Октоих, глас 5. В среду на утрени. 


Мы поможем в написании ваших работ!



ЗНАЕТЕ ЛИ ВЫ?

Октоих, глас 5. В среду на утрени.



Ирмосы в среду на утрене совпадают с воскресными "Коня и всадника"

На стиховне, глас 5.

То́чию водрузи́ся дре́во Христе́ Креста́ Твоего́, / пре́лесть прогна́на бы́сть и́дольская, и благода́ть процвете́: / не бо́ ктому́ осужде́ния е́сть мучи́тельство, / но побе́да яви́ся на́с спасе́ния. / Крест бо на́м е́сть похвала́, / Крест на́м утвержде́ние, // Крест на́м ра́дование.

 

Стѝх: И спо̀лнихомся зау̀тра мѝлости Твоея̀ Го̀споди, и возра̀довахомся, и возвеселѝхомся, во вся̀ днѝ на̀ша возвеселѝхомся, за днѝ в ня̀же смирѝл ны̀ есѝ, лета, в ня̀же вѝдехом зла̀я, и прѝзри на рабы̀ Твоя̀, и на дела̀ Твоя̀, / и наста̀ви сы̀ны ѝх.

 

Веде́н бы́л еси́ на́с ра́ди на же́ртву Христе́, я́ко овча́, / и я́ко Агнец незло́бив Емману́ил, / на заколе́ние во́льное, с беззако́нники вмене́н бы́л еси́. / Прииди́-те, воспо́йте оте́чествия язы́к, // и поклони́теся на Кресте́ пове́шеному Животу́ безконе́чному.

Стѝх: И бу̀ди свѐтлость Го̀спода Бо̀га на̀шего на на̀с, и дела̀ ру̀к на̀ших испра̀ви на на̀с, / и дѐло ру̀к на̀ших испра̀ви.

 

Святи́и му́ченицы на земли́ подви́гшеся, / мра́з претерпе́ша, огню́ преда́шася, / вода́ и́х прия́т, / те́х е́сть гла́с: / проидо́хом сквозе́ о́гнь и во́ду, / и изведе́ ны в поко́й. // Моли́твами и́х Христе́ Бо́же, поми́луй на́с.

Сла́ва и ны́не, глас то́йже:

Зря́щи дре́вле Агнца и Сы́на Своего́, / Де́ва Ма́ти и Всеблаже́нная Отрокови́ца, / на Крест воздви́жена, вопия́ше слезя́щи: / увы́ Мне́, Сы́не Мо́й, ка́ко умира́еши. // Бо́г естество́м сы́й безсме́ртен?

Октоих, глас 5. В среду вечера.

На Господи воззвах, глас 5.

Всю́ проше́дше зе́млю, / все́ясте Боже́ственная уче́ния, / сло́во то́чию я́ко све́щник / и бога́тство все́, ученицы́ Госпо́дни нося́ще, / и́мже цари́ же и мучи́тели посрами́сте, / и любомудреце́м и вити́ям лю́тость я́ко паучи́нная раздра́сте плете́ния, / все́х к ра́зуму призыва́юще Зижди́теля, / и су́етная служе́ния бесо́вская отъе́млюще. // Те́мже молю́, безслове́сных изба́вити мя́ страсте́й моли́твами ва́шими.

Мяте́жа искуше́ний, / и лю́тыя лжи́ безче́стных ересе́й, / бесо́вскаго злосове́тия, / и челове́к го́рькаго сообще́ния / и бу́ри всеблаже́ннии, / огня́ несвети́маго, и ве́чнующаго че́рвия, / скре́жета зубна́го, и вся́кия ины́я му́ки, / к Бо́гу мольба́ми изба́вите все́х на́с, / и Сего́ умоли́те, / воздержа́ния ра́ди и трудо́в, / доброде́телей воздая́ний получи́ти, / насле́дия же Небе́снаго Ца́рствия, // и ве́лию ми́лость.

