Октоих, глас 4. Во вторник утра. Ирмосы.

Песнь 1. Порази́вый Еги́пта / и фарао́на мучи́теля погрузи́вый в мо́ри, / лю́ди спа́сл еси́ из рабо́ты, / Моисе́йски пою́щия пе́снь побе́дную, // я́ко просла́вися.

Песнь 3. Утвержда́яй гро́м, и созида́яй ду́х, / утверди́ мене́, Го́споди, / да Тя́ пою́ и́стинно, / и творю́ во́лю Твою́,// я́ко не́сть свя́т, я́ко Ты, Бо́же на́ш.

Песнь 4. Услы́шах Бо́же, слу́х Тво́й и убоя́хся, / разуме́х дела́ Твоя́, и ужасо́хся, Го́споди, // я́ко Твоего хвале́ния испо́лнь земля́.

Песнь 5. Возсия́й ми́, Го́споди, све́т повеле́ний Твои́х,/ я́ко к Тебе́ ду́х мо́й у́тренюет и пое́т Тя́: / Ты́ бо еси́ Бо́г на́ш, // и к Тебе́ прибега́ю Царю́ ми́ра.

Песнь 6. Пучи́ною жите́йскою / дея́ньми мои́ми снидо́х во а́д, / но, я́ко от ки́та Ио́на, та́ко вопию́: / из глубины́ зо́л возведи́, молю́ся, // Сы́не Бо́жий и Сло́ве.

Песнь 7. Образу злато́му не поклони́вшеся, о́троцы авраа́мстии / искуша́хуся, я́ко зла́то в горни́ле, / в пещи́ о́гненней, я́ко в черто́зе све́тлем, / ликова́ху, пою́ще: // благослове́н еси́, Бо́же оте́ц на́ших.

Песнь 8. Во огни́ пла́меннем предстоя́т Тебе́ / Херуви́ми, Серафи́ми, Го́споди, / и вся́ тва́рь пе́снь Тебе́ пое́т кра́сную: / по́йте, благослови́те, лю́дие, превозноси́те Христа́, // Еди́наго Соде́теля, во вся́ ве́ки.

Песнь 9. Сотвори́ держа́ву мы́шцею Свое́ю, / низложи́ бо си́льныя со престо́л / и вознесе́ смире́нныя Бо́г Изра́илев. / В ни́хже посети́ на́с Восто́к с высоты́ // и напра́вил ны́ е́сть на пу́ть ми́ра.

Октоих, глас 4.

Во вторник на утрени.

На стиховне, глас 4.

 

Омы́й мя́ слеза́ми мои́ми Спа́се, / я́ко оскверни́хся мно́гими грехи́. / Те́мже и припа́даю Ти́: // согреши́х, Бо́же, и поми́луй мя́.

Стих: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом злая. И при́зри на рабы́ Твоя́, и на дела Твоя́, / и наста́ви сы́ны их.

Овча́ е́смь слове́снаго Твоего́ ста́да, / и к Тебе́ прибега́ю Па́стырю до́брому, / взыщи́ мене́ заблу́ждшаго, Бо́же, // и поми́луй мя́.

 

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас, / и де́ло рук на́ших испра́ви.

 

Ангелом соприча́стницы бы́сте святи́и му́ченицы, / на суди́щи, Христа, му́жески пропове́давше: / вся́ бо я́же в ми́ре оста́висте кра́сная, я́ко не су́ща, / ве́ру же я́ко наде́жду тве́рду удержа́сте. / Те́мже и ле́сть отгна́вше, / источа́ете ве́рным исцеле́ний дарова́ния, / непреста́нно моля́щеся, // спасти́ся душа́м на́шим.

 

Сла́ва и ны́не, глас то́йже:

 

От все́х бе́д рабы́ Твоя́ сохраня́й, / Благослове́нная Богоро́дице: // да Тя́ сла́вим, Наде́жду ду́ш на́ших.

Октоих, глас 4.

Во вторник вечера.

На Господи воззвах, глас 4.

 

На Крест воздвиза́емь, / и копие́м пробода́емь, / и пе́рсты окровавля́емь Влады́ко, / свобожде́ние подписа́л еси́ на́м Преблаги́й, / и рукописа́ние Ада́ма прароди́теля растерза́в, / свободи́л еси́ челове́ческое существо́. / Сего́ ра́ди воспева́ем Ще́дре, // ю́же па́че ума́ Твою́ благосты́ню.

Воспева́ем Твоя́ страда́ния Влады́ко Иису́се: / Крест, копие́ же и тро́сть, / гу́бу и гво́здия, / бие́ния, багряни́цу, и вене́ц от те́рния, / оплева́ния же и поруга́ния, / я́же претерпе́л еси́ во́лею. / Велича́ю Твое́ незло́биве Еди́не Жизнода́вче долготерпе́ние, // и ве́рою славосло́влю Тя́ Человеколю́бче.

