Октоих, глас 5. В понедельник на утрени.

На стиховне, глас 5.

Мно́жества прегреше́ний мои́х пре́зри Го́споди, / и́же от Де́вы рожде́йся: / и вся́ очи́сти грехи́ моя́, / мы́сль мне́ подая́ обраще́ния,/ я́ко Еди́н Человеколю́бец, молю́ся, // и поми́луй мя́.

Стѝх: И спо̀лнихомся зау̀тра мѝлости Твоея̀ Го̀споди, и возра̀довахомся, и возвеселѝхомся, во вся̀ днѝ на̀ша возвеселѝхомся, за днѝ в ня̀же смирѝл ны̀ есѝ, лета, в ня̀же вѝдехом зла̀я, и прѝзри на рабы̀ Твоя̀, и на дела̀ Твоя̀, / и наста̀ви сы̀ны ѝх.

Увы́ мне́, кому́ уподо́бихся а́з? / Непло́дней смоко́внице, / и бою́ся прокля́тия с посече́нием: / но Небе́сный Де́лателю Христе́ Бо́же, / олядене́вшую ду́шу мою́ плодоно́сну покажи́, / и я́ко блу́днаго сы́на приими́ мя, // и поми́луй мя́.

Стѝх: И бу̀ди свѐтлость Го̀спода Бо̀га на̀шего на на̀с, и дела̀ ру̀к на̀ших испра̀ви на на̀с, / и дѐло ру̀к на̀ших испра̀ви.

Благослове́но во́инство Небе́снаго Царя́: / а́ще бо и земноро́днии бе́ша страстоте́рпцы, / но а́нгельское досто́инство потща́шеся дости́гнути, / о телесе́х неради́ша, / и страда́ньми безпло́тных сподо́бишася че́сти. / Те́мже моли́твами и́х Го́споди, // низпосли́ на́м ве́лию ми́лость.

Сла́ва и ны́не, глас то́йже:

Обра́дованная, хода́тайствуй Твои́ми моли́тва-ми,/ и испроси́ душа́м на́шим мно́жество щедро́т, // и очище́ние мно́гих прегреше́ний, мо́лимся.

Октоих, глас 5.

В понедельник вечера.

На Господи воззвах, глас 5.

Увы́ мне́ прогне́вавшему Тя́, / Ми́лостиваго Бо́га моего́ и Го́спода! / Коли́жды обеща́хся пока́ятися Христе́, / и ло́ж обрето́хся несмы́сленный! / Пе́рвую у́бо креще́ния окаля́х оде́жду, / заве́т же мо́й, и́же к Тебе́, оста́вих: / и второ́е сие́ па́ки завеща́ние, / е́же испове́дах Ти́ пред Ангелы и челове́ки, / о́бразом плаче́вным оде́ян: / его́же отложи́в про́чее, // Спа́се, до конца́ не оста́ви мене́ поги́бнути.

Кото́рый отве́т душе́ окая́нная, / обря́щеши в де́нь су́дный: / или́ кто́ тя осужде́ния огня́ ве́чнаго, / и про́чих муче́ний изба́вит? / Никто́же, а́ще не ты́ сама́ уми́лостивиши Благоутро́бнаго, / зла́я твоя́ оста́вльши дея́ния, / и благоуго́дно стяжа́вши жи-тие́:/ пла́чущи на вся́к де́нь твои́х безме́рных согреше́ний,/ я́же на вся́к ча́с согреша́еши / де́лом, и сло́вом, и помышле́нием, / Христа́ моля́щи, // пода́ти тебе́ соверше́нное си́х проще́ние.

Да не содержи́т мене́ Спа́се, / грехо́вный обы́чай влеки́й, / ниже́ да облада́ет мно́ю бе́с, / при́сно боря́, и низводя́ к во́ли свое́й: / но исхити́ мя того́ влады́чествия, / кре́пкою Твое́ю руко́ю Всеси́льне, / и воцари́ся во мне́ Ты́ Человеколю́бче. / Всего́ же Твоего́ бы́ти мя́ сподо́би, / и жи́ти по во́ли Твое́й Сло́ве, / име́ти поко́й в Тебе́, / и обрести́ ми очище́ние и спасе́ние // и ве́лию ми́лость.

Октоих, глас 5.

В понедельник вечера.

На стиховне, глас 5.

Го́споди, согреша́я не престаю́, / человеколю́бия сподобля́емь не разуме́ю: / одоле́й моему́ недоуме́-нию Еди́не Бла́же, // и поми́луй мя́.

Стѝх: К Тебѐ возведо̀х о̀чи моѝ, живу̀щему на Небесѝ. Сѐ я̀ко о̀чи раб в руку̀ госпо̀дий своѝх, я̀ко о̀чи рабы̀ни в руку̀ госпожѝ своея̀: та̀ко о̀чи на̀ши ко Го̀споду Бо̀гу на̀шему, / до̀ндеже ущѐдрит ны̀.

