Govardhana bhaṭṭa gosvāmī

Rūpa-Sanātana-stotram

ratnaṁ kecid avāpya santu suditā muktendra-nīlādikaṁ
brahmānanda-parā bhavantv iha pare kecit pareśonmukhāḥ |
śrī-vaiyāsaki-citta-sampuṭa-gataṁ gaurānugodghāṭitaṁ
rādhākāñcanarekhikaṁ marakataṁ cinme vayaṁ gokule ||1||

rādhābhāvābhipūrṇaṁ vraja-rasa-dhayanodbhūtaghūrṇaṁ sutūrṇaṁ
nṛtyantaṁ bhakta-madhye nirūpama madhure kīrtane kṛṣṇa-nāmnām |
varṣantaṁ prema-sindhuṁ parama-karuṇayā plāvayantaṁ trilokīṁ
vande caitanyadevaṁ parijana-sahitaṁ cārucāmīkarābham ||2||

śrīcaitanya-harer viyoga-vikalo yaḥ kṣetra-sannthāplavān
apyārāt parihṛtya dhāma jagatāṁ nāthasya paścād yayau |
varṣan prema-payonidhi jayati yo govindapādābjayoḥ
vande śrīla-gadādharaṁ purudayaṁ taṁ rādhikārūpiṇam ||3||

śrīgovindāṅghrikañjāruṇa-ruci-niratān rādhikā-dāsya-sindhau
magnān śrutvā purāṇoccayamadhi-hṛdayaṁ niścitātmeśatattvān |
durbodhān duṣṭavṛndair vrajapatitanayāsakta-bhaktātimānyān
vande’nanta-prabhāvānaparimitakalāpūritāṁs tīrthapādān ||4||

prāṇotkrāntikaphāvarodhasamaye śrīrāsa-līlotsavaṁ
vaṁśī-gīta-mati-pramoda-sahito yo yugma-gītaṁ tathā |
prākarṇyāmala-kṛṣṇa-nāma vadane gāyan vane mādhavaṁ
dṛṣṭvotthāya jahāvasūn svapitaraṁ taṁ naumi śikṣā-gurum ||5||

śrīvṛndāvipinañca gokulabhuvaṁ gopīgaṇaṁ rādhikāṁ
govindaṁ sakalañca vaiṣṇavamataṁ nānāgameṣu sthitam |
mando veda yadīyayaiva dayayā caitanya-devānugaṁ
dīnoddhāra-viśāradaṁ namata taṁ rūpāgrajaṁ santatam ||6||

mūḍho’haṁ viṣayābhilāṣa-valitaḥ saṁsāra-mārge bhraman
kva śrīmad-vṛṣabhānujācaraṇayor dāsyotsavo vā kva ca |
kintu tvat karuṇānadīṁ suvipulāṁ viśvaṁ punantīṁ valād
ācāṇḍāla mimāṁ vicārya mudito rūpāgraja tvāṁ bhaje ||7||

yo rājyaṁ parihṛtya pūrvajayuto niṣkaṇṭakaṁ svecchayā
śrī-caitanya-padāravinda-yugalaṁ dhṛtvā manasyunmadaḥ |
āgatya vrajabhūmivāsamabhito varṣan rasāmbhonidhīṁś
cakre śrīyutarūpa sa tvam adhamaṁ māṁ svīyam aṅgīkuru ||8||

granthālīṁ lalitāṁ mahojvala-rasāṁ gāndharvikāmādhava
krīḍābhir valitāṁ kavīśvaranutāṁ caitanyadevājñayā |
viśvaṁ mohaghanāndhakārapatitaṁ vīkṣyānukampāyutaḥ
śrīrūpaḥ prakaṭīcakāra yamunā-tīre kuṭīre sthitaḥ ||9||

yatkāvyaṁ hṛdayāntarālamilita-śrīgauracandreritaṁ
rādhā-kṛṣṇa-vilāsa-sañcayacitaṁ vṛndāvanaśrībhṛtam |
śrutvā nandatanūjabhaktanikarāḥ kampāśruromāñcitāḥ
ughūrṇanti luṭhanti mattamanasaḥ kurddanti nṛtyanti ca ||10||

