Октоих, глас 3. В пяток на утрени. Ирмосы.

Сопадают со Сретением

Песнь 1.

Су́шу глубороди́тельную зе́млю / со́лнце наше́ствова иногда́: / я́ко стена́ бо, огусте́ обапо́лы вода́, / лю́дем пешемореходя́щим и Богоуго́дно пою́щим: // пои́м Го́сподеви, сла́вно бо просла́вися.

Песнь 3.

Утвержде́ние на Тя́ наде́ющихся, / утверди́, Го́споди, Це́рковь, / ю́же стяжа́л еси́ // Честно́ю Твое́ю Кро́вию.

Песнь 4.

Покры́ла е́сть Небеса́ доброде́тель Твоя́, Христе́, / из Киво́та бо проше́д святы́ни, Твоея́ Нетле́нныя Ма́тере, / в хра́ме Сла́вы Твоея́ яви́лся еси, я́ко Младе́нец руконоси́мь,// и испо́лнишася вся́ Твоего́ хвале́ния.

Песнь 5.

Яко ви́де Иса́ия обра́зно / на Престо́ле превознесе́на Бо́га, / от Ангел Сла́вы дориноси́ма, / о, окая́нный, – вопия́ше, – а́з! / прови́дех бо воплоща́ема Бо́га, Све́та Невече́рня, // и ми́ром влады́чествующа.

Песнь 6.

Возопи́ к Тебе́, ви́дев ста́рец очи́ма спасе́ние, / е́же лю́дем прии́де от Бо́га: // Христе́, Ты́ – Бо́г мо́й.

Песнь 7.

Тебе́ во огни́ ороси́вшаго о́троки Богосло́вившия, / и в Де́ву нетле́нну все́льшагося, Бо́га Сло́ва пои́м, / благоче́стно пою́ще: // благослове́н Бо́г оте́ц на́ших.

Песнь 8.

Нестерпи́мому огню́ соедини́вшеся, / Богоче́стия предстоя́ще, ю́ноши, / пла́менем же неврежде́ни, / Боже́ственную пе́снь поя́ху: / благослови́те, вся́ дела́ Госпо́дня, Го́спода, // и превозноси́те во вся́ ве́ки.

Песнь 9.

В зако́не се́ни и писа́ний / о́браз ви́дим ве́рнии: / вся́к му́жеский по́л, ложесна́ разверза́я, / свя́т Бо́гу. /Те́м Перворожде́нное Сло́во / Отца́ Безнача́льна, / Сы́на, первородя́щася Ма́терию неискусому́жно, // велича́ем.

Октоих, глас 3. В пяток на утрени.

На стиховне, глас 3.

Дре́во преслуша́ния ми́ру сме́рть прозябе́, / дре́во же Кре́стное живо́т и нетле́ние. / Те́мже Тебе́ мо́лим распе́ншагося Го́спода, // да зна́менается на на́с све́т лица́ Твоего́.

Стих: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом злая. И при́зри на рабы́ Твоя́, и на дела́ Твоя́, / и наста́ви сы́ны их.

За́вистию от пи́щи изгна́н бы́х, / паде́нием падо́хся лю́тым: / но не презре́в Влады́ко, / и восприе́м мене́ ра́ди е́же по мне́ распя́тие Твое́, / и спаса́еши мя́, и в сла́ву вво́диши, // Изба́вителю мо́й, сла́ва Тебе́.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас, / и де́ло рук на́ших испра́ви.

Святы́х страстоте́рпец па́мять, / прииди́те лю́дие, вси́ почти́м, / я́ко позо́р бы́вше Ангелом и челове́ком, / побе́ды венцы́ от Христа́ прия́ша, // и мо́лятся о душа́х на́ших.

Сла́ва и ны́не, глас то́йже:

Зря́щи из Тебе́ рожде́ннаго, Всенепоро́чная, / пове́шена на Дре́ве, восклица́ше вопию́щи: / Сла́дкое Мое́ Ча́до, / где́ Твоя́ за́йде добро́та светоно́сная, // добро́ сотвори́вшаго ро́ду челове́ческому?

Октоих, глас 3. В пято́к ве́чера.

На стиховне стихи́ры му́ченичны с "Го́споди воззва́х"

 

Ве́лия Креста́ Твоего́ Го́споди си́ла: / водрузи́ся бо на ме́сте, и де́йствует в ми́ре, / и показа́ от ры́барей апо́столы, / и от язы́к му́ченики, // да мо́лятся о душа́х на́ших.

Стих: К Тебе́ возведо́х о́чи мои́ Живу́щему на Небеси́. Се я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, / до́ндеже уще́дрит ны.

Ве́лия му́ченик Твои́х Христе́ си́ла: / во гробе́х бо лежа́ще ду́хи прого́нят: / и упраздни́ша вра́жию вла́сть, // ве́рою Тро́ическою подви́гшеся по благоче́стии.

Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих: / и уничиже́ния го́рдых.