Го́споди, и стра́ха Твоего́ бою́ся, / и зло́е творя́ не престаю́: / кто́ на суди́щи судии́ не бои́тся? / Или́ кто́ уврачева́тися хотя́, врача́ прогне́вает я́коже а́з? / долготерпели́ве Го́споди, на не́мощь мою́ умилосе́рдися, // и поми́луй мя́.

Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих: / и уничиже́ния го́рдых.

Щито́м ве́ры обо́лкшеся, / и о́бразом Крестным себе́ укре́пльше, / к му́кам му́жески вда́шася, / и диа́волю горды́ню и ле́сть низложи́ша / святи́и Твои́ Го́споди: / те́х мольба́ми я́ко Всеси́лен Бо́г, / ми́рови ми́р низпосли́, // и душа́м на́шим ве́лию ми́лость.

Сла́ва и ны́не, глас то́йже:

Утоли́ боле́зни многовоздыха́ющия души́ моея́, / утоли́вшая вся́ку сле́зу от лица́ земли́. / Ты́ бо челове́ком боле́зни отгоня́еши, / и гре́шных ско́рби разруша́еши: / Тебе́ бо вси́ стяжа́хом наде́жду и утвержде́ние, // Пресвята́я Ма́ти Де́во.

Октоих, глас 5. Во вторник на утрени.

Ирмосы, глас 5.

Песнь 1.

Зе́млю, на ню́же не возсия́, ни ви́де со́лнце когда́, / бе́здну, ю́же не ви́де на́гу широта́ Небе́сная, / Изра́иль про́йде невла́жно Го́споди, / и вве́л еси́ его́ в го́ру святы́ни Твоея́, // хва́ляща и пою́ща побе́дную пе́снь.

Песнь 3.

Дви́жимое се́рдце мое́ Го́споди, / волна́ми жите́йскими, / утверди́ в приста́нище ти́хое // наставля́я я́ко Бо́г.

Песнь 4.

Услы́шах Го́споди слу́х Тво́й, и убоя́хся, / разуме́х смотре́ние Твое́, / и просла́вих Тя́ // Еди́не Человеколю́бче.

Песнь 5.

Окая́нную ду́шу мою́, нощеборю́щуюся со тьмо́ю страсте́й, / предвари́в уще́дри, / и возсия́й мы́сленное со́лнце днесве́тлыя звезды́ во мне́, // во е́ж раздели́ти но́щь от све́та.

Песнь 6.

Якоже проро́ка от зве́ря изба́вил еси́ Го́споди, / и мене́ из глубины́ несодержи́мых страсте́й / возведи́, молю́ся, // да приложу́ призре́ти ми́ к хра́му свято́му Твоему́.

Песнь 7.

Огня́ гаси́лище отроко́в моли́тва, / ороша́ющая пе́щь пропове́дница чудесе́, / не опаля́ющи, ниже́ сожига́ющи// песносло́вцы Бо́га оте́ц на́ших.

Песнь 8.

Ангелов со́нм, челове́ков собо́р, / Царя́ и Зижди́теля все́х, / свяще́нницы по́йте, благослови́те леви́ти, // лю́дие превозноси́те во вся́ ве́ки.

Песнь 9.

Яко сотвори́ Тебе́ вели́чия си́льный, / Де́ву я́вль Тя́ чи́сту по рождестве́, / я́ко ро́ждшую без се́мене Своего́ Творца́: // те́м Тя́ Богоро́дице велича́ем.

Октоих, глас 5.

Во вторник на утрени.

На стиховне, глас 5.

Мно́жества прегреше́ний мои́х пре́зри Го́споди, / и́же от Де́вы рожде́йся: / и вся́ очи́сти беззако́ния моя́, / мы́сль мне́ подая́й обраще́ния, / я́ко Еди́н Человеколю́бец, молю́ся, // и поми́луй мя́.

Стѝх: И спо̀лнихомся зау̀тра мѝлости Твоея̀ Го̀споди, и возра̀довахомся, и возвеселѝхомся, во вся̀ днѝ на̀ша возвеселѝхомся, за днѝ в ня̀же смирѝл ны̀ есѝ, лета, в ня̀же вѝдехом зла̀я, и прѝзри на рабы̀ Твоя̀, и на дела̀ Твоя̀, / и наста̀ви сы̀ны ѝх.

Увы́ мне́, кому́ уподо́бихся а́з? / Непло́дней смоко́внице, / и бою́ся прокля́тия с посече́нием: / но Небе́сный Де́лателю Христе́ Бо́же, / олядене́вшую мою́ ду́шу плодоно́сну покажи́, / и я́ко блу́днаго сы́на приими́ мя, // и поми́луй мя́.

 

Стѝх: И бу̀ди свѐтлость Го̀спода Бо̀га на̀шего на на̀с, и дела̀ ру̀к на̀ших испра̀ви на на̀с, / и дѐло ру̀к на̀ших испра̀ви.

Страстоте́рпцы Твои́ Го́споди, / чино́м Ангельским подража́телие, / я́ко безпло́тнии му́ки претерпе́ша, / и единомы́сленно упова́ние иму́ще, / обеща́нных бла́г наслажде́ние: / моли́твами и́х Христе́ Бо́же, / ми́р ми́рови Твоему́ да́руй, // и душа́м на́шим ве́лию ми́лость.

