ЗНАЕТЕ ЛИ ВЫ?

Октоих, глас 7. В среду на утрени.



На стиховне, глас 7.

Влады́ка сы́й Человеколю́бче Жизнода́вче, / искупи́л еси́ Кресто́м Твои́м вселе́нную, // Го́споди, сла́ва Тебе́.

Стих:Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом злая. И при́зри на рабы́ Твоя́, и на дела́ Твоя́, / и наста́ви сы́ны их.

На Кресте́ пригвозди́ся Лоза́ и́стинная, / и обыма́ша язы́цы ра́й с разбо́йником: / сия́ сла́ва церко́вная,/ сие́ бога́тство Ца́рствия. // Пострада́вый на́с ра́ди, Го́споди, сла́ва Тебе́.

Стих:И бу́ди све́тлость Го́спода Бо́га на́шего на нас, и дела́ рук на́ших испра́ви на нас,/ и де́ло рук на́ших испра́ви.

Свети́ла яви́шася вселе́нней / всехва́льнии страстоте́рпцы Христо́вы, вопию́ще: // Го́споди, сла́ва Тебе́.

Сла́ва и ны́не, глас то́йже:

На дре́ве пригвожде́на Тя́ во́лею, / я́ко Всенепоро́чная узре́ пла́чущи // поя́ше держа́ву Твою́.

Октоих, глас 7. В среду вечера.

На Господи воззвах, глас 7.

Богоразу́мия сла́внии апо́столи / ра́лом возде́лавше зе́млю всю́, // ве́рных мно́жество возрасти́сте.

Страсте́й мои́х разруши́те зи́му, / и тишину́ ми возсия́йте, чи́стаго проли́тия, // блаже́ннии апо́столи.

Яко ученицы́ Сло́ва, / от несмы́сльства приведо́сте к ра́зуму Бо́жию // язы́ков собо́ры.

Октоих, глас 7. В среду вечера.

На стиховне, глас 7.

Апо́столи сла́внии, / столпи́ церко́внии, / и́стины пропове́дницы, / свети́ла су́ще све́тлая, / вы́ огне́м духо́вным вся́ку пре́лесть попали́сте, / челове́ческий ро́д ве́рою просвети́сте. / Те́мже мо́лим вы́: / моли́те Спа́са и Бо́га на́шего, // умири́ти ми́р, и спасти́ ду́ши на́ша.

Стих:К Тебе́ возведо́х о́чи мои́ Живу́щему на Небеси́. Се я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, / до́ндеже уще́дрит ны.

Апо́столи Христо́вы, / де́латели Спа́совы, / Крест у́бо я́коже ра́ло на ра́мех нося́ще, / оляде́вшую зе́млю и́дольскою пре́лестию очи́стивше, / и ве́ры сло́во все́ясте: / досто́йно почита́еми есте́ // святи́и Христо́вы апо́столи.

Стих:Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих: / и уничиже́ния го́рдых.

Всехва́льнии му́ченицы, / овча́та духо́вная, / всесожже́ния слове́сная, / же́ртвы прия́тны, благоуго́дны Бо́гови, / ва́с ни земля́ сокры́, но Не́бо прия́т. / Вы́, Ангелом соприча́стницы бы́сте. / С ни́миже моли́те, мо́лим вы́, / Спа́са и Бо́га на́шего, // умири́ти ми́р, и спасти́ ду́ши на́ша.

Сла́ва и ны́не, глас то́йже:

Еди́ну по рождестве́ Пречи́стую Де́ву воспои́м, / я́ко Ма́терь Бо́га Сло́ва, глаго́люще: // сла́ва Тебе́.

Октоих, глас 7. В четверток на утрени.

Ирмосы, песнь 1.

Ма́нием Твои́м на земны́й о́браз преложи́ся, / пре́жде удоборазлива́емое водно́е естество́ Го́споди: / те́мже немо́кренно пешеше́ствовав Изра́иль, // пое́т Тебе́ пе́снь побе́дную.

Песнь 3.

В нача́ле Небеса́, всеси́льным сло́вом Твои́м утвержде́й Го́споди Спа́се, / и вседе́тельным и Бо́жиим Ду́хом, всю́ си́лу и́х: // на недви́жимем мя́ ка́мени испове́дания Твоего́ утверди́.

Песнь 4.

Отча не́дра не оста́вль, / и соше́д на зе́млю Христе́ Бо́же, / та́йну услы́шах смотре́ния Твоего́, // и просла́вих Тя́ Еди́не Человеколю́бче.

