Богослужение Царской Православной Церкви

Богослужение Царской Православной Церкви

3 ОКТЯБРЯ: Му́ченик и испове́дник благове́рнаго вели́каго кня́зя Михаи́ла Черни́говскаго и боля́рина его́ Фео́дора, чудотво́рцев.

Вечером 2 октября

На Го́споди воззва́х:

Сти́х:Изведи́ из темни́цы ду́шу мою́, испове́датися и́мени Твоему́.

Сти́х: Мене́ жду́т пра́ведницы, до́ндеже возда́си мне́.

Сти́х: Из глубины́ воззва́х к Тебе́, Го́споди, Го́споди, услы́ши гла́с мо́й.

Сти́х: Да бу́дут у́ши Твои́ вне́млюще гла́су моле́ния моего́.

Сти́х: А́ще беззако́ния на́зриши, Го́споди, Го́споди, кто́ постои́т; я́ко у Тебе́ очище́ние е́сть.

Глас 4. Ярости царя́ богоме́рзкаго и христоненави́стнаго/ ника́коже убоя́вся, прему́дре Михаи́ле,/ ни ослабе́л еси́ щаде́ния ра́ди живота́,/ ни жела́нием ца́рства,/ его́же самово́льне оста́вил еси́,/ но Христа́ Еди́наго Бо́га испове́дал еси́:/ Тому́ Еди́ному от души́ покланя́юся, рекл еси́,/ и сла́дце умру́ за Уме́ршаго мене́ ра́ди./ Его́же моли́, страстоте́рпче Михаи́ле,/ со страда́вшим с тобо́ю Фео́дором боля́рином,// спасти́ вас почита́ющия.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Пощади́ ю́ность твою́, мучи́тель рече́,/ и поклони́ся мно́ю жела́емому бо́гу, со́лнцу же и огню́,/ да со мно́ю ца́рствуеши./ Ты же, му́чениче, рекл еси́:/ да не бу́дет мне, о пребеззако́нниче, Христа́ отврещи́ся/ и ло́жным бого́м твои́м поклони́тися./ Что бо мне тобо́ю прети́мая му́ка/ или́ настоя́щее житие́/ проти́ву бу́дущаго Ца́рствия?/ Его́же получи́ти моли́, прему́дре Михаи́ле с до́блим Фео́дором боля́рином,// любо́вию вас непреста́нно почита́ющим.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Царь богоме́рзкий и весьма́ отчужде́нный Бо́га/ покуша́шеся ле́стию, Михаи́ле,/ вас отврати́ти от ве́ры су́щия во Христа́/ и ласка́ньми свои́ми увеща́ти тща́шеся./ Глаго́лаше бо:/ а́ще покло́нитеся со мно́ю превожделе́нному моему́ бо́гу,/ сла́вы ми́ра сего́ со мно́ю насладите́ся./ Но наде́жди погреши́в,/ и в де́лех рук свои́х увязе́ гре́шник./ Моли́твами, Христе́, Твои́х уго́дник/ такова́го безчелове́чия изба́ви ду́ши на́ша,// я́ко Еди́н Милосе́рд и Человеколю́бец.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Глас 2. Претерпе́сте муче́ния боле́зни,/ пролия́сте кровь, я́ко во́ду,/ тем во страсте́х свои́х мног плод принесо́сте,/ о пречу́дне Михаи́ле и прему́дре Фео́доре!/ Христо́вы за́поведи соблюда́юще/ и те́ми утвержда́ющеся,/ уче́ньми наста́вника своего́,/ зми́я злонача́льнаго попра́сте/ и побе́дными венцы́ увязо́стеся// от Христа́, Бо́га и Спа́са душ на́ших.

Сти́х: Хвали́те Го́спода вси́ язы́цы, похвали́те Его́ вси́ лю́дие.