ТОП 10:

Песнь 1-ая (2-го канона, творение Василиево. Глас 1)



Ирмос:
Песнь победную поим вси Богу, сотворшему дивная чудеса мышцею высокою, и спасшему Израиля, яко прославися.-дважды-

Припев:
Величай, душе моя, приведенную во храм Господень, и благословенную руками иереевыми.

Стецемся днесь, Богородицу почитающе песньми, и торжествуим духовный праздник: в храм бо Богу дар приносится.

Припев:
Величай, душе моя, приведенную во храм Господень, и благословенную руками иереевыми.

Песньми да воспоим Богородицы славное предшествие: к храму бо днесь, яко Храм Божий, приносится пророчески дар многоценный.

Анна непорочная радовашеся, яко дар многоценен Богу приносящи в храм матерски, Иоаким же с нею торжествует светло.

Давид праотец Твой воспе Тя древле, Дево Богоневесто, Дщерь глаголя Тя Царя Христа: Егоже и родивши, матерски Младенца доила еси.

Плотию трилетствующи, Богородица Господу приносится: Захариа же сию священник Божий прием, радуяся в храм возложи.

Девы ликовствуйте свещеносицы, начните днесь и матери: воспойте Царице Матери, приходящей в храм Царя Христа.

Старший:
Слава Отцу и Сыну и Святому Духу.

Троице единосущная, Отче, и Слове, и Душе Святый, Тя верно славим, яко Творца всех, и Тебе вопием благочестно: спаси ны, Боже.

Старший:
И ныне и присно и во веки веков. Аминь.

От багра кровей Твоих червленицею, Пречистая, одеявся, прошед обнови Царь и Бог, род весь человеческий благоутробием Своим.

Катавасия оба лика вкупе:
Христос раждается, славите. Христос с Небес, срящите. Христос на земли, возноситеся. пойте Господеви вся земля, и веселием воспойте, людие, яко прославися.

Песнь 3-ая (1- го канона)

Ирмос:
Твоя песнословцы, Богородице, живый и независтный Источниче, лик себе совокупльшия духовно утверди, в честнем Вхождении Твоем венцев славы сподоби. -дважды-

Припев:
Ангели, вхождение Пречистыя зряще, удивишася, како Дева вниде во святая святых.

Невестокраситель днесь явися, красный Девы храм и чертог, приемь одушевленный чертог Божий, Чистую и Непорочную, и светлейшую всея твари.

Припев:
Ангели, вхождение Пречистыя зряще, удивишася, како Дева вниде во святая святых.

Давид предначиная ликование, играет и ликовствует с нами, и Царицу зовет Тя украшену, Пречистая, предстоящу, Всечистая, в храме Царю и Богу.

Старший:
Слава Отцу и Сыну и Святому Духу.

Из неяже преступление произыде древле роду человеческому, из тоя исправление и нетление процвете, Богородица днесь приводима в Дом Божий.

Старший:
И ныне и присно и во веки веков. Аминь.

Играют ангельская воинства, и всех человек множество, и пред лицем, Пречистая, предтекут Твоим днесь свещеносицы зовуще, величествия Твоя в дому Божии.

Песнь 3-ая (2-го канона)

Ирмос:
Да утвердится сердце мое в воли Твоей, Христе Боже, Иже над водами небо утверждей второе, и основавый на водах землю, Всесильне. -дважды-

Припев:
Величай, душе моя, приведенную во храм Господень, и благословенную руками иереевыми.

Торжествуим празднолюбцы и срадуимся духом, во святем празднице учреждающеся днесь, Дщере Царевы, и Матере Бога нашего.

Припев:
Величай, душе моя, приведенную во храм Господень, и благословенную руками иереевыми.

Иоакиме, радуйся днесь, и веселися, Анно, духом, Рожденную из вас Господу приводяще трилетствующу, яко Юницу Чисту Всенепорочную.

Припев:
Величай, душе моя, приведенную во храм Господень, и благословенную руками иереевыми.

Божие селение во храм святый приводится, Богородица Мариамь, плотию трилетствующая, и Той свещесветят девы, предтекуще.

Припев:
Величай, душе моя, приведенную во храм Господень, и благословенную руками иереевыми.

Божия Агница неблазненная, и Голубица нескверная, боговместимая Скиния, славы освящение, в скинии святей обитати избра.

Припев:
Величай, душе моя, приведенную во храм Господень, и благословенную руками иереевыми.

Трилетствующая телом, и многолетствующая духом, ширшая небес, и горних сил превышшая, да восхвалится песньми Богоневестная.

Припев:
Величай, душе моя, приведенную во храм Господень, и благословенную руками иереевыми.

