В пятую неделю читается Евангелие от иоанна, гл. 18 и 19, зачала 58-62.

Глава 18.

Зачало 58.

1 (И) сия рек Иисус, изыде со ученики своими на он пол потока кедрска, идеже бе вертоград, в оньже вниде сам и ученицы его:
2 ведяше же [и] иуда предаяй его место, яко множицею собирашеся Иисус ту со ученики своими.
3 иуда убо приемь спиру и от архиерей и фарисей слуги, прииде тамо со светилы и свещами и оружии.
4 Иисус же ведый вся грядущая нань, изшедъ рече им: кого ищете?
5 отвещаша ему: Иисуса назореа. глагола имъ Иисус: аз есмь. Стояше же и иуда, иже предаяше его, с ними.
6 егда же рече им: аз есмь, идоша вспять и падоша на земли.
7 Паки убо вопроси их (Иисусъ): кого ищете? они же реша: Иисуса назореа.
8 отвеща Иисус: рех вам, яко аз есмь: аще убо мене ищете, оставите сих ити:
9 да сбудется слово, еже рече, яко ихже дал еси мне, не погубих от них ни когоже.
10 Симон же петр, имый нож, извлече его, и удари архиереова раба, и уреза ему ухо десное: бе же имя рабу малх.
11 Рече убо Иисус петрови, вонзи нож въ ножницу: чашу, юже даде мне отец, не имамъ ли пити ея,
12 спира же и тысящник и слуги иудейстии яша Иисуса и связаша его,
13 и ведоша его ко анне первее: бе бо тесть каиафе, иже бе архиерей лету тому:
14 бе же каиафа давый совет иудеом, яко уне есть единому человеку умрети за люди.
15 По Иисусе же идяше симон петр и другий ученик: ученик же той бе знаемь архиереови, и вниде со Иисусом во двор архиереов:
16 петр же стояше при дверех вне. Изыде убо ученик той, иже бе знаемь архиереови, и рече двернице, и введе петра.
17 Глагола же раба дверница петрови: еда и ты ученик еси человека сего? Глагола он: несмь.
18 Стояху же раби и слуги огнь сотворше, яко зима бе, и греяхуся: бе же с ними петр стоя и греяся.
19 Архиерей же вопроси Иисуса о ученицехъ его и о учении его.
20 отвеща ему Иисус: аз не обинуяся глаголахъ миру: аз всегда учах на сонмищах и въ церкви, идеже всегда иудее снемлются, и тай не глаголах ничесоже:
21 что мя вопрошаеши? вопроси слышавших, что глаголах им: се, сии ведят, яже рех аз.
22 Сия же рекшу ему, един от предстоящихъ слуг удари в ланиту Иисуса, рек: тако ли отвещаваеши архиереови?
23 отвеща ему Иисус: аще зле глаголах, свидетелствуй о зле: аще ли добре, что мя биеши?
24 Посла же его анна связана к каиафе архиереови.
25 Бе же симон петр стоя и греяся. Реша же ему: еда и ты от ученик его еси? он (же) отвержеся и рече: несмь.
26 Глагола един от раб архиереовых, южика сый, емуже петр уреза ухо: не азъ ли тя видех в вертограде с нимъ?
27 Паки убо петр отвержеся, и абие петель возгласи.
28 (Зачало 59) Ведоша же Иисуса от каиафы в претор. Бе же утро: и тии не внидоша в претор, да не осквернятся, но да ядят пасху.
29 Изыде же пилат к ним вон и рече: кую речь [вину] приносите на человека сего?
30 отвещаша и реша ему: аще не бы (былъ) сей злодей, не быхом предали его тебе.
31 Рече же им пилат: поимите его вы и по закону вашему судите ему. Реша же ему иудее: нам не достоит убити ни когоже:
32 да слово Иисусово сбудется, еже рече, назнаменуя, коею смертию хотяше умрети.
33 Вниде убо паки пилат в претор, и пригласи Иисуса, и рече ему: ты ли еси царь иудейскъ?
34 отвеща ему Иисус: о себе ли ты сие глаголеши, или инии тебе рекоша о мне?
35 отвеща пилат: еда аз жидовин есмь? род твой и архиерее предаша тя мне: что еси сотворилъ?
36 отвеща Иисус: царство мое несть от мира сего: аще от мира сего было бы царство мое, слуги мои (убо) подвизалися быша, да не преданъ бых был иудеом: ныне же царство мое несть отсюду.
37 Рече же ему пилат: убо царь ли еси ты? отвеща Иисус: ты глаголеши, яко царь есмь аз: аз на сие родихся и на сие приидохъ в мир, да свидетелствую истину: (и) всяк, иже есть от истины, послушает гласа моего.
38 Глагола ему пилат: что есть истина? И сие рек, паки изыде ко иудеом, и глагола им: аз ни единыя вины обретаю в нем:
39 есть же обычай вам, да единаго вамъ отпущу на пасху: хощете ли убо, (да) отпущу вам царя иудейска?
40 Возопиша же паки вси, глаголюще: не сего, но варавву. Бе же варавва разбойник.

