И ны́не и при́сно и во ве́ки веко́в, ами́нь.

                   И ны́не и при́сно и во ве́ки веко́в, ами́нь.

Богородичен:  Со все́ми проро́ки, и жена́ми свяще́нными, ны́не приле́жно Бо́га моли́ Де́во ро́ждшагося из Тебе́, уще́дрити на́с.

 

Катава́сия, глас 2:

Хор:    Непло́дствовавший мо́й у́м,/ плодоно́сен Бо́же покажи́ ми́,/ де́лателю до́брых, насади́телю благи́х,// благоутро́бием Твои́м.

 

Б)Песнь 3:

Кано́н му́ченика Аре́фы и и́же с ним, глас 8:

Ирмос:            Небеснаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// Еди́не Человеколю́бче. (Дважды)

Припев:      Святии му́ченицы, моли́те Бо́га о нас.

Тропарь:        Утвержде́нну зря́ще Креста́ благода́тию Твою́ Це́рковь,/ евре́йстии о́троцы пребеззако́ннии,/ за́вистию та́юще,/ и ра́нами многообра́зными неща́дно му́чаху,/ Еди́не Человеколю́бче.

Припев:      Святии му́ченицы, моли́те Бо́га о нас.

Тропарь:        Ядоме́тный язы́к злове́рнии иму́ще и Тя ху́ляще,/ сих прароди́тели Изба́вльшаго дре́вняго мучи́тельства,/ в Тя ве́рующия, Спа́се, закла́ша.

Припев:      Святии му́ченицы, моли́те Бо́га о нас.

Тропарь:        Созда́вый наедине́ Богоде́йственным ма́нием челове́ческая сердца́,/ кто Про́мысла Твоего́ глубину́ возмо́жет пости́гнути,/ я́ко ста́до, е́же, Христе́, собра́л еси́,/ волко́м пре́дал еси́.

Припев:      Святии му́ченицы, моли́те Бо́га о нас.

Тропарь:        Богому́дрое твое́ ста́до,/ ва́рварскими мечи́ ссека́емо,/ усе́рдно призыва́ше Тя:/ приими́ ду́хи и ду́ши на́ша, Спа́се,/ и к све́ту наста́ви Ца́рствия Твоего́.

 

Кано́н ХРА́МА ( на 4)

 

Кано́н из Окто́иха (му́ченичны́й), глас 2:

Припев:      Вси святи́и, моли́те Бо́га о нас.

Тропарь:        Разже́гшеся огне́м любве́ Христо́вы, о страстоте́рпцы, му́к разжже́ния угаси́сте, ороше́нием Вседе́теля Ду́ха.

 

Припев:      Вси святи́и, моли́те Бо́га о нас.

Тропарь:        Святе́йшии Христо́вы святи́телие, и честни́и преподо́бных собо́ри, о все́х на́с Человеколю́бца Бо́га умоли́те.