Кресту́ Твоему́ Честно́му, / покланя́юся, Преблаги́й, любо́вию облобыза́я, / и сла́влю Твое́ е́же па́че ума́ соше́ствие, / безме́рную ми́лость и неизрече́нныя щедро́ты, / и бога́тую благосты́ню, / ея́же ра́ди спа́сл еси́ челове́ческое естество́, / содержи́мо бы́вшее во тьме́ прегреше́ний. // Сла́ва Христе́ распя́тию Твоему́.

 

 

Октоих, глас 4.

Во вторник вечера.

На стиховне, глас 4.

 

Ору́жие непобеди́мое Христе́, / Крест Тво́й да́л еси́ на́м: // и си́м побежда́ем прило́ги чужда́го.

 

Стѝх: К Тебѐ возведо̀х о̀чи моѝ, живу̀щему на Небесѝ. Сѐ я̀ко о̀чи раб в руку̀ госпо̀дий своѝх, я̀ко о̀чи рабы̀ни в руку̀ госпожѝ своея̀: та̀ко о̀чи на̀ши ко Го̀споду Бо̀гу на̀шему, / до̀ндеже ущѐдрит ны̀.

 

Всегда́ иму́ще Христе́, / Крест Тво́й на по́мощь, // се́ти вра́жия удо́бь попира́ем.

 

Стѝх: П омѝлуй на̀с, Го̀споди, помѝлуй на̀с, я̀ко по мно̀гу испо̀лнихомся уничижѐния: наипа̀че напо̀лнися душа̀ на̀ша поношѐния гобзу̀ющих / и уничижѐния го̀рдых.

 

Иму́ще дерзнове́ние ко Спа́су святи́и, / моли́те непреста́нно за ны́ гре́шныя, / оставле́ние прегреше́ний прося́ще, // и душа́м на́шим ве́лию ми́лость.

 

Сла́ва и ны́не, глас то́йже:

 

Распина́ема Христа́ Человеколю́бца ви́дящи Пречи́стая, / и ре́бра ископова́ема копие́м, / пла́чущи вопия́ше: / что́ сие́ Сы́не Мо́й? / Что́ Ти́ безблагода́тнии лю́дие возда́ша, / за я́же сотвори́л еси́ до́брая и́м, / и тщи́шися безча́дствовати Мя́ Вселюбе́знейший? // Удивля́юся Благоутро́бне, Твоему́ во́льному распя́тию.

 

 

 

В среду на утрени.

Канон Октоиха в среду совпадает с воскресным "Моря чермную пучину"

На стиховне, глас 4.

Стена́ бу́ди на́м Крест Тво́й, Иису́се Спа́се на́ш: ино́го бо упова́ния ве́рнии не и́мамы, / то́чию Тебе́ на не́м пло́тию пригво́ждшагося, // и подаю́ща на́м ве́лию ми́лость.

 

Стѝх: И спо̀лнихомся зау̀тра мѝлости Твоея̀ Го̀споди, и возра̀довахомся, и возвеселѝхомся, во вся̀ днѝ на̀ша возвеселѝхомся, за днѝ в ня̀же смирѝл ны̀ есѝ, лета, в ня̀же вѝдехом зла̀я, и прѝзри на рабы̀ Твоя̀, и на дела̀ Твоя̀, / и наста̀ви сы̀ны ѝх.

Да́л еси́ зна́мение / боя́щимся Тебе́ Го́споди, / Крест Тво́й Честны́й, / и́мже посрами́л еси́ нача́ла тьмы́ и вла́сти, / и возве́л еси́ на́с на пе́рвое блаже́нство. / Те́мже Твое́ Человеколю́бное смотре́ние сла́вим, / Иису́се Всеси́льне, // Спа́се ду́ш на́ших.

 

Стѝх: И бу̀ди свѐтлость Го̀спода Бо̀га на̀шего на на̀с, и дела̀ ру̀к на̀ших испра̀ви на на̀с, / и дѐло ру̀к на̀ших испра̀ви.

 

Ка́ко ва́шим не удиви́мся подвиго́м, святи́и му́ченицы, / я́ко те́лом умира́ющим обложе́ни, / безпло́тныя враги́ победи́сте? / Не устраши́ша ва́с мучи́тельская преще́ния, / не ужаси́ша ва́с му́к приложе́ния: / вои́стинну досто́йно от Христа́ просла́вистеся,// и душа́м на́шим проси́те ве́лия ми́лости.

