Року 1606. Ассекурация, то ест волность. 


Мы поможем в написании ваших работ!



ЗНАЕТЕ ЛИ ВЫ?

Року 1606. Ассекурация, то ест волность.



Миколай Жебрудовский з Жебрудович, воевода и енерал краковский; Ян Хоронский, снятинский староста; Януш Радивил, княжа на Биржах и Дубинках, подчаший Великого князства Литовского. Ведомо чиним всем и каждому зособно, иж мы, дознавши ласки его к[о]р[олевской] м[и]л[ости] пана нашего, всЂ покое и в той то Речы Посполитой замешане, абы далей до крве сполней братии нашой розлияня не пришло, a то в том, же тая ассекурация его к[о]р[олевской] м[и]л[ости] под Вислицею братии нашое обывателев панов тых дать тут упевненьем c всим панским утвердити того не занехал, же на вси помноженя прав и свобод тое сполное отчизны нашое, на которое бы ся над вислицкие артикулы сталы тое Речи Посполитое вси згодитися позволит и близко пришлом сейме есть готов. Для того упевняем У в том его к[о]р[олевскую] м[и]л[ость] пана нашего милостиваго, иж люде вси пенежные, которые мы под тот час над звычай зобрали были, роспустимо и потом хоругови подносити не будем, ездов жадных и зобраня братии через универсалы иншые складати не маем, и тых, которые суть \л.161об.\ через нас зложоны не толко сами занехаем, але теж и других от того отводити будем, стараючися o тое пилностию, абы тые речы в том замешаню узрушоные, успокоены били Ф и далший узрух першей турбации в Речи Посполитой не чинили.

 

 

Т так в рукописи; очевидно, должно быть зацно У м переделано из другой буквы Ф так в рукописи

 

 

До того ся сполне его к[о]р[олевская] м[и]л[ость] так якосмы повинны зо всих сил наших приложим, што колвек будет доброго и сполного отчизне належало. B тот час до домов наших спокойне, жадных схадок болшей не чинечи, розедемся и на сейми даст ли пан бог пришлым, если на нем будем, без войск и приймованя людей над звычай, яко до упокойных рад становимысе y во всих справах Речи Посполитое зычливе и верне его к[о]р[олевской] милости радити будем, на што тое все писмом нашим даем, еднак руками нашими подписаные и печатми нашыми запечетованые. Деялосе y Янове 2 у-в обозе под Ядловцем октобра первого по старому, по новому десятого, року 1606.

Року 1600. Панове волынские, панове литовские, также козаки запорозкие, змовившися и знявшися вси вкупе, волохи отгамовали, войска Могилево побили, армату отняли; воевода мултянский втек и з Мигалем, троха не поймали, и много за ним гонили \л.162.\ аж до границы мултянское. Троха ся было успокоило. За то была дана козаком лежа y Киеве, гетманом был Самуел Кошка; лежали y Гоми, в Речицы, в Рогачове, y Баркулабове на пристанство; аж уждали. Року 1600, месяца августа 8 дня c понеделка на второк пан Лев Сапега, канцлер Великого князства Литовского, староста могилевский, албо теж за росказанем его м[и]л[ости] слуги его м[и]л[ости] пан Голубицкий, врядник Печерский, Ян Рожновский Требухи до замку Могилевского лривернули, а тое имене было от веков на манастыр Печерский Святыя Богородицы надано от княжат Буйницких по самую речку Дубровню, — то все Буйницкий кгрунт был.

Р оку 1600. Того року было Благовещение на святой недели y вовторок.

Р оку 1600, месеца септевриа 18, в че[тверто]к пан Ян Варшавский также его м[и]л[ость] пан Лев Сапега, канцлер литовский, староста могилевский, на Москву до царя восточнаго князя Василия Годунова послами ходили, и з ними княжат, панов зацных множество и мешкали на Москве недель 20. Тамо ж приняли примире на год 20.

Т ого ж року 1600, октов[риа] 7 дня, Гермоген, владыка полоцкий, если за грех свой, албо з божого допущеня, первей того хорев y Полоцку, потом y месте Виленском \л.162об.\ лекарство поживал, там же едучи з Вилни в дорозе [в] Сморкгоинех, там же смертию ганебною живот свой скончал, смерть претерпев; яко был на пастырство дирею взлез, также в дири, в дорозе, зле живот скончал. Того ж року y самую y восень не по обычаю месяца септеврия 17 дня y волторок от западу силный великий гром был в нас и по всим сторонам велми силно гримел, также и блискане молони было; a в ночи мороз и вЂтер был, a тое было прознаменование — напредЂ будеш читати рок Христа 602, 603; великие болести, хоробы, также войны великие, голод, неврожай силный; было поветрие албо мор на людей перехожих, множество на Низ идучих; около тысещ 4 з голоду мужей и жон, детей пошло так, иж страшно было видети, иж на улицах, по дорогах, по гумнах, y ровех псы мертвых многих тела ели.