Проро́цы, и апо́столи Христо́вы, и му́ченицы, / научи́ша ны́ пе́ти Тро́ицу Единосу́щную, / и просвети́ша язы́ки прельще́ныя, // и прича́стники, Ангелом сотвори́ша сы́ны челове́ческия.

Сла́ва, и ны́не, глас тойже:

Ка́ко не диви́мся / Богому́жному Рождеству́ Твоему́, Пречестна́я? / Искуше́ния бо му́жескаго не прии́мши Всенепоро́чная, / родила́ еси́ без отца́ Сы́на пло́тию, / пре́жде ве́к от Отца́ рожде́ннаго без ма́тере, / ника́коже претерпе́вшаго измене́ния, / или́ смеше́ния, или́ разделе́ния: / но обою́ существу́ сво́йство це́ло сохра́ншаго. / Те́мже Ма́ти Де́во Влады́чице, / Того́ моли́ спасти́ся душа́м, // правосла́вно Богоро́дицу испове́дающих Тя́.

Октоих, глас 3. В пято́к ве́чера.

На стихо́вне стихи́ры му́ченичны, гла́с 3:

Му́ченицы Твои́ Го́споди / ве́рою утверди́вшеся, / и наде́ждею укре́пльшеся, / любо́вию Креста́ Твоего́ душе́вне соедини́вшеся, / вра́жие мучи́тельство разруши́ша, / и улучи́ша венцы́: // со Безпло́тными мо́лятся о душа́х на́ших.

Сти́х: Блаже́ни, я́же избра́л / и прия́л еси́ Го́споди.

Ме́ртвен: Все́ су́етие челове́ческое, / ели́ко не пребу́дет по сме́рти: / не пребу́дет бога́тство, / ни сни́дет сла́ва: / наше́дши бо сме́рть, вся́ сия́ погуби́т. / Те́мже Христу́ Безсме́ртному Царю́ возопии́м: / преста́вленныя от на́с упоко́й, // иде́же все́х е́сть веселя́щихся жили́ще у Тебе́.

Сти́х: Ду́ши и́х / во благи́х водворя́тся.

Ме́ртвен: Челове́цы, что́ всу́е мяте́мся? / Пу́ть кра́ток е́сть, и́мже тече́м, / ды́м е́сть житие́, па́ра и пе́рсть и пе́пел: / вма́ле явля́ется, и вско́ре погиба́ет. / Те́мже Христу́ Безсме́ртному Царю́ возопии́м: / преста́вленныя от на́с упоко́й, // иде́же все́х е́сть веселя́щихся жили́ще у Тебе́.

Сла́ва, и ны́не, глас тойже:

В жена́х Свята́я Богоро́дице / Ма́ти Безневе́стная, / моли́ Его́же родила́ еси́, / Царя́ и Бо́га на́шего, // да спасе́т ны́, я́ко Человеколю́бец.

Октоих, глас 3. В суббо́ту у́тра.

Катава́сия му́ченичного кано́на, гла́с 3:

Пе́снь 3

Непло́дная душе́ и безча́дная, / стяжи́ пло́д благосла́вный, / веселя́щися возопи́й: / утверди́хся Тобо́ю Бо́же, / не́сть свя́т, не́сть пра́веден, // па́че Тебе́ Го́споди.

Пе́снь 6

Глубина́ страсте́й воста́ на мя́, / и бу́ря проти́вных ве́тров: / но предвари́в мя́ Ты́ спаси́ Спа́се, и изба́ви от тли́, // я́ко спа́сл еси́ от зве́ря проро́ка.

Пе́снь 8

Ангельми немо́лчно в Вы́шних сла́вимаго Бо́га, / Небеса́ Небе́с, земля́, и го́ры, и хо́лми, и глубина́, / и ве́сь ро́д челове́ческий, / пе́сньми Того́ я́ко Созда́теля и Изба́вителя благослови́те, // и превозноси́те во вся́ ве́ки.

Пе́снь 9

На Сина́йстей горе́ ви́де Тя́ в купине́ Моисе́й, / неопа́льно о́гнь Божества́ заче́ншую во чре́ве: / Дании́л же Тя́ ви́де го́ру несеко́мую, / же́зл прозя́бший,// Иса́иа взыва́ше от ко́рене Дави́дова.

Октоих, глас 3. Ирмосы воскресны,

Канона Богородицы.

Песнь 1.

Пе́снь но́вую пои́м, лю́дие, / от Де́вы Ро́ждшемуся во спасе́ние на́ше / и еди́но Сотво́ршему с Небе́сными земна́я, // я́ко просла́вися.

Песнь 3.

Лук сокруши́л еси вра́жий / и щиты́ сте́рл еси кре́постию, Влады́ко Христе́, / утвержде́ние на́ше, // Свя́т еси́, Го́споди.

Песнь 4.

Стра́нна и неизрече́нна Рождества́ Твоего́ та́йна! / услы́шах слух Твой, и убоя́хся, / и, веселя́ся, вопию́ Ти: // си́ле Твое́й сла́ва, Человеколю́бче.

Песнь 5.

На земли́ Неви́димый яви́лся еси́, / и челове́ком во́лею сожи́л еси́, Непостижи́мый, / и, к Тебе́ у́тренююще, // воспева́ем Тя́, Человеколю́бче.

