Припев:      Велича́й, душе́ моя́,/ пречестны́й Крест Госпо́день.

Припев:      Велича́й, душе́ моя́,/ пречестны́й Крест Госпо́день.

Чтец читает тропари:

Тропарь:    Да возра́дуются древа́ дубра́вная вся, освяти́вшуся естеству́ их,/ от Него́же изнача́ла насади́шася,/ Христу́ распросте́ршуся на Дре́ве;/ тем, ны́не возноси́му,// покланя́ющеся Ему́, Тя велича́ем. (Трижды)

Припев:      Велича́й, душе́ моя́,/ пречестны́й Крест Госпо́день.

Тропарь:    Свяще́нный воста́ рог/ и глава́ всем богому́дрым, Крест,/ и́мже гре́шных мы́сленно стира́ются ро́зи вси;// тем, ны́не возноси́му, покланя́ющеся ему́, Тя велича́ем. (Трижды)

Припев:      Велича́й, душе́ моя́,/ животворя́щаго Креста́ Госпо́дня воздви́жение.

Второй ирмос: Сне́дию дре́ва ро́ду прибы́вшая смерть/ Кресто́м упраздни́ся днесь,/ и́бо прама́терняя всеро́дная кля́тва разруши́ся/ прозябе́нием Чи́стыя Богома́тере,// Ю́же вся Си́лы Небе́сныя велича́ют.

Припев:      Велича́й, душе́ моя́,/ животворя́щаго Креста́ Госпо́дня воздви́жение.

Тропарь:    Го́рести уби́йственныя, я́же от дре́ва, не оста́вив, Го́споди,/ Кресто́м бо сию́ соверше́нно истреби́л еси́./ Сего́ ра́ди и дре́вом услади́ иногда́ го́ресть вод Ме́рры:/ прообразу́ющее Креста́ де́йство,// е́же вся Си́лы Небе́сныя велича́ют. (Дважды)

 

Припев: Велича́й, душе́ моя́,/ животворя́щаго Креста́ Госпо́дня воздви́жение.

Тропарь:    Непреста́нно гружа́емыя мра́ком пра́отца, Го́споди,/ Кресто́м возвы́сил еси́ днесь,/ я́ко бо ле́стию весьма́ неудержа́нно естество́ преднизведе́ся,/ всеро́дне ны па́ки испра́ви свет Креста́ Твоего́,// его́же, ве́рнии, велича́ем. (Дважды)

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в, ами́нь.               

Катава́сия, глас 8:

Ирмос:         Та́ин еси́, Богоро́дице, рай,/ невозде́ланно возрасти́вший Христа́,/ И́мже кре́стное живоно́сное на земли́ насади́ся Дре́во./ Тем, ны́не возноси́му,// покланя́ющеся Ему́, Тя велича́ем.