Песнь 5.

Го́споди Бо́же мо́й, / от но́щи у́треневав, Тебе́ молю́ся: / пода́ждь ми́ оставле́ние прегреше́ний мои́х: / и к све́ту Твои́х повеле́ний // пути́ моя́ напра́ви, молю́ся.

Песнь 6.

Пла́вающаго в молве́ жите́йских попече́ний, / с корабле́м потопля́ема грехи́, / и душетле́нному зве́рю примета́ема, / я́ко Ио́на Христе́ вопию́ Ти: // из смертоно́сныя глубины́ возведи́ мя.

Песнь 7.

Пе́щь о́троцы огнепа́льну дре́вле росоточа́щу показа́ша, / Еди́наго Бо́га воспева́юще, и глаго́люще: // превозноси́мый отце́в Бо́г и препросла́влен.

Песнь 8.

Неопа́льная огню́ в Сина́и прича́щшаяся купина́ / Бо́га яви́ медленоязы́чному и гугни́вому Моисе́ови, / и о́троки ре́вность Бо́жия / три́ непребори́мыя во огни́ певцы́ показа́: / вся́ дела́ Госпо́дня Го́спода по́йте, // и превозноси́те во вся́ ве́ки.

Песнь 9.

Нетле́ния искуше́нием ро́ждшая, / и Всехитрецу́ Сло́ву пло́ть взаимода́вшая, / Ма́ти Неискусому́жная Де́во Богоро́дице: / прия́телище Нестерпи́маго, / село́ Невмести́маго Зижди́теля Твоего́, // Тя́ велича́ем.

Октоих, глас 7. В четверток на утрени.

На стиховне, глас 7.

Апо́столи сла́внии, / столпи́ Церко́внии, / и́стины пропове́дницы, / свети́ла су́ще све́тлая, / вы́ огне́м духо́вным вся́ку пре́лесть попали́сте, / челове́ческий же ро́д просвети́сте. / Те́мже мо́лим вы́: / моли́те Спа́са и Бо́га на́шего, // умири́ти ми́р, и спасти́ ду́ши на́ша.

Стих:Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом злая. И при́зри на рабы́ Твоя́, и на дела́ Твоя́,/ и наста́ви сы́ны их.

Апо́столи Христо́вы, / де́латели Спа́совы, / Крест бо я́ко ра́ло на ра́мех нося́ще, / оляде́вшую зе́млю от и́дольския ле́сти очи́стивше, / и ве́ры сло́во все́ясте: / вои́стинну досто́йно нарица́етеся святи́и // Христо́вы апо́столи.

Стих:И бу́ди све́тлость Го́спода Бо́га на́шего на нас, и дела́ рук на́ших испра́ви на нас,/ и де́ло рук на́ших испра́ви.

Еди́но ды́шуще, / и на еди́но взира́юще страстоте́рпцы му́ченицы, / еди́н пу́ть живота́ обре́тше, / е́же за Христа́ сме́рть ревну́юще дру́г дру́га кончи́не: / оле чудесе́! / я́ко сокро́вища му́ки предвосхища́юще, / дру́г ко дру́гу глаго́лаху: / я́ко а́ще не ны́не у́мрем, у́мрем же вся́ко, / и бытию́ до́лжная послу́жим: / сотвори́м ну́жду любоче́стием, / о́бщее свое́ да вмени́м, / сме́ртию живо́т ку́пим. // Моли́твами и́х, Бо́же, поми́луй на́с.

Сла́ва и ны́не, глас то́йже:

Роди́лся еси́ от Де́вы несказа́нно Христе́, / и просвети́л еси́ су́щия во тьме́, вопию́щия: // Го́споди сла́ва Тебе́.

Октоих, глас 7. В четверток вечера.

На Господи воззвах, глас 7.

Да челове́ка Бо́га соде́лаеши, / челове́к бы́л еси́ Преблаги́й Христе́, и распя́лся еси́: // сла́ва си́ле Твое́й.

Егда́ на Крест Тя́ Иису́се, / со́нм евре́йский осуди́, // земля́ тряса́шеся, и со́лнца све́т скрыва́шеся.

Те́рнием Тя́ Безсме́ртне, / венча́ собо́р беззако́нный, // пре́лести те́рние из ко́рене секу́ща, Царю́ Святы́й.

Октоих, глас 7. В четверг вечера.

На стиховне, глас 7.

Не ктому́ возбраня́еми есмы́ дре́ва живо́тнаго, / упова́ние иму́ще Крест Тво́й: // Го́споди, сла́ва Тебе́.

