Зде ирмос Минеи святаго не поется, но поем оный по конце песни. 


Мы поможем в написании ваших работ!



ЗНАЕТЕ ЛИ ВЫ?

Зде ирмос Минеи святаго не поется, но поем оный по конце песни.



К тропарем же стихи припеваются по чину.

Стих: Господь взыде на небеса и возгреме, Той судит концем земли, Праведен сый.

И 1-й тропарь канона Минеи святаго: Утверждение, Христе, и стену необориму, в персех преподобная Твоя стяжавши, прилоги не поколебася врага: но сего до конца потреби.

Стих: И даст крепость царю нашему, и вознесет рог христа Своего.

И 2-й тропарь канона Минеи святаго: Возжелавши Христовы красоты, и Сего любовию снедаема, страданием сочеталася еси Ему, Евдокие богомудрая и всеславная.

Слава:

И 3-й тропарь канона Минеи святаго: Крещением Христовым, и слезами твоими, и по сем кровьми мучения очистившися, храм была еси Троице, и место священия.

И ныне:

И Богородичен канона Минеи святаго: От Анны радость роду процвела еси, и раждаеши, Дево, Царя: и срадуются рождеству Твоему жены, разрешшеся Тобою от клятвы.

Лик поет ирмос Минеи, третия песни: Утверди нас в Тебе, Господи, древом умерщвей грех, и страх Твой всади в сердца нас поющих Тя.

Посем ектения малая.

Чтец: седален Минеи святаго (единожды): Просвещшися зарею Божественною, прелестную оставила еси тму, и житие восприяла еси с плотию невещественное, благодатьми Божественными исполнившися духа, малым провещанием мертвыя воскресила еси. Тем при кончине мучения венцем Божественне украсилася еси, и льстиваго посрамила еси, Евдокие равноангельная: моли Христа Бога, прегрешений оставление даровати чтущим любовию святую память твою.

Слава: И ныне:

Богородичен егоже: Яко Деву и едину в женах, Тя без семене рождшую Бога плотию, вси ублажаем роди человечестии: огнь бо вселися в Тя Божества, и яко младенца млеком питаеши Зиждителя и Господа. Тем ангельский и человеческий род достойно славим пресвятое рождество Твое, и согласно вопием Ти: моли Христа Бога, согрешений оставление даровати покланяющимся верою пресвятому рождеству Твоему.

Песнь 4

Лик поет ирмос канона Минеи святаго: Услышах, Господи, слух Твоего смотрения, и прославих Тя, едине Человеколюбче.

Стихи же к тропарем припеваются по чину:

Стих: Господь Бог мой, сила моя и учинит нозе мои на совершение.

И 1-й тропарь канона Минеи святаго: Безбожия пучину, рекою Божественных твоих кровей, Евдокие славная, изсушила еси.

Стих: И на высокая возводит мя, победити ми в песни Его.

И 2-й тропарь канона Минеи святаго: Яже первее уловляющая блудными безумныя мрежами, ныне к Царству Божию уловляет верныя.

Слава:

И 3-й тропарь канона Минеи святаго: Еже без правды собранное тебе богатство тленное расточивши праведно, нетления богатство наследовала еси.

И ныне:

И Богородичен канона Минеи святаго: Свет возсиял еси, Господи, иже в нощи и тме прегрешения, от Чистыя Девы воплощаемь.

Песнь 5

Лик поет ирмос канона Минеи святаго: Света подателю и веков Творче, Господи, во свете Твоих повелений настави нас: разве бо Тебе, иного Бога не знаем.

Стихи же к тропарем припеваются по чину:

Стих: Воскреснут мертвии, и востанут иже во гробех, и возвеселятся иже на земли.

И 1-й тропарь канона Минеи святаго: Свет Невечерний озарив воистинну славную, от страстныя изъят мглы, и к безстрастия пути навед, всесветлу показа.

Стих: Роса бо, яже от Тебе, исцеление им есть, земля же нечестивых падет.

И 2-й тропарь канона Минеи святаго: Царя Бога, якоже вневестившися Сыну, возставила еси честным Его призыванием умершаго люте царева сына, преславная.

Слава:

И 3-й тропарь канона Минеи святаго: Мужеским помыслом на судищи Христа, славная, исповедуеши Бога воплощенна: и мечем во главу усечена, ликуеши с мученики.

И ныне:

И Богородичен канона Минеи святаго: Якоже надежду Твое предстательство вернии имуще, и бедами горьких болезней окружени, к Тебе усердно, Дево, прибегаем, Владычице.

Песнь 6

Зде ирмос Минеи святаго не поется, но поем оный по конце песни.