Р оку 1601. Великая война была y Вифлянтех c кролем шведским за Жикгимонта Третего. Того ж року запорозкие козаки y Швецыи были, да ничого не помогли Х, толко великую шкоду господарю вчинили, бо место славное, место богатое Витебск звоевали, мещан побили, панны поплюгавили, скарбы побрали, \л.163.\ многое множество людей порубали, незличоные скарбы побрали.

 

 

Х по написано над строкой,

 

 

Т ого ж року 1601. По волости Могилевской гайдуков до Выфлянт выбранцов выбирали.

Т ого ж року 1601. За господаря кроля Жикгимонта Третего, за митрополита Потея отщепенца, за вселенского патриархи кир Рафаила, постановлено на владычество Гедиона, a первей звано его Миколаем; и тот отщепенец. Того ж року 601, месеца августа пятого дня, преставился священик Юревский отец Тимофей Алексеевич, асправовал ерейства своего год 4. Парафея его была: полместа, село Былевичи, Ходутичи, Липовка, Панковичи, Новоселки, Тризнина слобода, село Лежнево, Богданова слобода.

Р оку 1601. Тот был неуставичный, то ест почали жито на хлеб жати голодные люде пред УсЂкновением главы святого Иоанна Предтечи, a в копы почали жито жати на святого Симеона Столпника; и то было зерня велми мякко. A дожали жита перед Покровом за 2 недели, бо дожд уставичне шол недель 12. Яр почала высыповатися o святом ПетрЂ, а по святом Покрове за две недели почали яр жати; и то было зелено. A потом после святого Симеона Столпника ок[тобра] 4 дня снег \л.163об.\ великий выпал; прето, што было пашни, ярицы, овса, пшеницы, ечмень, горох, боб, то все снегом напало, и великую яри шкоду учинило. Згола было всему недобро як збожю, также и людем; a пред се цена збожю средняя была. Яко ж и знак тому упадку збожю: в року 600 было зле, гром гримев y восень по Воздвижению честнаго креста.

Т ого ж року 601. Были y Швеции козаки запорозкие люду четыри тысечи, над ним был гетманом Самуель Кошка. Там же того Самуила убито, a поховано y Киеве. Нижли там y Швеции козаки запорозкие ничого доброго не вчинили ани гетманови и пану королю жадного ратунку не дали, толко з Швеции утекли, a тут на Руси Полоцку великую шкоду чинили, a место славное и великое Витебск звоевали, злата, сребра множество побрали, мещан учтивых порубали, и так шкоду содомию чинили горше злых неприятелей албо злых татар.

Т ого ж року 1601, месяца октобра десятого дня, цЂлую неделю снег силний и кгвалтовный ишол, выпал до полголени; также и буря силная была. Тогды пшеницы ярицы, овес, гречиху, горохи и вси овощы, великое множство ярицы на полях непожатые, также и копы жатые снегом \л.164.\ позаметала метелица, иж было жалосно и страшно гледЂти и выповедити уздыханя и плачу людей убогих, пашников немаетных. A так лежал тот снег 2 недели аж до Дмитровы суботы; яко ж з великих морозов река Днепр был замерз, и ездили по нем яко серед зимы. A потом за ласкою всемилостивого господа бога для плачу и великого уздыханя снег ростал и река Днепр росплынулся. A потом почали жати — горовати по снегу y стужу. Были теж морозы великие, огнЂ клали, сами грелися, иж страшно и жалосно было гледЂтв: три — два человеки на день ледво снопов 40 нажнут овса албо ярицы, бо велми к земли [прилегло]. Люди убогие яр на весне жалигоревали, але вже толко для статку, a того много статками на весне сами господари свое збоже травили; маки, горохи, бобы, проса, репа — то все згола погинуло. A которые молотили ярь, зерня толко знак, a коли змелет, спечет, — то y печи испечется, a з лопаты y печ не зложит; c печи аж ополоником выберет. Также и жито велми было не умолотно; a коли муку житную y хлебе спекут, то тесто печеное солодко, a за скорину хотя ложки клади, a в печи не печется. У восени \л.164об.\ роли и жито сеяли которые старым житом, то пред се ни во што, a которые житом новым сеяли, тые ни жали. Яко ж две доле тых людей было,.которыи оралы и не сеяны были. На лето куповали жито чверть по грошей 35, яры по гр[ошей] 40, пшеницу куповали чверть 40 грош[ей], овес по гр[ошей] 40, конопель чверть 20 грош[ей], горох чверть 20 гр[ошей]. A тот гнев божий был и непогода, почавши от Менска до Полоцка к Витебску, до Орши, до Мстиславля, до Пропойска, до Рогачова, Могилева, Любошаны. Потом y Речицы, в Лоеве, в Киеве, аж на Волынь добрый врожай был. A так потом много миожества людей убогих з голоду на Низ з жонами и детками и зь семею, што иж страшно было не толко видети, але трудно было и выписати, то ест з верху з волости Шкловское, з Друцка, з Дубровны, з Круглы, з Бобря, з Витебска, с-под Полоцка, с-под Менска и з инших многих украин. Того ж року была зима злая, снеги великие и силные были морозы. Многим людем поморозило кому Ц ногу, кому палцы, другому вид: уши, нос; a другие з морозу померли.

