Лист от послов князя великого московскаго.



Мы поможем в написании ваших работ!


Мы поможем в написании ваших работ!



Мы поможем в написании ваших работ!


ЗНАЕТЕ ЛИ ВЫ?

Лист от послов князя великого московскаго.



Божею милостю царя и великого князя Ивана Василевича всея Руси, володимерского, московского, новгородского, казанского, царя витариханского [астраханскаго], господаря псковского, и великого князя смоленского, твердского, югорского, тримскаго ББ, вядскаго, болгарского и иных многих — Стефану, божиею милостю, королю полскому и великому князю литовскому, рускому, прускому, жомоитскому, мазовецкому, княжати семикгродскому. Што первей сего по взятию Полоцка зсылалися наши бояре c твоими паны понеоднокрот, и ты o то[м] нам явно знати не дал, и писал еси во своих листех и паны твои заводнем и мудрыми речами писали, и того было явне зрозумети нелзе; што по прожнем обычаю послов своих олати не хотели есте, и мы к тобе послали послов своих, a ты приказал к нам нашим дворянином Григорием Афанасовичом Нащокиным рок, a к тому року нашим послом поспеть невозможно было. И мы к тобе послов своих отпустили, a наперед послов своих послали есмо к тобе гонца Федора Шимшарова з листом, жебы ты a наших послов з войском почекал, и ты к нам гонца своего отпустил еси, \л.140об.\ a сам еси не вернулся, идеш на конец землю з войском, a послом нашим росказал еси к собе ити наспех, прагнучи кров християнскую и хотячи видячи крови розлияния во хрестиянстве, и написал еси y своих листех, штобы нам своими послы приказати вси слова и нам почому позгинути, што тобе мило, албо любо, a от тебе не слышавши, албо которое уставиш новое дело, чему ся стать нелзе, и мы перед богом и перед тобою змирячися, послом своим к тобе ити росказали и на которой мере.

Року 1583, месяца септеврия 8 дня. Его милость князь Богдан Соломерецкий, староста кричевский и луцкий В, приехавши з войска з службы з двору его кр[олевское] милости c под Пскова, по взятию, панну Евву Баркулабовну, старостянку дисенскую, y стан малженский за себе взял, a веселе было y месте Виленъском.

Того ж року 1585. У пост Филипов y пущи Сидоровской его милость князь Богдан Соломерецкий побил лосей десять великих, a вепров диких великих осмь, где тепер село Сутоки и Махова. Того ж року Василей Сескович з уряду зьехал, a пан Роман Ревут на вряд Баркулабовский наехал.

Того ж року 83 Г, праве o светом Петре албо на самый день Петра и Павла светаго, y Головчине робили, пруд сыпалы. Яко бы o полудни y месте Головчине y брони Д Остроговой силный и великий гром забил 12 человек, a трех \л.141.\ человек не знашли, не ведет где ся подели, если вода занесла албо песок засыпал.

Того ж року многа множества страшных и великих чудес господь бог оказати рачил: перуны и грады великия, сухость, морозы маль не через все лето были y Литве. От великого морозу на поли y колосьи жито посхло, многия домы панов зацных от перунов великих погорели, зиме з морозов и метелицы по дорогам многое множество людей убогих, также и купецких померло. A лете великий жар был: жито, яри, трава, такъже ярины огородныя все погорело y Литве, a звлаща около Менска, около Вилни. Люди убогия з хлеба на Русь давалися — молодцы, жонки, девки, много на Русь и на Украину понаходило.

Року божого нарож[еня] 1584. Великий князь Иван Василевич первей сына своего Федора посохом пробил, a потом сам и сын его старший умерли.

Року 1599. Стефан Е Василевич Е Годунов на царство Московское коронован. На весне великая вода была y Смоленску, y замку швырен зрыла, ставов, прудов много попсовало.

 

 

ББ так в рукописи В так в рукописи; должно быть олучицкий Г так в рукописи; очевидно, должно быть [15]85 Д так в рукописи; должно быть браме Е—Е так в рукописи

 

 

Року 1585. О семой суботе Хомутовский, врядник пана Любелского, села Гарбовичи, Хотетов, Следноки и Струпищи, Заболотя, Батуня и иных много сел побрал за пана Любелскаго держаня, a первей была волость замку Могилевского.

