И ныне и присно и во веки веков, аминь

В разрешении от уз греховных ходатайством Твоим, Владычице, да низпошлет нам Господь в сердца наша благодатный огнь Духа Утешителя во примирение народа нашего и соединение Святей Своей Соборной Церкви, дондеже сретим Христа на облацех, Тя верою несумненною и любовию величающе.

 

Молитва ко Пресвятей Богородице

Пресвятая Владычице наша Богородице, Предстательнице спасения нашего, воистину радость бывает на небеси о единем грешнице кающемся, кольми же паче о мнозем народе Твоем, кающемся с трепетом смиренным и в сокрушении духа предстоящем и молящемся к Тебе кийждо о своих сих прегрешениях прощении такожде и от света сего отшедших и братий наших. Сего ради молим Тя и просим: не отврати лица Твоего от людей Твоих, яко скорбим, скоро услыши ны, вонми гласу моления нашего, моли Сына Твоего и Бога нашего простити согрешения наша и отец наших и избави ны от лютых обстояний наших. Умалихомся паче всех язык и смиренни есмы по всей земли грех ради наших, окаянни, ума лишенни, мерзостию растления оскверненни и озлобленни.

    Претерпехом разорение и поругание земли нашея, чести посрамление, глубину падения и любве изсякновение, такожде и скорби горкия во очищение и беды велия во вразумление. Ум наш умерщвлен страстьми, во мрак неведения впадеся, буйною гордынею от пути Божия отлучися. За нерадение о правде Божии ереси, расколы и неверие на ны взыдоша. Отцы наши клеветы, хулы, и напасти царю законному и природному сотвориша, крестоцелование во Иудово лобзание обратиша, отступиша Господа Бога и Спаса и убиение кротчайшаго помазанника не возбраниша во смутное время новое, отрекошася Царя Небеснаго, такожде и царя земнаго и утешения не обретоша. И ныне несть нам возвести очеса наша на Небо, студ и поношение еста нам. Исповедуем же, яко по беззаконию отец наших и по грехом нашым наведе Господь казни страшныя на ны. Ныне же каемся пред святыми Царственными Мученики, да отпустит Господь и разрешит грехи наша и отец наших чрез святейшаго патриарха молитвами Твоими, Державная Владычице наша Богородице, не оставила бо еси нас до конца во испытаниях наших даже до третьяго и четвертаго рода, не лишила еси нас милости Твоея, но за вольную жертву благоприятную и по молитвам сострадательнейшаго отца нашего святаго царя-мученика Николая даруй нам день покаяния, день спасения, воставления и с Богом примирения. Сего ради многоболезненный вопль услыши, многомилостивая Мати Божия, и изведи из истления живот наш! Благодатию Божиею посети, изнеможение духа народа Твоего уврачуй, належащыя соблазны ослаби, духу прелести запрети и вся ны обрати, спаси и сохрани и сердцу ведение истины даруй. Чрез падение наше смиренномудрие обретших, сподоби ны во подвизе верности возрастати и плоды ея приносити Богу Владыце нашему и державе православней. Церковь же Святую всякаго злаго обстояния милостивно избави, страждущую землю русскую от всех врагов видимых и невидимых свободи молитвами Твоими и святую православную Русь воскреси. Да будет знамением соборнаго единения день покаяния всенароднаго в силе правды и во обновлении духа. Сподоби ны, Пресвятая Богородице, в верноподданстве пребывати, не на себе бо надеемся во всяцем обещании и присягании, но уповаем токмо на всесильную помощь Божию, яко же рече Господь: без Мене не можете творити ничесоже. Сего ради молим Тя: моли Господа Иисуса Христа, да укрепит нас силою Святаго Духа во брани до конца претерпети и венцев небесных сподобитися вкупе со святыми царственными мученики и святыми новомученики Российскими, да вси мы в согласнем единомыслии и нелицемерной любви прославим пречестное имя Отца, и Сына, и Святаго Духа во веки веков. Аминь.

Стихиры

На прикладывание к иконе Божия Матере Державныя