Чюдо 8-ое о жене иступившеи ума

Подобно же первымъ приложимъ сказание, еже о жене некоей, рабыни оного преждепомянутаго благовернаго князя Симеона, глаголемаго Бывалца, ей же имя Васса. Огненым трудомъ болевши ей, и иступивше ума своего и нелепая глаголаше, якоже случашеся множицею от зелнаго жена жжениемъ безумнемъ быти. Подобно же первымъ и тако приходитъ некими приводима ко гробу святыхъ, и молитве бывшей о ней, вскоре исцеление получаетъ, здрава и смыслена отходит в домъ свой князя своего, Бога благодарьствующи и святыхъ его угодникъ.

Чюдо 8 о Василие некоемъ

Василеи некто именемъ от града Шуйскаго, боляше сердцемъ зело, и утроба его болезнено надымашеся, и проходъ его неистовне испражняшеся, оному же спящу, иногда же ходящу. И симъ недугомъ страдаше время немало, и слыша о бываемыхъ чюдесехъ, иже от гроба святыхъ. И той верою влеком, прииде, идеже святыхъ чюдотворна гроба, якоже прежде бывшихъ исцеления приемших, молившимся тепле святым, и той Василей подобно первым с верою притекъ, помолися. Темже надежда не погреши и абие отходитъ здравъ во свояси, якоже николиже болевъ. И оттуду даждь до отшествия своего, еже от жития сего, по вся лета приходитъ ко гробу святыхъ и благодать воздая святым его.

Чюдо 10 о слепой девице

Человекъ некий именемъ Феодоръ от веси прежде реченныя Шилехоцкия, той имея дщерь именемъ Марину и та боляше зело очима своима. От тоя болезни на десять летъ лишена бысть света сего чювьственаго, но светъ мысленыи всегда во сердцы своемъ имяше, никогдаже оставляше еже сердечныма очима на небесехъ живущаго зрети же и призывати. Темже прошения ея, еже от веры непрезримо бываетъ. Во единъ убо от дний повелеваетъ себе привести к чюдотворному гробу святыхъ и молитву свою проливаетъ вкупе с теплыми слезами. Сице же и молитве бывшей о ней от иерея ту сущаго и от нищихъ. Егда священнику молебная поющи, якоже есть обычай, и в той часъ внезапу прозре и ясно всехъ зрети и всеми зрима бысть, вельми радующися и веселящися, восвояси возвращается и преславное Божие благоутробие всемъ исповедая, святыхъ его преславная чюдеса бываемая о ней. Вси же ту сущии видеша таковое преславное бывше чюдо и с веселиемъ воздаваху славу Богу, глаголющи: «Дивен Бог во святых своих, Богъ Израилевъ» (Пс 67:36).

О жене немой чюдо 11

Прежде помянутого же князя Симеона, егоже и прежде сказахомъ, едина от рабынь его Елена именемъ, жена слуги княжа Феодора именемъ по реклому же Медведь, страдаша огненым недугомъ зело. И от зелнаго огня жжения связа языкъ ея и не могуща проглаголати ей отнюдъ словесе ни единого же 6 месяцъ, во уме же своемъ и въ сердцы безпрестани моляся Богу, и Пречистей Его Матери, и преподобныхъ отецъ Григория и Касьяна молитвами на помощь призывая. И тако внезапу отверзошася уста ея и языкомъ своимъ ясно, якоже и прежде иногда, начатъ глаголати, благодаряще Бога и прославляя святыхъ его.

Чюдо 12 о Козме, имуще суху руку

По сих же прииде от града Шуйскаго человекъ некий именем Козма, сынъ Афанасиевъ, имея суху руку, бе бо слыша от многихъ бываема чюдеса святыми Григориемъ и Касияном и ихъ молитвами многия от различныхъ недугъ своихъ исцелевше, елико Богъ творитъ сихъ ради предивная знамения. И помолився тепле той Козма у гроба святыхъ чюдотворецъ, и абие в той часъ вскоре исцеление получи, простреся рука его, якоже другая.

Чюдо 13 о слепой жене

Потом же некая жена именемъ Мария приводима бываетъ от веси некия, еяже прежде сказахомъ Шейбохты. Бе бо слепа и ничтоже видя отнюдъ очима своима, и тако простираетъ молитвы своя ко всемогущему Богу и святыхъ отецъ Григория и Касияна такоже на молитву призываетъ, яко да молитвами ихъ святыхъ от Бога милость получитъ и прозритъ очима своима, еже и бысть вскоре прозрение, ясно зря очима своима и все видя и с веселием в дом свой отиде, славя Бога и угодниковъ его

Чюдо 14 о исстипившем (так!) ума

Человекъ некий Иванъ имя ему от веси тоя же Авнеги, ея же выше рехомъ села некоего глаголемаго Просилова, приводимъ бываетъ ко святымъ от домашнихъ своихъ. Бе бо преже мало время боляше ему вельми огненымъ недугомъ и от зелныя болезни изступившу ему ума своего, яко ближнихъ ему соседъ не познати. И тако помольшеся онем о немъ (так!) тепле и призвавши святыхъ отецъ на помощь, и отходитъ в домъ свой здравъ и смысленъ, яко николиже болевъ.