Богородицы празднующе в невходимых предшествие, свещеимуще умно с веселием днесь, и мы с девами к храму приближимся.

Припев:
Величай, душе моя, приведенную во храм Господень, и благословенную руками иереевыми.

Священницы Божии, облецытеся в правду благодатию, и срящите светло, входы подающе Дщери Царя и Бога во святая.

Старший:
Слава Отцу и Сыну и Святому Духу.

Свет Отец, Свет Сын Его, Свет Дух Утешительный: яко от солнца бо единаго Троица сияющи, Божественно озаряет и соблюдает души нашя.

Старший:
И ныне и присно и во веки веков. Аминь.

Тя пророцы проповедаша Кивот, Чистая, святыни, Кадильницу златую, и Свещник, и Трапезу: и мы, яко Боговместимую Скинию, воспеваем Тя.

Катавасия:
Прежде век от Отца Рожденному нетленно Сыну, и в последняя от Девы Воплощенному безсеменно Христу Богу возопиим: вознесый рог наш, свят еси, Господи.

Седален, глас 4, подобен: Удивися Иосиф:
Возопий, Давиде, что сей настоящий праздник, Юже воспел еси иногда в книзе псаломстей, яко Дщерь Богоотроковицу и Деву. приведутся, рече, Царю таинственно девы во след Ея, и ближнии Ея: и дивен соделай и всемiрен праздник зовущим: Богородица нам предста, спасения Ходатаица. Слава и ныне

глас и подобен тойжде:
Непорочная Агница и нескверный Чертог, в Дом Божий Богородица Мариамь с веселием вводится преславно, юже ангели Божии дориносят верно, и вси вернии блажат присно, и благодарственно поют Ей непрестанно велиим гласом: наша Слава и Спасение Ты еси, Всенепорочная.

Песнь 4-ая (1-го канона)

Ирмос:
Неизследный Божий совет, еже от Девы воплощения Тебе, Вышняго, пророк Аввакум усмотряя зовяше: слава силе Твоей. Господи. -дважды-

Припев:
Ангели, вхождение Пречистыя зряще, удивишася, како Дева вниде во святая святых.

Дверь непроходную, Божий дом приемля днесь, престати сотвори всякой службе законной, яко истинно явися, зовый, сущим на земли Истина.

Припев:
Ангели, вхождение Пречистыя зряще, удивишася, како Дева вниде во святая святых.

Гора присенная, Юже провиде древле Аввакум, предпроповеда внутрь вместившуюся в неходных храма, добродетели процветши, и покрывает концы.

Старший:
Слава Отцу и Сыну и Святому Духу.

Видевши преславная вся земля странныя же и дивныя вещи, како Дева, от ангела пищу приемлющи, образы строения носит.

Старший:
И ныне и присно и во веки веков.

Храм и Палата, и Небо одушевленное явльшися, Богоневесто Царева, во храм законный приводима днесь, Тому соблюдаема, Пречистая.

Песнь 4-ая (2-го канона)

Ирмос:
Духом провидя, пророче Аввакуме, словесе воплощение, проповедал еси, вопия: внегда приближитися летом, познаешися, внегда приити времени, покажешися. слава силе Твоей, Господи. -дважды-

Припев:
Величай, душе моя, приведенную во храм Господень, и благословенную руками иереевыми.

Пророче Исаие, прорцы нам, Дева кто есть, имущая во чреве, яже из Иудина корене прозябши, и рождшися из Давида Царя, семене святаго, Плод благославный;

Припев:
Величай, душе моя, приведенную во храм Господень, и благословенную руками иереевыми.

Начинайте девы, и воспойте песни, руками держаще свещы, Чистыя Богородицы предшествие хваляще, ныне грядущия во храм Божий купно с нами празднующе.

Припев:
Величай, душе моя, приведенную во храм Господень, и благословенную руками иереевыми.

Иоакиме и Анно, веселитеся ныне, во храм приводяще Господень Чистую Бога Матерь, Христа Всецаря будущую, от вас же рождшуюся, яко трилетствующую Юницу.

Припев:
Величай, душе моя, приведенную во храм Господень, и благословенную руками иереевыми.

Святая святых сущи, Чистая, во храм святый возлюбила еси вселитися, и со ангелы, Дево, беседующи пребываеши, преславно с небесе хлеб приемлющи, Питательнице жизни.

Припев:
Величай, душе моя, приведенную во храм Господень, и благословенную руками иереевыми.

Рождши паче надежди Пречистую Деву, благочестиво обещахуся Богу принести: и исполняют, дающе, яко Жертву рожденную от них, Иоаким днесь и Анна в дом Божий.