К тропарем же стихи припеваются по чину:

Стих: Хранящии суетная и ложная милость свою оставиша.

И 1-й тропарь канона Минеи святаго: Яко тепла ревность веры твоея, мученице Евдокие, еюже попрала еси неверных настояние, и победу пожала еси страдания.

Стих: Аз же со гласом хваления и исповедания пожру Тебе, елика обещах, воздам Тебе во спасение мое, Господеви.

И 2-й тропарь канона Минеи святаго: Слезныя токи совокупльши, мучения каплями крове твоея, едину от обою чашу спасения совершила еси.

Слава:

И 3-й тропарь канона Минеи святаго: Яже прежде смрада исполнена, множеством нечистоты сущи, ныне благовония исполнися, и с девическими лики веселится.

И ныне:

И Богородичен канона Минеи святаго: Яже мира радость, Богородице Чистая, радуйся, Тебе зовущих со Ангелом верно, Твоея радости сподоби, и печаль нашу разори.

Лик поет ирмос Минеи шестыя песни: В бездне греховней валяяся, неизследную милосердия Твоего призываю бездну: от тли, Боже, мя возведи.

Посем ектения малая.

По шестой песни чтется мученичен Октоиха прилучившагося гласа (зри Приложение). Аще же прилучится в Минеи святый имеяй кондак, тогда сей мученичен глаголем по 1-й кафисме с седальны, с припевом: Дивен Бог во святых Своих, Бог Израилев. Зде же глаголем кондак святаго Минеи.

Кондак, глас 4: Во страдании твоем добре подвизавшися, и по смерти нас освящаеши чудес излиянии, всехвальная, верою прибегающия в Божественную церковь твою, и торжествующе молим тя, преподобная мученице Евдокие: да избавимся недуг душевных, и чудес благодать почерпем.

Икос: Страстотерпческая церковь порода явися, среде стяжавши сад безсмертия, тело сея честное, иже сего объемлющии плоды, ветвьми крепко освящаются: зряще же удивляются, како воистинну мертво тело источает исцеления, вразумляя вся? Тем со тщанием приидите ныне вси со мною смиренным, и очищше скверну, чудес благодать почерпем.

Песнь 7

Лик поет ирмос канона Минеи святаго: Образу златому, на поле Деире служиму, трие Твои отроцы небрегоша безбожнаго веления. Посреде же огня ввержени, орошаеми пояху: благословен еси, Боже отец наших.

Стихи же к тропарем припеваются по чину:

Стих: Благословен еси на престоле славы Царствия Твоего, препетый и превозносимый во веки.

И 1-й тропарь канона Минеи святаго: Иже древле уловляяй, одождении злобными всю объемь тя, враг льстец попираемь твоими ногами, вельми зваше: увы мне, победихся, глаголя, Евдокие прехвальная, твоим непреложным к Богу присвоением, чистая.

Стих: Благословен еси на тверди небесней, препетый и превозносимый во веки.

И 2-й тропарь канона Минеи святаго: Воздержанием многим, мудрования твоея плоти умертвивши, мертвым подаваеши воскресение, к Богу дерзновением твоим, и к Нему несомненною, Евдокие, мольбою твоею: ибо волю творит боящихся Его.

Слава:

И 3-й тропарь канона Минеи святаго: Страсти Христовы, якоже украшение боголепно, на выи твоея души носящи, Сего привлекла еси нетления желанием, отонудуже тя обручи невесту, непорочно зовущую: благословен Бог отец наших.

И ныне:

И Богородичен канона Минеи святаго: Первее Гедеон провозвещая Твое, Чистая, Божественное рождество яве, окрин носит полн воды, юже от руна оцеди: все бо в Тя Божество вселися, Пречистая, благословен Плод чрева Твоего.

Песнь 8

Благословите вся дела Господня, Господа, пойте и превозносите Его во веки.

Благословите Ангели Господни, небеса Господня, Господа, пойте и превозносите Его во веки.

Благословите воды вся, яже превыше небес, вся силы Господни, Господа, пойте и превозносите Его во веки.

Благословите солнце и месяц, звезды небесныя, Господа, пойте и превозносите Его во веки.

Благословите всяк дождь и роса, вси дуси, Господа, пойте и превозносите Его во веки.

Благословите огнь и вар, студь и зной, Господа, пойте и превозносите Его во веки.

Лик поет ирмос канона Минеи святаго: В пещь огненную ко отроком еврейским снизшедшаго, и пламень в росу преложшаго Бога, пойте, дела, яко Господа, и превозносите во вся веки.