 

 

Ц к переделано из н

 

 

A коли вже была весна в року 1602, тот наход людей множество почали мерти; по пятеру, по трид \л.165об.\ цати у яму [хоронили]. Хворых, голодных, пухлых многое множество, — страх видети гневу божого. A так при великих местах человека по едному y яму ховали, священники проводили. Там же, которые ишли на Низ, тые вси там померли, мало се зостало. A так мерли одны при местах, на вулицах, по дорогах, по лесах, на пустыни, при роспутиях, по пустых избах, по гумнах померли. Отец сына, сын отца, матка детки, детки матку, муж жену, жена мужа, покинувши детки свои, розно по местах, по селах разышлися, один другого покидали, не ведаючи один o другом, — мало не вси померли. A коли тот наход y ворот, албо в дому y кого стоячи хлеба просили, отец з сыном, сын со отцем, матка з дочкою, дочка з маткою, брат з братом, сестра з сестрою, муж з жоною, тыми словы мовили силне, слезне, горко, мовили так: «Матухно, зезулюхно, утухно, панюшко, сподариня, слонце, месец, звездухно, дай крошку хлеба!». Тут же подле ворот будет стояти з раня до обеда и до полудня, так то просячи; тамже другий под плотом и умрет.

T oro ж року куповали жита чверть 40 грош[ей], пшеницы чверть 50 грош[ей], овса чверть грош[ей] 38, гречихи чверть грош[ей] 40, гороху чверть гр[ошей] 40, конопель чверть 50 грош[ей], капусты ведро кислое 3 грош[и], \л.165об.\ ушаток капусты кислое 24 гр[оши], ячмень чверть грош[ей] 70. A коли варива просили, тые слова мовили: «Сподариня, перепелочко, зорухно, зернетко, солнушко, дай ложечку дитятку варивца сырого!». Того ж року 602 з ласки божей весна почалася добре, нижли до святого Юря ледво штос жито посееное почало з земли являтися, a другое усходити, и то потросе; почали орати на Страстной недели, a нЂкоторые до свята потросе маку, пшеницы посеяли.

Т ого ж року на Страстной недели во среду гром загримел велми грозный з дождем и з бурею немалою. A то был знак недобрый и праве злый, бо на десятой недели того ж року 602, в четверток великий, страшный был мороз: што было цветов, то все поморозил. Правда, початок был грозный, a остаток плачливый: што было огородных речей — капуста, ботвинье, цибуля, маки, горохи, ячмень, ярица, то все мороз побил, чого з великим плачем было видети тых людей голодных, которые толко огороды были засеяли, a жита не починали. У восень цена всему збожю была такова, як в року выш описан.

Т ого ж року 602. У восень жито посеяное велми было урунилося. З ласки божей осень были погодлива и вдячно глядЂти, — было велми зелено. Также севба \л.166.\ позная добра была. Того ж року 602, веснЂ и летЂ на люди были з божого допущеня хоробы великие, горючки, бегунки; по местах, по селах много малых деток померло.

Т ого ж року 602. За кроля Жикгимонта Третего, за митрополита Патея отщепенца, за владыку полоцкого Гедеона, за светейшаго патриархи кир Гедиона, месеца септебря 7 дня со олторка на среду o полночи, канон Рожства Святыя Богородицы, славный пан хрестиянски пан побожный, церкви божой миловник, князь Богдан Соломерецкий, во святом крещении называемый Алимпей, его м[и]л[ость] староста крычовский и олучицкий, на старостве своем во граде Крычове переставился в добром сумненю и памети; a погребено при славной памети пану отцы Иване в Соломеричах в церкви святого Покрова. Того ж року князь Иван Соломерецкий y Высоцку переставился.