Припев:
Величай, душе моя, приведенную во храм Господень, и благословенную руками иереевыми.

Прозябе жезл иногда Ааронов, прообразующий, Чистая, Божественное Рождество, яко безсеменно зачнеши, и нетленна пребудеши, и по Рождестве девствующи явишися, Младенца питающи, всех Бога.

Припев:
Величай, душе моя, приведенную во храм Господень, и благословенную руками иереевыми.

Девы Деву, и матери Матерь, благочестно стецытеся почтити с нами Рождшуюся, яко непорочную Жертву и рожденную Богу плодоносимую, вси убо светло празднуем.

Припев:
Слава Отцу и Сыну и Святому Духу.

Троицу лицы, Единицу образом благочестно славим Бога Истинна, Егоже поют ангельская и архангельская чиноначалия, яко твари Владыку, и человецы верно покланяющеся присно.

Припев:
И ныне и присно и во веки веков.

Моли непрестанно, Пресвятая Чистая, Егоже плотию родила еси Сына Твоего и Бога, от многообразных сетей диаволих, и от всяких искушений находящих вся избавити рабы Твоя.

Катавасия:
Жезл из корене Иессеова, и цвет от него, Христе, от Девы прозябл еси, из горы хвальный приосененныя чащи, пришел еси воплощся, от Неискусомужныя, Невещественный Боже: слава силе Твоей, Господи.

Песнь 5-ая (1-го канона)

Ирмос:
Ужасошася всяческая в честнем Вхождении Твоем: Ты бо, Неискусобрачная Дево, внутрь вошла еси во храм Божий, якоже Честнейший Храм, всем воспевающим Тя мир Подавающая. -дважды-

Припев:
Ангели, вхождение Пречистыя зряще, удивишася, како Дева вниде во святая святых.

Священие славное и священное возложение днесь Пречистая Дева, возложившися в Храм Божий, Всецарю нашему, Богу Единому в жилище соблюдается, яко весть Сам.

Припев:
Ангели, вхождение Пречистыя зряще, удивишася, како Дева вниде во святая святых.

Доброту, Пречистая, души Твоея зря некогда, верою Захариа возопи: Ты еси Избавление, Ты еси всех Радость, Ты еси Воззвание наше, Еюже Невместный вмещен Мне явится.

Припев:
Слава Отцу и Сыну и Святому Духу.

О паче ума чудес Твоих, Всечистая! странное Твое Рождество есть, странен образ возращения Твоего, странна и преславна Твоя Богоневесто, вся, и человеки несказанна.

Припев:
И ныне и присно и во веки веков.

Свещник многосветлый сущи, Богоневесто, днесь возсияла еси в дому Господни, и озаряеши ны честными даровании, Чистая, чудес Твоих, Богородице Всепетая.

Песнь 5-ая (2-го канона)

Ирмос:
Светлый нам возсияй свет присносущный, утренюющим о судьбах заповедей Твоих, Владыко Человеколюбче, Христе Боже наш. -дважды-

Припев:
Величай, душе моя, приведенную во храм Господень, и благословенную руками иереевыми.

Да светлоносим, православнии вси, стекающеся, и славяще Богоматерь, яко Господу днесь приводится, яко Жертва благоприятна.

Припев:
Величай, душе моя, приведенную во храм Господень, и благословенную руками иереевыми.

Да веселятся праотцы днесь, Владычице, и да радуется рождшая Тя со отцем Твоим, яко плод их Господу приносится.

Припев:
Величай, душе моя, приведенную во храм Господень, и благословенную руками иереевыми.

Многоименитую и славнейшую Непорочную Юницу, яко плотию Рождшую Божественнаго Тельца, вси воспоим, верно празднующе.

Припев:
Величай, душе моя, приведенную во храм Господень, и благословенную руками иереевыми.

Уневещения написуются Божественная знамения паче ума Рождества Твоего, Чистая Дево, днесь Духом Святым в Дому Божии.

Припев:
Величай, душе моя, приведенную во храм Господень, и благословенную руками иереевыми.

Да отверзутся преддверия славы Бога нашего, и да приемлют Неискусобрачную Божию Матерь, якоже трилетствующую Нескверную Юницу.

Припев:
Величай, душе моя, приведенную во храм Господень, и благословенную руками иереевыми.

Многочестную и присенную гору воспоим Приснодеву, Божию Матерь бывшу: Та бо облиста свет в концех.

Припев:
Слава Отцу и Сыну и Святому Духу.

Преначальное и Присносущное Едино Божество славословяще, треми Лицы естеством нераздельное, и славою равночестное.

Припев:
И ныне и присно и во веки веков.

