И ныне и присно и во веки веков, аминь

За отступление пути Божия взыдоша на ны ереси, расколы и неверие, но Путь истины нам рождшая, Одигитрие Всеблагая, пути нашя направи и приведи ко всецерковному покаянию.

Песнь 5

Ирмос: Утро светлое возсия от гроба, Его бо схождением света исполнишася преисподняя: праведных душы восташа во славе, славословящыя страшное и Божественное Воскресение: Ты бо един Царь, и державный, и сильный, и мира податель.

Пресвятая Богородице, спаси нас

Призываху ны святии отцы и святителие наши многажды к покаянию, мы же, яко аспид затыкаяй уши свои, в нераскаянности омертвехом и в лукавстве погибохом, обаче востави ны от сна греховнаго, во еже устремитися и восхитити соборным покаянием дом Твой от враг Твоих, Пресвятая Богородице.

Пресвятая Богородице, спаси нас.

Падут врази Твои, Всецарице, иже на колесницах ныне и на конех, мы же востанем покаянием нашим и благодатию соборнаго разрешения и прощения исправимся и воспоем Ти во смирении, ликуя: Ты еси спасение рода христианского.

    Слава Отцу, и Сыну, и Святому Духу.

Тако некогда Русь погибаше за измену царю, обаче отпущением святую Иова и Ермогена воскресе соборно во храме Успения Твоего, Мати Божия, покаянно, радостно и тепле взывающи: прости нас и отцев наших, во всех сих виновни есмы, прости нас, во успении Твоем нас не оставляющая.

И ныне и присно, и во веки веков, аминь.

Несть Бог мертвых, но живых, сего ради молим Человеколюбца Господа, грехи отпускающаго и неправды потребляющаго, за отшедших от нас сродников наших, да простятся им молитвами Твоими, Богородице, вольная их согрешения и невольная противу Бога и царя.

Песнь 6

Ирмос: Глас словесе, светильник света, денница солнца, Предтеча в пустыни покайтеся всем вопиет людем, и предочиститеся: се бо предстоит Христос, от тли мир избавляяй.

Пресвятая Богородице, спаси нас

Не осудих бунт клятвопреступник и оправдих власть богоборческую, надменно соработах ей волею моею, обаче научи мя, Богоневестная, и возроди во мне верность Богу.

Пресвятая Богородице, спаси нас

Страха ради человеческа многажды попрах мою совесть христианскую и не приях в сердце любве истины и правды Божия, но молюся, Дево, умертви плотское мое мудрование, и исцеление слепоты духовныя даруй.

Слава Отцу и Сыну и Святому Духу

Прельстихомся тлетворным духом запада, осквернихомся коварным тайноведением востока, вхождахом во противу-христианская сонмища и враждовахом святей монархии Руси православныя, от Византии наследованныя, но избави ны от лукаваго, сети его попаляющая, и просвети ны, Пречистая.

И ныне и присно, и во веки веков, аминь.

Признахом беззаконныя притязатели на священный престол царский, оболгахомся о мощах, во храме царстем положенных, но от слуг антихриста нас избави, Державная Царице.

Кондак, глас 6-й

Престола славных апостол воспреемнику и святителей всехвальных Иова и Ермогена, поспешествуй,

Владычице, патриарху нашему собрати паству во едино стадо благодатию прощения тяжких грех, да украсится она, яко невеста, ко второму пришествию Жениха Христа, егда услышит: благословении, приидите и наследуйте уготованное вам царствие.

 

Стихира, глас той же

 

Первое крещение Руси бе на водах Днепра повелением святаго равноапостольнаго великаго князя, второе же на реках крове святых царственных мученик и всех новомученик и исповедников Российских. И ныне нам даруй, Владычице мира, омовение третие бани пакибытия слезами покаяния всенародного, да соборно зовем Ти: спаси Дом Твой, страну Российскую, и сохрани нас под кровом Твоим.

 

Песнь 7

Ирмос: Херувимы подражающе отроцы в пещи, ликовствоваху вопиюще: благословен еси Боже, яко истиною и судом навел еси сия вся грех ради наших, препетый и препрославленный во вся веки.