Р оку божого нароженя 1603. Были козаки запорозкие — неякий гетман на имя Иван Куцкович. При нем было люду козацкого яко 4 тисечи; брали приставство з волости Боркулабовской и Шупенской, то ест грошей коп 50, жита мер пятсот, яловиц полтораста, кобанов 50, сал свиных 100, меду пресного пудов 60, масла пудов десять, \л.166об.\ куров пятсот, сена воз триста.

Т ого ж року 603. B месте Могилеве Иван Куцка здал з себе гетманство козацкое для того, иж y войску великое своволенство: што хто хочет, то броит. На тот же час был выеждый от его крол[евское] милости и от панов и рад, напоминал, грозил козаком, иж бы они никоторого кгвалту в месте, по селах не чинили. Перед того ж выеждчого от его крол[евское] милости приносил один мещанин на руках своих дЂвчину y шести летех змордованую, зкгвалчоную, ледвей живую, чого было горко, плачливе, страшно глядети. На тое вси люди плакали, богу сотворителю молилися, абы таковых своеволников вечне выгладити рачил.

П отом по Иване Куцку был гетманом Иван Косый. Тые козаки брали приставства y Полоцку, y Витебску, на Орши, y во Мстиславлю, y Крычове, y Могилеве, y Головчине, y Чечерску, y Гомли, y Любечу, y Речицы, y Быхове, y Рогачове и по всих местах. A на Волыню, на Подолю, y Киеве там на тот час жолнери лежали, которые з Волох выехали, яко десеть тысящ; в тых всих краех приставство брали.

Также y Менску и по всей Литве там жолнери, татарове, \л.167.\ которые выехали з Швецией, по тых местах приставство брали. Яко ж в тых роках 600, 601, 602 великие силные были незрожаи, также голоды, поветрее, хоробы, бо в летех тых бывали лЂтом великие морозы, силные грады. У Могилеве жита чверть куповали по грошей 40; ячмень грош[ей] 50, пшеницу гр[ошей] 50. A около Головчина, Полоцка и Витебска куповали жита чверть по грош[ей] 60, ечменю чверть по грошей 70, пшеницы чверть по грошей 70. Также гречихи, конопель знаку не было, — все мороз побил. Тогды всего того насеня в Киеве, на Волыню куповали, и то потросе; ледве можный огород засеял, a на поли, по лядах, по нагноях нихто не бывал, албо редкий сеял, бо насеня ярнаго каждый мало мел. A коли козаки запорозкие назад на Низ отсоля выеждчали, тепер же великую силную шкоду по селах, по мЂстах чинили: жонки, девки и хлопята з собою много брали. Также коней много з собою побрали. Один козак будет мети коней 8, 10, 12, a хлопят трое, четверо, жонки албо девки две албо три.

Т ого ж року 603. Народ божий з Низу до домов своих назад пошол — великое множество мужей, жон, детей, но еще болши тых было, которые на Низу померли. Року 603. Весна велми была студена, морозлива \л.167об.\ аж до недели Фомины; того року был святый Юрей во великую суботу. A пред се з ласки божое на весне и y восень жито на поли зелено было, яко ж c тою зеленю и зацвило на 7 недели по святе, a никако ж пожовкло. Почали ярь сеяти до великодня, a досевали яри на 7 недели; хто сеял на третей недели, тые загорели, a хто сеял яр на 7 недели, того яр добра была. Житу добрый урожай был и вмолотистый чисто. Жито почали люди голодныя до Ильи святого, a дожинали в копу за тыждень по Или. Тот рок 603 велми был сухий, жарки; як был дожд o Дусе Святом, потом o десятой пятницы, a потом на святого Илию. Того року напал снег месеца ноембра 5 молодика и оттоле стала зима за две недели до запуст Филиповых. A потом мороз, снег, метелица великая была от Юря святаго аж до Крещения; по Крещению святом колко недель великая неуставичность; так было: если настанет месец молодый, то снег, дожд, буря, метелица, морозы, гололедица, ковзота, студень, иж трудно было выповедати; потом недели третей в пост великий y вовторок в ночы был дожд силный, аж снег согнало и весна стала.