Пристанище благоутишное, и необоримую Стену стяжахом, молитву Твою во обстояниих, Богородительнице, всегда избавляеми бед и скорбей.

Катавасия:
Бог сый мiра, Отец щедрот, великаго совета Твоего Ангела, мир подавающа, послал еси нам: тем богоразумия к свету наставльшеся, от нощи утренююще, славословим Тя, Человеколюбче.

Песнь 6-ая (1-го канона)

Ирмос:
Божественное сие и всечестное совершающе празднество, Богомудрии, Богоматере, приидите, руками восплещим, от Нея Рождшагося Бога славим. -дважды-

Припев:
Ангели, вхождение Пречистыя зряще, удивишася, како Дева вниде во святая святых.

Всяческая носяй глаголом, молитву праведных услыша. темже неплодныя разрешил еси недуг, яко Благоутробен, радости Виновную сим дарова.

Припев:
Ангели, вхождение Пречистыя зряще, удивишася, како Дева вниде во святая святых.

Сказати хотя языком Господь Свое спасение, Неискусобрачную ныне от человек прият, примирения знамение и обновления.

Припев:
Слава Отцу и Сыну и Святому Духу.

Яко дом сущи благодати, в немже сокровища лежат неизреченнаго Божия строения, Всечистая, в храме причастилася еси нетленныя сладости.

Припев:
И ныне и присно и во веки веков.

Диадиму Тя царскую прием Храм, Богоневесто, просвещашеся, и подступаше лучшым, предреченных зря на Тебе сбытие.

Песнь 6-ая (2-го канона)

Ирмос:
Пророка Иону подражая, вопию: живот мой, Блаже, свободи из тли, и спаси мя, Спасе мiра, зовуща: слава Тебе. -дважды-

Припев:
Величай, душе моя, приведенную во храм Господень, и благословенную руками иереевыми.

Празднуим, вернии, праздник духовный Матере Божия, воспевающе благочестно: есть бо святейша небесных умов.

Припев:
Величай, душе моя, приведенную во храм Господень, и благословенную руками иереевыми.

Песньми духовными восхвалим, вернии, Матерь Света, яко днесь нам явися, предходящи в храм Божий.

Припев:
Величай, душе моя, приведенную во храм Господень, и благословенную руками иереевыми.

Нескверная Агница, и Чистая Голубица приведеся обитати в Дом Божий, яко Непорочная, пронареченная быти Мати Божия.

Припев:
Величай, душе моя, приведенную во храм Господень, и благословенную руками иереевыми.

В храм законный входы совершает Храм Божий, Небесная Скиния, из Неяже нам сущым во тме Свет возсия.

Припев:
Величай, душе моя, приведенную во храм Господень, и благословенную руками иереевыми.

Младенствующи плотию, и совершена душею, святый Кивот в Дом Божий входит, воспитатися Божественною благодатию.

Припев:
Величай, душе моя, приведенную во храм Господень, и благословенную руками иереевыми.

От всяких искушений и бед душевных свободи ны, притекающыя к Тебе, Всепетая, Твоими мольбами, Мати Христа Бога.

Припев:
Слава Отцу и Сыну и Святому Духу.

Отец, и Сын, и Дух Правый, Триипостасная Единице, и Неразделимая Троице, помилуй покланяющыяся Божественней державе Твоей.

Припев:
И ныне и присно и во веки веков.

Во чреве Твоем вмещен Невместимый всеми, Богомати, быв, из Тебе произыде, Пречистая, сугуб естеством Бог и Человек.

Катавасия:
Из утробы Иону младенца изблева морский зверь, якова прият: в Деву же всельшееся Слово, и плоть приемшее пройде сохраншее Нетленну. егоже бо не пострада истления, Рождшую сохрани неврежденну.

Братия:
Господи, помилуй. (12 раз) – читается вместо ктеньи

Кондак (глас 4), подобен: Вознесыйся:
Пречистый Храм Спасов, многоценный Чертог и Дева, священное Сокровище Славы Божия, днесь вводится в дом Господень, благодать совводящи, яже в Дусе Божественном, Юже воспевают Ангели Божии: сия есть Селение Небесное.

Икос:
Неизреченных Божиих и Божественных таин зря в Деве благодать являемую, и исполняему явственно, радуюся, и образ разумети недоумеюся, странный и неизреченный: како избранная Чистая Едина явися паче всея твари видимыя и разумеваемыя; темже восхвалити хотя Сию, ужасаюся зело умом же и словом, обаче дерзая проповедаю и величаю: Сия есть Селение Небесное.

Песнь 7-ая (1-го канона)

Ирмос:
Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.-дважды-

Припев:
Ангели, вхождение Пречистыя зряще, удивишася, како Дева вниде во святая святых.

