Богослужение Царской Православной Церкви

Богослужение Царской Православной Церкви

1 ОКТЯБРЯ: Преподобныя и благове́рныя ма́тере на́шея, княжны́ Евфроси́нии Су́ждальския, дще́ре му́ченика и испове́дника Христо́ва вели́каго кня́зя Михаи́ла Черни́говскаго.

Вечером 30 сентября

На Го́споди воззва́х:

Сти́х:Изведи́ из темни́цы ду́шу мою́, испове́датися и́мени Твоему́.

Сти́х: Мене́ жду́т пра́ведницы, до́ндеже возда́си мне́.

Сти́х: Из глубины́ воззва́х к Тебе́, Го́споди, Го́споди, услы́ши гла́с мо́й.

Глас 2: Прииди́те, ве́рнии,/ пе́сньми почти́м пречу́дную Евфроси́нию,/ при́сную о нас к Бо́гу моли́твенницу,/ усе́рдно взыва́юще:/ ра́дуйся, страны́ Росси́йския ве́рное охране́ние,/ гра́да на́шего ве́рный покро́ве/ и всем Христиа́ном ско́рое вспоможе́ние и заступле́ние.

Сти́х: Да бу́дут у́ши Твои́ вне́млюще гла́су моле́ния моего́.

Прииди́те, ве́рнии,/ пе́сньми почти́м пречу́дную Евфроси́нию,/ при́сную о нас к Бо́гу моли́твенницу,/ усе́рдно взыва́юще:/ ра́дуйся, страны́ Росси́йския ве́рное охране́ние,/ гра́да на́шего ве́рный покро́ве/ и всем Христиа́ном ско́рое вспоможе́ние и заступле́ние.

Сти́х: А́ще беззако́ния на́зриши, Го́споди, Го́споди, кто́ постои́т; я́ко у Тебе́ очище́ние е́сть.

Пресла́вная Евфроси́ние,/ Престо́лу предстоя́щи Вседержи́теля,/ при́зри на нас, с любо́вию па́мять твою́ соверша́ющих,/ и ми́лостивно приими́ хвале́бная на́ша тебе́ песнопе́ния,/ ми́лостивным о́ком всегда́ взира́ти на нас сотвори́/ Влады́ку на́шего и Го́спода.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Весь град и вся страна́,/ ны́не сте́кшеся в храм твой,/ те́плая к тебе́ обраща́ют сердца́,/ ча́юще твои́ми моли́твами получи́ти грехо́в оставле́ние,/ в доброде́телех преспе́яние,/ вре́менное благоде́нствие и ве́чное спасе́ние./ Ты же, я́ко ми́лостивая ма́ти,/ собо́р сей пра́зднственный ра́достно прие́млющи,/ ра́дости испо́лни сердца́ на́ша,/ я́ко ра́дости тезоимени́тая.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Терпя́щи ны́нешняя му́жественне, веселя́щися бу́дущим,/ ко всем глаго́лаше, преподо́бная Евфроси́ние:/ еда́ у́бо ту́не подвиза́емся, но ве́чнаго живота́ ча́юще получи́ти,/ лю́ты ско́рби, но сла́док рай,/ боле́зненни труди́, но присносу́щно восприя́тие ве́чнаго живота́;/ не облени́мся у́бо, о по́стницы, ма́ло претерпи́м,/ да венцы́ нетле́нными увязе́мся от Христа́ Бо́га/ и Спа́са душа́м на́шим.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.