taṁ rādhā-padapadmasevana-rataṁ caitanya-deva-priyaṁ
vṛndāraṇya-vilāsa-rakta-manasaṁ gopāṅganābhāvinam |
kṛṣṇā-tīra-kuṭīravartimamalaṁ rūpaṁ samāśritya yo
vartteta prasabhaṁ tadīya hṛdaye bhaktir narī-nṛtyate ||11||

tāvad ghora-kalivyathākula-hṛdastāvacca karmāturā
stāvadyogakalākalāpavalitāstāvacca naiyāyikāḥ |
tāvadbrahmaratā bhavanti manujāḥ granthāḥ na gaurapriyāḥ
yāvatkarṇapathaṁ prayānti tarasā śrīrūpa-vaktrodgatāḥ ||12||

śrīmadrūpamukhāmbujādvigalitaṁ caitanyadevecchayā
rādhākṛṣṇarasāmbudhiṁ niravadhi premonmadā bhūtale |
citraṁ bhaktajanāḥ pibanti satataṁ ye kumbhajātāyitās
teṣāṁ hā dviguṇībhavatyanudinaṁ tatraiva tṛṣṇā punaḥ ||13||

tuṇḍe tāṇḍavinīti mukhya-lalitaślokāvalīṁ yatkṛtāṁ
muktābhānyatulākṣarāṇi ca harigauro vilokyonmadaḥ |
ghūrṇan bhaktavṛto nanartta sahasā yaṁ sapramodaṁ stuvan
ko rādhāpadadāsyam atra labhate taṁ rūpasaṅga vinā ||14||

yenāśeṣam idaṁ jagad vraja-rasāmbhodhau samāplāvitaṁ
yannāmāpi niśamya kṛṣṇacaraṇe prāpnoti bhakti janaḥ |
so'yaṁ yasya manasya-mandakṛpayā caitanyadevo hariḥ
svaṁ sarvasvamaṇiṁ dadhau vada sakhe ! rūpātparaḥ ko bhuvi ||15||

aṭan kūle kūle taraṇiduhitur nirvyadhiraṭan
vrajendornāmāni kvacid api naṭan premavivaśaḥ |
likhan rādhānandātmajalalitakeliṁ kvacid api
smaran gauraṁ śṛṇvan kvacid api ca rūpo vilasati ||16||

kanyāmekāṁ dadhānaḥ karakayutakaro rādhikā-kāntalīlāṁ
gāyan dhyāyan samodaṁ drumatalavasatiḥ kṛṣṇanāmāni gṛhan |
kurvan rolamba bhikṣāṁ kvacidapi paramād brāhmaṇāt sthūlavṛttiṁ
rūpo nīcastṛṇebhyas tarur iva sahano rājate kānanāntaḥ ||17||

gāndharvāpadapadmadāsya-nirataś caitanyadeva-priyaḥ
śrīgovinda-kṛpāvalokanaparo vṛndāṭavīkāmukaḥ |
bhakta-prīti-kṛdanvahaṁ nataśiro bhūtāvalīmānanaḥ
pīyūṣādhikabhāṣito vijayate rūpānuyāyī janaḥ ||18||

durdāntendriya-sañcayo'pi vihitānantāparādhopyasat
saṅgenojjhita-mādhavo'pi kalitānyastrīprasaṅge'pi ca |
caitanya priyapārṣadottamanutaṁ kāruṇya-pūrṇāntaraṁ
śrīrūpaṁ paricaryā paryaṭati kaḥ saṁsārapāthonidhau ||19||

kecid ghorakaliprabhāvavijitāḥ pāṣaṇḍa-mārge gatāḥ
kecit karmaratāḥ pare'vakalita-jñānādhvaviśrāntayaḥ |
kecid bhakti-vibhūṣitāḥ suviralāstatrāpi kṛṣṇātsukāḥ
śrīrādhāpadadāsya lampaṭa-hṛdaḥ ke santri rūpaṁ vinā ||20||