Се днесь возсия концем весна радостная, просвещающи нашу душу и помышление и ум благодатию, торжеством Богородицы днесь таинственно да учредимся.

Припев:
Ангели, вхождение Пречистыя зряще, удивишася, како Дева вниде во святая святых.

Да дароносят днесь всяческая Царице Матери Божии, небо и земля, и ангелов чини, и человеков множество, и да вопиют: во храм вводится Радость и Избавление.

Припев:
Слава Отцу и Сыну и Святому Духу.

Писание мимотече, и оскуде закон якоже сень, и благодати лучи возсияша, в Храм Божий вшедшей Тебе, Дево Мати Чистая, в нем Благословенная.

Припев:
И ныне и присно и во веки веков.

Повинуся Рождеству Твоему, Всечистая, яко Творцу и Богу, небо и земля и преисподняя, и всяк язык земных исповедает, яко Господь явися Спас душ наших.

Песнь 7-ая (2-го канона)

Ирмос:
Пещь, Спасе, орошашеся, отроцы же, ликующе, пояху: отцев Боже, благословен еси. -дважды-

Припев:
Величай, душе моя, приведенную во храм Господень, и благословенную руками иереевыми.

Ликовствуем празднолюбцы днесь, воспоим чистую Владычицу, Иоакима и Анну достойно чтуще.

Припев:
Величай, душе моя, приведенную во храм Господень, и благословенную руками иереевыми.

Пророчествуй Давиде, глаголя духом: приведутся девы вслед Тебе, приведутся Тебе во храм Царицы Матери.

Припев:
Величай, душе моя, приведенную во храм Господень, и благословенную руками иереевыми.

Радовахуся ангелов чини, веселяхуся праведных дуси, яко Божия Мати во святая приводится.

Припев:
Величай, душе моя, приведенную во храм Господень, и благословенную руками иереевыми.

Приемлющи пищу Небесную, преспеваше мудростию и благодатию, бывши Мати по плоти Христа Бога.

Припев:
Величай, душе моя, приведенную во храм Господень, и благословенную руками иереевыми.

И телом и духом радовашеся, пребывающи Мариа Непорочная во храме Божии, якоже сосуд священнейший.

Припев:
Величай, душе моя, приведенную во храм Господень, и благословенную руками иереевыми.

Введоша Тя во внутреннейшее храма, целомудреннии родителие Твои, Пречистая, воспитатися странно в жилище Христа Бога.

Припев:
Слава Отцу и Сыну и Святому Духу.

Прославим Троицу Нераздельную, воспоим Едино Божество, со Отцем Слово, и Духа Всесвятаго.

Припев:
И ныне и присно и во веки веков.

Моли, Егоже родила еси, Господа, яко благоутробна естеством суща, Богородительнице, спасти душы воспевающих Тя.

Катавасия:
Отроки благочестию совоспитани, злочестиваго веления небрегше, огненнаго прещения не убояшася, но посреде пламене стояще, пояху: отцев Боже, благословен еси.

Песнь 8-ая (1-го канона)

Ирмос:
Слыши Отроковице Дево Чистая, да речет убо Гавриил совет Вышняго древний истинный, буди к приятию готова Божию: Тобою бо Невместимый с человеки поживе. тем и радуяся вопию: благословите вся дела Господня Господа. -дважды-

Припев:
Ангели, вхождение Пречистыя зряще, удивишася, како Дева вниде во святая святых.

Пречистый храм в дом Божий приводящи Анна иногда, вопиющи, с верою рече священнику: Чадо, от Бога данное мне, приим ныне, введи во храм Зиждителя Твоего, и радуяся пой ему: благословите, вся дела Господня, Господа.

Припев:
Ангели, вхождение Пречистыя зряще, удивишася, како Дева вниде во святая святых.

Рече, видев, Анне иногда духом Захариа: жизни Матерь вводиши истинную, юже светло пророцы Божии Богородицу проповедаша, и како храм вместит Ю; тем чудяся вопию: благословите, вся дела Господня, Господа.

Припев:
Ангели, вхождение Пречистыя зряще, удивишася, како Дева вниде во святая святых.

Раба Божия бых аз, отвеща Анна ему, призывающи Сего верою и молитвою, прияти моея болезни плод, по приятии же Рожденную привести Давшему Ю. Тем зовя вопию: благословите, вся дела Господня, Господа.

Припев:
Ангели, вхождение Пречистыя зряще, удивишася, како Дева вниде во святая святых.

Законное воистинну дело есть, священник рече ей, странну же весьма вещь поразумеваю, зря Приводимую в дом Божий, преславно Превосходящую святая благодатию. тем и радуяся вопию: благословите, вся дела Господня, Господа. Слава Отцу и Сыну и Святому Духу.