Т ого ж року 603. B месте Виленским, в Менску, y Радо \л.168об.\ шковичах, на Орши, y Шклове и по инших многих замках было поветрее великое в пост Филипов; a в которых замках поветрее не было, в тых местах по дорогах, по улицах страж великую день и ночь мевали аж до Рожства Хри-

стова; a пред се господь бог тых в целости здравых заховал. A потом з ласко Ч божое было по всим странам здорово.

 

 

Ч так в рукописи; должно быть ласки

 

 

Тепер же з ласки божое урожай на все добрый был; жита мера копа гр[ошей], ярицы мера копа грош[ей], овса мера грошей 50, гречихи мера грош[ей] 60. A за таковое милосердие и великую его ласку честь и хвалу господу богу воздавали, пили и ели. А которые померли, тых успоминали, плакали, жаловали и паметку творили за тых душ и за грехи их господа бога просили, абы господь бог не поменул грехов их. Тепер же радость великая была, иж муж жену в далеких странах знашол, отец сына, матка дети, дети матку, приятель приятеля, ближний ближнего своего; a где который умер, от тых один одному поведал, где похован.

Р оку 1604. На Василя святаго, то ест новаго лета, была зима велми добра, погодлива до великого посту, a потом на пятой недели великого посту снеги, дожды великие были, аж Днепр ростекся, \л.168об.\ a снег согнало. Пред се весна непогодная была, — тогды жито y цвету мороз побил; также огурки y цвету мороз побил, яко ж на тот час y господарстве мало хто бы ся мел огурками похвалити, хотя ж их гораздо и добре кукобили; ягод, яблок, иных овощов мало ся зостало для великих дождов, морозов, градов, толко грибов-абабков в лЂте велми много было зродило, иж кождый человек по двакрот y грибы на день ходил. Также за великими дождами около великих рек трав ни троха сена не косили. Вода вешняя стояла по святом Петре тыждень; a коли почала вода вешняя спадывать, яко бы три дни было. Потом болшая вода дожчевая нашла; и так поведали, яко бы серед лЂта на Москве снег великий и мороз был, колко недель на санех в лЂте ездили. B нас на низких мЂстах у-в огородех капусты, цыбули, яри згола потопило; и стояла вода мал не до Или святаго. Зима была велми суха, людем купецким велми шкодила, бо снег мал был. Жита, гречихи, пшеницы, овес, ечмень, горох в той цене был, яко в року 603, бо тот рок вари мало было, толко грибы, ледники, опенки ели, a рыб вялых мало было для великих поводков. \л.169.\ На люди з ласки божее было здорово.

Р оку 1605. Весна з ласки божей была добра, снег заразом согнало; жито на зиму сеяное, як было зелено y восень, также было зелено и на веснЂ; c тою зеленостю и зацвило. Пред се житу сухость была велми зашкодила, дожду мало бывало; y цвету яко y жите, так и яр мороз, сухость зашкодила; двои были усходы. Гречихи добрий урожай был и пленна была. Того року укуповали жита чверть 8 грош[ей], овса чверть грошей 4, пшеницы чверть гр[ошей] 16, конопель чверт гр[ошей] 6; маку не было ни троха, ни цибули; чоснику и того было велми малый урожай.

Т ого ж року 605. У Баркулабове за Лахвою y волоки порезано через урядника пана Федора Плетинского.

Того ж року 605. Якийся знашол y краю Низовом, a звлаща y дворе князей Вышневецких, якийсь Дмитр Иванович царевич; яко ж бывши при дворе их милости панов радных и собравши войско немалое люду низовского и козаков запорозких, также люду руского множество, c тым людом поехавши, Стародуб, город московский, узял, лысты по всей Москве розослал, поведаючи себе быти \л.169об.\ царя Дмитра Ивановича московского, которого еще малого яко бы мел Годун стратити, нижли страшно и до царя Годуно принесено, але не оного Дмитра Ивановича, в него место малое дитятко, a его дивне было сховано и на Украину Низовскую было вывезено. Яко ж o того Дмитра Ивановича животе и мешканю, o бытности его, обычаех и поступках и мешканю его дивне и плачливе и трудно было выписати, яко ж история o нем ест написана по достатку y других летописцах. Яко ж не по малом часе оный Дмитр Иванович з людом, взявши град Стародуб и Москву, осел, a Годуна c царства своего Московского согнал, и не ведати где ся Годун подел. Яко ж Дмитра Ивановича познавши его Москва по давных знаках царских, был корунован царем в место отца своего Ивана, царя московского на Москве. A хотя ж и короновали его, пред се не мели со собою доброе и зуполное згоды: одна москва приймовала его за царя, a другая не приймовала. Тут же промежи ними была силная и великая незгода и посварок и велми o нем штось дивне радили, хитре, мудре, скрыте, молчком. Радили, o чом напереде услышыте.