 

Глава 19.

1 Тогда убо пилат поят Иисуса, и би (его):
2 и воини сплетше венец от терния, возложиша ему на главу, и в ризу багряну облекоша его,
3 и глаголаху: радуйся, царю иудейский. И бияху его по ланитома.
4 Изыде убо паки вон пилат, и глагола им: се, извожду его вам вон, да разумеете, яко в нем ни единыя вины обретаю.
5 Изыде же вон Иисус, нося терновен венецъ и багряну ризу. И глагола им: се, человек.
6 егда же видеша его архиерее и слуги, возопиша глаголюще: (Зачало 60) распни, распни его. Глагола им пилат: поимите его вы, и распните, аз бо не обретаю в нем вины.
7 отвещаша ему иудее: мы закон имамы, и по закону нашему должен есть умрети, яко себе сына божия сотвори.
8 егда убо слыша пилат сие слово, паче убояся,
9 и вниде в претор паки, и глагола Иисусови: откуду еси ты? Иисус же ответа не даде ему.
10 Глагола же ему пилат: мне ли не глаголеши? не веси ли, яко власть имам распяти тя и власть имам пустити тя?
11 отвеща Иисус: не имаши власти ни единыя на мне, аще не бы ти дано свыше: сего ради предавый мя тебе болий грех имать.
12 от сего искаше пилат пустити его. иудее же вопияху, глаголюще: аще сего пустиши, неси друг кесарев: всяк, иже царя себе творит, противится кесарю.
13 Пилат убо слышав сие слово, изведе вон Иисуса и седе на судищи, на месте глаголемемъ [лифостротонъ], еврейски же [гаввафа].
14 Бе же пяток пасце, час же яко шестый. И глагола иудеом: се, царь ваш.
15 они же вопияху: возми, возми, распни его. Глагола им пилат: царя ли вашего распну? отвещаша архиерее: не имамы царя токмо кесаря.
16 Тогда убо предаде его им, да распнется. Поемше же Иисуса и ведоша:
17 и нося крест свои, изыде на глаголемое [лобное место], еже глаголется еврейски [голгофа],
18 идеже пропяша его, и с ним ина два сюду и сюду, посреде же Иисуса.
19 Написа же и титла пилат, и положи на кресте. Бе же написано: Иисус назорянин, царь иудейский.
20 Сего же титла мнози чтоша от иудей, яко близ бе место града, идеже пропяша Иисуса: и бе написано еврейски, гречески, римски.
21 Глаголаху убо пилату архиерее иудейстии: не пиши: царь иудейский: но яко сам рече: царь есмь иудейский.
22 отвеща пилат: еже писах, писах.
23 Воини же, егда пропяша Иисуса, прияша ризы его, и сотвориша четыри части, коемуждо воину часть, и хитон: бе же хитон нешвен, свыше исткан весь.
24 Реша же к себе: не предерем его, но метнем жребия о нем, кому будет: да сбудется писание, глаголющее: разделиша ризы моя себе и о иматисме моей меташа жребия. Воини убо сия сотвориша.
25 (Зачало 61) Стояху же при кресте Иисусове мати его, и сестра матере его, мариа клеопова, и мариа магдалина.
26 Иисус же видев матерь и ученика стояща, егоже любляше, глагола матери своей: жено, се, сын твой.
27 Потом глагола ученику: се, мати твоя. И от того часа поят ю ученик во своя си.
28 Посем ведый Иисус, яко вся уже совершишася, да сбудется писание, глагола: жажду.
29 Сосуд же стояше полн оцта. они же исполнивше губу оцта и на трость вонзше, придеша ко устом его.
30 егда же прият оцет Иисус, рече: совершишася. И преклонь главу, предаде дух.
31 иудее же, понеже пяток бе, да не останутъ на кресте телеса в субботу, бе бо велик день тоя субботы, молиша пилата, да пребиют голени их и возмут.
32 Приидоша же воини, и первому убо пребиша голени, и другому распятому с ним:
33 на Иисуса же пришедше, яко видеша его уже умерша, не пребиша ему голений,
34 но един от воин копием ребра ему прободе, и абие изыде кровь и вода.
35 И видевый свидетелствова, и истинно есть свидетелство его, и той весть, яко истину глаголет, да вы веру имете.
36 Быша бо сия, да сбудется писание: кость не сокрушится от него.
37 И паки другое писание глаголет: воззрятъ нань, егоже прободоша.
38 (Зачало 62) По сих же моли пилата иосиф, иже от аримафеа, сый ученик Иисусов, потаенъ же страха ради иудейска, да возмет тело Иисусово: и повеле пилат. Прииде же и взят тело Иисусово.
39 Прииде же и никодим, пришедый ко Иисусови нощию прежде, нося смешение смирнено и алойно, яко литр сто.
40 Прияста же тело Иисусово, и обвиста е ризами со ароматы, якоже обычай есть иудеомъ погребати.
41 Бе же на месте, идеже распятся, вертъ [вертоградъ], и в верте гроб нов, в немже николиже никтоже положен бе:
42 ту убо пятка ради иудейска, яко близъ бяше гроб, положиста Иисуса.