Возмогаю, рече Анна ему, знающи, яже глаголеши, разумееши бо сия Духом Божиим, ясно яже Девы проповедал еси: приими убо Пречистую в храм Создателя Твоего, и радуяся пой Ему: благословите, вся дела Господня, Господа.

Припев:
И ныне и присно и во веки веков.

Светоносна нам воззжеся Свеща, возопи священник, радость величайшую светящи в храме: душы пророческия да срадуются мне, яко преславная зряще, совершаемая в дому Божии, и да вопиют присно: благословите, вся дела Господня, Господа.

Песнь 8-ая (2-го канона)

Ирмос:
Егоже ужасаются ангели и вся воинства, яко Творца и Господа, пойте священницы, прославите отроцы, благословите людие, и превозносите во вся веки. -дважды-

Припев:
Величай, душе моя, приведенную во храм Господень, и благословенную руками иереевыми.

Веселится днесь светло Иоаким, и Анна непорочная Господу Богу приносит Жертву, данную ей от обещания Святую Дщерь.

Припев:
Величай, душе моя, приведенную во храм Господень, и благословенную руками иереевыми.

Хвалятся святии, Давид и Иессей, и Иуда чтится, из корене бо их израсте плод, Дева Чистая, из Неяже родися Бог Превечный.

Припев:
Величай, душе моя, приведенную во храм Господень, и благословенную руками иереевыми.

Мариа, пречистая и одушевленная Скиниа, приводится днесь в дом Божий: и приемлет Сию Захариа руками, яко освященное Сокровище Господне.

Припев:
Величай, душе моя, приведенную во храм Господень, и благословенную руками иереевыми.

Яко дверь спасительную и гору мысленную, яко лествицу одушевленную, почтим, вернии, воистинну Деву и Матерь Божию, благословенную руками иереев.

Припев:
Величай, душе моя, приведенную во храм Господень, и благословенную руками иереевыми.

Пророцы, апостоли и мученицы Христовы, ангелов чини и вси земнороднии, почтим песньми Деву Чистую, яко благословенную Матерь Высочайшаго.

Припев:
Величай, душе моя, приведенную во храм Господень, и благословенную руками иереевыми.

В храм Тя принесоша, Всенепорочная Чистая, божественне рождшии Тя, яко Жертву Чисту: и странно водворяешися в неходимых Богу, предуготоватися в Жилище Слова.

Припев:
Величай, душе моя, приведенную во храм Господень, и благословенную руками иереевыми.

Благословим Отца и Сына и Святаго Духа, Господа.

Припев:
Слава Отцу и Сыну и Святому Духу.

Да поется Трисвятый, Отец, и Сын, и Дух Святый, Нераздельная Единица, Едино Божество, Держащее дланию всю тварь, во вся веки.

Припев:
И ныне и присно и во веки веков.

Безначальное начинается Слово плотию, родився, яко благоволи, Бог же и Человек, из Отроковицы Девы, возсозидая ны прежде падшыя, ради крайнего благоутробия.

Хвалим, благословим, покланяемся Господеви, поюще и превозносяще во вся веки.

Катавасия:
Чуда преестественнаго росодательная изобрази пещь образ: не бо, яже прият, палит юныя, яко ниже огнь Божества Девы, в Нюже вниде утробу. тем воспевающе воспоем: да благословит тварь вся Господа, и превозносит во вся веки.

Вместо "Честнейшую" на 9-й песни поются праздничные припевы:

Братия – первый лик :
Припев праздника: Ангели, вхождение Пречистыя зряще, удивишася, како Дева вниде во святая святых.
Ирмос: Яко одушевленному Божию Кивоту, да никакоже коснется рука скверных, устне же верных Богородице немолчно глас ангела воспевающе, с радостию да вопиют: истинно вышши всех еси, Дево Чистая.

Братия – второй лик :
Припев праздника: Величай, душе моя, приведенную во храм Господень, и благословенную руками иереевыми.
Ирмос: Светоносный Облак, в оньже всех владыка, яко дождь с небесе на руно сниде, и воплотися нас ради, быв Человек, Безначальный: величаем вси яко Матерь Бога нашего Чистую.

Песнь 9-ая (1- го канона)

Ирмос:
Яко одушевленному Божию Кивоту, да никакоже коснется рука скверных, устне же верных Богородице немолчно глас ангела воспевающе, с радостию да вопиют: истинно вышши всех еси, Дево Чистая. -дважды-

Припев:
Ангели, вхождение Всечистыя зряще, удивишася: како со славою вниде во святая святых.