Всю́ све́тлость я́сно восприе́млюще, / тро́ичный све́т вторы́й неизрече́ннаго смотре́ния, / я́ко мо́щно вои́стинну челове́ческому естеству́, / всехва́льная десяти́ца со дво́ицею, / показа́ся соверше́нне водя́щи единоревни́тельный собо́р, / седми́десятих и дву́ иму́щи с ни́ми, / и вся́ просвеща́юще ми́ра концы́, / омрача́ющияся тьмо́ю злому́дренных ересе́й, / Христа́ моля́ще, // подаю́щаго ми́рови ве́лию ми́лость.

Октоих, глас 5. В среду вечера.

На стиховне, глас 5.

Ученицы́ Спа́совы та́ин самови́дцы бы́вше, / Неви́димаго и Нача́ла не иму́щаго пропове́дасте, глаго́люще: / в нача́ле бе́ Сло́во. / Не со́здани бы́сте пре́жде Ангел, / ни научи́стеся от челове́к, но от вы́шния прему́дрости. / Те́мже дерзнове́ние иму́ще,// моли́теся о душа́х на́ших.

Стѝх: К Тебѐ возведо̀х о̀чи моѝ, живу̀щему на Небесѝ. Сѐ я̀ко о̀чи раб в руку̀ госпо̀дий своѝх, я̀ко о̀чи рабы̀ни в руку̀ госпожѝ своея̀: та̀ко о̀чи на̀ши ко Го̀споду Бо̀гу на̀шему, / до̀ндеже ущѐдрит ны̀.

Апо́столы Госпо́дни согла́сно пе́сньми похва́лим, / обле́кшеся бо в кре́стное ору́жие, / и́дольскую пре́лесть упраздни́ша, / и победоно́снии яви́шася вене́чницы: / и́хже моли́твами и все́х святы́х, // Бо́же, поми́луй на́с.

 

Стѝх: И бу̀ди свѐтлость Го̀спода Бо̀га на̀шего на на̀с, и дела̀ ру̀к на̀ших испра̀ви на на̀с, / и дѐло ру̀к на̀ших испра̀ви.

 

Несы́тною любо́вию души́, / Христа́ не отверго́стеся святи́и му́ченицы, / и́же разли́чныя ра́ны страсте́й претерпе́вше, / мучи́телей де́рзость низложи́сте, / непрекло́нну и невреди́му ве́ру сохра́ньше, / на Небеса́ преста́вистеся. / Те́мже и дерзнове́ние иму́ще к Нему́,// проси́те дарова́ти на́м ве́лию ми́лость.

Сла́ва и ны́не, глас то́йже:

Блажи́м Тя́ Богоро́дице Де́во, / и сла́вим Тя́ ве́рнии по до́лгу, / Гра́д непоколеби́мый, Сте́ну необори́мую, / тве́рдую Предста́тельницу, // и прибе́жище ду́ш на́ших.

Октоих, глас 5. В четверток на утрени.

Ирмосы в четверток на утрене совпадают с воскресными "Коня и всадника"

На стиховне, глас 5.

Ученицы́ Спа́совы та́ин самови́дцы бы́вше, / Неви́димаго и Нача́ла не иму́щаго пропове́дасте, глаго́люще: / в нача́ле бе́ Сло́во. / Не со́здани бы́сте пре́жде Ангел, / ниже́ научи́стеся от челове́к, но от вы́шния прему́дрости./ Те́мже дерзнове́ние иму́ще,// моли́те о душа́х на́ших.

 

Стѝх: И спо̀лнихомся зау̀тра мѝлости Твоея̀ Го̀споди, и возра̀довахомся, и возвеселѝхомся, во вся̀ днѝ на̀ша возвеселѝхомся, за днѝ в ня̀же смирѝл ны̀ есѝ, лета, в ня̀же вѝдехом зла̀я, и прѝзри на рабы̀ Твоя̀, и на дела̀ Твоя̀, / и наста̀ви сы̀ны ѝх.

