Октоих, глас 2. В среду на утрени.

На стиховне, глас 2.

Креста́ Твоего́ дре́во Христе́ Бо́же, / дре́во живо́тное показа́л еси́ на́м ве́рующим в Тя́, / и си́м упраздни́л еси́ держа́ву иму́щаго сме́рти: / оживи́л же еси́ ны́ умерщвле́нныя грехо́м. / Те́мже вопие́м Ти́: // Благода́телю все́х, Го́споди сла́ва Тебе́.

 

Стѝх: И спо̀лнихомся зау̀тра мѝлости Твоея̀ Го̀споди, и возра̀довахомся, и возвеселѝхомся, во вся̀ днѝ на̀ша возвеселѝхомся, за днѝ в ня̀же смирѝл ны̀ есѝ, лета, в ня̀же вѝдехом зла̀я, и прѝзри на рабы̀ Твоя̀, и на дела̀ Твоя̀, / и наста̀ви сы̀ны ѝх.

 

Во́лею обнища́в обнища́ния ра́ди Ада́мова Христе́ Бо́же, / прише́л еси́ на зе́млю от Де́вы вопло́щься, / и распя́тие прия́л еси́, / да на́с свободи́ши от рабо́ты вра́жия, // Го́споди сла́ва Тебе́.

 

Стѝх: И бу̀ди свѐтлость Го̀спода Бо̀га на̀шего на на̀с, и дела̀ ру̀к на̀ших испра̀ви на на̀с, / и дѐло ру̀к на̀ших испра̀ви.

 

Вся́к гра́д и страна́ чту́т мо́щи ва́ша, / о страстоте́рпцы му́ченицы: / вы́ бо зако́нно пострада́вше, / венцы́ Небе́сныя прия́сте, / и сего́ ра́ди святи́телем есте́ похвала́ // и Це́рквам благоле́пие.

Сла́ва и ны́не, глас то́йже:

Гро́зд всезре́лый Чи́стая, / Его́же невозде́ланно во утро́бе носи́ла еси́, / на дре́ве я́ко узре́ла еси́ Сего́ пове́шена, / рыда́ющи восклица́ла еси́, и взыва́ла: / Ча́до, сла́дость иска́пай, / е́юже отъи́мется пия́нство вся́кое страсте́й, Благода́телю, / Мене́ ра́ди Тебе́ ро́ждшия, // Свои́м благоутро́бием умоля́емь.

Октоих, глас 2. В среду вечера.

На Господи воззвах, глас 2.

Всю́ напои́сте зе́млю, / я́коже ре́ки разде́льшеся духо́вныя из Еде́ма, / ю́же и поора́вше все́ясте спаси́тельное пропове́дание, / и кла́с благопло́ден пожа́сте му́дрии, ду́ши спасе́нных, / си́х в мы́сленных сокро́вищах сокрыва́юще ученицы́ Госпо́дни, // я́ко многоце́нное бога́тство.

От тьмы́ страсте́й и сласте́й многостра́стное мое́ се́рдце свободи́те, / свети́льницы су́ще Восто́ка мы́сленнаго, / и просвети́телие пресве́тлии со́лнца, / все́м возвеща́юще разо́ршаго ле́сть но́щи злове́рия: / Его́же умоли́те и на́ша просвети́ти смы́слы, // я́ко самови́дцы Сего́.

Но́выя вои́стинну благода́ти вы́ скрижа́ли Богоначерта́нныя, / таи́нницы и сви́тцы одушевле́ннии яви́стеся, / сло́во спаси́тельное нося́ще напи́санное Ду́хом, Отчим пе́рстом: / те́мже проидо́сте вся́ концы́, ве́ру правосла́вную, / и к Небе́сным стезю́ веду́щую, // все́м челове́ком я́ве показу́юще.

И Минеи - 3

Слава и ныне Минеи

Октоих, глас 2. В среду вечера. На стиховне, глас 2.

Возвели́чил еси́ Спа́се, / во вселе́нней верхо́вных апо́стол имена́: / навыко́ша бо Небе́сным, / и неизрече́нна да́ша земны́м исцеле́ния: / и се́ни и́х еди́ны неду́ги уврачева́ху, / и́же от ры́барей чудотворя́ще, / и и́же от иуде́й Богосло́вяще благода́ти уче́ния: / и́хже ра́ди Милосе́рде, // да́ждь на́м ве́лию ми́лость.