Стих:К Тебе́ возведо́х о́чи мои́ Живу́щему на Небеси́. Се я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, / до́ндеже уще́дрит ны.

Пове́шен бы́в Безсме́ртне на дре́ве, / сокруши́л еси́ вся́ се́ти диа́воли: // Го́споди, сла́ва Тебе́.

Стих:Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих: / и уничиже́ния го́рдых.

Сла́ва Тебе́ Христе́ Бо́же, / апо́столов похвала́, и му́чеников весе́лие: // и́хже про́поведь Тро́ица Единосу́щная.

Сла́ва и ны́не, глас то́йже:

На дре́ве пригвожде́нна Тя́ во́лею, / Всенепоро́чная, я́ко ви́де, пла́чущи // поя́ше держа́ву Твою́.

Октоих, глас 7. В пяток на утрени.

Ирмосы, глас 7.

Песнь 1.

Истря́сшему Бо́гу фарао́на в мо́ри Чермне́м, / пе́снь побе́дную пои́м, // я́ко просла́вися.

Песнь 3.

Утверди́ся ве́рою Христо́ва Це́рковь, / и́бо непреста́нно пе́сньми вопие́т пою́щи: // Свя́т еси́ Го́споди, и Тя́ пое́т ду́х мо́й.

Песнь 4.

Услы́шах слу́х Тво́й, и убоя́хся: / разуме́х дела́ Твоя́, // и ужасо́хся Го́споди.

Песнь 5.

Утренюет ду́х мо́й к Тебе́, Бо́же: / зане́ Све́т еси́, / и Твоя́ повеле́ния бы́ша исцеле́ния рабо́м Твои́м, // Человеколю́бче.

Песнь 6.

Ио́на из чре́ва а́дова вопия́ше: / возведи́ от тли́ живо́т мо́й. / Мы́ же Тебе́ вопие́м: // Всеси́льне Спа́се, поми́луй на́с.

Песнь 7.

Пе́щь о́троцы огнепа́льну / дре́вле росоточа́щу показа́ша, / Еди́наго Бо́га воспева́юще, и глаго́люще: // Превозноси́мый отце́в Бо́г, и Препросла́влен.

Песнь 8.

Еди́наго Безнача́льнаго Царя́ сла́вы, / Его́же благословя́т Небе́сныя Си́лы, / и трепе́щут чи́ни Ангельстии, / по́йте свяще́нницы, // лю́дие превозноси́те его́ во ве́ки.

Песнь 9.

Всепе́тая Небе́с превы́шшая, / Безнача́льное Сло́во безсе́менно заче́ншая, / и воплоще́ннаго Бо́га ро́ждшая челове́ком: // те́м Тя́ вси́ велича́ем.

Октоих, глас 7. В пяток на утрени.

На стиховне, глас 7.

Влады́ко сы́й Человеколю́бче Жизнода́вче, / искупи́л еси́ Кресто́м Твои́м вселе́нную, // Го́споди, сла́ва Тебе́.

Стих:Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом злая. И при́зри на рабы́ Твоя́, и на дела́ Твоя́,/ и наста́ви сы́ны их.

На Кресте́ пригвозди́ся Лоза́ и́стинная, / обыма́ша язы́цы ра́й с разбо́йником: / сия́ сла́ва Церко́вная, / сие́ бога́тство Ца́рствия. // Пострада́вый на́с ра́ди, Го́споди, сла́ва Тебе́.

Стих:И бу́ди све́тлость Го́спода Бо́га на́шего на нас, и дела́ рук на́ших испра́ви на нас,/ и де́ло рук на́ших испра́ви.

Па́мять святы́х Твои́х страстоте́рпец пра́зднующе, / Тебе́ пое́м Христе́, вопию́ще, // Го́споди, сла́ва Тебе́.

Сла́ва и ны́не, глас то́йже:

Своего́ Сы́на на дре́ве ви́дящи дре́вле, / се́рдце Свое́ ору́жием печа́ли // уязвля́ше Пречи́стая.

Октоих, глас 7. В пято́к ве́чера.

На стиховне стихи́ры му́чеником

с " Го́споди воззва́х"

Спа́се, не постыди́ мене́, / егда́ прии́деши суди́ти ми́ру всему́, // сту́дная дела́ сотво́ршаго.

Стих:К Тебе́ возведо́х о́чи мои́ Живу́щему на Небеси́. Се я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему,/ до́ндеже уще́дрит ны.