Року 1586. ВеснЂ y великий пост пан Михайло Гарабурда послом на Москву ходил. Оттоль вывез примиря \л.141об.\ на год двадцать, a мешкал на Москве аж до семое суботы, a приехавши y Литве умер. Того ж року на святаго Юря мороз, a снег y колена выпал. Тогды на Фом[иной] недели люди овсы, ячмени сеяли, a пред се был урожай добрый. Того ж року пан Любенский и пан троцкий умер, a пану Лву Сапезе волость пана Любелского досталася.

Року 1583 календар новый выдан. За кроля Стефана, за митрополита Девочку, за владыку полоцкого Терлецкого ляха, бо перед тым был ротмистром, a век свой зжил. На тот же час было великое замешание промежи панами и промеж людми духовными, также и людми простыми было плачу великого, нареканя силнаго, похвалки, посварки, забуйство Ж, грабежи, заклинания, видячи яко новые свята установляли, празники отменяли, купцом торги албо ярмарки поотменяли, праве было начало пристья антихристова, y таком великом замешанью. Того ж часу почали y во Лвове, y месте Виленском, y Берестю школы науку выдавати, братерство якоесь установляти и тым закон и веру утвержати, за патриархи не кажут бога просити, ани его успоминати, толко за папежа; тепер же почали сеймы — соборы чинити и до них из[ъ]ежчатися. \л.142.\

Року 1586, месяца июля. На святаго Бориса и Глеба в месте Могилевском церков святыя Богородицы сооружена и через владыку посвечона. Того ж року, 86, было посту Петрова 5 недель. Того року ячмень, овес сеяли на десятой недели, пред се был урожай великий, добрый: жита мера была грошей по 14, a чверть жита по грошей полчварта.

Того ж року 86, o Святом Духу на Москву ехал и на Орши был Еремея, патриарха Антиохийский, з своее земли до Москвы ехал рок; тогды на дорозе в него вси слуги отмерли, a мовил языком антиохийским.

Року 1586, месяца декабря 4 дня часа 9 o полудни, великий король полский Стефан Батура, княжа Семигродское, переставился, a поховано y Кракове.

Року божого нарож[еня] 1588 взято на кролевство Полское кролем кролевича швецкаго.

Року 1587. Зима была велми снежная, морозы силные, метелицы великие, такъже и весна велми неуставична была: редкий день минул без снегу, аж до святого Юръя, a Юрей святый был 2 недели по святе; a потом на четвертой недели по святе в ночи были немилостивые страхи: великие дожды кгвалтовные домы подрывали, верхи позносили, яко через всю тую ноч не засыпали ЖЖ люде, по полям y пастухов статки градом \л.142об.\ побило, a в лесе деревем, y князя Головчинского много стирт з житом перун пожог, по селам статки мало не вси побив град по полям.

 

 

Ж так в рукописи ЖЖ сы написано по другим буквам

 

 

Того ж року 87 на весне пшеницы переводыи сеяли на 5 недели, ярицы на 7, овсы, ячмени на 8 и на девятой, але не увошли от великих морозов; еще c первое Святыя Пречистыя почалися; гречихи не косили, a хотя кто и косил, немиого пожитку мел. Того року жита жали по Покрову Святыя Богородицы, овсы и ячмени жали на 3 недели по Покрове. Тот рок 87 велми был на все згола незрожайпый и голодный.

Року божого нарожения 1587, месяца июня 7 дня. Послы шли московские до Варшава кроля обирати на кролевство Полское по смерти кроля Стефана: боярин и наместник коломенский, великоперимъский Стефан Василиевич Годунов, боярин и намесник коломенский Феодор Михайлович Троекуров ярославский, печатник и ближний дияк господарский Василей Яковлевич Щолканов, думный дияк Дружина Панътелеев Петелин. На том же сейму Варшавском ничого доброго не усеймовали, бо межи панами была великая незгода: поляки вотовали на Максимилиана, цесаря християнского, \л.143об.\ литва вотовала на князя московского, кролевая вотовала на кролевича шведцкого, и затым роз[ъ]ехалися, не постановивши ничого доброго. На том же зьезде было немилостивые посварки и забойства, выличили на том сейме невинне забитых семъсот голов. Были теж на том сейму з многих и далеких земль, то есть от царя турецкого, от князя московского Ивана Василевича, от Максимилияна, цесаря хрестиянского, от кроля шведского; всих тых было з розьных украин послов двадцать. Конвакация септебря 20 дня: пана Кишку послали послы по кролевича шведского Жикгимонта Третего, c которым кролевая сама послала двору своего выбраного люду коней пятсот.