Сла́ва и ны́не, глас то́йже:

Умерщвля́ема ви́дящи Христа́, Пречи́стая Влады́чица, / умерщвля́юща льсти́ваго, / восклица́ше го́рце взыва́ющи, / из утро́бы Тоя́ произше́дшему, / и долготерпе́нию Его́ чудя́щися взыва́ше: / Ча́до Мое́ любе́знейшее, / не забу́ди Рабу́ Твою́, // не закосни́ Человеколю́бче, Мое́ утеше́ние.

Октоих, глас 4.

В среду вечера.

На Господи воззвах, глас 4.

 

Крепча́йшим мудрова́нием во́инствовавше сла́внии,/ на лука́ваго врага́ ополчи́стеся, / всеору́жием огра́ждшеся духо́вным до́блественне: / и всю́ кре́пость бесо́вскую погуби́вше, / восхи́тивше ду́ши челове́ческия я́коже коры́сти: // сего́ ра́ди во ве́ки ва́с почита́ем, апо́столи.

Крестообра́зно распросте́рши мре́жу ве́ры, / двоенадеся́тица Боже́ственных апо́стол Твои́х, / вся́ язы́ки улови́ла е́сть к Твоему́ позна́нию Христе́: / и мо́ре сла́ное страсте́й изсуши́. / Сего́ ра́ди Тя́ молю́, / из глубины́ прегреше́ний воззови́ мя, // те́х всеблагоприя́тными мольба́ми.

Двоенадеся́тица Богоизбра́нная, / апо́стольская и всечестна́я, / да восхва́лится дне́сь Боже́ственными пе́сньми: / Пе́тр, и Па́вел, Иа́ков: / Лука́, Иоа́нн же и Матфе́й, и Фома́: / Ма́рк, Си́мон, и Фили́пп: / и пресла́вный ны́не Андре́й с Матфи́ем, / и Боже́ственным и прему́дрым Варфоломе́ем, // и с про́чими седми́десятьми.

 

Октоих, глас 4.

В среду вечера.

На стиховне, глас 4.

 

Апо́стольский ли́к Ду́хом Святы́м просвети́л еси́ Христе́, / и на́шу скве́рну грехо́вную те́ми омы́й Бо́же,// и поми́луй на́с.

 

Стѝх: К Тебѐ возведо̀х о̀чи моѝ, живу̀щему на Небесѝ. Сѐ я̀ко о̀чи раб в руку̀ госпо̀дий своѝх, я̀ко о̀чи рабы̀ни в руку̀ госпожѝ своея̀: та̀ко о̀чи на̀ши ко Го̀споду Бо̀гу на̀шему, / до̀ндеже ущѐдрит ны̀.

 

Некни́жныя ученики́ Ду́х Тво́й Святы́й / каза́тели яви́ Христе́ Бо́же, / и многовеща́нным сли́чием язы́ков пре́лесть упраздни́, // я́ко Всеси́лен.

 

Стѝх: К Тебѐ возведо̀х о̀чи моѝ, живу̀щему на Небесѝ. Сѐ я̀ко о̀чи раб в руку̀ госпо̀дий своѝх, я̀ко о̀чи рабы̀ни в руку̀ госпожѝ своея̀: та̀ко о̀чи на̀ши ко Го̀споду Бо̀гу на̀шему, / до̀ндеже ущѐдрит ны̀.

 

Же́ртвы одушевле́нныя, / всесожже́ния слове́сная, / му́ченицы Госпо́дни, / заколе́ния соверше́нная Бо́жия, / Бо́га зна́ющая, и Богом зна́емая овча́та, / и́хже огра́да волко́м невхо́дна: / моли́теся и на́м упасе́ным бы́ти с ва́ми, // на воде́ упокое́ния.

 

Сла́ва и ны́не, глас то́йже:

 

Изба́ви ны́ от ну́жд на́ших, / Ма́ти Христа́ Бо́га, / ро́ждшая все́х Творца́, / да вси́ зове́м Ти́: // ра́дуйся Еди́но предста́тельство ду́ш на́ших.

 

Октоих, глас 4.

В четверток на утрени.

Канон Октоиха в четверток совпадает с воскресным "Моря чермную пучину"

На стиховне, глас 4.

 

Апо́стольский ли́к Ду́хом Святы́м просвети́л еси́ Христе́, / и на́шу скве́рну грехо́вную, тех ра́ди омы́й Бо́же, // и поми́луй на́с.

 

Стѝх: И спо̀лнихомся зау̀тра мѝлости Твоея̀ Го̀споди, и возра̀довахомся, и возвеселѝхомся, во вся̀ днѝ на̀ша возвеселѝхомся, за днѝ в ня̀же смирѝл ны̀ есѝ, лета, в ня̀же вѝдехом зла̀я, и прѝзри на рабы̀ Твоя̀, и на дела̀ Твоя̀, / и наста̀ви сы̀ны ѝх.