Р оку божого нарож[еня] \л.170.\ 1606. Тот рок з ласки божей был здоров, на всем добрый, нижли рок мокрый; жито, яри плохи были, a пред се цена была яко в року 1605 описано; предные поводки были частые; сенов мало было статку. З ласки божей было здорово также на люди.

Т ого ж року 1606 Дмитр Иванович, будучи ему коронованому царем на Москве, не порадившися, ани пытавшися сынов боярских, по своей ему воли, по своей мысли, послав и змовивши панну зацную за себе y пана Ш воеводы сондомирского в Полщи; яко ж оные послы змовившы, панну привезли на Москву и самого пана сондомирского воеводу, также з ним много множество добрых, зацных панов и паней и панянок зацных, шляхетных.

 

 

Ш далее пропуск на 4 — 5 букв

 

 

Яко ж того ж року 606, было веселье на Москве и было при том веселю литвы, руси и поляков, волынцов. Поведали яко сем тысящей выбранцов, коштом великим выбраных, в злате и сребре, в жемчугу, y каменью дорогом, иж того ум человеческий сказати не возможет. Яко ж по том веселю за колко дней албо недель москва вся, забравшисе и змовившися межи собою, в ночи без вЂсти безпечне, грозно вдарили на палац самого \л.170об.\ царя Дмитра Ивановича и на весь почет его, так литву, русь и поляки и на пана Сондомирского. B тот час побито от москвы много множество почту царя Дмитра Ивановича, люду зацного, люду служалого рыцерского, панов зацных, шляхетных, также зацных паней, панянок; тым всим великое насилство, посмеване, што их злый умысл мыслил, то чинили; плачливе и страшно было слышати o таковой злой пригоде тых людей учтивых, a самого царя Дмитра не ведати где ся он подел. Одны поведали, — убит, a другие поведали, — жив утек; o том нихто на тот час певное ведомости не мел, a самого пана Сондомирского не згубили и з дочкою его до вязеня посадили. A которых на тот час панов не побили, тых множество люду служалого яко убогих, так и богатых полупивши, шаты добрые з них собравши, брони поотнимавши, нагих, босых за границу выгнавши, попускали. A то за великие прикрости литовские и насмеванье полское сталося им, иж был збудовал царь Дмитр ку воли жоне своей на Москве костел полский и мниши служили службе божую, a з руских церквей великое насмеванье чинили, \л.171.\ попов московских уруговали, з них ся насмевали, — мели то собе за великую кривду и великое зелживости своей, не хотячи y царству своем, абы была вера ляховитинская; бо в них того от веков не бывало, ани хотели того во царстве своем мети. Прето их побили, помордовали и c царства своего Московского проч выгнали, a собе на царство царем помазали Шуйского. Потом, того ж року 606, господарь, крол полский Жикгимонт Третий, послал гонца своего o том до Москвы пана Яна Кгенсевского; и того там же на Москве посадили, и седел тот гонец много.

Т ого ж року 606, месяца июня 5. Почался починати якийсь рокош. Там же на тот рокош зьеждчалися панове руские, пруские, жомоитские, мазовецкие, подляские, волынцы, литва, поляки, згола от всих землей и поветов панове велможные, панове зацные, всяких вер, всяких языков. И стоял тот рокош y Сондомиру месяцей шесть. Яко ж там тот край выгубивши, выпаливши, спустошивши от Покрывници две миле, и не учинивши и не постановивши ничого доброго y восень o святой Покрове розехалисе прочь. Тот рок 606 з ласки божей добрый был, толко на фребру много было хворых, a збожю была цена: \л.171об.\ жита мера по гр[ошей] 24, овса мера гр[ошей] 14, гречихи мера гр[ошей] 20, ечменю мера гр[ошей] 20. Той же рок 606 велми дивный был, a то в том, иж вода все лето так была велика, яко праве весне: не толко летом, но и o запустех Филиповых: раз упадет, потом прибудет, и з берегов выливалося; прето сена велми мало косили.

Р оку 1607. Тот рок з ласки божей был здоров на люди, также и врожай збожу середний был, также и цена збожу была: жита чверть гр[ошей] 8, пшеница чверть грошей 6, ечмень гр[ошей] 6, овса чверть грош[ей] 5, гречихи чверть гр[ошей] 4. Нижли того року 607 великая была незгода и замешане кролю c панами, паном c кролем, з рокошанами, великий бунт, забите, кровопролите; от господаря кроля на домы насылане; шляхте шкоду великую починене. Велми страшно было слышати, албо тым, где се то деяло, видети. Яко ж и конституцыя были выдали релии греческой; a потом за великою и дивными справами разорвалося. На том так не постановилося, толко великое забийство, мордерство, кровопролитство поделали рокошаном; яко ж o таковом постановеню рокошанском тут же в том року 606 ест вышей описан.