Сла́ва и ны́не, глас то́йже:

Обра́дованная, хода́тайствуй Твои́ми моли́твами,/ и испроси́ душа́м на́шим мно́жество щедро́т, // и очище́ние мно́гих прегреше́ний, мо́лимся.

Октоих, глас 5.

Во вторник вечера.

На Господи воззвах, глас 5.

Воздви́жеся я́коже Агнец на Кресте́, / и возноше́ния льсти́ваго низве́ргл еси́: / закла́в же ся, кро́вию Твое́ю всю́ освяти́л еси́ зе́млю. / И прободе́н копие́м, пла́менному мне́ Христе́,/ору́жию плещи́ да́ти а́бие повеле́л еси́, / и рая́ вмести́ти вхо́д, / и дре́ва мя́ наслажда́тися живо́тнаго небоя́зненно. / Те́мже спасе́н бы́в стра́стию Твое́ю, / зову́ ра́дуяся: / сла́ва Боже́ственному Кресту́ Твоему́, / и́мже кля́твы изба́вихомся дре́вния, / и благослове́ние от дре́ва объе́млем, // и ве́лию ми́лость.

Уста́вити боле́зни хотя́ челове́ком и поноше́ния, / преблаги́й Го́споди Спа́се мо́й, / распя́тие терпи́ши поно́сное, / и же́лчи вкуша́еши Незло́биве, / на́шу го́ресть отъе́мля зло́бную, уязви́вся Сло́ве, / ребра́ прободе́нием, я́звы на́ша я́ко Влады́ка исцеля́еши./ Те́мже и воспева́ем Твое́ сла́вное хоте́ние,/ и покланя́ющеся чти́м копие́, и гу́бу, и тро́сть, / и́миже дарова́л еси́ ми́ру Твоему́ // ми́р и ве́лию ми́лость.

Ка́ко Тя́ Иису́се, евре́йское мно́жество беззако́нное / на Кресте́ распя́ти осуди́, / не уще́дрив Тебе́ Ще́драго: / Де́ва пла́чущи веща́ше иногда́, / егда́ узре́ на Кресте́ воздви́жена, / Его́же из утро́бы нестра́стно породи́. / Что́ Ти соде́я беззако́нное собо́рище, / Ча́до Мое́ вожделе́нное, / Сы́не Мо́й превозлю́бленней-ший? / Потщи́ся и спаси́, ве́рою Твое́ сла́вящих распя́тие, / и Мене́, я́коже обеща́л еси́ велича́ющих, // я́ко Еди́н Всепреблаги́й.

Октоих, глас 5. Во вторник вечера.

На стиховне, глас 5.

Го́споди, при Моисе́и иногда́ проро́це, / то́чию о́браз Креста́ Твоего́ явля́емь, / побежда́ше враги́ Твоя́. / Ны́не же са́мый Крест Тво́й иму́ще, по́мощи про́сим: / укрепи́ Це́рковь Твою́, // мно́гия ра́ди ми́лости, Человеколю́бче.

Стѝх: К Тебѐ возведо̀х о̀чи моѝ, живу̀щему на Небесѝ. Сѐ я̀ко о̀чи раб в руку̀ госпо̀дий своѝх, я̀ко о̀чи рабы̀ни в руку̀ госпожѝ своея̀: та̀ко о̀чи на̀ши ко Го̀споду Бо̀гу на̀шему, / до̀ндеже ущѐдрит ны̀.

Крест Тво́й Христе́, / а́ще и Дре́во ви́димо е́сть существо́м, / но Боже́ственною оде́яно е́сть си́лою, / и чу́вственне ми́рови явля́емь, / у́мно на́ше чудотвори́т спасе́ние, // ему́же кла́няющеся сла́вим Тя́ Спа́се, поми́луй на́с.

Стѝх: П омѝлуй на̀с, Го̀споди, помѝлуй на̀с, я̀ко по мно̀гу испо̀лнихомся уничижѐния: наипа̀че напо̀лнися душа̀ на̀ша поношѐния гобзу̀ющих / и уничижѐния го̀рдых.

Моли́те за ны́ святи́и му́ченицы, / да изба́вимся от беззако́ний на́ших: // ва́м бо дана́ е́сть благода́ть моли́тися за ны́.

Сла́ва и ны́не, глас то́йже:

Ве́сь восприи́м мо́й зра́к, Созда́тель и Бо́г облече́ся, / вообрази́ти и́же пре́жде па́дший зра́к Ада́мов восхоте́вый, / на Крест вознесе́ся во́лею я́ко пови́нен:/ и ру́це распросте́р ны́не, / исцеля́я ру́це я́же дре́вле осла́бленныя к дре́ву сне́дному. / Его́же Всечи́стая ви́дящи восклица́ше: / что́ сие́ Твое́ Сы́не Мо́й неизрече́нное долготерпе́ние? / Не терплю́ на Кресте́ воздви́жена зря́щи Тя́, // го́рстию содержа́ща всея́ земли́ концы́.