Стѝх: К Тебѐ возведо̀х о̀чи моѝ, живу̀щему на Небесѝ. Сѐ я̀ко о̀чи раб в руку̀ госпо̀дий своѝх, я̀ко о̀чи рабы̀ни в руку̀ госпожѝ своея̀: та̀ко о̀чи на̀ши ко Го̀споду Бо̀гу на̀шему, / до̀ндеже ущѐдрит ны̀.

Иже от непра́ведных дея́ний всегда́ бори́ми, / и к Тебе́ прибега́юще вои́стинну Су́щему Бо́гу, / гла́с Твои́х учени́к прино́сим Ти́, глаго́люще: / спаси́ ны Наста́вниче, погиба́ем. / Покажи́ и ны́не враго́м на́шим, мо́лимся / я́ко покрыва́еши лю́ди, и спаса́еши от бе́д, / моли́твами апо́стол, презира́я грехи́, / за мно́гую благосты́ню, // Го́споди сла́ва Тебе́.

Стѝх: П омѝлуй на̀с, Го̀споди, помѝлуй на̀с, я̀ко по мно̀гу испо̀лнихомся уничижѐния: наипа̀че напо̀лнися душа̀ на̀ша поношѐния гобзу̀ющих / и уничижѐния го̀рдых.

Ве́лия сла́ва ю́же стяжа́сте святи́и ве́рою: / не то́кмо бо во страда́ниих врага́ победи́ли есте́, / но и по сме́рти ду́хи прогоня́ете, / неду́жныя исцеля́ете, / ду́ш и теле́с вра́чеве, // моли́теся ко Го́споду, поми́ловатися душа́м на́шим.

Сла́ва и ны́не, глас то́йже:

Яко плодови́та ма́слина, / Де́ва израсти́ Тебе́ плода́ живо́тнаго, // плодоноси́ти ми́ру ве́лию и бога́тую ми́лость.

Октоих, глас 2. В четверток на утрени.

Ирмосы на утрене в четверток совпадают с воскресными "Во глубине постла иногда"

На стиховне, глас 2.

Возвели́чил еси́ Спа́се, / во вселе́нней верхо́вных апо́стол имена́: / навыко́ша Небе́сным, / неизрече́нна да́ша земны́м исцеле́ния: / и се́ни и́х еди́ны неду́ги уврачева́ху, / и́бо от ры́барей чудотворя́ще, / и и́же от иуде́й Богосло́вяще благода́ти уче́ния: / и́хже ра́ди Благоутро́бне, // да́ждь на́м ве́лию ми́лость.

 

Стѝх: И спо̀лнихомся зау̀тра мѝлости Твоея̀ Го̀споди, и возра̀довахомся, и возвеселѝхомся, во вся̀ днѝ на̀ша возвеселѝхомся, за днѝ в ня̀же смирѝл ны̀ есѝ, лета, в ня̀же вѝдехом зла̀я, и прѝзри на рабы̀ Твоя̀, и на дела̀ Твоя̀, / и наста̀ви сы̀ны ѝх.

 

Иже от непра́ведных дея́ний всегда́ бори́ми, / и к Тебе́ прибега́юще вои́стинну Су́щему Бо́гу, / гла́с Твои́х учени́к прино́сим Ти́, глаго́люще: / спаси́ ны Наста́вниче, погиба́ем. / Покажи́ и ны́не враго́м на́шим, мо́лимся / я́ко покрыва́еши лю́ди, и спаса́еши от бе́д, / моли́твами апо́стол, презира́я грехи́, / за мно́гую благосты́ню, // Го́споди сла́ва Тебе́.

 

Стѝх: И бу̀ди свѐтлость Го̀спода Бо̀га на̀шего на на̀с, и дела̀ ру̀к на̀ших испра̀ви на на̀с, / и дѐло ру̀к на̀ших испра̀ви.

 

Святы́х Твои́х мно́жество, / мо́лит Тя́ Христе́: // поми́луй и спаси́ на́с я́ко Человеколю́бец.

Сла́ва и ны́не, глас то́йже:

Все́ упова́ние мое́ на Тя́ возлага́ю, / Ма́ти Бо́жия, // сохрани́ мя под кро́вом Твои́м.

Октоих, глас 2. В четверток вечера.

На Господи воззвах, глас 2.