 

Апо́столы Госпо́дни согла́сно пе́сньми похва́лим, / обо́лкшеся бо в кре́стное всеору́жие, / и́дольскую ле́сть упраздни́ша, / и победоно́снии яви́шася вене́чницы: / и́хже моли́твами и все́х святы́х, // Бо́же, поми́луй на́с.

 

Стѝх: И бу̀ди свѐтлость Го̀спода Бо̀га на̀шего на на̀с, и дела̀ ру̀к на̀ших испра̀ви на на̀с, / и дѐло ру̀к на̀ших испра̀ви.

 

В му́ках су́ще святи́и, / ра́дующеся, вопия́ху: / ку́пля на́м су́ть сия́ ко Влады́це: / вме́сто бо быва́ющих ра́н на телесе́х, / све́тло одея́ние в Воскресе́ние процвете́т на́м: / вме́сто безче́стия, венцы́: / за у́зы темни́чныя, ра́й: / и за е́же со злоде́и осужде́ние со Ангелы житие́. // и́хже моли́твами Го́споди, спаси́ ду́ши на́ша.

Сла́ва и ны́не, глас то́йже:

Блажи́м Тя́ Богоро́дице Де́во, / я́ко из Тебе́ возсия́ Со́лнце пра́ведное Христо́с, // име́яй ве́лию ми́лость.

Октоих, глас 5.

В четверток вечера.

На Господи воззвах, глас 5.

Вся́ древа́ дубра́вная да возра́дуются, / Дре́во ви́дяще всечестно́е, / стра́стию Влады́чнею обра́дованно, / благода́ть облистава́ющее я́ко пла́мень огня́, / источа́ющее я́коже во́ды дарова́ния все́м, / ду́ши просвеща́ющее и помышле́ния, / неду́ги очища́ющее и стра́сти отгоня́ющее неви́димыя, / язы́ки иноплеме́нныя побежда́ющее я́ве, / побе́ды подаю́щее всегда́ ве́рным, // благослове́ние и ве́лию ми́лость.

Ме́сту, иде́же стоя́сте но́зе Госпо́дни, / ве́рою покланя́ющеся, я́коже проро́к рече́: / Христа́ славосло́вим распе́ншагося / и сраспе́нша прегреше́ния на́ша: / ю́же от дре́ва разори́вшаго кля́тву, / и примири́вша Отцу́ отстоя́щия отню́д помышле́ньми. / Ручны́я же Его́ и ножны́я гво́здия, / копие́ и тро́сть, гу́бу и вене́ц облобыза́юще, / досажде́ния и наруга́ния, и и́на ели́ка подъя́т, // че́стне почита́ем, и́миже спасо́хомся.

Вся́ у́ды Христу́ сраспне́м, / и ми́рови умертви́мся,/ и Мироде́ржцу Христу́ по стопа́м ходи́ти вожделе́вше, / Того́же на ра́мех Боже́ственный Крест но́сим, / отверже́нием плотска́го взыгра́ния, и похоте́й злы́х, / я́же ду́шу влеку́т ко греху́, / Тому́ мня́ще предста́ти, / и зре́ти Того́ на Кресте́ пригвожде́на, / и ду́шу свою́ в ру́це Роди́телю со издыха́нием преда́вша, // я́ко да всегда́ с Ни́м бу́дем неразлу́чни.

Октоих, глас 5.

В четверток вечера.

На стиховне, глас 5.

Го́споди, при Моисе́и иногда́ проро́це, / то́чию о́браз Креста́ Твоего́ явля́ем, / побежда́ше враги́ Твоя́. / Ны́не же са́мый Крест Тво́й иму́ще, / по́мощи про́сим: / укрепи́ Це́рковь Твою́, // мно́гия ра́ди ми́лости, Человеколю́бче.