Року божого нарож[еня] 1588. Взято на кролевство Полское кролевича шведскаго Жикгимонта Третего, a короновано y Кракове на Вознесение Христово. Того ж часу и тело кроля Стефана поховано.

Прето што ся почнет не з благословенства божого и старших панов, господарей наших, a за призволеньем белых голов, не много господь бог помагает и грады множит, албо покой дарует. Теперь же за держаня кроля пана нашего Жикгимонта Третего явилася промеж панами великая немилость, \л.143об.\ показалося отщепенство и великое гонение y святой вере на церкви Христовы, a наболей на веру кафолическую, на веру хрестиянскую; оставивши голову Христа спасителя нашего, показуют и становят на то местце старшим головою Петра и насветшаго папежа. Были войны розные великие з Ыкгимилем волоским, з кролем шведским, c козаками запорозкими, праве згола яко бы мало не пуста земля была. Такъже y збожью неурожай, голоды великие, доро[го]в силная З, поветрие, моры, лета непогодныя незрожайныя, праве на все недобро и неспоро было стало.

 

 

З c переделано из другой буквы; н из я.

 

 

Року 1587, месяца октобря 1 дня. За Жикгимонта Третего, за владыку полоцкого Феофана, за митрополита Девочку, на Вендорожи посвящено храм Покров Святыя Богородицы через Федора Филиповича, священника баркулабовского, за благословением Феофана, владыки полоцкого.

Лет две тисечи без закону пред потопом. Лет две тисечи зь законом со обрезанием. Лет две тисечи зь евангилием, то есть християнство.

Року 1588. После Петра святаго был на Орши патриарха цариградский именем; тот на Москву ехал до князя Федора Ивановича, a з ним три владыки, всих было при нем коней 50. Тот бо на собор до места Виленского листы писал до митрополита и до всих епископов. \л.144.\

Того ж року 88 y месте Виленском там y тых краях, такъже y Киеве и на многих странах великий мор был. Того ж року 88, от семое суботы аж до Рожства Христова велми великая была непогода и неуставичность: в лете дожду не было, a y восень снегу не было, толко вЂтры a дожды, y восень o святом Покрове велми поводок великий был, аж по лугом пошла, праве яко на весне велика была, a до Рожства Христова y Днепре вода прибывала и з берегов выливалася.

Року того ж 88, месяца генвара 18, после святаго Афанасия на третий день дожды великие были, аж снег согнало, праве было яко не весыЂ : пастухи на бор c статками погналися на паству, a потом за недель три знову зима лютая.

Того ж року архиепископ Феофан, владыка полоцкий, господин благоверный, y Полоцку преставился; там же погребено тело его честно.

Того ж року 88 совершено на владычество Полоцкое Афанасия Терлецкого, за кроля Жикгимонта Третего, за митрополита Михаила Рагозу.

Року того ж от господаря кроля выслано напервей до Орши енералы, то ест над дванадцатми возными один енерал местце старшое мает, Богдан Биряленок, яко ж пред тым y тых краях не бывало.

Року 1589, месяца мая 30 дня. По запустах святаго \л.144об.\ Петра и Павла y пятницу ее милость кыежна Богдановая Соломерецкая, княгиня Евдокия Баркулабовна Корсаковна, y замку Кричевском за староства князя малжонка своего породила сына именем Исакия Долматского по прозвищу князь Богдан, a крестил его старец убогий.

Того ж року 89, пан Кгрикгор Вилянт y закупе Баркулабов держал год три; он уволоки меския роздавал. Тот рок 1590, яко в лете сухость, так зиме морозы силные великие; было так, иж ляда y восень палили.

Року 1590. Были козаки запорозкие, Матюша c полком, Голый c полкому Могилеве. Аж до Минска приставъство по волостях брали, a кривды, шкоды не чинилы, толко жонок охочих тых намовляли и заклинали, абы з ними на Низ ишли, и взяли з собою жонок и девок яко двесте поголов.

Року 1592 o мясопустах, его милость князь Богдан Соломерецкий, староста кричовский и олучицкий, Буйничи, Чайки откупил и y волоки поволочив, a пред тым было многих розных панов — князей Соколенских, князей Мосалских, князей Крашинских, пана Филона и далей.

