Утром в субботу. Свети́ла у́мная яви́стеся, святи́и му́ченицы, мглу́ бо пре́лести упраздни́сте ве́рою, и душе́вныя свещы́ ва́шя просвети́сте, и с Женихо́м со сла́вою внидо́сте

Утром в субботу

По 1-м стихосло́вии седа́льны:

Свети́ла у́мная яви́стеся, святи́и му́ченицы, мглу́ бо пре́лести упраздни́сте ве́рою, и душе́вныя свещы́ ва́шя просвети́сте, и с Женихо́м со сла́вою внидо́сте в небе́сный черто́г. и ны́не мо́лим вы́, моли́теся спасти́ся душа́м на́шым.

Сти́х: Ди́вен Бо́г во святы́х Свои́х, Бо́г Изра́илев.

Воздержа́нием страсте́й огнепа́льныя испепели́вше зра́ки и движе́ния, Христо́вы му́ченицы, прия́ша благода́ть, неду́ги отгоня́ти немощству́ющих, и живу́ще и по конце́ чудоде́йствовати. Вои́стинну чу́до пресла́вное, я́ко ко́сти на́ги источа́ют исцеле́ния: сла́ва Еди́ному Бо́гу на́шему.

Сла́ва, и ны́не, Богоро́дичен: <далее см. основной Чин>

По 2-м стихосло́вии седа́льны:

Проро́цы, му́ченицы Христо́вы, и святи́телие, и́же по́двиг до́брый благочестному́дренно зако́нно сконча́вше, и прии́мше венцы́ неувяда́емыя от Бо́га, непреста́нно моли́те о на́с Его́ бла́гость: я́ко да да́рует на́м прегреше́ний проще́ние, я́ко Бо́г благоуве́тлив.

Сти́х: Блаже́ни, я́же избра́л и прия́л еси́, Го́споди.

Ме́ртвен:Преста́вльшыяся благоче́стно от вре́менных, в селе́ниих избра́нных с пра́ведными сопричти́, Влады́ко, те́х упокоева́я на ме́сте пра́зднующих, и в сла́дости неконча́емей ра́йстей, я́ко Бла́г, во́льная прегреше́ния и нево́льная и́х, за кра́йнюю бла́гость прости́вый, Человеколю́бче.

Сти́х: Ду́шы и́х во благи́х водворя́тся.

Ме́ртвен:Глубино́ю му́дрости человеколю́бно вся́ стро́яй, и поле́зное все́м подава́яй, Еди́не Соде́телю, упоко́й, Го́споди, ду́шы ра́б Твои́х: на Тя́ бо упова́ние возложи́ша, Творца́ и Зижди́теля и Бо́га на́шего.

Сла́ва, и ны́не, Богоро́дичен: <далее см. основной Чин>

На хвали́тех стихи́ры:

Сти́х: Сотвори́ти в ни́х су́д напи́сан: сла́ва сия́ бу́дет все́м преподо́бным Его́.

Сти́х: Хвали́те Бо́га во святы́х Его́, хвали́те Его́ во утверже́нии си́лы Его́.

Сти́х: Хвали́те его́ на си́лах его́, хвали́те его́ по мно́жеству вели́чествия его́.

Сти́х: Хвали́те Его́ во гла́се тру́бнем, хвали́те Его́ во псалти́ри и гу́слех.

Сти́х: Хвали́те Его́ в тимпа́не и ли́це, хвали́те Его́ во стру́нах и орга́не.

Вельми́ подвиза́стеся, святи́и, му́ки беззако́нных претерпе́сте до́блественне, и Христа́ испове́давше пред цари́: и па́ки преста́вльшеся от жития́, си́лы де́йствуете в ми́ре: и немощны́я исцеля́ете от страсте́й и́х святи́и, моля́ще спасти́ся душа́м на́шым.

Сти́х: Хвали́те Его́ в кимва́лех доброгла́сных, хвали́те Его́ в кимва́лех восклица́ния: вся́кое дыха́ние да хва́лит Го́спода.

Му́ченицы Христо́вы непобеди́мии, победи́вше пре́лесть си́лою кре́стною, наслажда́етеся благода́ти ве́чныя жи́зни: мучи́телей преще́ния не убоя́стеся, му́ками ураня́еми весели́стеся: и ны́не кро́ви ва́шя бы́ша исцеле́ния душа́м на́шым, моли́те спасти́ся душа́м на́шым.

Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́диубо́гих Твои́х до конца́.

Во броня́ ве́ры обо́лкшеся до́бре, и о́бразом кре́стным вооружи́вше себе́, во́ини благомо́щнии яви́стеся: мучи́телем му́жески проти́вистеся, и диа́волю пре́лесть низложи́сте, побе́дницы бы́вше, венце́в сподо́бистеся, моля́щеся при́сно о на́с, во е́же спасти́ся на́м.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

Поко́ин:Безме́рна е́сть блу́дно живу́щым му́ка, скре́жет зубо́в, и пла́чь неуте́шимый, гее́нна о́гненная, и тма́ кроме́шная, и че́рвь неусыпа́емый, сле́зы недействи́тельны, и су́д неми́лостивый. Сего́ ра́ди пре́жде конца́ возопии́м, глаго́люще: Влады́ко Христе́, я́же избра́л еси́, со избра́нными Твои́ми упоко́й.

Сла́ва, и ны́не, Богоро́дичен: А́з, Де́во Свята́я Богоро́дице, к покро́ву Твоему́ прибега́ю, ве́м, я́ко обря́щу Тобо́ю спасе́ние: мо́жеши бо, Чи́стая, помощи́ мне́.

На стихо́вне стихи́ры: