Из повести временных лет лаврентьевской летописи 1377 года.

По второму изданию Постоянной историко-археографической комиссии Академии наук СССР: Полное собрание русских летописей. Том первый. – Ленинград: 1926, с использованием электронной копии оригинала, выполненной в Российской национальной библиотеке. Лаврентьевская летопись наиболее приближенная по времени к описываемым событиям, поэтому является наиболее ценным источником по истории русского народа.

Примечания: 1. В тексте оригинала предложения и имена собственные не начинаются с заглавных букв, а между словами в большинстве случаев нет пропусков. Заглавные буквы и пропуски между словами сохранены согласно редакции Постоянной историко-археографической комиссии Академии наук СССР. 2. Листы разделяются аналогично оригиналу рукописи. Разделение строк не сохранено. 3. Даты не выделены отдельной строкой. В оригинале они выделяются красным цветом. После них часто ставятся символы по начертанию близкие к: ‧:‧, ∞, ᴂ. 4.  Примечания и включения из других летописных списков, приведенные в редакции Постоянной историко-археографической комиссии Академии наук СССР, исключены, за исключением дат в цифровом обозначении.

-Лист 1 оборот-

Се повѣсти времѧньнъı^х лѣ^т. ѿкуду єсть пошла рускаӕ земѧ. кто въ києвѣ   нача первѣє кнѧжи^т и ѿкуду рускаӕ землѧ стала єсть

Се начнемъ повѣсть сию.

По потопѣ. первиє снве Ноєви. раздѣлиша землю. Симъ. Хамъ. Афет^ъ. и ӕсѧ въстокъ. Симови Персида. Ватрь. тоже и до Индикиӕ в долготу и в    ширину ӕкоже рещи ѿ въстока и до полуденьӕ. и Суриӕ. и Инди^а по Єфратъ рѣку. Вавилонъ. Кордуна. Асурѧне. Мисопотамира. Аравиӕ. старѣишаӕ. Єлмаисъ. Инди. Равиӕ. на всѧ. Хамови же ӕсѧ. полуденьнаӕ страна.      Єюпетъ. Єфивопьӕ. прилежащиӕ ко Индомъ. другаӕ же Єфивопьӕ. из неӕже исходить рѣка Єфиѡпьскаӕ. Чермна текущи. на въстокъ. Авифаникии прилежащи. до Куриниа. Маръмарьӕ. Асиритисиоу. и другаӕ. Нумидьӕ. Масуриӕ. Мавританьӕ. протиоущи Гадирѣ. сущимъ же ко          востокомъ имать Киликию. Памъфилию. Писидию Мосию. Лук^аѡнию.    Фругию.     Камалию. Ликию Карию. Лудью. Масию. другую Троаду. Салиду.          Вифунию. Старую Фругию. и ѡстровъ неки имать. Саръдани

-Лист 2-

Критъ. Купръ. и рѣку Гѣѡну зовемую. фету же ӕша^с̑ полунощнъıӕ странъı и западн. Мидиӕ Алъваньӕ. Арвиньӕ. Малаӕ и Великаӕ Кападокиӕ.           Фефлагони  . Галатъ. Влехисъ. Воспории. Меѡти. Дереви. Гаръмати          Тавріани. Сируфьӕ. Фраци. Макидоньӕ.         Алматиӕ. Луєи. Фесальӕ.  Локриӕ. Пелениӕ. ӕже и Полопонисъ наречесѧ  . Аркадъ. Ӕпироньӕ     Илюрикъ Словѣне. Лухитаӕ. Анъдриѡкиӕ. Ѡньдрѣӕтиньскаӕ пучина имать же и ѡстр^овъı Вротанию Сикилию Ӕвию. Родока Хиѡна Лѣзовона. Кофирана  Вакунофа. Кефалиньӕ. Ифакину.       Керькуру часть всѧчьскиӕ странъı нарицаємую Ѡнию  . рѣку Тигру. текущи межю Мидъı и                Вавилономь до Понетьского морѧ. на полънощнъıӕ странъı Дунаи Дьнѣстръ. и Кавкаисинскиӕ горъı. рекше Оугорьски и ѿтудѣ доже и до Днѣпра. и    прочаӕ рѣки Десна Припеть Двина. Волховъ Волъга. ӕже идеть на востокъ в часть Симову. в Афетовѣ же части сѣдѧть  Русь. Чюдь. и вси ӕзъıци. Мерѧ. Мурома Весь Моръдва. Заволочьскаӕ Чюдь. Пермь Печера Ӕмь. Оугра         Литва. Зимѣгола Корсь. Сѣтьгола Любь  Лѧхове же и Пруси Чюдь пресѣдѧть к мор^ю Варѧжьскому по сему же морю сѣдѧть Варѧзи сѣмо ко въстоку до предѣла Симова. по тмуже морю сѣдѧть къ западу до землѣ Агнѧнски и до   Волошьски. Афетово бо и то колѣно Вар^ѧзи Свеи. Оурмане Русь. Агнѧне Галичане. Волъхва Римлѧне Нѣмци. Корлѧзи Веньдици Фрѧгове и прочии доже присѣдѧть ѿ запада къ полуночью и съсѣдѧтьсѧ съ племѧнемъ         Хамовъı^м.

-Лист 2 оборот-

Сим и Хамъ. и Афетъ раздѣливше  землю жр^ебьи метавше. не                     преступати никомуже. въ жр^ебии братень. живѧхо  кождо въ своєи части. бъı^с̑ ӕзъıкъ єдинъ. и оумножившемъсѧ чл҃вкомъ на земли помъıслиша           создати столпъ до н҃бсе. въ дн҃и Нектана. и Фалека. и собрашасѧ на мѣстѣ. Сенаръ поли здати столпъ до нбс҃е. и градъ ѡколо єго Вавилонъ. и созда столпъ то за. м҃. лѣ^т̑. не свершенъ бъı^с̑. и сниде Г^с̑ь Бъ҃ видѣти градъ и столпъ. и ре^ч̑ Г^с̑ь се родъ єдинъ. и ӕзъıкъ єдинъ. и съмѣси Бъ҃ ¹¹ ӕзъıкъı. и раздѣли на. о҃. и. в҃. ӕзъıка и расъсѣӕ по всеи земли. по размѣшеньи же ӕзъıкъ. Бъ҃ вѣтром^ъ великимъ разраши столпъ. и єсть ѡстанокъ єго     промежю Асюра. и Вавилона. и єсть въ въıсоту и  в лѣта многа хранимъ ѡстанокъ. по размѣшеньи же столпа. и по раздѣленьи ӕзъıкъ. приӕша сн҃ве Симови. въсточнъıӕ странъı. а Хамови сн҃ве п^олуденьнъıӕ странъı. Афетови же приӕша западъ. и             полунощнъıӕ странъı. ѿ сихъ же. о҃. и. в҃. ӕзъıку. бъı^с̑ ӕзъıкъ Словѣнескъ. ѿ племени Афет^ова. Нарци єже суть Словѣне. Во мнозѣхъ же времѧнѣ^х. сѣли суть Словѣни по Дунаєви. гдѣ єсть нъıне Оугорьска землѧ. и Болгарьска. ѿ тѣхъ Словѣнъ разидошасѧ по землѣ. и прозвашасѧ именъı св^оими. гдѣ сѣдше на которомъ мѣстѣ. ӕко  пришедше сѣдоша. на рѣцѣ имѧнемъ Марава. и       прозвашасѧ Морава. а друзии Чеси нарекоша^с̑. а се ти же Словѣни     Хровате Бѣлии. и Серебь. и Хорутане. Волхомъ бо нашедшемъ  на Словѣни на        Дунаискиӕ. сѣдшемъ в ни^х. и насилѧщемъ им^ъ. Словѣни же ѡви пришедше сѣдоша на Вислѣ. и

-Лист 3-

прозвашасѧ Лѧхове. а ѿ тѣхъ Лѧховъ прозвашасѧ Полѧне. Лѧхове. друзии Лутичи. ини Мазовшане ини Поморѧне. такоже и ти Словѣне пришедше и сѣдоша по Днѣпру. и нарекошасѧ Полѧне. а друзии Древлѧне зане сѣдоша в лѣсѣ^х. а друзии сѣдоша межю Припетью и Двиною. и нарекошасѧ Дреговичи. рѣчьки ради ӕже втечеть  въ Двину. имѧнемъ Полота. ѿ сеӕ прозвашасѧ    Полочане. Словѣни же сѣдоша ѡколо єзера  Илмерѧ  . прозвашасѧ св^оимъ имѧнемъ и сдѣлаша градъ. и нарекоша и Новъгородъ. а друзии сѣдоша по Деснѣ. и по Сѣли по Сулѣ  и нарекоша Сѣверъ. тако разидесѧ Словѣньскии ӕзъıкъ тѣмже и грамота прозвасѧ Словѣньскаӕ. Полѧномъ же жившимъ ѡсобѣ по горамъ симъ. бѣ путь изъ Варѧгъ въ Греки. и изъ Грекъ по Днѣпру. и  верхъ Днѣпра волокъ до Ловоти. по Ловоти внити в-ЪІлмерь ѡзеро  великоє. из негоже ѡзера потечеть Волховъ и вътечеть в  озеро великоє Ново. того ѡзера внидеть оустьє в море Варѧжьскоє. и по тому морю ити до Рима а ѿ Рима прити по томуже морю ко Цр҃югороду а ѿ Цр҃ѧгорода прити в Понотъ морѧ в неже втече^т Днѣпръ рѣка Днѣпръ бо потече из Оковьскаго  лѣ и потечеть на полъдне. а Двина ис тогоже лѣса потече^т. а идеть на полунощьє и внидеть в море Варѧжьскоє. ис того же лѣса потече  Волга на въстокъ. и вътечеть      семьюдесѧтъ жерелъ в море Хвалисьскоє. тѣмже и  из Руси можеть ити в Болгаръı и въ Хвалисъı наста въстокъ доити въ  жребии Симовъ. а по Двинѣ въ Варѧги. изъ Варѧгъ до Рима. ѿ Рима до   племени Хамова а Днѣпръ      втечеть в Понетьскоє море жереломъ.

-Лист 3 оборот-

єже море словеть Рускоє. по немуже оучилъ стъıи Ѡньдрѣи братъ Петровъ. ӕкоже рѣша  Ѡньдрѣю оучащю въ Синопии. и пришедшю єму в Корсунь.   оувидѣ ӕко ис Корсунѧ близь оустьє Днѣпрьскоє. въсхотѣ поити  в Римъ и проиде въ вустьє Днѣпрьскоє. ѿтоле поиде по Днѣпру горѣ. и по приключаю. приде  и ста подъ горами на березѣ. заоутра  въставъ и ре^ч̑ к сущимъ с нимъ ученикомъ. видите ли горъı сиӕ. ӕко на сихъ гора восиӕєть блг҃дть Бжьӕ. имать градъ великъ. и црк҃ви многи Бъ҃ въздвигнути имать. въшедъ на горъı сиӕ бл҃ви ӕ. постави кр^с̑тъ и помоливъсѧ Бу҃. и сълѣзъ съ горъı сеӕ. идеже послѣже бъı^с̑ Києвъ. и поиде по Днѣпру горѣ. и приде въ Словѣни. идеже нъıнѣ Новъгородъ. и видѣ ту люди сущаӕ. како єсть ѡбъıчаи имъ. и како сѧ мъıють  хвощютсѧ. и оудивисѧ имъ. иде въ Вариги и приде в Римъ           исповѣда єлико наоучи. и єлико видѣ. и ре^ч̑ имъ дивно видѣхъ словѣньскую землю. идучи ми сѣмо. видѣхъ  бани древенъı. и пережьгуть є рамѧно.     совлокутьсѧ и будуть нази. и ѡблѣютсѧ квасомъ оусниӕнъı^мь. и    возмуть на сѧ прутьє младоє. бьють сѧ сами. и т^ого сѧ добьють. єгда влѣзуть ли живи. и ѡблѣютсѧ водою студеною. тако ѡжноуть. и то творѧть по всѧ дн҃и. не      мучими никимже. но сами сѧ мучать. и то творѧть мовеньє собѣ а не мученьє. тъı сл^ъıшаще дивлѧху^с̑. Ѡньдрѣи же. бъıвъ в Римѣ. приде в        Синофию.

Полем же жившемъ ѡсобѣ и володѣющемъ. и родъı своими. иже и до сеє братьѣ бѧху Полѧне. и живѧху кождо съ своимъ родомъ. и  на своихъ мѣстѣхъ. владѣюще кождо родомъ своимъ на своихъ мѣстѣ^х. бъıша. г҃. братьӕ. єдиному имѧ Кии. а другому ІЦекъ. а третьєму Хори^въ  

-Лист 4-

сестра ихъ Лъıбедь. сѣдѧще  Кии на горѣ гдѣже нъıне оувозъ Боричевъ. а Щекъ сѣдѧше на горѣ. гдѣже нъıне зоветсѧ Щековица. а Хоривъ на третьєи горѣ. ѿ негоже прозвасѧ Хоревица. и створиша градъ во имѧ брата своєго старѣишаго. и нарекоша имѧ єму Києвъ. бѧше ѡколо града сѣсъ и боръ    великъ. и бѧху ловѧща звѣрь бѧху мужи мудри и смъıслени нарицахусѧ Полѧне. ѿ них^же єсть Полѧне в Києвѣ и до сего дн҃е. Ини же не свѣдуще    рекоша. ӕко Кии єсть перевозникъ бъıлъ. оу Кїєва бо бѧше перевозъ тогда с оноӕ сторонъı Днѣпр^а. тѣмь гл҃ху на перевозъ на Києвъ. аще бо бъı                       перевозникъ Кии. то не бъı ходилъ Цр҃югороду  но се Кии кнѧжаше в родѣ своємь. приходившю єму ко  цр҃ю. ӕкоже сказають. ӕко велику честь приӕлъ ѿ цр҃ѧ. при к^оторомь приходивъ цр҃и. идущю же єму ѡпѧть. приде къ Дунаєви. възлюби мѣсто и сруби градокъ малъ хотѧше сѣсти с родомъ ^своимъ и не даша єму ту блїзь живущии. єже и донъıнѣ наречють Дуици городище         Киевець. Киеви же пришедшю въ свои градъ Києвъ. ту животъ свои сконча. а братъ єго Щекъ и Хоривъ и сестра и^х Лъıбедь ту скончаша^сѧ. И по сихъ братьи держати. почаша родъ ихъ кнѧженьє в Полѧхъ. в Деревлѧхъ своє. а  Дреговичи своє. а Словѣни своє в Новѣгородѣ а другоє на Полотѣ иже      Полочане ѿ нихъже. Кривичи же сѣдѧть на верхъ Волги. а на верх^ъ Двинъı и на верхъ Днѣпра. ихже градъ єсть Смоленскъ туда бо сѣдѧть Кривичи таже Сѣверъ ѿ нихъ н^а Бѣлѣѡзерѣ сѣдѧть Весь а на Ростовьскомъ ѡзерѣ Мерѧ  а на Клещинѣ ѡзерѣ  Мерѧ же. по Ѡцѣ рѣцѣ гд^е потече в Волгу же. Мурома ӕзъıкъ свои и Черемиси свои ӕзъıкъ. Моръдва свои ӕзъıкъ. се бо токмо

-Лист 4 оборот-

Словѣнескъ ӕзъıкъ в Руси. Полѧне. Деревлѧне. Ноугородьци. Полочане. Дреговичи. Сѣверъ Бужане зане сѣдоша по Бугу послѣже же Велъıнѧне. а се суть инии ӕзъıци. иже дань дають Руси. Чюдь. Мерѧ. Весь. Мурома.    Черемись. Моръдва. Пермь. Печера Ӕмь. Литва. Зимигола. Корсь. Норова. Либь: си суть свои ӕзъıкъ. имуще ѿ колена Афетова. иже ж^иоуть въ       странахъ полунощнъıхъ. Словѣньску же ӕзъıку ӕкоже рекохомъ. жиоуще на Дунаи. придоша ѿ Скуфъ. рекше ѿ Козаръ. рекомии Болгаре сѣдоша по     Дунаєви. населници Словѣномъ бъıша. посемь придоша Оугри Бѣлии.       наслѣдиша  з^емлю Словѣньску. си бо Оугри почаша бъıти. пр Ираклии цри. иже находиша на Хоздроӕ  цр҃ѧ Перьскаго Въ си же времѧна бъıша. и  Ѡбри ходиша на       Аръклиӕ  цр҃ѧ. и мало єго не ӕша. си же добрѣ воєваху на Словѣнѣ^х. и примучиша Дулѣбъı. сущаӕ Словѣнъı. и насильє творѧху         женамъ Дулѣпьскимъ. ащ^е поѣхати будѧше Ѡбърину. не дадѧше въпрѧчи конѧ. ни вола. но велѧше въпрѧчи. г҃. ли. д҃. ли. е҃. ли. женъ в телѣгу. и   повести Ѡбърѣна. тако му^чаху Дулѣбъı. бъıша бо Ѡбърѣ тѣломъ велици. и оумомь г^орди. и Бъ потреби ӕ. помроша вси. и не ѡстасѧ ни єдинъ. Ѡбъринъ. єсть притъча в Руси. и до сего дн҃е погибоша аки Ѡбрѣ. ихже     нѣ^с̑ племени ни наслѣдъка. по сихъ же придоша Печенѣзи. паки идоша Оугри Чернии мимо Києвъ. послѣже прі Олзѣ. Полѧномъ же жиоущемъ ѡсобѣ. ӕкоже рекохомъ. суще ѿ рода Словѣньска. и нарекош^асѧ Полѧне. а Древѧнѧ же ѿ Словѣнъ же. и нарекошасѧ Древлѧне. Радимичи бо и Вѧтичи ѿ Лѧховъ. бѧста бо. в҃. брата в Лѧсѣ^х . Радимъ. а другому Вѧ^тко

-Лист 5-

и пришедъша. сѣдоста Радимъ на Съжю  . прозвшасѧ Радимичи. а Вѧтъко сѣде съ родомъ своимъ по Ѡцѣ. ѿ негоже прозвашасѧ  Вѧтичи. иже бѧху в мирѣ Полѧне. и Деревлѧне. Сѣверъ и Рад^имичь. и Вѧтичи. и Хрвате. Дулѣби живѧху по Бу҃ гдѣ нъıне Велъıнѧне. а Оулучи Тиверьци. сѣдѧху бо по Днѣстру. присѣдѧху къ Дунаєви бѣ мн^ожьство ихъ. сѣдѧху бо по Днѣстру. или до морѧ. суть гради и^х. и до сего дн҃е. да то сѧ зваху ѿ Грекъ. Великаӕ Скуфь. Имѧху бо объıчаи свои и законъ ѡць свои^х̑. и преданьӕ кождо свои нравъ. Полѧне бо свои^х  ѡц҃ь ѡбъıчаи имуть. кротокъ и тихъ. и стъıдѣньє къ снохамъ своимъ. и къ сестрамъ. къ мт҃рмъ и к родителемъ своимъ. къ            свекровем^ъ  и къ деверемъ. велико стъıдѣньє имѣху. брачн^ъıи ѡбъıчаи имѧху. не хоже^ше зѧть по невѣсту. но приводѧху вечеръ. а завътра  приношаху по неи. что вдадуче. а Древлѧне  живѧху звѣриньскимъ ѡбразомъ. жиоуще  скотьски. оубиваху другъ друга. ӕдѧху  всѧ нечисто. и брака оу нихъ не бъıваше. но оумъıкиваху оу водъı дв҃цѧ. и Радимичи и Вѧтичи. и Сѣверъ. ѡдинъ ѡбъıчаи имѧху живѧх^у в лѣсѣ. ӕкоже всѧкии звѣрь. ӕдуще все нечисто срамословьє в ни^х̑ предъ ѡтьци. и предъ. снохами.  браци не бъıваху въ ни^х. и игрища  межю селъı. схожахусѧ. на игрища на плѧсаньє. и на всѧ бѣсовьскаӕ игрища. и ту оумъıкаху женъı собѣ. с неюже кто съвѣщашесѧ. имѧху же по двѣ и по три женъı. аще кто оумрѧше творѧху тръıзно надъ нимъ. и по семь т^ворѧху кладу велику и възложахуть  и накладу мртв҃ца. сожьжаху. и посемь           собравше кости. вложаху в судину малу. и по

-Лист 5 оборот-

ставѧху на столпѣ на путе^х єже творѧть Вѧтичи и нъıнѣ. си же творѧху ѡбъıчаӕ Кривичи. прочии погании. не вѣдуще закона Бж҃ӕ. но творѧще сами собѣ законъ. Гл҃ть Геѡргии в лѣтописаньи. ибо комуждо  ӕзъıку. ѡвѣмъ       исписанъ законъ єсть. другимъ же объıчаи. зане безаконьникомъ  ѡтечьствиє мнитсѧ. ѿ нихже первиє Сирии  жиоуще на конець землѧ. законъ имуть ѿ  свои^х ѡбъıчаи. не любодѣӕти и прелюбодѣӕт. ни красти ни ѡклеветати ли   оубити. ли злодѣӕти весьма законъ же и у Ктирианъ гл҃ми. Врахманеи ѡстровьници. ѥже ѿ прадѣдъ пока^заньємь. блгч^с̑тьємь мѧс не ӕдуще ни    вина пьющ^е. ни блуда творѧще. никакоӕ же злобъı творѧщ^е. страха ради  многа. ибо ӕвѣ таче прилежащим^ъ к нимъ: оубиистводѣиици. сквернотворѧще. гнѣвливи и паче естьства. ли нутрьнѣишимъ странѣ ихъ члв҃къ ӕдуще и страньствующихъ оубиваху. паче же ӕдѧть ӕко пси. єтеръ же зак^онъ Халдѣємъ Вавилонѧмъ. мт҃ри поимати. съ братними чадъı блудъ дѣӕти и    оубиватı  всѧкоє бо студеноє дѣӕньє. ӕко дѣтельє  мнѧстѧ дѣюще любо     далече странъı своєӕ будуть. инъ же законъ Гилиѡмь женъı в ни^х̑  ѡрють.    зижють храми мужьскаӕ дѣла творѧть. но любъı тв^орѧть єлико хощеть. не въздержаєми. ѿ мужии своихъ весьма. ли зрѧтъ в нихъ же суть. храбръıӕ женъı ловити звѣрь крѣпко. владѣють же  женъı мужи своими. ни доблѧють ими. во Врѣтаньи же мнози мужи. съ єдино[ю] женою спѧть. и. женъı съ єдинъıмъ мужемъ  похотьствують. безаконьнаӕ. законъ ѡтець творѧть.     незави

-Лист 6-

стьно ни въздержаньно. Амазоне же мужа не имуть но и аки скотъ               бесловеснъıи. но єдиною лѣтомъ къ вечнъıмъ днемъ. ѡземьствени будуть. и сочтаютсѧ съ ѡкр^с̑нхъ. и въ мужи ӕко нѣвтороє имъ торжьство. и велико   празденьство времѧ тѣ мьнѧть ѿ ни^х заченшимъ въ чревѣ. паки  разбѣгнутсѧ ѿтсюду вси во времѧ же хотѧщихъ родити. аще родитсѧ ѡтроча погубѧть. аще дѣвоческъ полъ то въздоӕть. прилѣжнѣ въсптитають. ӕкоже се и при насъ нъıнѣ. Половци законъ держать ѡц҃ь свои^х. кровь проливати а хвалѧще ѡ сихъ  . ӕдуще мерьтвечину. и всю нечистоту. хомѣки и сусолъı. поимають мачехи своӕ. ӕтрови и инъı ѡбъıчаӕ отець своихъ. мъı же х^с̑еӕне єлико земль. иже вѣрують въ ст҃ую Трцю въ єдино кр҃щньє въ єдину вѣру законъ имамъ єдинъ. єлико во Х^с̑а кр^с̑тихомсѧ и во Х^с̑а ѡблекохомсѧ. По сихъ же лѣтѣхъ по смр҃ти братьѣ сеӕ  бъıша ѡбидимъı Древлѧми. инѣми ѡколними. и наидоща ӕ Козарѣ сѣдѧщаӕ на гора^х сихъ в лѣсѣхъ и рѣша Козари. пл^атите намъ дань. съдумавше Полѧне и вдаша ѿ дъıма мечь и несоша Козари ко кнѧзю своєму. и къ стариишинъıмъ. и рѣша имъ се налѣзохомъ дань нооу. ѡни же рѣша имъ ѿкуду. ѡни же рѣша въ лѣсѣ на горохъ. надъ рѣкою Днѣпрьскою. ѡни же рѣша что суть въдали ¹. ѡни же показаша мечь рѣша старци Козарьстии. не добра дань кнѧже. мъı сѧ доискахомъ ѡружьемь ѡдиною стороною. рекоша саблѧми. а сихъ ѡружьє ѡбоиду ѡстро рекше мечь. си имуть имати дань на насъ. и на инѣхъ страна^х. се же сбъıсѧ  все не ѿ своеӕ волѧ рек^оша но отъ Бж^ьѧ повелѣньӕ. ӕко при Фаравонѣ цр҃и

-Лист 6 оборот-

Єюпетьстѣмь  єда приведоша Моисѣӕ предъ Фаравона и рѣша старѣишина Фараѡнѧ. се хочеть см^ирити ѡбласть Єюпетьскую. ӕкоже и бъı^с̑ погибоша Єюптѧне ѿ Моисеӕ. а первоє бъıша работающе имъ. тако и си владѣша а послѣже самѣмъ владѣють ӕкоже бъı^с̑ володѣють Козаръı Русьскии до днш҃нго дн҃е. Въ лѣ^т. ҂s҃. т҃. ѯ ‧:‧ [6360 (852)] Индикта. є҃ı. дн҃ь. наченшю       Михаилу цр^с̑твоват^и начасѧ прозъıвати Руска  землѧ. ѡ семь бо увидѣхомъ. ӕко при семь цр҃и приходиша Русь на Цр҃ьгородъ. ӕко^же пишетсѧ  в лѣтописаньи Гречьстѣмь. тѣмже ѿселе почнем. и числа положим^ъ. Ӕко ѿ Адама ^до потопа. лѣ^т̑. м҃. и. в҃.  а ѿ потопа до Ѡврама ³⁷. лѣ^т̑ ҂а҃. и. п҃в а ѿ     Аврама до исхоженьӕ Моисѣєва. до Дв҃да. лѣ^т̑. х҃. и. а҃. а ѿ Дв҃да и ѿ начала ц^с̑ртва Соломонѧ. до  плѣненьӕ Ӕрлм҃лѧ. лѣ^т̑. у҃. м҃. и. а ѿ  пл^ѣненьӕ до Ѡлексанъдра лѣ^т. т҃. и҃ı. а ѿ Ѡлексанъдра до ржва Хва лѣ^т. т҃. г҃ı. ѿ Костѧнтина же до Михаила сего. лѣ^т ф҃. м҃. в҃. а ѿ перваго лѣта Михаилова. до перваго лѣ^т Ѡлгова Рускаго кнѧзѧ лѣ^т. к҃ѳ. а ѿ перваго лѣ^т Ѡлгова понеже сѣде в Києвѣ. до перваго лѣта Игорева. лѣ^т ла҃. а ѿ перваго лѣ^т Игорева до  перваго лѣта Свѧтьславлѧ. лѣ^т. г҃ı.  а ѿ перваго лѣ^т Ст҃ославлѧ  до перваго лѣ^т Ӕрополча. лѣ^т̑ к҃и. а  Ӕрополкъ кнѧжи. лѣ^т̑. и҃. а Володимеръ [кнѧжи]. лѣ^т̑. л҃з. а Ӕрославъ кнѧжи. лѣ^т. м҃. тѣмже ѿ смр҃ти Ст҃ославл^ѧ до смр҃ти Ӕрославли. лѣ^т п҃є҃. а ѿ смр҃ти Ӕрославли до смр҃ти Ст҃ополчи. лѣ^т̑. ѯ҃. но мъı на преженьє  возъвратимсѧ. скажемъ што сѧ оудѣӕло та си  ӕкоже преже почали бѧхомъ первоє лѣто Мих^аиломъ а по рѧду положимъ числа::

Въ лѣ^т̑. ҂s҃. т҃. ѯ. а҃. [6361 (853)]

Въ лѣ^т̑.҂s҃. т҃. ѯ. в҃. [6362 (854)]

Въ лѣ^т̑.҂s҃. т҃. ѯ҃. г҃. [6363 (855)]

Въ лѣ^т̑.҂s҃. т҃. ѯ҃.д҃. [6364 (856)]

-Лист 7-

Въ лѣ^т̑.҂s҃. т҃. ѯ҃. е҃. [6365 (857)]

Въ лѣ^т̑. ҂s҃. т҃. ѯ҃. s҃. [6366 (858)] Михаилъ цр҃ь изиде с вои брегомъ. и моремъ на Болгаръı. Болгаре же оувидѣвше. не могоша стати противу. кр^с̑титисѧ       просиша. и покорити^с̑ Грекомъ. цр҃ь же крти  кнѧзѧ ихъ. и болѧръı всѧ. и миръ створи  с Болгаръı.

Въ лѣ^т. ҂s҃. т. ѯ҃. з҃  ‧:‧ [6367 (859)] маху дань Варѧзи изъ заморьӕ. на Чюди и на Сл^овѣне^х. на Мери. и на всѣхъ Кривичѣхъ. а Козари имаху на Полѧнѣ^х̑ . и на Сѣверѣ^х̑ и на Вятичѣхъ. им^аху по бѣлѣи вѣверицѣ ѿ дъıма ‧:‧ Въ лѣ^т. ҂s҃. т҃. ѯ҃. и ҃. [6368 (860)]

Въ лѣ^т̑.҂s҃. т҃. ѯ. ѳ҃ [6369 (861)] ‧:‧

Изъгнаша Варѧги за море и не даша имъ дани. и почаша сами в собѣ         володѣти. и не бѣ в нихъ пр^авдъı. и въста родъ на родъ. бъıша в ни^х̑ усобицѣ. и воєвати почаша сами на сѧ рѣша сами в себѣ. поищемъ собѣ кнѧзѧ. иже бъı володѣлъ нами. и судилъ по праву. идаша  за море къ Варѧгомъ к Русı. сице бо сѧ звахуть и. варѧзи суть. ӕко се друзии зъвутсѧ Свое. друзии же Оурмане. Анъглѧне друзıи Гъте. тако и си рѣша. Русь. Чюдь Словѣни. и Кривичи. всѧ землѧ наша велика и ѡбилна. а нарѧда в неи нѣтъ. да поидѣте кнѧжитъ и володѣти н^ами. и изъбращасѧ. г҃.  братьӕ. с родъı своими. поӕша по собѣ всю Русь. и придоша старѣишии Рюрикъ. а другии Синеоусъ на Бѣлѣѡзерѣ. а третии Изборьстѣ. Труворъ. ѿ тѣхъ прозвасѧ Рускаӕ землѧ  Новугородьци ти суть людьє Нооугородьци ѿ рода Варѧжьска. преже бо бѣша Словѣни. по дву же лѣту. Синеоусъ оумре. а братъ єго Труворъ. и приӕ власть Рюрикъ. и раздаӕ мужемъ своимъ градъı. ѡвому Полотескъ ѡвому Ростовъ другому Бѣлоѡзеро. и по тѣмъ городомъ суть находн^и

- Лист 7 оборот-

ци Варѧзи а перьвии насельници в Новѣгородѣ Словѣне. Полотьски Кривичи. в Ростовѣ Мерѧ  . в Бѣлѣѡзерѣ Весь. в Муромѣ Мурома. и тѣми всѣми ѡбладаше Рюрикъ. и бѧста оу него. в҃. мужа не племени его ни  боӕрина. и та испросист^асѧ  ко Цр҃югороду с родомъ своимъ. и поидоста по Днѣпру. и идуче мимо и оузрѣста  на горѣ градо^к и оупращаста. рѣста  чии се градокъ. ѡни же рѣша бъıла суть.г҃. братьӕ. Кии. Щекъ. Хоривъ. иже сдѣлаша         градокось. и изгибоша и мъı сѣдимъ. платѧче дань родомъ и^х Козаромъ.  Аколъдо же. и Диръ. ѡстаста въ градѣ семь. и многи Варѧги скуписта. и  начаста владѣ^т Польскою  землею Рюрику же кнѧжаста в Новѣгородѣ

Въ лѣ^т̑. ҂s҃. т҃. о҃. а҃. [6371 (863)]

Въ лѣ^т̑. ҂s҃. т҃. о҃. в҃. [6372 (864)]

Въ лѣ^т̑. ҂s҃. т҃. о҃. г҃. [6373 (865)]

Въ лѣ^т.҂s҃. т҃ о҃. д҃ [6374 (866)] ‧:‧ Иде Асколдъ. и Диръ на Греки и прииде въ. д҃ı. Михаила цр҃ѧ цр҃ю же ѿшедшю на Ѡгарѧнъı. дощедшю єму Чернъıє рѣки. вѣсть єпархъ посла к нему. ӕко Русь на Цр҃ьгородъ идеть. и вратисѧ цр҃ь си же внутрь Суду вшедше. много оубıиство крт҃нмъ створиша. и въ двою сотъ корабл^ь Цр҃ьградъ ѡступиша. Цр҃ь же єдва въ градъ вниде с. патреӕрхомъ съ Фотьємъ къ сущеи цр҃кви ст҃ѣи Бц҃ѣ Влахѣрнѣ всю нощь молт҃ву створиша таж^е бжт҃вную свт҃ъı Бц҃ѧ ризу с ими изнесъше  в рѣку ѡмочивше тишинѣ сущи морю оукротившюсѧ. абьє бу^рѧ въста с вѣтромъ. и волнамъ вельӕмъ      въставшемъ засобь безбожнъıхъ Руси корабль смѧте к берегу приверже. и  изби ӕ. ӕко ма и^х ѿ так^овъıӕ бѣдъı избѣгнути. въ своӕси возъвратишас

Въ лѣ^т̑. ҂s҃. т҃. о҃. е҃ [6375 (867)]

Въ лѣ^т̑. ҂s҃. т҃. о҃. s [6376 (868)] По црт҃вовати Всилѣ

Въ лѣ^т̑. ҂s҃. т҃. о҃. з҃  [6377 (869)]::

-Лист 8-

рщ҃на бъıсть всѧ землѧ Болъгарскаӕ

Въ лѣ^т̑. ҂s҃. т҃. о҃. и҃. [6378 (870)]

Въ лѣ^т̑. ҂s҃. т҃. о҃. ѳ҃. [6379 (871)]

Въ лѣ^т̑.҂s҃. т҃. п҃   [6380 (872)] ‧:‧

Въ лѣ^т̑. ҂s҃. т҃.п҃. а҃. [6381 (873)]

Въ лѣ^т̑. ҂s. т. п҃. в. [6382 (874)]

Въ лѣ^т̑.҂s҃. т. п҃. г҃   [6383 (875)].

Въ лѣ^т̑.҂s҃ т. п҃. д҃  [6384 (876)].

Въ лѣ^т̑.҂s҃. т҃. п҃. є҃  [6385 (877)].

Въ лѣ^т̑ ҂s҃. т҃. п҃. s҃  [6386 (878)].

Въ лѣ. ҂s҃. т. п҃. з҃   [6387 (879)] ‧:‧ Оумершю Рюрикови предасть кнѧньє своє Ѡлгови. ѿ рада имъ  суща. въдавъ єму сн҃ъ свои на руцѣ. Игорѧ. бъıсть бо дѣтескъ вельми ‧:‧  ∞

Въ лѣ^т̑.҂s҃. т҃. п҃. и҃  [6388 (880)].

Въ лѣ^т̑. ҂s҃. т҃. п҃. ѳ҃ [6389 (881)]  ‧:‧ ᴂ

оиде Ѡлегъ поимъ воӕ многи Варѧги. Чюдь Словѣни. Мерю. и всѣ        Кривичи. и приде къ Смоленьску съ Кривичи. и  приӕ градъ. и посади мужь сво^и. ѿтуда поиде внизъ. и взѧ Любець. и посади муж^ь  свои. придоста къ    горамъ хъ Києвьскимъ. и оувидѣ Ѡлегъ. ӕко Ѡсколдъ. и Диръ. кнѧжита. похорони вои въ лодьӕ. а другиӕ назади ѡстави. а самъ приде носѧ Игорѧ дѣтьск^а. и приплу подъ Оугорьскоє. похоронивъ вои своӕ. и присла ко       Асколду и Дирови гл҃ѧ. ӕко гость єсмь. идемъ въ Гр^еки ѿ Ѡлга и ѿ Игорѧ кнѧжича. да придѣта к намъ к родомъ своимъ. Асколдъ же и Диръ придоста. въıскакав же вси прочии изъ лодьӕ. и рече Ѡлегъ Асколду и Дирови. въı нѣста кнѧзѧ. ни рода кнѧжа. но азъ єсмь роду кнѧжа. въıнесоша Игорѧ. и се єсть снъ Рюриковъ. и оубиша  Асколд^а и Дира. несоша на гору и погребша и на горѣ. єже сѧ нъıне зоветь Оугорьскоє. кде нъıне Ѡлъминъ дворъ. на тои могилѣ поставилъ црк҃вь свт҃го Николу а Дирова могила за ст҃ою Ѡриною. сѣде Ѡлегъ кнѧжа въ Києвѣ. и ре^ч Ѡлегъ се буди мт҃и градомъ рускими. бѣша оу него Варѧзи и Словѣни и прочи прозвашасѧ Русью. се же Ѡлегъ нача городъı ставити. и оустави дани Словѣномъ Кри

-Лист 8 оборот-

вичемъ и Мери  и Варѧгомъ. дань даӕти ѿ Новагорода гривенъ. т҃. на лѣ^т  мира дѣлѧ. єже  до смрти Ӕрославлѣ. даӕше Варѧгомъ.

Въ лѣ^т.҂s҃. т҃. ч҃а. [6391 (883)] Поча Ѡлегъ воєвати Деревлѧнъı и примучи вои имаша на ни^х дань. по чернѣ кун^ѣ.

Въ лѣ^т̑.҂s҃. т҃. ч҃в. [6392 (884)] ∞  Иде на Сѣверѧне и побѣди Сѣверѧнъı и възложи на нь  дань легъку. и не дастъ имъ Козаромъ дани платити рекъ азъ имъ противенъ. а вам^ъ  не чему::

Въ лѣ^т.҂s҃. т҃. ч҃г  [6393 (885)] ‧:

Посла къ Радимичемъ. рька камо дань даєте. ѡни же рѣша Козаромъ. и ре^ч̑ имъ Ѡлегъ не даите Козаромъ. но мнѣ даите. и въдаша Ѡльговı. по щьлѧгу. ӕкоже Козаромъ даху. и бѣ облад^аӕ Ѡлегъ. Полѧнъı. и                Деревлѧнъı. Сѣверенъı. и Радимичи. а с Уличи. и Тѣверци имѧше ра^ть.

Въ лѣ^т̑.҂s҃. т҃. ч҃д. [6394 (886)]

Въ ⁶⁸ лѣ^т̑. ҂s҃. т҃. ч҃е [6395 (887)]. ‧:‧  

Левонъ цр^с̑твова сн҃ъ Васильєвъ. иже Левъ прозва^с̑ и бра^т̑ єго Ѡлександръ. иже цр^с̑твоваста. лѣ^т̑ к и s҃.