B том же року 607 было великое на християне \л.172.\ и немилостивое жолнерство, лупежство; по местах, по селах жолнери берестейские, жолнере кгроденские тые по волости кролевской капщизну брали, a на панских и княжеских приставство на подданых вытегали. K тому зас особливе жолнеры Лисовского, жолнеры Кгроденского, тые по подданых кролевских и князских, панских, шляхецких великое и немилостивое приставство, албо стацию по волостях брали яко збожем, также и пенезьми.

Т ого ж року 607, месяца мая, после семое суботы, ишол со Шклова и з Могилева на Попову гору якийсь Дмитр Иванович; менил себе быти оным царем московским, который первей того Москву взял, и тамже оженився. Бо тот Дмитр Нагий был напервей y попа шкловского именем, дети грамоте учил, школу держал; a потом до Могилева пришол, также y священника Федора Сасиновича Николского y селе дети учил. A сам оный Дмитр Нагий мел господу y Могилеве y Терешка, который проскуры заведал при церкви святого Николы. И прихожувал до того Терешка час немалый, каждому забегаючи, послугуючи; a мел на собе оденье плохое, кожух плохий, шлык баряный, в лете в том ходил. A коли были почали познавати онаго \л.172об.\ Дмитра Нагого, в тот час зМогилева на село Онисковича Сидоровича аж до Пропойска увышол. Тамже y Пропойску были его поймали, во везенью седел. A потом пан Рагоза, врядник чечерский, за ведомостю пана своего его м[и]л[ости] Зеновича, старосту чечерского, оного Дмитра Нагого на Попову Гору, то ест за границу Московскую пустил, со слугами своими его пропровадил. A коли приехал до Москвы, то ест Поповы Горы, там же его москва по знаках царских и по писаных листах, которые он, утекаючи зМосквы по замках иаписавши давал, — через тые уси знаки его познали, иж он ест правдивый певный царь восточный Дмитр Иванович, праведное слонце. Тут же почали радоватися, в шаты, убиоры коштовные одЂли; потом конного люду семсот до него прибегло. Тут же почал лысты писати до Могилева, до Оршы, до Мстиславля, Кричева, до Менска и до всих украинных замков, абы люде рыцерские, люде охотные до онаго Дмитра Нагого прибывали, гроши брали его. И заразом c Поповы Горы оный Дмитр Нагий, сел мнимый царь московский, осел замок московский Стародуб. Тепер же почал ся люд гулящий, люд своволный — скоро Дмитро, то и молодцы. Якийсь наймит зМстиславля до него пришол. На тот же час \л.173.\ на Москве царем князь Андрей Шуйский. Тогды собравшы войско Дмитраш, и почал войну творити з Москвою и c князем Шуйским, нижли одны москвачи признавали его царем быти и самая Москва и вси болшые бояре московские, — и иныя многая москва, которая первей его добре знала быти царем московским: ино дей якийсь вор московский, a другие поведали быти и называли его так — плут. И так до оного Дмитра Нагого москва писала быти его таким — царь вор Гриша Отрепич, рострыга. Потом зась явился другий царь на Москве именем Недведок. Тот Недведок з людом немалым сам передался на Москву царю Андрею Шуйскому. Тепер же почали войска до царя Дмитрия прибывати, войска велйкие, войска силные. Отселя з Литвы Руцкий з ротою, Лисовский, Велемовский, Сапега и иных много, a з Низу роты великие: князь Вышневецкий з ротою, князь Ружинский з ротою; там же волынских, подолских зацных панов зротами. A c Полщи пан Стадницкий з ротами великими. Там же на Москве в тот час бог ведает, што ся там деяло: места, замки малые выплендровали, але под столицею все лето стояли, много штурмов утратили, — не достали. Там же купцы шли многие з горелками, и тые великую шкоду Москве делали, — хотя купцы, и тые жолнерами \л.173об.\ себе поведали быти; яко ж оные жолнере и вси купцы, которые там на Москве были, чудно и велми дивно o цари Дмитре поведают: якось дивне y войску справует, иж дей y ночи не спит, толко убравшися во платье леда каковое то Щ.