Спа́се, на Кресте́ пригвозди́вся, / со́лнце ви́дев помрачи́ся от стра́ха Твоего́, / и заве́са церко́вная раздра́ся: / земля́ же потрясе́ся, / и ка́мение та́кожде тре́петом распадо́шася, / зре́ти не терпя́ще Зижди́теля своего́ и Бо́га, / на дре́ве стра́ждуща непра́ведно во́лею, // и от беззако́нник досажда́ема.

Ве́сь низложе́н бы́сть на зе́млю, ве́сь уязви́вся, / и лежи́т паде́нием чу́дным зми́й вселука́вый, / вознесе́ну бы́вшу Ти́ на дре́во Человеколю́бче: / Ада́м же от кля́твы разреша́ется, / и спаса́емь быва́ет, и́же пре́жде осужде́ный. / Те́мже и мы́ мо́лимся: / спаси́ на́с Ще́дрый все́х, // и Ца́рствия Твоего́ сподо́би.

Егда́ воздви́глся на Кре́ст, / и в ре́бра прободе́н бы́л еси́ копие́м Безгре́шне, / со́лнце сокрыва́шеся, зре́ти не хотя́ Спа́се, / и земля́ колеба́шеся, / и ка́мение стра́хом тогда́ распада́шеся, досажда́ему Тебе́. / Тва́рь же вопия́ше вся́: / сла́ва распя́тию Твоему́ Сло́ве, // и́мже все́х спа́сл еси́ Человеколю́бче.

И Минеи - 3

Слава и ныне Минеи

Октоих, глас 2. В четверток вечера.

На стиховне, глас 2.

Спаси́ мя Христе́ Спа́се си́лою Кре́стною, / спасы́й Петра́ в мо́ри, // и поми́луй мя́ Бо́же.

Стѝх: К Тебѐ возведо̀х о̀чи моѝ, живу̀щему на Небесѝ. Сѐ я̀ко о̀чи раб в руку̀ госпо̀дий своѝх, я̀ко о̀чи рабы̀ни в руку̀ госпожѝ своея̀: та̀ко о̀чи на̀ши ко Го̀споду Бо̀гу на̀шему, / до̀ндеже ущѐдрит ны̀.

Да ра́спнется вопия́ху, / и́же Твои́х дарова́ний при́сно наслажда́ющиися, / и злоде́я во Благоде́теля ме́сто проша́ху прия́ти, / и́же пра́ведником уби́йцы: / молча́ше же Христе́, терпя́ и́х суровство́, / пострада́ти хотя́, и спасти́ на́с // я́ко Человеколю́бец.

Стѝх: П омѝлуй на̀с, Го̀споди, помѝлуй на̀с, я̀ко по мно̀гу испо̀лнихомся уничижѐния: наипа̀че напо̀лнися душа̀ на̀ша поношѐния гобзу̀ющих / и уничижѐния го̀рдых.

Иже земны́х наслажде́ний не возлюби́вше страстоте́рпцы, / Небе́сных благи́х сподо́бишася, / и Ангелом сожи́теле бы́ша: // Го́споди, моли́твами и́х поми́луй и спаси́ на́с.

Сла́ва и ны́не, глас то́йже:

Егда́ Тя беззако́ннии лю́дие Спа́се, Жи́знь все́х, / на дре́во вознесо́ша, / тогда́ Чи́стая и Пренепоро́чная Ма́ти Твоя́ / предстоя́щи и рыда́ющи взыва́ше: / Ча́до Мое́ Сла́дкое, / Све́те Мои́ма очи́ма, увы́ Мне́, / ка́ко посреде́ злоде́ю на Кресте́ пригвозди́тися претерпе́л еси́,// и́же зе́млю пове́шей на вода́х?

Октоих. В пяток на утрени. Ирмосы, глас 2.

Песнь 1.

Нетре́ну, необы́чну, / немо́кренно морску́ю ше́ствовав стезю́, / избра́нный вопия́ше Изра́иль: // Го́сподеви пои́м, я́ко просла́вися.

Песнь 3.

На ка́мени мя́ ве́ры утверди́в, / разшири́л еси́ уста́ моя́ на враги́ моя́, / возвесели́ бо ся ду́х мо́й, внегда́ пе́ти: / не́сть свя́т, я́коже Бо́г на́ш, // и не́сть пра́веден, па́че Тебе́, Го́споди.