Въ лѣ^т̑ ҂s҃. т҃. ч҃s. [6396 (888)]

Въ лѣ^т̑ ҂s҃. т. ч҃з. [6397 (889)]

Въ лѣ^т̑.҂s҃. т҃. ч҃и. [6398 (890)]

Въ лѣ^т̑.҂sт. ч҃ѳ. [6399 (891)]

Въ лѣ^т̑. s҃. у. [6400 (892)]

Въ лѣ^т ҂s҃. у҃. а҃. [6401 (893)]

Въ лѣ^т̑ ҂sу҃в҃. [6402 (894)]

Въ лѣ^т̑.҂s҃. г҃. [6403 (895)]

Въ лѣ^т̑. ҂s҃. д҃.  [6404 (896)]

Въ лѣ^т̑ у҃. е҃.  [6405 (897)]

Въ лѣ. ҂s҃. у҃s ჻ [6406 (898)]

Идоша Угри мимо Києвъ горою. єже сѧ зоветь н҃нѣ Оугорьскоє.  пришедъше къ Днѣпру и сташа вежами. бѣша бо ходѧще аки се Половци. пришедъ ѿ стока и оустремиша чересъ горъı великиӕ. и почаша воєвати на жиоущаӕ  ту. Волхı. и Словѣни сѣдѧху бо ту преже Словѣни. и Волъхве. приӕша землю Словеньску посем же Оугри прогнаша Во^лъхи. и наслѣдиша землю. и сѣдоша съ Словѣнъı. покоривше ӕ подъ сѧ. ѿтоле прозвасѧ землѧ Оугорьска. и      начаша воєвати Оугри на Греки. и поплѣниша землю Фрачьску и Макидо

- Лист 9-

ньску доже и до Селунѧ. начаша воєвати на Мараоу и на Чахи  бѣ єдинъ ӕзъıкъ Словѣн^ескъ. Словѣни же сѣдѧху по Дунаєви ихже прıӕша Оугри и Марава. Чеси и Лѧхове и Полѧне ӕже нъıнѣ зовомаӕ Русь. симъ бо первоє преложенъı книги Маравѣ. ӕже презвасѧ грамота Словѣньскаӕ. ӕже      грамота єсть в Руси и в Болгарѣ^х̑ Дунаискихъ.  Словѣномъ жиоущимъ крщн҃мъ. и кнѧземъ ихъ Ростиславъ и С^т̑пкъ и Коцелъ. послаша ко цр҃ю     Михаилу гл҃ще. землѧ наша крщ҃на. и нѣ^с̑ оу насъ оучителѧ. иже бъı нъı      наказалъ и поучалъ насъ. и протолковалъ ст҃ъıӕ книги. не разумѣємъ ни   Гречьску ӕзъıку. ни Латъıньску ѡни бо нъı ѡнако  оучат^ь. а ѡни бо нъı и ѡнако. тѣмже не разумѣємъ. книжнаго ѡбраза ни силъı ихъ. и послѣте нъı учит^елѧ. иже нъı могуть сказати книжнаӕ словеса и разумъ и^х. се слъıша цр҃ь Михаилъ и созва философъı всѧ. и сказа имъ рѣчи всѧ Словѣньскихъ кнѧзь. и рѣша философи єсть мужь в Селуни именемъ Левъ. суть оу него сн҃ве.       разумиви ӕзъıку Словѣньску. хитра. в҃. сн҃а оу него философа. се слъıшавъ  цр҃ь посла по нѧ. в Селунь ко Ѡлгови гл҃ѧ посли к намъ въскорѣ сн҃а своӕ Мефодиӕ и Костѧнтина. се слъıшивъ Левъ въскорѣ посла  ӕ. и придоста ко цр҃ви. и ре^ч̑ има. се прислаласѧ ко мнѣ Словѣньска землѧ. просѧщи  оучıтелѧ собѣ. иже бъı моглъ имъ протолковати ст҃ъıӕ гниги. сего бо желають.           оумолена бъıста ц҃р^мъ и послаща ӕ въ Словѣньскую землю. къ Ростıславу и. Стп҃лку. и Къцьлови. сима же пришедъшема. начаста съставливати писмена. азъ

-Лист 9 оборот-

буковьнаӕ Словѣньски. и преложиста Ап^с̑лъ и Еуг҃л^ье. ради бъıша  Словѣни. ӕко слъıшиша виличьӕ Бж҃ьӕ. своимь ӕзъıкомь. посем же приложиста Пслт҃рь  и Ѡхтаикъ. и прочаӕ книги. гл҃ще. ӕко не достоить ни которому же ӕзъıку имѣти букъвъ своихъ. развѣ Еврѣи. и Грекъ. Латинъ по Пилатооу    писанью. єже на кр^с̑тѣ Г^с̑ни напи^с̑. се  же слъıшавъ папежь  Римьскии. похули тѣ^х̑. иже ропьщуть на книги Словеньскиӕ. река да сѧ исполнить книжноє слово. ӕко въсхвал^ѧть Ба҃ вси ӕзъци. другоє же вси възъгл҃ють ӕзъıки  величьӕ Бжьӕ. ӕкоже дасть имъ Ст҃ъıи Дх҃ъ ѿвѣщевати. да аще хто хулить Словѣньскую гр^амоту да будеть ѿлученъ ѿ цр҃кве. донде сѧ испр^авѧть  ти бо суть волци а не ѡвца. ӕже  достоить ѿ плода знати ӕ. хранитисѧ ихъ. въı же чада Бжьӕ послушаите оученьӕ и. не ѿрините наказаньӕ цркв҃нго. ӕкоже въı наказалъ Мефодии оучитель вашь. Костѧнтинъ же възративсѧ въспѧть. и иде оучитъ Болгарьскаго ӕзъıка. а Мефодии ѡста в Моравѣ. посем же Коцелъ кнѧзь постави Мефедьӕ єпп҃а  въ Пании на столѣ. ст҃го Ѡнъдроника ап^с̑ла  єдиного ѿ. о. оучн҃ка ст҃го ап҃л^а Павла. Мефодии же посади. в҃. попа        скорописца зѣло. и преложи всѧ книги исполнь. ѿ Гречьска ӕзъıка въ Словѣнескъ. s҃. ю мц҃ь. наченъ  ѿ Марта мца до двудесѧту и. s҃. ю дн҃ь Ѡктѧбрѧ мц҃а. ѡконьчавъ же достоино хвалу и славу Бу҃ въздасть. дающему таку блг҃дать єп^с̑пу Мефодью. настольнику Анъдронику. тѣмже Словѣньску ӕзъıку. оучитель єсть Анъдронигъ  ап^с̑лъ. в Моравъı бо ходıлъ и ап^с̑лъ Павелъ оучилъ ту. ту бо єсть Илюрикъ.