Р оку 1608. Летом великие и силные войска ишли на Москву до царя Дмитра, a нам в том краю силную великую шкоду починили y статку, a наболшей y конях. Тые то ишли жолнери, имена их описано в року 607.

Т ого ж року 608 разгневане божее было, много псов устеклых попсовалося, коней и людей много покусали и померли. Того ж року 608 патриарха вселенский кир Рафаил переставился. Того ж року на местце его был посвящен вселенским патриархом именем кир Неофата.

Того ж року 608 лето было мокрое, поводки были частые, \л.174.\ мало хто при реках великих сена косил, бо и до восени поводки великие были. Того ж року 608 много деток малых з воспы померло Ъ.

 

 

Щ далее пропуск, равный примерно девяти строчкам Ъ далее пропуск на 5 строк

 

 

К ороль Владислав ишол под Смоленск в року 1635. Шеин на тот час з войском великим под Смоленском был и кролю Владиславу поклонился и делы его, што Смоленск добывал, королю Владиславу досталися, меновите, напервей: «Однорожец», сажний три и болей — 1; «Кгранат», сажний чтыри — 2; «Гладки», сажний три — 3; «Кречет», сажний три — 4; «Волк», сажний три — 5; «Царь-пушка», сажни три и болей — 6; «Коваль», сажни три — 7; «Юрей», сажни три — 8; «Пасынок», сажний два и болей — 9.

П ри тых и иншых дел малых припроважено з Смоленска, числом всих.

 

 

ЛІТОПИС ПАНЦИРНОГО Й АВЕРКИ


Опис рукопису

 

 

Dziele miasta Witebska, ktore sie działy na swiecie dawnych czasow. Wypisane tu z xiengi pisaney renku i [ego] m [ości] pana Michała Pancernego, mieszczanina witebskiego słowo w słowo przez Stefana Hawriłowicza Awierke, mieszczanina wittebskiego w roku 1768, miesionca mli, 13 dnia.

Zaczynaion sie tak pisane w xiendze Pancernego:

Roku 974. Zbiwszy Olha iaćwingow i piczyngow y, przeprawiwszy sie przez rzeke Dzwina zanocowawszy z woyskiem, y upodobawszy gure założyła zamek drewniany, nazwała od rżieki Widiby Wittebskiem, wmurowała cerkicu А w Wysznim zamku swienteho Michała, a w Niżnim \л.1об.\ Zwiastowanie. Dwa roki zmieszkawszy odiechała do Kiowa.

Roku 965. W Gnieźnie okrscił sie xionże polski, Mieczysławem nazwany na krście, y Polska wiare przyieła Б.

 

 

А так в тексте Б так в тексте

 

 

Roku 980. Gieysa, syn Tokow, ociec swientego Stefana, xionże wengierskie, okrscił sie y wszystka Wengierska ziemia z nim.

Roku 956. Olha sie okrścila w Kostantynopolu; na krście swientym nazwana Helena.

Roku 990. Włodzimierz okrścil sie z wody w Korsuni, a na druhi rok w Kiiowie okrszczono. Ten Włodzimierz fundował arcybiskupstwo Połockie. Bywszy wnukiem xienżny Olhy, na krście świetym nazwaney Heleny. \л.2.\ Za błogosławieństwem Andryiana papieża Mettody y Cyryli greckie xiengi przetłumaczyli na słowienski ienzyk i służba boża pierwsza słowienskim ienzykiem była w Rzymie odprawowana, roku pańskiego 895.

 

 

Z ruskich kronik.

 

Roku 896. Od stworzenia świata, według ruskiego rachuie sie 6400 roku, przetłumaczyli greckie xiengi na słowien[s]ki ienzyk.

Roku 1114. Włodziemierz umarł w Kiiowie, wnuk Olhy, xienżny witebskiey.

Roku 1162. Wołhow, rzeka wielka w państwie Rosyskim bendonca, przez całe pieńć dni w gure szła.

Roku 1695. Galiczyn chodził pod Krim. \л.2об.\

Roku 1697. Drugi raz chodził Galiczyn pod Krym. Tam onemu okupu dali: wmiasto czerwonych złłotych, liczbanow kilka beczek tatarowie dali.

 

 



Поделиться:


Последнее изменение этой страницы: 2016-07-14; просмотров: 160; Нарушение авторского права страницы; Мы поможем в написании вашей работы!

infopedia.su Все материалы представленные на сайте исключительно с целью ознакомления читателями и не преследуют коммерческих целей или нарушение авторских прав. Обратная связь - 3.235.229.251 (0.087 с.)