Мы поможем в написании ваших работ!
ЗНАЕТЕ ЛИ ВЫ?
|
Богослужение Царской Православной Церкви
Содержание книги
- Богослужение Царской Православной Церкви
- Егда́ ся́деши во сла́ве твое́й, я́ко ца́рь все́х, на престо́ле суда́, предстоя́щым стра́хом ти́ святы́м а́нгелом твои́м, и предста́нет ти́ естество́ все́ челове
- Ме́рзкия же́ртвы страда́льцы крепча́йшею мы́слию оттря́сше, же́ртва чисте́йша Сло́ву поже́ршемуся бы́ша.
- Преше́дше по́прище муче́ния, теплото́ю духо́вною, страда́льцы богоблаже́ннии, веще́ственную пре́лесть попали́сте.
- Святи́и Бо́жии святи́тели, моли́те со все́ми преподо́бными Христа́, грехо́в оставле́ние дарова́ти на́м.
- Благослови́м Отца́, и Сы́на, и Свята́го Ду́ха, Го́спода.
- Пе́снь Богоро́дицы: Вели́чит душа́ моя́ Го́спода: <см. основной Чин>
- Иму́ще му́ченицы Христо́вы непобеди́мую кре́пость, и неодоле́емую, уничижи́сте мучи́телей безбо́жное веле́ние, и Ца́рствия Небе́снаго я́ве сподо́бистеся, просвеща́еми Тро́ичны
- Утром в субботу. Свети́ла у́мная яви́стеся, святи́и му́ченицы, мглу́ бо пре́лести упраздни́сте ве́рою, и душе́вныя свещы́ ва́шя просвети́сте, и с Женихо́м со сла́вою внидо́сте
- Ца́рское ми́ подписа́в свобожде́ние, ша́ры червле́ными, пе́рсты Твоя́ окровави́в Влады́ко, и обагри́в Твое́ю кро́вию. Те́мже Тя́ ве́рою мо́лим: с перворо́дными Твои&
Богослужение Царской Православной Церкви
Октоих, Глас 8, Суббота
Вечером в пятницу
На Го́споди воззва́х:
Сти́х: Изведи́ из темни́цы ду́шу мою́, испове́датися и́мени Твоему́.
Сти́х: Мене́ жду́т пра́ведницы, до́ндеже возда́си мне́.
Сти́х: Из глубины́ воззва́х к Тебе́, Го́споди, Го́споди, услы́ши гла́с мо́й.
Сти́х: Да бу́дут у́ши Твои́ вне́млюще гла́су моле́ния моего́.
Сти́х: А́ще беззако́ния на́зриши, Го́споди, Го́споди, кто́ постои́т? Я́ко у Тебе́ очище́ние е́сть.
Му́ченицы Госпо́дни вся́ко ме́сто освяща́ете, и вся́к неду́г уврачу́ете: и ны́не моли́те, изба́витися от се́тей вра́жиих душа́м на́шым, мо́лим вы́.
Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.
Му́ченицы Твои́, Го́споди, забы́вше жите́йская, и небре́гше о муче́ниих, бу́дущия ра́ди жи́зни, Тоя́ насле́дницы яви́шася: те́мже и со А́нгелы ра́дуются. Те́х моли́твами, да́руй лю́дем Твои́м ве́лию ми́лость.
Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.
А́ще ка́я доброде́тель, и а́ще ка́я похвала́, подоба́ет святы́м: мече́м бо преклони́ша вы́и, Тебе́ ра́ди прекло́ньшаго Небеса́ и соше́дшаго: излия́ша кро́ви своя́, Тебе́ ра́ди истощи́вшаго Себе́, и зра́к ра́бий прие́мша: смири́шася да́же до сме́рти, нищету́ Твою́ подража́юще. и́хже моли́твами, по мно́жеству щедро́т Твои́х, Бо́же, поми́луй на́с.
Сти́х: Я́ко у Го́спода ми́лость, и мно́гое у него́ избавле́ние: и то́й изба́вит Изра́иля от все́х беззако́ний его́.
Дре́ву непло́дному уподо́бихся, о́бразом я́ко ли́ствием тще́тным обложе́н: и бою́ся, Влады́ко. Да не отсе́к, отсле́ши мя́ во о́гнь неугаси́мый ве́чный. Но пода́ждь обраще́ния мне́ вре́мя, я́ко да принесу́ Ти доброде́тельных дея́ний пло́д до́брый, и сподо́блюся Ца́рствия Твоего́.
Сти́х: Хвали́те Го́спода вси́ язы́цы, похвали́те Его́ вси́ лю́дие.
Го́споди, Го́споди, Твоего́ раба́ мене́, мно́го прогневля́юща Твою́ бла́гость на вся́кий де́нь, Человеколю́бче, не отве́ржи от лица́ Твоего́, Христе́, ниже́ накажи́ твои́м пра́ведным гне́вом: согреши́х, согреши́х Ти́, я́ко никто́же и́н, испове́дую, уще́дри и спаси́ мя, Твоея́ Ма́тере моли́твами.
Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.
|