hitvā rūpapadāmbujaṁ bhavati yo rādhāṅghri-dāsyotsukas
tuṅga gehamasau tanoti na kathaṁ ramye sthale saikate |
bāhubhyāṁ tridivaṁ spṛśennahi kathaṁ no vā kathaṁ cchādayet
tūrṇaṁ bhūrirajobhirambaramaṇi paṅguṁ na kiṁ cālayet ||21||

gopībhāva-taraṅga-ranjita-manāś caitanyadevo haris
teṣāmeti kathaṁ hṛdaṁ kva ca kathā rādhāpadāmbhojayoḥ |
vṛndākānana-mādhurī śrutigatā teṣāṁ vidūre nṛṇāṁ
śrīrūpāṅghri sarojabhaktim iha ye kurvanti no durmadāḥ ||22||

śrīgovindapadāravinda-yugalaṁ kālāhi-tāpāpahaṁ
vṛndākānanabhūṣaṇaṁ vraja-vadhū-netrālibhiḥ pūjitam |
śrīrādhākucakuṭūmalāntaragataṁ dhyeyaṁ rasajñottamaiḥ
ko loke vidadhāti locanapuro rūpaṁ dayāluṁ vinā ||23||

kaḥ śrībhāgavatasya tattvam amalaṁ boddhuṁ kṣamo bhūtale
ko vṛndāvanamādhurīṁ kalayituṁ vaktuṁ ca dhatte matim |
goṣṭhendrātmaja-rūpamadbhūtatamaṁ ko vā nayenmānasaṁ
śrīmantaṁ karuṇākaraṁ guṇa-nidhiṁ rūpaṁ sabandhuṁ vinā ||24||

śrīgovarddhana-ghaṭṭa-vartmamilitāṁ rādhāṁ puro
mādhavenāruddhāṁ kuṭilabhruvaṁ viracitānandādhipūrāplavām |
ālokyāmita-vāg-vilāsamabhitaścakruḥ pramodena yaṁ
sakhyastaṁ jagati sphuṭaṁ kathayitu rūpaṁ vinā kaḥ kṣamaḥ ||25||

yo nāṭye rādhikāyā vyattanuta paramāṁ premapāthodhisīmā
mudghūrṇā-citra-jalpādi-kavi-kṛticitāṁ kṛṣṇa-rūpārti-rūḍhām |
gūḍhāṁ mūḍhair manuṣyākṛtipaśunivahair nādṛtāṁ gauravedyāṁ
sa śrīrūpaḥ kadā māṁ nija-jana-gaṇanāntaḥ kariṣyaty anātham ||26||

rādhāyāḥ pūrvarāgaṁ vrajapati-tanayasyāpy asādhāraṇa yaṁ
gāyanty aśruplutākṣāḥ pulakita-vapuṣaḥ svedino bhaktavaryāḥ |
mānaṁ kṛṣṇa-pravāsaṁ praṇayaca yacitāpāra-sambhogabhedā
nāviścakre kṛpāluḥ kalimala nivahadhvaṁsanaḥ śrīla-rūpaḥ ||27||

vairāgyaṁ vidhi-rāga-bhaktimamalānnānā rasān dvādaśa
premānaṁ vrajavāsināṁ śuka-mukhair-vipra-rṣibhiḥ saṁstutam |
gopīnāṁ paramāṁ lasatpara-mahābhāvāṁ samarthāṁ ratiṁ
rādhāyām iha mādanaṁ vada sakhe ko vetti rūpaṁ vinā ||28||

śrīgovarddhana-yajña-vaibhava-bharaṁ śrī-rāsalīlotsavaṁ
śrīrādhābhisṛtiṁ kṛta-vraja-vadhūnmādāṁ pramodānvitām |
gītālīṁ lalitāṣṭakaṁ nirūpamaśrīkṛṣṇanāmastutiṁ
rūpaḥ svīya kṛte dayālumukuṭaḥ prāduścakāra prabhuḥ ||29||

