Послание к колоссаем, зачало 257.

Послание к колоссаем, зачало 257.

Бра́тие, егда́ Христо́с яви́тся, живо́т ваш, тогда́ и вы с Ним явите́ся в сла́ве. Умертви́те у́бо у́ды ва́ша, я́же на земли́, блуд, нечистоту́, страсть, по́хоть злу́ю, и лихоима́ние, е́же есть идолослуже́ние. И́хже ра́ди гряде́т гнев Бо́жий на сы́ны противле́ния. В ни́хже и вы иногда́ ходи́сте, егда́ живя́сте в них. Ны́не же отложи́те и вы та вся: гнев, я́рость, зло́бу, хуле́ние, срамосло́вие от уст ва́ших. Не лжи́те друг на дру́га, совле́кшеся ве́тхаго челове́ка с дея́ньми его́. И обле́кшеся в но́ваго, обновля́емаго в ра́зум, по о́бразу созда́вшаго его́. Иде́же несть е́ллин, ни иуде́й, обре́зание, и необре́зание, ва́рвар и скиф, раб и свобо́дь, но вся́ческая и во всех Христо́с.

Кол 3:4–11
Неделя 29-я.
Сие же и в неделю праотцем.

Послание к колоссаем, зачало 258.

Бра́тие, облецы́теся у́бо, я́коже избра́ннии Бо́жии, свя́ти и возлю́бленни, во утро́бы щедро́т, бла́гость, смиреному́дрие, кро́тость и долготерпе́ние, прие́млюще друг дру́га и проща́юще себе́, а́ще кто на кого́ и́мать порече́ние, я́коже и Христо́с прости́л есть вам, та́ко и вы. Над все́ми же си́ми стяжи́те любо́вь, я́же есть соу́з соверше́нства. И мир Бо́жий да водворя́ется в сердца́х ва́ших, во́ньже и зва́ни бы́сте во еди́ном те́ле, и благода́рни быва́йте. Сло́во Христо́во да вселя́ется в вас бога́тно, во вся́кой прему́дрости, уча́ще и вразумля́юще себе́ саме́х во псалме́х и пе́ниих и пе́снех духо́вных, во благода́ти пою́ще в сердца́х ва́ших Го́сподеви.

Кол 3:12–16
Неделя 30-я.
Сие же и преподобным.

Послание к колоссаем, зачало 259.

Бра́тие, все е́же а́ще что твори́те сло́вом или́ делом, вся во и́мя Го́спода Иису́са Христа́, благодаря́ще Бо́га и Отца́ Тем. Жены́, повину́йтеся свои́м муже́м, я́коже подоба́ет о Го́споде. Му́жие, люби́те жены́ ва́ша, и не огорча́йтеся к ним. Ча́да, послу́шайте роди́телей свои́х во всем, сие́ бо уго́дно есть Го́сподеви. Отцы́, не раздража́йте чад ва́ших, да не уныва́ют. Раби́, послу́шайте по всему́ плотски́х госпо́дий ва́ших, не пред очи́ма то́чию рабо́тающе а́ки человекоуго́дницы, но в простоте́ се́рдца, боя́щеся Бо́га. И вся́ко, е́же а́ще что творите́, от души́ де́лайте, я́коже Го́споду, а не челове́ком, ве́дяще, я́ко от Го́спода прии́мете воздая́ние достоя́ния, Го́споду бо Христу́ рабо́таете. А оби́дяй восприи́мет, е́же оби́де, и несть лица́ обинове́ния. Госпо́дие, пра́вду и уравне́ние рабо́м подава́йте, ве́дяще, я́ко и вы и́мате Го́спода на небесе́х.

Кол 3:17–4:1
В среду 22-я недели.