О пришествии епископа Иасафа в монастырь и о игумене Иларионе чюдо 30

Пресвященныи же митрополитъ Макарие собра архиепископы, епископы и весь священныи соборъ, и уставиша праздновати святымъ, и посла книги своя перьмскому епископу Иасафу, да идетъ тамо, идеже святии лежаху. И епископъ же посла книги своя во вся монастыри, сущая под нимъ, да идутъ с нимъ вси игумени в пустыню, идеже святии лежаху по повелению же пресвященнаго митрополита видети своима очима слышанная. Самъ же епископъ со тщаниемъ седе в ладиицу, поимъ с собою весь причетъ церковныи, и потребная повеле брати сущимъ в пустыню. И плыша тамо по реце тако еже и игумени по повелению епископа кождо ихъ от монастыря своего тамо идуще. В нихже бе игуменъ Иларионъ именемъ монастыря глаголемаго Лопотова, яко тяжко сии внятъ путное шествие, якоже тщету некую вменяя и всуе труды глаголя в себе, бе бо яко маловериемъ одержимъ ко преподобнымъ, но бояшеся преслушатися епископа и не хотя идяше путемъ, от своего монастыря на осляти еха. Егда же бысть ему близъ монастыря святыхъ, разсверепеся осля его и сверже его с себе и сокруши его толико, якоже ничимъ ему не владети и состави ему вси сотрясошася. И принесоша его в монастырь святыхъ, и внесоша в келию, и положиша и на постели, и прииде же епископъ и вси игумени с нимъ, и певше вечернюю и заутренюю. Тому же игумену Лариону болезнующу и кающуся о неверии своемъ и молящуся Богу и святымъ его на постели своей, и тако помалу нача ощучати облегчение болезни своея и повеле пети вечернюю и утренюю и тако боле облегчение получи и повеле правилная вся пети потребная къ божественей литоргии. Егда же приспевшу времени святей службе, входитъ епископъ и сущии с нимъ игумени и священницы во святую церковь, входитъ же и той с нимъ игуменъ Иларионъ. И бысть служа со епископомъ святую литоргию, по совершении же службы бысть весь здравъ, яко николиже что пострада. Извествуетъ епископу и всемъ ту сущимъ с нимъ Божию благодать и святыхъ преподобныхъ отецъ и чюдотворцевъ Григория и Касьяна великая и дивная и преславная ихъ чюдеса. Иже преже инемъ не верующимъ о святыхъ, последи же самъ известенъ сказатель святыхъ о чюдесехъ бываетъ той игуменъ Иларионъ.

Егда же совершивше божественою литоргию, и повеле епископъ раскопати землю, идеже святии лежаху, и обрете гробъ целъ. И открыша, и обоня благоухание на вся предстоящая, и видеша мощи, составы нерушимы и не имуща дебельства тела, яко кожа присхла бе к костемъ и светящеся яко снегъ. Другий же гробъ рушимъ от некихъ, якоже преже писахомъ, егда свеща являхуся и мнеша, яко сокровище ископаху, тогда в нощи и смесивъша мощи с перьстию, темже и месть тогда прияша и паки покаявшеся и здравие получиша.

Мы же на предълежащее возвратимся. Тогда же прииде чернецъ некии от веси, глаголемыя Каремы, именемъ Иеремей. Той бысть во зступлении ума от многихъ лет, припадая къ мощемъ святыхъ. И в той часъ, всемъ зрящимъ, бысть здравъ и смысленъ и отиде во своя си, прославляя Бога и святыхъ его угодниковъ.

Чюдо 31 о Василие некоемъ

И паки отрокъ некий Василие именемъ такоже приведенъ бысть, сущу ему летъ 15 от ближнихъ весей. Растяше же утроба его, якоже нечто животно хождаше в немъ во чреве его. Симъ вельми боляше время немало, и явишася ему святии в видении нощномъ в дому его, спящу ему и решаему, яко да велитъ иконописцу написати образъ святаго великомученика Христова Георгия, и принесетъ в церковь, и поставитъ над гробомъ ихъ, и здравие получитъ. Сему же бывшу, повелевает той Василие написати образъ святаго великомученика Георгия, и приноситъ въ церковь, и поставляетъ верху гроба святыхъ и помолився со слезами глаголя: «Помолитеся о мне, святии, Богу, якоже обещаетеся здравие подати ми, яко да вашими молитва (так) милость Божию получю и здравие прииму». И абие от того часа бысть здравъ, благодаря Бога и прославляя святыхъ его. И отиде в домъ свой и оттоле часто приходитъ в монастырь. Видевъ же сия епископъ своима очима Божию благодать, бываемую от гроба святыхъ, елика Богъ творитъ преславная знамения и чюдеса молитвами ихъ, и о семъ удивися и прослави Бога, и отписа к преосвященному митрополиту Макарию. Онъ же и сия чюдеса повеле написати къ прежде бывшим, яко же и с прочими и ти на память святыхъ почитаются въ славу Богу и святыхъ угодниковъ его.