Стих: Благословите росы и иней, леди и мраз, Господа, пойте и превозносите Его во веки.

И 1-й тропарь канона Минеи святаго: Якоже пришедши умом ко истинному рачителю, удобь терпиши плотския язвы, и огня горькую болезнь, мученице всеславная, благословящи Христа во веки вся.

Стих: Благословите сланы и снези, нощи и дние, Господа, пойте и превозносите Его во веки.

И паки 1-й тропарь канона Минеи святаго: Якоже пришедши умом ко истинному рачителю, удобь терпиши плотския язвы, и огня горькую болезнь, мученице всеславная, благословящи Христа во веки вся.

Стих: Благословите свет и тьма, молния и облацы, Господа, пойте и превозносите Его во веки.

И 2-й тропарь канона Минеи святаго: Треволнения бед сокрушила еси крестным ядрилом, и душевное кормило, в Царствия Божия пристанища спасла еси, славная, благословящи Христа во веки.

Стих: Благословите земля, горы и холми и вся, прозябающая на ней, Господа, пойте и превозносите Его во веки.

И 3-й тропарь канона Минеи святаго: Безобразия страстей совлеклася еси, и душу обложила еси красною одеждею безстрастия: темже Христос тя невесту обручив, в небесныя всели храмы.

Стих: Благословите источницы, моря и реки, кити и вся, движущаяся в водах, Господа, пойте и превозносите Его во веки.

И Богородичен канона Минеи святаго: Свобождается Тобою прабаба, Богородице, осуждения, и се ныне жены страждут за Христа, и радуется естество женское, якоже первомученица вопиет дева Фекла.

Стих: Благословите вся птицы небесныя, зверие и вси скоти, Господа, пойте и превозносите Его во веки.

И чтутся тропари трипеснца Триоди:

Огнесожжена сластьми, и души зрительным помрачена, огнем Твоего страха обновив, Христе, светом мя спасения озари, да Тя славлю во вся веки.

Стих: Благословите сынове человечестии, да благословит Израиль, Господа, пойте и превозносите Его во веки.

Сытость возненавидевши страстей, напитайся добрых сладостною пищею и усладися паче от поста сладостию, горести сластей уклоняющися, смиренная душе моя, и поживи во веки.

Стих: Благословите священницы Господни, раби Господни, Господа, пойте и превозносите Его во веки.

Ослеплен душею и пиянством страстей отемнен, никакоже взираю к Тебе Единому Богу: темже мя ущедри и просвети, и покаяния отверзи ми врата.

Стих: Благословите дуси и души праведных, преподобнии и смиреннии сердцем, Господа, пойте и превозносите Его во веки.

Богородичен: Онебесившая наше земное и тленное, Чистая, существо, теплою Твоею молитвою, управитися нашим мольбам и молением сотвори, к Твоему и всех Богу, и Царю.

Стих: Благословите Анания, Азария, Мисаил, Господа, пойте и превозносите Его во веки.

Иный трипеснец Триоди:

Светло усрящим поста вход, вернии, и да не сетуим, но омыим лица наша безстрастия водою, благословяще и превозносяще Христа во веки.

Стих: Благословите апостоли, пророцы и мученицы Господни, Господа, пойте и превозносите Его во веки.

Елеем помазавше милости души главу, не многословим Отцу нашему, сущему на небесех, молитвы возсылающе, благословяще и превозносяще Его во вся веки.

Благословим Отца и Сына и Святаго Духа, Господа.

Троичен: Присносущна, Безначальна Отца, воспоим вернии, Сына же Собезначальна, и Духа Сопросиявша из Отца, Единосущна Лица, Единаго суща Всесильнаго начала и власти.

И ныне:

Богородичен: Марие Богозванная, очистилище воистинну верных, из Тебе бо оставление подавается всем богатно: Сына Твоего и Господа не престай молящи о поющих Тя.

Слава Тебе, Боже наш, слава Тебе.

Постився Господь четыредесятную меру дней, сия ныне освяти и очисти дни, братие, в няже достигше, зовем: благословите и превозносите Христа во веки.

Хвалим, благословим, покланяемся Господеви, поюще и превозносяще во вся веки.

Триоди ирмос: Древле оросившаго еврейския отроки в пламени и опалившаго Господа халдеи преславно в нем, воспоим, глаголюще: благословите и превозносите Его во веки.

Священник: Богородицу и Матерь Света в песнех возвеличим.

Честнейшую Херувим…

Песнь 9

Лик поет ирмос канона Минеи святаго: От Бога, Бога слова, неизреченною мудростию пришедшаго обновити адама, ядию в тление падшаго люте: от Святыя Девы неизреченно воплотившагося нас ради, вернии, единомудренно песньми величаем.

