В понедельник кафисмы и седальны

КАФИСМА 4-я (пс. 24-31).

Седальны Октоиха умилительнии, глас 8:

Оком благоутробным, Господи, виждь мое смирение, яко помале жизнь моя иждивается, и от дел несть мне спасения. Сего ради молюся: оком благоутробным, Госпо­ди, виждь мое смирение, и спаси мя.

Стих: Господи, да не яростию Твоею обличиши мене, ниже гневом Твоим накажеши мене.

Яко Судии предстоящу, попецыся, душе, и страшнаго дне час помышляй: суд бо немилостив есть не сотворшим милости. Возопий убо Христу Богу: Сердцеведче, согрешйх, прежде даже не осудиши, помилуй мя.

[Аще же прилучится Минеи святый, имеяй кондак, мученичен Октоиха (зри Приложение) чтется зде с припевом: Дивен Бог во святых Своих, Бог Израилев.

Светила умная явистеся святии мученицы, мглу бо прелести упразднисте верою, и душевныя свещи ваша просветисте, и с Женихом со славою внидосте в небес­ный чертог: и ныне молим вы, молитеся спастися душам нашим].

Слава, и ныне, Богородичен: Мысленная врата жизни, Пречистая Богородице, притекающия Тебе верно избави от бед, да славим пресвятое рождество Твое, во спасение душ наших.

Лик: Господи, помилуй. (Трижды.). Слава: Чтец: И ныне:

КАФИСМА 5-я (пс. 32-36).

Седален Триоди, господина Иосифа, глас 2:

Подобен: Милосердия сущи:

Поста божественным начатком умиление стяжим, от души вопиюще: Владыко Христе, молитву нашу приими, яко избранное кадило, и избави нас, молимся, злосмрадныя тли и муки страшныя, яко един сый Благоуветливый.

Слава: Тот же седален.

И ныне: Милосердия сущи источник, милости сподоби нас, Богородице, призри на люди согрешившия, яви яко присно силу Твою: на Тя бо уповающе, радуйся, вопием Ти, якоже иногда Гавриил безплотных Архистратиг.

Лик: Господи, помилуй. (Трижды.). Слава: Чтец: И ныне:

КАФИСМА 6-я (пс. 37-45).

Седален Триоди, господина Феодора, глас 2:

Подобен: Пречистому Твоему образу:

Всечестное воздержание начнем светло, лучами сияюще святых заповедей Христа Бога нашего, любве светлостию, молитвы блистанием, чистоты очищением, благомужества крепостию: яко да светоносни предварим во святое и тридневное Воскресение, осиявающее нетление миру.

Слава: Всечестное воздержание начнем светло, лучами сияюще святых заповедей Христа Бога нашего, любве светлостию, молитвы блистанием, чистоты очищением, благомужества крепостию: яко да светоносни предварим во святое и тридневное Воскресение, осиявающее нетление миру.

И ныне: Необоримую молитву Твою стяжав в лютых, свобождаюся от оскорбляющих мя паче надежди чудно, о Мати Божия! предваряеши всегда просящим Тя верно. Отонудуже благодарно вопием Ти: приими, Владычице, краткая благодарственная, вместо сих буди ми во всех помощь.

 

Во вторник кафисмы и седальны

КАФИСМА 10-я (пс. 70-76).

Седальны Октоиха умилительнии, глас 8:

Яко блудница припадаю Ти, да прииму оставление, и вместо мира, слезы от сердца приношаю Ти, Христе Боже: да яко оную ущедриши мя, Спасе, и подаси очи­щение грехов. Яко оная бо зову Ти: избави мя от тимения дел моих.

Стих: Господи, да не яростию Твоею обличиши мене, ниже гневом Твоим накажеши мене.

День он страшный помышляющи, душе моя, побди, вжигающи свещу твою, елеем просвещающи: не веси бо когда приидет к тебе глас глаголющий: се Жених! блюди убо, душе моя, да не воздремлеши, и пребудеши вне толкущи, яко пять дев: но бодренно пожди, да усрящеши Христа елеем маститым, и даст ти чертог Божественный славы Своея.

[Аще же прилучится Минеи святый, имеяй кондак, мученичен Октоиха (зри Приложение) чтется зде с припевом: Дивен Бог во святых Своих, Бог Израилев.

Светом небесным сияет днесь сия скиния: в сей бо воинства ангельская радуются, с нимиже мученичестии лицы веселятся о памяти страстотерпец. Тех молитвами низпосли миру Твоему мир, Христе, и велию милость].

Слава, и ныне, Богородичен: Недвижимое утвержде­ние веры, и честный дар душ наших. Богородицу песньми величаем вернии: радуйся, камень жизни во чреве Твоем вместившая. Радуйся, концей надеждо, скорбящих за­ступление. Радуйся, Невесто Неневестная.

Лик: Господи, помилуй. (Трижды.). Слава: Чтец: И ныне:

КАФИСМА 11-я (пс. 77-84).