Стѝх: К Тебѐ возведо̀х о̀чи моѝ, живу̀щему на Небесѝ. Сѐ я̀ко о̀чи раб в руку̀ госпо̀дий своѝх, я̀ко о̀чи рабы̀ни в руку̀ госпожѝ своея̀: та̀ко о̀чи на̀ши ко Го̀споду Бо̀гу на̀шему, / до̀ндеже ущѐдрит ны̀.

Крест Тво́й Христе́, / а́ще и дре́во ви́димо е́сть существо́м, / но Боже́ственною оде́яно е́сть си́лою: / и чу́вственно ми́рови явля́яся, / мы́сленно на́ше чудотвори́т спасе́ние. / Ему́же покланя́ющеся, // сла́вим Тя́ Спа́се, поми́луй на́с.

Стѝх: П омѝлуй на̀с, Го̀споди, помѝлуй на̀с, я̀ко по мно̀гу испо̀лнихомся уничижѐния: наипа̀че напо̀лнися душа̀ на̀ша поношѐния гобзу̀ющих / и уничижѐния го̀рдых.

О земны́х все́х неради́вше, / и на му́ки му́жески дерзну́вше, / блаже́нных наде́жд не погреши́сте: / но Небе́сному Ца́рствию насле́дницы бы́сте, прехва́льнии му́ченицы, / иму́ще дерзнове́ние к человеколюби́вому Бо́гу, / ми́ру умире́ние испроси́те, // и душа́м на́шим ве́лию ми́лость.

Сла́ва и ны́не, глас то́йже:

Зря́щи дре́вле Агнца и Сы́на Своего́, / Де́ва Ма́ти и Всеблаже́нная Отрокови́ца, / на Кресте́ возвы́шена, вопия́ше слезя́щи: / увы́ Мне́ Сы́не Мо́й, // ка́ко умира́еши, Бо́г естество́м сы́й безсме́ртен?

Октоих, глас 5. В пяток на утрени.

Ирмосы, глас 5.

Песнь 1.

Спаси́телю Бо́гу, / в мо́ри лю́ди немо́крыми нога́ми наста́вльшему, / и фарао́на со всево́инством пото́пльшему, // Тому́ Еди́ному пои́м, я́ко просла́вися.

Песнь 3.

Си́лою Креста́ Твоего́ Христе́, / утверди́ мое́ помышле́ние, / во е́же пе́ти и сла́вити // спаси́тельное Твое́ вознесе́ние.

Песнь 4.

Услы́шах слу́х си́лы Креста́, / я́ко ра́й отве́рзеся и́м, // и возопи́х: сла́ва си́ле Твое́й Го́споди.

Песнь 5.

Утренююще вопие́м Ти́ / Го́споди, спаси́ ны: / Ты́ бо еси́ Бо́г на́ш, // ра́зве бо Тебе́ ино́го не зна́ем.

Песнь 6.

Обы́де мя́ бе́здна, / гро́б мне́ ки́т бы́сть, / а́з же возопи́х к Тебе́, Человеколю́бцу, // и спасе́ мя десни́ца Твоя́ Го́споди.

Песнь 7.

В пещи́ о́гненней / песносло́вцы спасы́й о́троки,// благослове́н Бо́г оте́ц на́ших.

Песнь 8.

Из Отца́ пре́жде ве́к рожде́ннаго Сы́на и Бо́га, / и в после́дняя ле́та воплоще́ннаго от Де́вы Ма́тере, / свяще́нницы по́йте, // лю́дие превозноси́те во вся́ ве́ки.

Песнь 9.

Тя́ па́че ума́ и словесе́ Ма́терь Бо́жию, / в ле́то Безле́тнаго неизрече́нно ро́ждшую, // ве́рнии единому́дренно велича́ем.



Поделиться:


Последнее изменение этой страницы: 2016-04-07; просмотров: 231; Нарушение авторского права страницы; Мы поможем в написании вашей работы!

infopedia.su Все материалы представленные на сайте исключительно с целью ознакомления читателями и не преследуют коммерческих целей или нарушение авторских прав. Обратная связь - 54.166.200.255 (0.022 с.)