Сла́ва тебе́ Христе́ Бо́же, апо́столов похвало́: / и му́чеников весе́лие: // и́хже про́поведь, Тро́ица Единосу́щная.

Стих:Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих:/ и уничиже́ния го́рдых.

Святи́и му́ченицы, / и́же до́бре страда́вше, и венча́вшеся, / моли́теся ко Го́споду, // спасти́ся душа́м на́шим.

Сла́ва и ны́не, глас тойже:

Ма́ти у́бо позна́лася еси́, / па́че естества́ Богоро́дице, / пребыла́ же еси́ Де́ва, / па́че сло́ва и ра́зума, / и чудесе́ рождества́ Твоего́ сказа́ти язы́к не мо́жет. / Пресла́вну бо су́щу зача́тию Чи́стая, / непости́жен е́сть о́браз рожде́ния: / иде́же бо хо́щет Бо́г, побежда́ется естества́ чи́н. / Те́мже Тя́ вси́ Ма́терь Бо́жию ве́дуще, / мо́лим Ти ся приле́жно: // моли́ спасти́ся душа́м на́шим.

Октоих, глас 7. В пято́к ве́чера.

Аще ЗАУПОКОЙНАЯ СЛУЖБА

На стихо́вне стихи́ры му́ченичны, гла́с 7:

Неради́вше о все́х земны́х, святи́и му́ченицы, / и на суди́щи Христа́ му́жески пропове́давше, / воздая́ние му́к от Него́ прия́сте: / но я́ко иму́ще дерзнове́ние, / Того́ умоли́те я́ко Бо́га Всеси́льна, / ду́ши на́ша спасти́, // прибега́ющия к ва́м, мо́лимся.

Всехва́льнии му́ченицы, / овча́та духо́вная, всесожже́ния слове́сная, / же́ртва прия́тна благоуго́дна Бо́гу,/ ва́с ни земля́ потаи́ла е́сть, но Не́бо прия́т вы́, / Ангелом соприча́стницы бы́сте. / С ни́миже моли́те, мо́лим вы́, / Спа́са и Бо́га на́шего, // умири́ти ми́р, и спасти́ ду́ши на́ша.

Сти́х: Блаже́ни, я́же избра́л/ и прия́л еси́ Го́споди.

Ме́ртвен: По о́бразу Твоему́ и по подо́бию созда́вый Го́споди, / испе́рва челове́ка, / и в раи́ поста́вил еси́ владе́ти Твои́ми творе́нии: / за́вистию же диа́волею прельще́н бы́в, я́ди причасти́ся. / За́поведей Твои́х престу́пник бы́в. / Те́мже па́ки в зе́млю, от нея́же взя́т бы́сть, / осуди́ его́ возврати́тися Го́споди, // и испроси́ти поко́й.

Сти́х: Ду́ши и́х/ во благи́х водворя́тся.

Ме́ртвен: Упоко́й Спа́се на́ш, Жизнода́вче, / я́же преста́вил еси́ бра́тию на́шу от вре́менных, зову́щия: // Го́споди, сла́ва Тебе́.

Сла́ва, и ны́не, глас тойже:

Яже Еди́на Невмести́маго прие́мши, / и ро́ждши Бо́га Сло́ва воплоще́нна, // моли́ спасти́ся душа́м на́шим.

Октоих, глас 7. В суббо́ту у́тра.

Катава́сия му́ченичного кано́на, гла́с 7:

Пе́снь 3.

Небеса́ утверди́вый сло́вом, / и земно́е основа́ние укрепи́вый на вода́х мно́гих, // утверди́ мо́й у́м в во́лю Твою́, Человеколю́бче.

Пе́снь 6.

Ио́на из чре́ва а́дова вопия́ше: / возведи́ от тли́ живо́т мо́й. / Мы́ же Тебе́ вопие́м: // Всеси́льне Спа́се, поми́луй на́с.

Пе́снь 8.

В пещи́ о́троки подража́юще, / духо́вную ро́су прие́мшии, ве́рою зове́м: // благослови́те дела́ Госпо́дня Го́спода.

Пе́снь 9.

Па́че естества́ Ма́терь, / и по естеству́ Де́ву, / Еди́ну в жена́х Благослове́нную, // пе́сньми ве́рнии Богоро́дицу велича́ем.





Последнее изменение этой страницы: 2016-04-07; Нарушение авторского права страницы

infopedia.su Все материалы представленные на сайте исключительно с целью ознакомления читателями и не преследуют коммерческих целей или нарушение авторских прав. Обратная связь - 54.85.57.0 (0.013 с.)