Некни́жныя ученики́ Ду́х Тво́й Святы́й / каза́тели яви́ Христе́ Бо́же, / и многовеща́нным сли́чием язы́ков пре́лесть упраздни́, // я́ко Всеси́лен.

Стѝх: И бу̀ди свѐтлость Го̀спода Бо̀га на̀шего на на̀с, и дела̀ ру̀к на̀ших испра̀ви на на̀с, / и дѐло ру̀к на̀ших испра̀ви.

 

Честна́ сме́рть святы́х Твои́х Го́споди: / меча́ми бо и огне́м, и сту́дению сокруша́еми, / излия́ша кро́вь свою́, наде́жду иму́ще на Тя́, / восприя́ти трудо́в мзду́:// претерпе́ша, и прия́ша от Тебе́ Спа́се ве́лию ми́лость.

 

Сла́ва и ны́не, глас то́йже:

 

Тя́ сте́ну стяжа́хом Богоро́дице Пречи́стая, / и благоути́шное приста́нище, и утвержде́ние. / Те́мже молю́ся, и́же в житии́ обурева́емь, // окорми́, и спаси́ мя.

 

 

Октоих, глас 4.

В четверток вечера.

На Господи воззвах, глас 4.

 

Егда́ Тя распина́ема тва́рь вся́ ви́де, / изменя́шеся и трепета́ше: / земля́ же трясу́щися вся́ колеба́шеся, / Долготерпели́ве Сло́ве, / и заве́са церко́вная стра́хом раздира́шеся, досажда́ему Тебе́, / и ка́мение распада́шеся от стра́ха, / и со́лнце лучи́ скры́, // Творца́ своего́ ве́дущи Тя́.

Ка́ко беззако́ннейший собо́р дерзну́ осуди́ти Тя,́ / Судию́ Безсме́ртнаго, / зако́н да́вшаго в пусты́ни дре́вле Моисе́ю Богови́дцу? / Ка́ко жи́знь вся́ческих на дре́ве зря́ще уме́ршую, / ника́коже убоя́шася, / ниже́ во уме́ помышля́ху, // я́ко Ты́ Еди́н Госпо́дь и Влады́ка тва́ри.

Растерза́ется рукописа́ние, / е́же от ве́ка Ада́ма пра́отца, / прободе́нием Твои́х ре́бр Многоми́лостиве, / и отринове́ное естество́ челове́ческое / кропле́нием кро́ве Твоея́ освяти́ся, зову́щее: / сла́ва благоутро́бию Твоему́, / сла́ва Боже́ственному распя́тию Твоему́, // Иису́се Всеси́льне, Спа́се ду́ш на́ших.

 

Октоих, глас 4.

В четверток вечера.

На стиховне, глас 4.

 

Ору́жие непобеди́мое Христе́, / Крест Тво́й на́м да́л еси́, // и си́м побежда́ем прило́ги чужда́го.

 

Стѝх: К Тебѐ возведо̀х о̀чи моѝ, живу̀щему на Небесѝ. Сѐ я̀ко о̀чи раб в руку̀ госпо̀дий своѝх, я̀ко о̀чи рабы̀ни в руку̀ госпожѝ своея̀: та̀ко о̀чи на̀ши ко Го̀споду Бо̀гу на̀шему, / до̀ндеже ущѐдрит ны̀.

 

Всегда́ иму́ще Христе́ / Крест Тво́й на по́мощь, // се́ти вра́жия удо́бне попира́ем.

 

Стѝх: П омѝлуй на̀с, Го̀споди, помѝлуй на̀с, я̀ко по мно̀гу испо̀лнихомся уничижѐния: наипа̀че напо̀лнися душа̀ на̀ша поношѐния гобзу̀ющих / и уничижѐния го̀рдых.

 

Прославля́яйся в па́мятех святы́х Твои́х Христе́ Бо́же, / и от ни́х умоле́н быва́я, // низпосли́ на́м ве́лию ми́лость.

 

Сла́ва и ны́не, глас то́йже:

 

Не рыда́й Мене́ Ма́ти, / зря́щи на дре́ве ви́сяща / Твоего́ Сы́на и Бо́га, / на вода́х пове́сившаго зе́млю неодержи́мо, / и всю́ тва́рь созда́вшаго: / и́бо воста́ну и просла́влюся, / и а́дова ца́рствия сокрушу́ кре́постию, / и потреблю́ его́ всю́ си́лу, / и у́зники изба́влю от злоде́йства его́, я́ко Милосе́рд: // и Отцу́ Моему́ приведу́, я́ко Человеколю́бец.