Седален Триоди, глас 2:

Подобен: Преблагословенна:

Преблагословенна благодать всечестнаго поста: Моисей бо тем прославися, и закон в писмени на скрижалех прият, огня сильнейшии отроцы юнии явишася. В том убо погасим плотския страсти пламенеющия, Христу Спасу вопиюще: обращение нам всем даруй, и избави геенны.

Слава: Иный, глас тойже: Подобен: Милосердия сущи:

Покаяния наста время, воздержания покажи плоды, о душе моя! Воззри к преждепокаявшимся, воззови Христу: согреших, спаси мя, якоже спасл еси, Владыко, мытаря, воздохнувша от сердца, Благий, един сый Многомилостивый.

И ныне: Предстательство теплое христиан, Сына Твоего моли присно, Богородице, всякаго злодейства и лютости избавити нас борителя, и дати нам прощение, ихже согрешихом, благоутробия ради щедрот, Твоими молитвами, Мати Дево.

Лик: Господи, помилуй. (Трижды.). Слава: Чтец: И ныне:

КАФИСМА 12-я (пс.85-90).

По кафисме седальны Триоди, глас 5:

Подобен: Господи, чашу муки:

Господи, спасительное воздержание двоеденствующе вопием Ти: умили сердца нас, рабов Твоих, и приими сущия со страхом молитвы наша, подая нам благотеченное поста поприще, очищение и велию милость.

Слава: Господи, спасительное воздержание двоеденствующе вопием Ти: умили сердца нас, рабов Твоих, и приими сущия со страхом молитвы наша, подая нам благотеченное поста поприще, очищение и велию милость.

И ныне: Богородичен: Подобен: Собезначальное Слово:

Цвет Божественный, Кореню прозябший, кивоте, и свещниче, и стамно всезлатая, Святая трапезо, хлеб жи­вота носящая, яко Сына Твоего и Бога умоли Его, со свя­тым Предтечею, еже ущедрити и спасти, Богородицу исповедающия Тя.

 

 

 

В среду кафисмы и седальны

КАФИСМА 19-я (пс. 134-142).

По 1-м стихословии седальны Октоиха крестны, глас 8:

Видя разбойник Начальника жизни, на Кресте висяща, глаголаше: аще не бы Бог был воплощься, Иже с нами распныйся, не бы солнце лучи своя потаило, ниже бы земля трепещущи тряслася: но вся терпяй, помяни мя, Господи, во Царствии Твоем.

Стих: Возносите Господа Бога нашего, и покланяйтеся подножию ногу Его, яко свято есть.

Посреде двою разбойнику мерило праведное обретеся Крест Твой: оному убо низводиму во ад тяготою хуления: другому же легчащуся от прегрешений к познанию бого­словия: Христе Боже, слава Тебе.

[Аще же прилучится Минеи святый, имеяй кондак, мученичен Октоиха (зри Приложение) чтется зде с припевом: Дивен Бог во святых Своих, Бог Израилев.

Теснаго и скорбнаго пути неуклоннии путешествен­ницы бысте, святии мученицы: искушений бо волнение претерпесте, и безплотных слуг жительство восприясте, камень терпения, и основания благочестия показастеся, молите Христа Бога о душах наших].

Слава, и ныне, Крестобогородичен: Агнца и Пастыря, и Спаса мира, на Кресте зрящи, рождшая Тя глаголаше слезящи: мир убо радуется, приемля избавление, утроба же Моя горит, зрящи Твое распятие, еже за всех терпиши, Сыне и Боже Мой.

Лик: Господи, помилуй. (Трижды.). Слава: Чтец: И ныне:

КАФИСМА 20-я (пс. 143-150).

Седален Триоди, глас 2:

Подобен: Благообразный Иосиф:

Страстьми Твоими всем безстрастие давый, Челове­колюбче, страсти плоти моея умертвив Твоим Крестом: Божественную сподоби Страсть видети, постом благоугождающа славе Твоей, да прииму богатно велию ми­лость.

Слава: Тот же седален.

И ныне: Крестобогородичен, глас тойже:

Подобен: Милосердия сущи:

Дева и Мати Твоя, Христе, на древе зрящи Тя мертва простерта, плачущи горько. Сыне Мой, глаголаше, что страшное сие таинство, всем даруяй живот вечный, во­лею на Кресте како умираеши смертию поносною?

Лик: Господи, помилуй. (Трижды.) Слава: Чтец: И ныне:

КАФИСМА 1-я (пс. 1-8).

Седален Триоди, глас 2:

Подобен: Животворящий:

Светотворное время, егоже ныне освятил еси, и даро­вал еси нам воздержания, Господи, Ты сподоби нас во умилении всех чисте прейти мирствующих, Креста крепостию, едине Человеколюбче.

Слава: Светотворное время, егоже ныне освятил еси, и даро­вал еси нам воздержания, Господи, Ты сподоби нас во умилении всех чисте прейти мирствующих, Креста крепостию, едине Человеколюбче.

И ныне: Крестобогородичен, глас тойже:

Подобен: Милосердия двери:

Честным Крестом Сына Твоего сохраняеми, Владычи­це Чистая Богородице, всякий прилог борителя вси удоб­но низлагаем. Темже Тя по долгу ублажаем, яко Матерь Света, едину надежду душ наших.