Деяния святых Апостол, зачало 47.

Деяния святых Апостол, зачало 47.

Во дни о́ны, воззре́в Па́вел на сонм, рече́: му́жие бра́тие, аз все́ю со́вестию благо́ю жи́тельствовах пред Бо́гом да́же до сего́ дне. Архиере́й же Ана́ниа повеле́ предстоя́щым ему́ би́ти его́ уста́. Тогда́ Па́вел рече́ к нему́: би́ти тя и́мать Бог, стено́ пова́пленая, и ты седи́ши судя́ ми по зако́ну, преступа́я же зако́н вели́ши, да бию́т мя. Предстоя́щии же ре́ша: архиере́ю ли Бо́жию досажда́еши? Рече́ же Па́вел: не ве́дах, бра́тие, я́ко архиере́й есть. Пи́сано бо есть: кня́зю люде́й твои́х да не рече́ши зла. Разуме́в же Па́вел, я́ко еди́на часть есть саддуке́й, друга́я же фарисе́й, воззва́ в со́нмищи: му́жие бра́тие, аз фарисе́й есмь, сын фарисе́ов, о упова́нии и о воскресе́нии ме́ртвых аз суд прие́млю. Се же ему́ ре́кшу, бысть ра́спря между́ саддуке́и и фарисе́и, и раздели́ся наро́д. Саддуке́и бо глаго́лют не бы́ти воскресе́ния, ни А́нгела, ни ду́ха, фарисе́и же испове́дуют обоя́. Бысть же кличь вели́к, и воста́вше кни́жницы ча́сти фарисе́йския пря́хуся между́ собо́ю, глаго́люще: ни еди́но зло обрета́ем в челове́це сем, а́ще же дух глаго́ла ему́ или́ А́нгел, не проти́вимся Бо́гу. Мно́зе же бы́вшей ра́спре, боя́ся ты́сящник, да не растерза́н бу́дет Па́вел от них, повеле́ во́ином сни́ти и восхи́тити его́ от среды́ их и вести́ его́ в полк. В наста́вшую же нощь предста́в ему́ Госпо́дь, рече́: дерза́й, Па́вле, я́коже бо свиде́тельствовал еси́ я́же о Мне во Иерусали́ме, си́це ти подоба́ет и в Ри́ме свиде́тельствовати.

Деян 23:1–11
В среду 7-я недели.

Деяния святых Апостол, зачало 48.

Во дни о́ны, Агри́ппа царь и Верники́а снидо́ста в Кесари́ю целова́ти Фи́ста. И я́коже мно́ги дни пребы́ста ту, Фист сказа́ царю́ я́же о Па́вле, глаго́ля: муж не́кий есть оста́влен от Фи́ликса у́зник, о не́мже, бы́вшу ми во Иерусали́ме, яви́ша архиере́е и ста́рцы Иуде́йстии, прося́ще нань суда́. К ни́мже отвеща́х, я́ко несть обы́чай ри́мляном вы́дати челове́ка ко́его на поги́бель, пре́жде да́же оклевета́емый не и́мать пред лице́м клеве́щущих его́ и ме́сто отве́та прии́мет о свое́м согреше́нии. Сше́дшымся же им зде, закосне́ние ни еди́но сотво́рь, нау́трие сед на суди́щи, повеле́х привести́ му́жа. О́крест же его́ ста́вше клеветницы́, ни еди́ну вину́, я́же аз непщева́х, нанесо́ша. Стяза́ния же не́кая о свое́й разли́чней ве́ре имя́ху к нему́ и о не́коем Иису́се уме́ршем, Его́же глаго́лаше Па́вел жи́ва бы́ти.

Деян 25:13–19
В четверток 7-я недели.