Песнь 4.

Прише́л еси́ от Де́вы не хода́тай, ни Ангел, / но Са́м, Го́споди, вопло́щься, / и спа́сл еси́ всего́ мя, челове́ка. // Те́м зову́ Ти: сла́ва си́ле Твое́й, Го́споди.

Песнь 5.

Угль Иса́ии проявле́йся, / Со́лнце из де́вственныя утро́бы возсия́, / во тьме́ заблу́ждшим, // Богоразу́мия просвеще́ние да́руя.

Песнь 6.

Гла́с глаго́л моле́бных / от боле́зненныя, Влады́ко, души́ услы́шав, / от лю́тых мя́ изба́ви: // Еди́н бо еси́ на́шего спасе́ния вино́вен.

Песнь 7.

Богопроти́вное веле́ние беззако́ннующаго мучи́теля,/ высо́к пла́мень вознесло́ е́сть. / Христо́с же простре́ Богочести́вым отроко́м ро́су духо́вную, // Сы́й благослове́н и препросла́влен.

Песнь 8.

О подо́бии зла́те небре́гше треблаже́ннии ю́ноши, / неизме́нный и живы́й Бо́жий о́браз ви́девше, / среди́ огня́ воспева́ху: / осуществова́нная да пое́т Го́спода вся́ тва́рь,// и превозно́сит во вся́ ве́ки.

Песнь 9.

Недоуме́ет вся́к язы́к благохвали́ти по достоя́нию, / изумева́ет же у́м и преми́рный пе́ти Тя́, Богоро́дице: / оба́че Блага́я су́щи, ве́ру приими́, / и́бо любо́вь ве́си Боже́ственную на́шу, // Ты́ бо христиа́н еси́ Предста́тельница, Тя́ велича́ем.

Октоих, глас 2. В пяток на утрени.

На стиховне, глас 2.

Креста́ Твоего́ дре́во, Христе́ Бо́же, / дре́во живо́тное показа́л еси́ на́м ве́рующим в Тя́, / и си́м упраздни́в держа́ву иму́щаго сме́рти, / оживи́л еси́ на́с умерщвле́ныя грехо́м. / Те́мже вопие́м Ти: // Благода́телю все́х Го́споди, сла́ва Тебе́.

 

Стѝх: И спо̀лнихомся зау̀тра мѝлости Твоея̀ Го̀споди, и возра̀довахомся, и возвеселѝхомся, во вся̀ днѝ на̀ша возвеселѝхомся, за днѝ в ня̀же смирѝл ны̀ есѝ, лета, в ня̀же вѝдехом зла̀я, и прѝзри на рабы̀ Твоя̀, и на дела̀ Твоя̀, / и наста̀ви сы̀ны ѝх.

 

Во́лею обнища́в, обнища́ния ра́ди Ада́мова, Христе́ Бо́же, / прише́л еси́ на зе́млю / от Де́вы вопло́щься, и распя́тие прия́т, / да на́с свободи́ши от рабо́ты вра́жия:// Го́споди сла́ва Тебе́.

 

Стѝх: И бу̀ди свѐтлость Го̀спода Бо̀га на̀шего на на̀с, и дела̀ ру̀к на̀ших испра̀ви на на̀с, / и дѐло ру̀к на̀ших испра̀ви.

 

По Христе́ пострада́вше да́же до сме́рти, / о страстоте́рпцы му́ченицы! / Ду́ши у́бо и́мате на Небесе́х в руце́ Бо́жии, / и по ми́ру всему́ почита́емы су́ть ва́ша мо́щи, / свяще́нницы покланя́ются, / и лю́дие вси́, ра́дующеся, согла́сно вопие́м: // со́н че́стен пред Го́сподем сме́рть преподо́бных Его́.

Сла́ва и ны́не, глас то́йже:

Егда́ Нескве́рная Агница ви́де Своего́ Агнца, / на заколе́ние я́ко челове́ка во́лею влеко́ма, / рыда́ющи глаго́лаше: / безча́дствовати Мя́ ны́не тщи́шися Христе́, ро́ждшую Тя́. / Что́ сие́ сотвори́л еси́ Изба́вителю все́х? / Оба́че воспева́ю и сла́влю Твою́ кра́йнюю бла́гость // па́че ума́ и сло́ва, Человеколю́бче.