Песнь 6.

Селе́ния Ио́на е́же в преиспо́днем а́де, / есте́ственный о́браз бы́в, вопия́ше: // возведи́ от тли́ живо́т мо́й, Человеколю́бче.

Песнь 7.

Го́рдый мучи́тель, но дете́й бы́сть игра́лище, / я́коже бо пе́рсть, попра́вше седмери́чный пла́мень, поя́ху: / благослове́н еси́ Го́споди, // Бо́же оте́ц на́ших.

Песнь 8.

Веще́ственнаго огня́ пла́мень / Невеще́ственным увяди́ша Богозри́мии о́троцы и поя́ху: // благослови́те вся́ дела́ Госпо́дня Го́спода.

Песнь 9.

Сла́дкою Пречи́стаго Твоего́ Рождества́ стрело́ю / уязвле́ни, Чи́стая, / Твое́й достожела́нней добро́те дивя́щеся,// пе́сньми Ангельскими досто́йно Тя́, я́ко Ма́терь Бо́жию велича́ем.

Октоих, глас 3. В суббо́ту у́тра.

На хвали́тех стихи́ры му́ченичны, гла́с 3:

Святы́х му́ченик па́мять, / прииди́те лю́дие, вси́ почти́м, / я́ко позо́р бы́ша Ангелом и челове́ком / и побе́ды венцы́ от Христа́ прия́ша, // и мо́лятся о душа́х на́ших.

Стих: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом злая. И при́зри на рабы́ Твоя́, и на дела́ Твоя́, / и наста́ви сы́ны их.

Царе́й и мучи́телей стра́х отри́нуша Христо́вы во́ини, / и благодерзнове́нно и му́жески Того́ испове́даша, / вся́ческих Го́спода Бо́га и Царя́ на́шего,// и мо́лятся о душа́х на́ших.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас, / и де́ло рук на́ших испра́ви.

Си́лы святы́х Ангел удиви́шася му́ченическим страда́нием, / я́ко пло́тию сме́ртною обложе́ни, о му́ках неради́ша, / подо́бницы бы́вше страсте́м Спа́са Христа́,// и мо́лятся о душа́х на́ших.

Аще ЗАУПОКОЙНАЯ СЛУЖБА Сла́ва,глас тойже:

Ме́ртвен: Челове́цы, что́ всу́е мяте́мся? / Пу́ть кра́ток е́сть, теце́м: / ды́м е́сть житие́, па́ра, пе́рсть и пе́пел: / вма́ле явля́ется, и вско́ре погиба́ет. / Те́мже Христу́ Безсме́ртному Царю́ возопии́м: / преста́вленныя от на́с упоко́й, // иде́же все́х е́сть веселя́щихся жили́ще у Тебе́.

Аще "Бог Господь" Сла́ва, и ны́не, глас тойже:

Без се́мене зачала́ еси́ от Ду́ха Свята́го, / и славосло́вяще воспева́ем Тя́: // ра́дуйся Пресвята́я Де́во.

Октоих, глас 3. В суббо́ту у́тра.

Аще ЗАУПОКОЙНАЯ СЛУЖБА

На стихо́вне стихи́ры ме́ртвены, гла́с 3.

Сла́влю Крест Тво́й честны́й, / и́мже живо́т дарова́ся, и пи́щи наслажде́ние, / ве́рою и любо́вию Тя́ пою́щим, Еди́не Многоми́лостиве. / Те́мже вопие́м Ти́ Христе́ Бо́же: / преста́вльшияся от на́с упоко́й, // иде́же все́х е́сть веселя́щихся жили́ще у Тебе́.

Сти́х: Блаже́ни, я́же избра́л / и прия́л еси́ Го́споди.

Еди́не Ми́лостиве и Благоутро́бне, / име́яй непостижи́мую бла́гости пучи́ну, / све́дый естество́ челове́ческое, е́же соде́лал еси́: / Тя́ мо́лим Христе́ Бо́же, / преста́вленныя от на́с упоко́й, // иде́же е́сть все́х веселя́щихся жили́ще у Тебе́.

Сти́х: Ду́ши и́х / во благи́х водворя́тся.

Усну́в во гро́бе я́ко Челове́к, / си́лою же непобеди́мою я́ко Бо́г воскреси́л еси́, я́же во гробе́х спя́щия, / немо́лчныя пе́сни Тебе́ принося́щия. / Те́мже мо́лим Тя́ Христе́ Бо́же: / преста́вленныя от на́с упоко́й, // иде́же е́сть все́х веселя́щихся жили́ще у Тебе́.

Сла́ва, и ны́не, глас тойже:

Свещу́ разу́мную Тя́, / нося́щую све́т Божества́, / совоку́пльшася дебельству́ челове́ческаго существа́, / Богоро́дице, вси́ ве́мы: / Твоего́ моли́ Сы́на и Бо́га, / преста́вленныя от на́с упоко́ити, // иде́же е́сть все́х веселя́щихся ра́дование.