chandobhir vividhair vrajendra-tanayaṁ kaḥ stotum atra kṣamaḥ
kaḥ śauri virudāvalī-prabhṛtibhiḥ stotrair manasyānayet |
jānīte madhuraṁ sagoṣṭa-vipinaṁ rādhāñca kṛṣṇaṁ mudā
ko martyaḥ paramānurāganicitaṁ dīneṣu rūpaṁ vinā ||30||

pūrvācāryakṛtāḥ śruti-smṛtinutā yuktyācitāḥ karkaśair
vādair bhrānti-nivārakā dṛḍhatarāḥ siddhānta-saṅghā bhuvi |
santu śrīśuka-vākya-sindhum amalaṁ saṁmathya gaurājñayā
svīyān rūpamṛte prapāyayati kaḥ śrīkṛṣṇa-līlāsudhām ||31||

caitanyānugṛhītavaryamatinā vṛndāṭavī-vāsinā
yena prema-sudhātimatta-hṛdayaṁ viśvaṁ pracakre'dhunā |
taṁ rūpaṁ śraya rādhikāpriyakathāṁ gāyan vasa tvaṁ vraje
karma-jñānaparānnarān hasa sakhe vaṁbhrabhyase kiṁ vahiḥ ||32||

vidyā-rūpa-kulādi-garva-sahitaḥ saṁsāra-mārgāntare
kiṁ re bhrāmyasi dārasūniratastūrṇaṁ mṛti cintaya |
āgatya vraja-bhūmim unmadatamau rādhā-mukundau bhaja
śrīrūpaṁ śraya gaura-candra-caraṇāmbhojaṁ manasyānaya ||33||

no janmāni gatāni te kati sakhe tīryaṅ nṛdevādikāḥ
yonīḥ prāpnuvataḥ kathaṁ patasi hā mohāndhakūpāntare |
tat tūrṇaṁ bhaja rūpa-pāda-yugalaṁ śrī-rādhikā-mādhavau
nityaṁ cintaya mā vṛthā kṣipa paraṁ mānuṣya-ratnaṁ bhuvi ||34||

alaṁ tīrthair dānair alamahaha yogaiḥ saniyamair
yamaiḥ sāṅkhenālaṁ kimu virasayā muktikathayā |
aho bhogaiḥ kiṁvā vihita-bhavapātaiḥ suvitathaiḥ
sadā rūpādiṣṭa-vrajamithuna-līlāḥ smara sakhe ||35||

kiṁ śāstra-vividhair mano bhramakarair dveṣādi-doṣākare
saṁsāre pariṇāmato'tivirase vaṁbhramyase mohataḥ |
rādhāmādhavakelivarṣavipulaṁ śrīkṛṣṇatṛṣṇākulaṁ
rūpagranthacayaṁ vilokaya sakhe pathyaṁ ca tathyaṁ bruve ||36||

prāptastvaṁ maraṇaṁ bhaviṣyasi yadā kāntā tanujo'thavā
bhrātā geham idaṁ dhanaṁ kimu sakhe saṅge tadā yāsyati |
mā vyarthaṁ kuru cintayā vitathayā janmedṛśaṁ durlabhaṁ
śrīrūpaṁ sa-sanātanaṁ śraya sadā gaurāṅgadevaṁ bhaja ||37||

durdāntendriyasañcayena rabhasādākṛṣyamānaḥ sakhe
saṁsāre khalu tāvadeva niviḍāṁ prāpnoṣi pīḍāṁ muhuḥ |
tāvad ghorakalivyathāvṛtamatis tvaṁ vañcito'si dhruvaṁ
yāvad rūpapadāmbujātayugalaṁ nāyāti cittaṁ tava ||38||

kiṁ nityaṁ paricintayasyapi manaḥ svargaṁ yaśaś ca kṣamāṁ
rājyaṁ brahma-sukhaṁ ca nirmalatarāṁ vaikuṇṭha-lokasthitim |
vṛndākānana-kuñja-lampaṭa-yuva-dvandva-spṛhārtipradaṁ |
śrīrūpaṁ bhaja na tyaja vraja-bhuvaṁ garvaṁ ca sarvvaṁ kṣipa ||39||