Стих: Благословен Господь Бог Израилев, яко посети и сотвори избавление людем Своим.

И 1-й тропарь канона Минеи святаго: Лица твоего зрение духовною зарею, якоже солнце возсиявши, чистая, странно показашеся видение зрящим неверным: ибо якоже возлюбивши Христа, от Него прославилася еси достойно, всечестная.

Стих: И воздвиже рог спасения нам, в дому Давидове отрока Своего.

И паки 1-й тропарь канона Минеи святаго: Души твоея свещу вжегши, мученице, елеем кровей твоих светло, радующися, ныне возшла еси в Божественный невестник Христов с мудрыми девами: с нимиже поминай всех верою хвалящих тя.

Стих: Якоже глагола усты святых, сущих от века пророк Его.

И 2-й тропарь канона Минеи святаго: От терновныя прелести, яко шипок, богомудрая, сладкоуханен израсла еси красно, и верных облаговонила еси души, Евдокие, неверных же отразила еси твердо смрад прелестный: темже тя блажим.

Стих: Спасение от враг наших и из руки всех ненавидящих нас.

И 3-й тропарь канона Минеи святаго: Совершающих любовию молебную память твою к Богу и Избавителю, мученице чистая, молитвами от всяких бед спаси: и мою душевную скверну, иже худо тя воспевшаго, отмый.

Стих: Сотворити милость со отцы нашими и помянути завет святый Свой.

И Богородичен канона Минеи святаго: О нас молящи Сына Твоего не престай, Дево, Человеколюбца Бога: Тя бо надежду стяжахом, и Твоим предстательством избавляемся бед и страстей, и прегрешений, и болезней, верою тя славящии.

Стих: Клятву, еюже клятся ко Аврааму, отцу нашему, дати нам без страха, из руки враг наших избавльшимся.

Зде чтется трипеснец Триоди:

Поста день, отложение греха да будет ти, душе, и к Богу мание вкупе, и присвоение: яко да убежиши злобныя пропасти, и самыя токмо пути возлюбиши, ведущия ко оному покою.

Стих: Служити Ему преподобием и правдою пред Ним вся дни живота нашего.

И помышленьми поползнувся и плотию прегрешив, рыдаю и стеню, и вопию: спаси мя, Господи, спаси мя, Незлобиве Едине, и не осуди мене во огнь геенны оныя, осуждения достойнаго.

Стих: И ты, отроча, пророк Вышняго наречешися, предыдеши бо пред лицем Господним уготовати пути Его.

Во светлую поста облекшеся ризу, пиянства темныя и злотяжкия совлецемся одежды, и светли бывше Божественными добродетельми, светозарная Спасова верою узрим страдания.

Стих: Дати разум спасения людем Его, во оставление грех их, милосердия ради милости Бога нашего.

Богородичен: Изнемогшую всеми прилоги злобных бесов, страстную мою душу исцели, Пречистая Владычице, Целителя рождшая Христа, избавление нас, ведущих Тя, Отроковицу, Деву нетленну.

Стих: В нихже посети нас Восток с высоты, явитися во тьме и сени смертней седящим.

Иный трипеснец Триоди:

Ныне наста время святых постов, начнем сего в добрых пребываниих: в судах бо и крамолах не поститеся, глаголет.

Стих: Направити ноги наша на путь мирен.

В горе Хорив постом очищься, виде Бога Илия: очистим и мы постом сердце, и узрим Христа.

Слава:

Троичен: Единому Естеству покланяюся, Три Лица пою, Единаго Бога всех, Отца и Сына и Святаго Духа, присносущное Начало.

И ныне:

Богородичен: Чистая, Отроча раждаеши, Дева, млеком доиши: како в сию двою девствуеши рождши? Бог есть содеявый, не взыскуй от Мене, еже како.

Слава Тебе, Боже наш, слава Тебе.

День един убо, рече, житие всяко земных, труждающимся от любве четыредесять суть дней поста, яже совершим светло.

Триоди ирмос: Преестественно плотию заченшую во чреве, от Отца безлетно предвозсиявшее Слово, в песнех немолчных величаем вернии.


 



Поделиться:


Последнее изменение этой страницы: 2016-08-26; просмотров: 198; Нарушение авторского права страницы; Мы поможем в написании вашей работы!

infopedia.su Все материалы представленные на сайте исключительно с целью ознакомления читателями и не преследуют коммерческих целей или нарушение авторских прав. Обратная связь - 54.221.69.42 (0.06 с.)