Яко пресветлую, Богородице Чистая, душевныя чистоты имущи доброту, благодатию же Божиею исполняема с Небесе, светом присносущным просвещаеши всегда с веселием вопиющыя: истинно вышши всех еси, Дево Чистая.

Припев:
Ангели, вхождение Девы зряще, удивишася: како преславно вниде во святая святых.

Прелетает, Богородице Чистая, чудо Твое силу словес: тело бо в Тебе поразумеваю паче слова, течения греховнаго неприятно. темже благодарственно вопию Ти: истинно вышши всех еси, Дево Чистая.

Припев:
Ангели и человецы Девы вхождение почтим: яко со славою вниде во святая святых.

Преславно прообразоваше, Чистая, закон Тя скинию и Божественную Стамну: странен кивот, и катапетасму, и жезл: храм неразрушимый и дверь Божию. темже научают Тебе звати: истинно вышши всех еси, Дево Чистая.

Припев:
Ангели, вхождение Девы зряще, удивишася: како богоугодне вниде во святая святых.

Песнопоя Тебе, провозглашаше Давид, глаголя Тя Дщерь Цареву, красотою добродетелей, одесную предстоящую Бога, видев Тя упещрену. темже, пророчествуя, вопияше: истинно вышши всех еси, Дево Чистая.

Припев:
Ангели, взыграйте со святыми, девы, сликовствуйте: Богоотроковица бо вниде во святая святых.

Богоприятну предзря Соломон, проповеда Тя одр Царев, живый источник запечатствован, из негоже немутная нам произыде вода, верою вопиющым: истинно вышши всех еси, Дево Чистая.

Припев:
Ангели и человецы Деву песньми да возвеличим: боголепно бо вниде во святая святых.

Подаеши дарований Твою тишину, Богородице, души моей, точащи жизнь Тебе чтущым по долгу, Сама защищающи, и покрывающи, и соблюдающи, вопити Тебе: истинно вышши всех еси, Дево Чистая.

Таже первый лик поет втораго канона припев праздника:
Величай, душе моя, приведенную во храм Господень, и благословенную руками иереевыми.

И посем ирмос:
Светоносный Облак, в оньже всех владыка, яко дождь с небесе на руно сниде, и воплотися нас ради, быв Человек, Безначальный: величаем вси яко Матерь Бога нашего Чистую.

Песнь 9-ая (2-го канона)

Ирмос:
Светоносный Облак, в оньже всех владыка, яко дождь с небесе на руно сниде, и воплотися нас ради, быв Человек, Безначальный: величаем вси яко Матерь Бога нашего Чистую. -дважды-

Припев:
Величай, душе моя, приведенную во храм Господень, и благословенную руками иереевыми.

Из праведных произыде, Иоакима и Анны, обещания Плод, Богоотроковица Мариа: и яко кадило приятное, плотию младенствующи, приводится во святилище святое, яко святая во святых обитати.

Припев:
Величай, душе моя, приведенную во храм Господень, и благословенную руками иереевыми.

Младенствующую естеством, и паче естества явльшуюся Матерь Божию, восхвалим песньми: в храм бо законный Господу днесь приводится, в воню благовония праведных, яко Плод духовный.

Припев:
Величай, душе моя, приведенную во храм Господень, и благословенную руками иереевыми.

Со ангелом, еже радуйся, Богородице приличне возопиим, вернии: радуйся, Вседобрая Невесто. Радуйся, Облаче светлый, из негоже нам возсия Господь, во тме неведения седящым. Радуйся, всех Надеждо.

Припев:
Величай, душе моя, приведенную во храм Господень, и благословенную руками иереевыми.

Святых святая, и Богомати Марие, молитвами Твоими, Чистая, свободи ны от сетей вражиих и всякия ереси и скорби, верно покланяющыяся образу святаго Твоего зрака.

Припев:
Величай, душе моя, приведенную во храм Господень, и благословенную руками иереевыми.

Песнь достойну Богородице вся тварь со Ангелом Гавриилом взывает, вопиющи: радуйся, Мати Божия Всенепорочная, Еюже избавихомся первыя клятвы, бывше нетления общницы.

Припев:
Величай, душе моя, приведенную во храм Господень, и благословенную руками иереевыми.

Херувим пребольши, и серафим вышши, и ширши небес явилася еси, Дево, яко невместнаго всеми, во утробе вместивши Бога нашего, и рождши несказанно: Егоже моли прилежно о нас.

Припев:
Величай, душе моя, Триипостаснаго и Нераздельнаго Божества державу.