strī-putrādika-bandhu-sañcayam iha tvaṁ naśvaraṁ cintaya
brahmāṇaṁ dviparārddha saṁstham api taṁ kālāhivaktra sthitam |
mānuṣyaṁ sura-durlabhaṁ kalaya re citta tyajānyāḥ kathāḥ
śrīrūpaṁ vṛṣabhānujāṅghri nalināsaktadvirephaṁ smara ||40||

mohaṁ prāpnuhi mā kalevara-bhare viṭkīṭabhasmottare
sarvagrāsipiśācikāvanitayā no vañcaya svaṁ januḥ |
pārśvaṁ muñca manaḥ sadā viṣayināṁ yoṣitsu tṛṣṇājuṣāṁ
rūpaṁ kiṁ na bhajasyaye vraja-yuva-dvandvāmala-prītidam ||41||

sāhaṅkāratayā bhayānvitamatir no vaiṣṇavāvajñayā
gopālendratanuja-pūjana-vidhi jānāmi nāhaṁ manāk |
gehe līnamatiḥ pravīṇa-manasaḥ svaṁ manyamāno'dhamaṁ
kāṁ gatāsmi na vedima hanta kugatiṁ śrīrūpa saṁrakṣamām ||42||

śrīrādhe vrajarāja-sūnupadavīnyastekṣaṇe gokula-
strī-rūpābhimati-pratāraṇapaṭuśrīpādapadmadyute |
vṛndāraṇya-nivāsa-kāraṇadaye kāruṇya-pūrṇāntare
śrīrūpāṅghrirajoniviṣṭamanasaṁ māṁ sarvadā tvaṁ kuru ||43||

tvatto'nye samavāpya santu manujāḥ pūrṇā nijābhīpsitaṁ
śrīrādhā-kuca-kuṭamalāntaramaṇe govinda nandātmaja |
dhṛtvā dantatale tṛṇaṁ muhur idaṁ yāce dayālo sadā
dhūlisyām iha janma-janmani vibho śrīrūpa-pādābjayoḥ ||44||

kuñje mañjula-vañjule mṛdutaraṁ guñjaddvirephoccaye
kekābhir virute harimaṇitale yūthībhirāmodite |
rādhāgokulanāgarau pravilasatkalpadrumādhaḥ sthitau
dole dolayituṁ yadīcchasi mudā tarhyāśu rūpaṁ bhaja ||45||

vṛndāraṇya-nikuñja-randhra-vilasannetraḥ sakhī-rūpavān
stambha-sveda-vivarṇatāyuta-tanuḥ kampāśru-romāñcitaḥ |
rādhāmādhava-keli-vāridhirasaṁ pātuṁ samutkaṇṭhase
tvaṁ ced rūpa-padāmbujaṁ bhaja sakhe tarhi pratītyādṛtaḥ ||46||

rādhākuṇḍa-taṭe samañjulatame vāsantikābhir mudā |
puṣpālīṁ vanamālikāviracanayācinvatīṁ kautukāt |
rūndhantaṁ vata rādhikāmatitarāṁ tuṣyantamantar muhuḥ
kṛṣṇaṁ bhartsayituṁ yadīcchasi sakhe tvaṁ tarhi rūpaṁ śraya ||47||

kaulaṁ dharmamatītya bhītimabhito ghorāndhakāraṁ vanaṁ
kālindīṁ ca payodasaṁplutasṛtiṁ saṅkatakuñjālaye |
prāptāyāḥ sarajaḥ padāmbujayugaṁ gāndharvikāyā nijaiḥ
keśair mārjiyitum yadīccchasi sakhe tarhy eva rūpaṁ bhaja ||48||

caitanya-priya-pārṣadānugamatiṁ śrīkṛṣṇasevārataṁ
ye svīyaṁ gurumāśritā api punas tyaktā gatā utpatham |
tair grastaiḥ kalinā khalair nahi kadāppastu bhramāt saṁgatir
hā śrīrūpa tathā sanātana-vibho baddhāñjaliḥ prārthaye ||49||

Познавательные статьи:



Организация работы процедурного кабинета

Статус республик в составе РФ

Понятие финансов, их функции и особенности

Сущность демографической политии