримая стена, изнемогающим пристанище небурное Ты еси, Богородице Пречистая: но яко мир спасающая непрестанною Твоею молитвою, помяни и нас, Дево Всепетая.

Господи, помилуй. (40 раз.)

Иже на всякое время и на всякий час, на небеси и на земли покланяемый и славимый Христе Боже, долготерпеливе, многомилостиве, многоблагоутробне, Иже праведныя любяй и грешныя милуяй, Иже вся зовый ко спасению, обещания ради будущих благ. Сам, Господи, приими и наша в час сей молитвы, и исправи живот наш к заповедем Твоим: души наша освяти, телеса очисти, помышления исправи, мысли очисти и избави нас от всякия скорби, зол и болезней. Огради нас святыми Твоими Ангелы, да ополчением их соблюдаеми и наставляеми, достигнем в соединение веры, и в разум неприступныя Твоея славы: яко благословен еси во веки веков. Аминь.

Господи, помилуй. (Трижды.)

Слава: И ныне:

Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.

Именем Господним благослови, отче.

Священник: Боже, ущедри ны и благослови ны, просвети лице Твое на ны и помилуй ны.

Чтец: Аминь.