Того ж року 92. Его милость князь Богдан Соломерецкий, староста кричевский и олучицкий, слободы осадил, село Махова и Сутоки.

Того ж року 92 сталося великое и немилостивое за \л.145.\ мешане y вере от римлян на святую веру восточную греческую; почали соборы помесные чинити, то ест y месте Виленском братство навчоных людей до себе на поратунок прибавили з места Лвовского Григория Раготинца, Стефана Зизания. Тые силную и великую войну з рымляны мевали, не толко на ратушах и при рынку, по дорогах, но и посредку церкви святое войну, потарчку великую мевали, якож им господь бог противу их упоров великих и змыщленых уставов и законов николи не помог и не поможет. Теперь же почали от господаря кроля до архиепископов c прозбами и грозбами листы фалшивые нисати и посылати по всих градех.

Року 1590, месяца июня 29. У Берестю Литовском на Рождество Иоанна Предтечи был собор, за митрополита Рагозу, a за владыку полоцкого Терлецкого, нижли на том зьезде ничого доброго не вчинили, на который собор и его милость князь Богдан, староста кричевский и олучицкий посылал попа своего баркулабовского Федора Филиповича. \л.145об.\

Року 1592. Жикгимонт Третий, божею милостю король полский, великий князь литовский, руский, пруский, жамоицкий, мазовецкий, инфлянтский, кролевства Шведскаго наближний дедич и пришлый. Ознаймуем тым нашим листом всем посполите, каждому зособна, кому бы новин ведати належало, нинешним и напотом будучим. Иж мы, господарь, видячи быти прихилных ку поровнаню y вере святой архиепископов релии греческое Ипатия, луцкого епископа, лвовского и холмского, которые до нас, господаря, c тым прислали, хотячи под зверхность и благословенство одного пастыря светейшаго отца нашего папежа римскаго быти, ему старшенство и зверхность признати, заховавши в себе вцале вси справы и церемонии в целости во церквах божиих. Што мы, господарь, видячи пред ся взяте их потребно до речей збавенных, то от них з вдячностю приймуем. A иж бы за таковую хуть свою ласки нашее господарское были вдячны и певны, тогды то им тым листом нашим, привилеем, им самым и их потомком, по них всих епископом, презвитерем и всему епископству церкви восточныя римския варуем и упевняем и словом нашим господарским прирекаем и обецуем, сами з себе и з яснейшими потомствы нашими кролевства Полского, иж хотя \л.146.\ бы на тых речоных епископов подати и листу привиля нашего от патриархов и митрополитов, яких же колвек причинку неблагословенству были на них винайдованя, клятвы выношены и выдаваны, иж то им епископом самым и всему духовенству их намней николи ни в чом шкодити не мает. Обецуем и словом нашим кролевским для вшелякого оскарженя и клятвы и оглошенья, бы и добре противу станом их водлуг справ духовных и светских было для всих причин каковых духовенство владычеств, на которых оны мешкают з данины продков их и от нас, того от них не отоймовати, и при их животах и нашим особом не давати, але их заховуем вцале, c йримноженьем ласки нашея и вывышеньем учстивости во упокою на тых владычествах, яко верных подданых и богомолцов наших, поки остатнего живота их ставати будет. И еще на тое им каждому, хто бы ся до таковое едности порядку прихилили, свободы, волности по тому ж, яко их милость духовные римские мають, также и они мають и будуть мети, што мы обецуем еще иншими привилеями нашими им надавати c примноженьем ласки нашея господарския. A то все обецуем мы, господарь, за нас и за потомки наши тым помененым епископом, Кириле Терлецкому, \л.146об.\ владыце луцкому; Гедиону Болобану, владыце лвовскому; Леонтию Пелчицкому, владыце пинскому; Дионисию Збаражьскому, владыце холмскому; Гермогену, владыце полоцкому, вцале держати до их животов. И на твердость тое речи дали есмо им сесь наш лист, привиле, подписавшися рукою нашею королевскою, до которого печать нашу коронную притиснути есмо велели. Писан в Кракове, месяца марта 11 дня, року 1592.



Последнее изменение этой страницы: 2016-07-14; просмотров: 61; Нарушение авторского права страницы; Мы поможем в написании вашей работы!

infopedia.su Все материалы представленные на сайте исключительно с целью ознакомления читателями и не преследуют коммерческих целей или нарушение авторских прав. Обратная связь - 3.89.204.127 (0.014 с.)