По прочтении Евангелия: " Слава долготерпению Твоему, Господи!"

Господи, помилуй (3 раза).

Далее 15-й антифон службы Великого пятка "Днесь висит на древе, Иже на водах землю повесивый; венцем от терния облагается, Иже Ангелов Царь; в ложную багряницу облачается, одеваяй небо облаки; заушение прият, Иже во Иордане свободивый Адама; гвоздьми пригвоздися Жених Церковный; копием прободеся Сын Девы. Покланяемся Страстем Твоим, Христе. Покланяемся Страстем Твоим, Христе. Покланяемся Страстем Твоим, Христе. Покажи нам и славное Твое Воскресение."

Сделав 3 земных поклона, прикладываются к Распятию поя или читая: "Разбойника благоразумнаго во едином часе раеви сподобил еси, Господи, и мене древом крестным просвети и спаси мя".

Ныне отпущаеши раба Твоего, Владыко, по глаголу Твоему, с миром; яко видеста очи мои спасение Твое, еже еси уготовал пред лицем всех людей, свет во откровение языков, и славу людей Твоих Израиля.

Трисвятое. Пресвятая Троице... Отче наш...

Священник: Яко Твое есть царство...

Хор: Богородице Дево, радуйся... (земной поклон).

Слава. Крестителю Христов, всех нас помяни, да избавимся от беззаконий наших: тебе бо дадеся благодать молитися за ны. (земной поклон).

И ныне. Молите за ны святии апостоли, святии вси, да избавимся от бед и скорбей: вас бо теплыя предстатели ко Спасу стяжахом. (земной поклон).

Под Твою милость прибегаем, Богородице Дево, молений наших не презри в скорбех, но от бед избави нас, Едина чистая и благословенная. Аминь.

Пресвятая Богородице, спаси нас.... (без поклона).

Далее: Господи, помилуй (40 раз).

Слава, и ныне.

Достойно есть яко воистину блажити Тя Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.

Слава Отцу и Сыну и Святому Духу. И ныне и присно и во веки веков. Аминь.

Господи, помилуй. (Трижды)

Господи, Иисусе Христе, Сыне Божий, молитв ради Пречистыя Твоея Матере, преподобных и богоносных отец наших и всех святых помилуй нас. Аминь.

Затем если пожелаете читаем «Слово о страданиях Спасителя» прп. Ефрема Сирина или церковную проповедь (см. после Слова прп. Ефрема Сирина).

Примечание:
Коленопреклоненно читается молитва из акафиста. /В чинопоследовании пассии после акафиста помещены две молитвы (с. 114-121). Они читаются на четырех пассиях попеременно/

 

И еще, к сведению: в Уставе (Типиконе) нет особых указаний на чтение акафистов в храме и при келейной молитве. Но в общецерковной практике есть правило: в период Великого Поста не принято читать акафисты, кроме Акафиста Божией Матери на 5 седмице (в субботу) и акафиста Страстем Христовым. Во все другие дни года чтение акафистов разрешено.