Триипостасное Естество, и нераздельную Славу, и в Божестве Едином поемую непрестанно, на небеси и на земли, Троицу неразлучную прославим, с Сыном Отцу и Духу покланяющеся благочестно.

Припев:
Величай, душе моя, Честнейшую и Славнейшую горних воинств, Деву Пречистую Богородицу.

Под Твое благоутробие прибегающыя верно, и покланяющыяся благочестно Сыну Твоему, Дево Богородительнице, яко Богу и Господу мiра молися, от тли и бед избавити, и всяческих искушений.

Припев 1-го канона:
Ангели, вхождение Девы зряще, удивишася: како богоугодне вниде во святая святых.

Ирмос 1-го канона:
Таинство странное вижу и преславное: небо, вертеп: престол херувимский, Деву: ясли, вместилище, в нихже возлеже Невместимый Христос Бог, Егоже воспевающе величаем.

Братия:
Господи, помилуй. (12 раз) – читается вместо малой ектеньи -поклон-

"Свят Господь Бог наш" не поется лишь в воскресенья, на которые приходятся Преображение Господне.

Старший:
Свят Господь Бог наш!

Братия:
Свят Господь Бог наш!

Старший:
Яко свят Господь Бог наш!

Братия:
Свят Господь Бог наш!

Старший:
Над всеми людьми Бог наш.

Братия:
Свят Господь Бог наш!

Чтец поет светилен:
Юже древле предвозвести пророческое сословие, стамну и жезл, и скрижаль, и несекомую гору, Марию Богоотроковицу верно да восхвалим: днесь бо вводится во святая святых, воспитатися Господу.

Старший:
Слава Отцу и Сыну и Святому Духу.

Чтец:
Юже древле предвозвести пророческое сословие, стамну и жезл, и скрижаль, и несекомую гору, Марию Богоотроковицу верно да восхвалим: днесь бо вводится во святая святых, воспитатися Господу.

Старший:
И ныне и присно и во веки веков.

Чтец:
Юже древле предвозвести пророческое сословие, стамну и жезл, и скрижаль, и несекомую гору, Марию Богоотроковицу верно да восхвалим: днесь бо вводится во святая святых, воспитатися Господу.

-4-

Хвалитны псалмы

Старший:
(150-й)

Всякое дыхание да хвалит Господа!
(148-й)
Хвалите Господа с небес, хвалите Его в вышних!

Припев:
Тебе подобает песнь, Богу!
Хвалите Его вси ангели Его, хвалите Его вся силы Его.

Припев:
Тебе подобает песнь, Богу!

Чтец:
Хвалите Его солнце и луна, хвалите Его вся звезды и свет. Хвалите Его небеса небес, и вода яже превыше небес. Да восхвалят имя Господне: яко Той рече, и быша: Той повеле, и создашася. Постави я в век и в век века: повеление положи, и не мимо идет. Хвалите Господа от земли, змиееве, и вся бездны: огнь, град, снег, голоть, дух бурен, творящая слово Его: Горы и вси холми, древа плодоносна и вси кедри: Зверие и вси скоти, гади и птицы пернаты: Царие земстии и вси людие, князи и вси судии земстии: Юноши и девы, старцы с юнотами да восхвалят имя Господне, яко вознесеся имя Того единаго: исповедание Его на земли и на небеси. И вознесет рог людей Своих: песнь всем преподобным Его, сыновом исраилевым, людем приближающымся Ему.
(149-й)
Воспойте Господеви песнь нову, хваление Его в церкви преподобных. Да возвеселится Исраиль о Сотворшем его, и сынове Сиони возрадуются о Царе своем: Да восхвалят имя Его в лице, в тимпане и псалтири да поют Ему. Яко благоволит Господь в людех Своих, и вознесет кроткия во спасение. Восхвалятся преподобнии во славе, и возрадуются на ложах своих. Возношение Божия в гортани их, и мечи обоюду остры в руках их: Сотворити отмщение во языцех, обличения в людех: Связати цари их путы, и славныя их ручными оковы железными.

На 4

Старший:
1. Хвалите Его на силах Eгo!

Братия: Хвалите Его по множеству величествия Его!

Братия:
Свещеносицы девы, приснодеву светло провождающе, пророчествуют истинно духом будущее: храм бо Божий Богородица сущи, в храм со славою девственною младенствующи вводится.

Старший:
2. Хвалите Его во гласе трубнем.

Братия: Хвалите Его во псалтири и гуслех!







Последнее изменение этой страницы: 2017-01-19; Нарушение авторского права страницы

infopedia.su Все материалы представленные на сайте исключительно с целью ознакомления читателями и не преследуют коммерческих целей или нарушение авторских прав. Обратная связь - 34.237.76.91 (0.047 с.)