Послание к коринфяном первое, зачало 137.

Послание к коринфяном первое, зачало 137.

Бра́тие, а́ще кото́рый брат жену́ и́мать неве́рну, и та благоволи́т жи́ти с ним, да не оставля́ет ея́. И жена́ а́ще и́мать му́жа неве́рна, и той благоволи́т жи́ти с не́ю, да не оставля́ет его́. Святи́тся бо муж неве́рен о жене́ ве́рне, и святи́тся жена́ неве́рна о му́жи ве́рне, ина́че бо ча́да ва́ша нечи́ста бы́ли бы, ны́не же свя́та суть. А́ще ли неве́рный отлуча́ется, да разлучи́тся, не порабо́тися бо брат или́ сестра́ в таковы́х, в мир бо призва́ нас Госпо́дь Бог. Что бо ве́си, же́но, а́ще му́жа спасе́ши? Или́ что ве́си, му́жу, а́ще жену́ спасе́ши? То́чию коему́ждо я́коже раздели́л есть Бог, ки́йждо я́коже при́зван бысть Го́сподем, та́ко да хо́дит, и та́ко во всех це́рквах повелева́ю. Во обре́зании ли кто при́зван бысть? Да не отто́ргнется, в необре́зании ли кто при́зван бысть? Да не обре́зуется. Обре́зание ничто́же есть, и необре́зание ничто́же есть, но соблюде́ние за́поведей Бо́жиих. Ки́йждо в зва́нии, в не́мже при́зван бысть, в том да пребыва́ет. Раб ли при́зван был еси́? Да не неради́ши, но а́ще и мо́жеши свобо́ден бы́ти, бо́льши порабо́ти себе́. При́званный бо о Го́споде раб, свобо́дник Госпо́день есть, та́кожде и при́званный свобо́дник, раб есть Христо́в. Цено́ю ку́плени есте́, не бу́дите раби́ челове́ком. Ки́йждо, в не́мже при́зван бысть, бра́тие, в том да пребыва́ет пред Бо́гом.

1 Кор 7:12Б–24
В среду 7-я недели.

Послание к коринфяном первое, зачало 138.

Бра́тие, ки́йждо в не́мже при́зван бысть, в том да пребыва́ет пред Бо́гом. О де́вах же повеле́ния Госпо́дня не и́мам, сове́т же даю́, я́ко поми́лован от Го́спода ве́рен бы́ти. Мню у́бо сие́ добро́ бы́ти за настоя́щую ну́жду, я́ко добро́ челове́ку та́ко бы́ти. Привяза́л ли ся еси́ жене́? Не ищи́ разреше́ния. Отреши́л ли ся еси́ жены́? Не ищи́ жены́. А́ще ли же и оже́нишися, не согреши́л еси́, и а́ще пося́гнет де́ва, не согреши́ла есть. Скорбь же пло́ти име́ти бу́дут такови́и, аз же вы щажду́. Сие́ же глаго́лю, бра́тие, я́ко вре́мя прекраще́но есть про́чее, да и иму́щии жены́, я́коже не иму́щии бу́дут. И пла́чущиися, я́коже не пла́чущии, и ра́дующиися, я́коже не ра́дующеся, и купу́ющии, я́ко не содержа́ще. И тре́бующии ми́ра сего́, я́ко не тре́бующе: прехо́дит бо о́браз ми́ра сего́. Хощу́ же вас безпеча́льны бы́ти. Не ожени́выйся пече́тся о Госпо́дних, ка́ко угоди́ти Го́сподеви, а ожени́выйся пече́тся о мирски́х, ка́ко угоди́ти жене́. Раздели́ся жена́ и де́ва. Непося́гшая пече́тся о Госпо́дних, да есть свя́та и те́лом, и ду́хом, а пося́гшая пече́тся о мирски́х, ка́ко угоди́ти му́жу. Сие́ же на по́льзу вам саме́м глаго́лю, не да сило́ вам наложу́, но к благообра́зию и благоприступа́нию Го́сподеви безмо́лвну.

1 Кор 7:24–35
В четверток 7-я недели.