Послание ко евреем, зачало 331Б.

Послание ко евреем, зачало 331Б.

Бра́тие, его́же лю́бит Госпо́дь, наказу́ет: бие́т же вся́каго сы́на, его́же прие́млет. А́ще наказа́ние терпите́, я́коже сыново́м обрета́ется вам Бог. Кото́рый бо есть сын, его́же не наказу́ет оте́ц? А́ще же без наказа́ния есте́, ему́же прича́стницы бы́ша вси, у́бо прелюбоде́йчищи есте́, а не сы́нове. К сим, пло́ти на́шей отца́ име́хом наказа́теля, и срамля́хомся: не мно́го ли па́че повине́мся Отцу́ духово́м, и жи́ви бу́дем? Они́ бо в ма́ло дней, я́коже го́де им бе, нака́зоваху нас, а Сей на по́льзу, да причасти́мся святы́ни Его́. Вся́кое бо наказа́ние в настоя́щее вре́мя не мни́тся ра́дость бы́ти, но печа́ль: последи́ же плод ми́рен науче́ным тем воздае́т пра́вды. Те́мже осла́бленныя ру́ки и осла́бленная коле́на испра́вите. И стези́ пра́вы сотвори́те нога́ми ва́шими, да не хро́мое соврати́тся, но па́че да исцеле́ет. Блюди́те же, да не отрече́теся Глаго́лющаго, а́ще бо не избежа́ша они́, отре́кшиися проро́чествующаго на земли́, мно́жае па́че мы отрица́ющиися Небе́снаго. Его́же глас зе́млю тогда́ поколеба́, ны́не же обетова́, глаго́ля: еще́ еди́ною Аз потрясу́ не то́кмо земле́ю, но и не́бом. А е́же, еще́ еди́ною, сказу́ет коле́блемых преложе́ние, а́ки сотворе́нных, да пребу́дут, я́же суть не подви́жимая.

Евр 12:6–13; 25–27
А сие трусу.

Послание ко евреем, зачало 332.

Бра́тие, мир име́йте и святы́ню со все́ми, и́хже кроме́ никто́же у́зрит Го́спода. Смотря́юще, да никто́же лиши́тся благода́ти Бо́жия, да не кий ко́рень го́рести, выспрь прозяба́яй, па́кость сотвори́т, и тем оскверня́тся мно́зи. Да не кто блудоде́й, или́ скверни́тель, я́коже Иса́в, и́же за ядь еди́ну отда́л есть перворо́дство свое́. Ве́сте бо, я́ко и пото́м похоте́в насле́довати благослове́ние, отве́ржен бысть, покая́ния бо ме́ста не обре́те, а́ще и со слеза́ми поиска́л его́. Не приступи́сте бо к горе́ осяза́емей и разгоре́вшемуся огню́, и о́блаку и сумра́ку, и бу́ре, и тру́бному зву́ку, и гла́су глаго́л, его́же слы́шавшии отреко́шася, да не приложи́тся им сло́во. Не терпя́ху бо повелева́ющаго, а́ще и зверь прико́снется горе́, ка́мением побие́н бу́дет. И та́ко стра́шно бе ви́димое, Моисе́й рече́: пристра́шен есмь и тре́петен. Но приступи́сте к Сио́нстей горе́ и ко гра́ду Бо́га жива́го, Иерусали́му небе́сному и тмам А́нгелов, торжеству́ и це́ркви перворо́дных на небесе́х напи́санных, и Судии́ всех Бо́гу и духо́м пра́ведник соверше́нных, и к Хода́таю заве́та но́ваго Иису́су и Кро́ви кропле́ния, лу́чше глаго́лющей, не́жели А́велева.

Евр 12:14–24
Егда огня запаления.