Хвалим, благословим, покланяемся господеви, поюще, и превозносяще во вся веки.

икатавасию глас 2:

В купине́ Моисе́ю Де́вы чу́до,/ на Сина́йстей горе́, прообрази́вшаго иногда́,/ по́йте, благослови́те// и превозноси́те во вся́ ве́ки.

Диакон: Богоро́дицу и Ма́терь Све́та в пе́снех возвели́чим.

Хор:

Песнь 9

(Канон Минеи):

Хор ирмос глас 4:

Е́ва у́бо неду́гом преслуша́ния/ кля́тву всели́ла е́сть,/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́./ Тем Тя вси велича́ем.

Чтецы:

Стих: Благослове́н Госпо́дь, Бог Изра́илев, / я́ко посети́ и сотвори́ избавле́ние лю́дем Свои́м.

Ви́дети жела́я Христо́ву неизрече́нную, святи́телю, сла́ву,/ потща́лся еси́ стра́сти умертви́ти душетле́нныя,/ прия́телище се́рдце сотвори́ти прему́дрости бо́льшия и лу́чшия./ Те́мже тя ве́рою ублажа́ем.

Стих: И воздви́же рог спасе́ния нам / в дому́ Дави́дове, о́трока Своего́.

Ви́дети жела́я Христо́ву неизрече́нную, святи́телю, сла́ву,/ потща́лся еси́ стра́сти умертви́ти душетле́нныя,/ прия́телище се́рдце сотвори́ти прему́дрости бо́льшия и лу́чшия./ Те́мже тя ве́рою ублажа́ем.

Стих: Я́коже глаго́ла усты́ святы́х, су́щих от ве́ка проро́к Его́.

Звезду́ многосве́тлую, Христо́с Со́лнце, на церко́вней высоте́ положи́ тя, Кири́лле,/ луча́ми уче́ний свяще́нных озаря́юща се́рдца/ ве́рно соверша́ющих твою́ светоно́сную па́мять, преподо́бне.

Стих: Спасе́ние от враг на́ших / и из руки́ всех, ненави́дящих нас.

Собесе́дник и сослужи́тель был еси́ А́нгелом,/ я́ко бо безпло́тен, о́тче, на земли́ пожи́в,/ преподо́бным яви́лся еси́ соприча́стник и святи́телем равностоя́тель;/ с ни́миже лику́я, нас помина́й.

Стих: Сотвори́ти ми́лость со отцы́ на́шими / и помяну́ти Заве́т Святы́й Свой.

Богоро́дичен: Непло́дствующее Боже́ственных доброде́телей, Пречи́стая Богоро́дице,/ се́рдце мое́ покажи́, Де́во, плодоно́сно,/ я́же от непло́дове ро́ждшаяся/ во́лею вся претворя́ющего манове́нием,/ да Тя пою́, Всепе́тую.

(1-й трипеснец Триоди):

Стих: Кля́тву, е́юже кля́тся ко Авраа́му, отцу́ на́шему, / да́ти нам без стра́ха, из руки́ враг на́ших изба́вльшимся.

Зми́я Моисе́й на дре́во возне́с, образова́ше Тя́ Иису́се на Кресте́ во́лею вознесе́на, и лука́ваго ядови́тую зло́бу изгна́вшаго, к Себе́ же челове́ки привле́кша, Человеколю́бче.

Стих: Служи́ти Ему́ преподо́бием и пра́вдою / пред Ним вся дни живота́ на́шего.

Огне́м мя́ Твоего́ стра́ха очи́сти, возжига́я в мое́й души́ Боже́ственную Твою́ любо́вь, и Кресто́м Твои́м огради́ мя, е́же прельсти́ ве́тхий запина́тель, сластьми́ омрачи́в мое́ Христе́ помышле́ние.

Стих: И ты, отроча́, проро́к Вы́шняго нарече́шися, / преды́деши бо пред лице́м Госпо́дним, угото́вати пути́ Его́.

Скве́рных помышле́ний, и дея́ний злы́х, пости́мся бра́тие, очи́стим сердца́, впери́мся боже́ственными доброде́тельми, и долере́вностныя зло́бы стремле́ний уклони́мся, да Па́сху вели́кую светоно́снии у́зрим.

Стих: Да́ти ра́зум спасе́ния лю́дем Его́/ во оставле́ние грех их / милосе́рдия ра́ди ми́лости Бо́га на́шего.

Богоро́дичен: Из Тебе́ в на́шу нищету́ Де́во, хотя́ облече́ся, Бога́тый естество́м, ви́димь же на́м бы́сть Неви́димый вы́шними ли́ки пева́емый, сокруше́нный о́браз обновля́я благосты́нею.

(2-й трипеснец Триоди):

Стих: В ни́хже посети́ нас Восто́к с высоты́, / яви́тися во тьме и се́ни сме́ртней седя́щим.

Тебе́ на Кресте́ ру́це распросте́рша и четвероконе́чная присво́ивша, И́мже ко Отцу́ обрето́хом вхо́д, Сы́не Бо́жий, вси́ велича́ем.

Стих: Напра́ви но́ги на́ша на путь ми́рен.

Тебе́ те́рнием Христе́ венча́вше, беззако́ннии бия́ху, и распя́ша, Его́же ра́ди поднебе́сная колеба́шася вся́: мы́ же спа́сшеся Тя́ велича́ем.

Сла́ва Отцу́ и Сы́ну и Свято́му Ду́ху.

Тро́ичен: Тя́ трисве́тлое Свято́е Божество́, все́ содержа́щее, и храня́щее при́сно, Отца́, Сы́на же, и Ду́ха Жива́го, пе́сньми немо́лчными велича́ем.

И ны́не и при́сно и во ве́ки веко́в, ами́нь.

Богоро́дичен: Тя́ све́тлый о́блак Ду́ха, из него́же на́м возсия́ све́т непристу́пный, Христо́с, пра́вды вели́кое Со́лнце, пе́сньми Богоро́дице велича́ем.

Стих: Сла́ва Тебе́, Бо́же наш, сла́ва Тебе́.

Ты́ на́м све́т, свято́е сложе́ние, одоле́ние побе́ды, Христо́в Кре́сте, ты́ на́м воздержа́ние услади́, и тебе́ поклони́тися сподо́би.

Хор катавасию глас 2:

Тебе́ мы́сленную и одушевле́нную ле́вствицу,/ на не́йже Бо́г на́ш утверди́ся,/ е́юже к небеси́ обрето́хом восхожде́ние,// пе́сньми Богоро́дице велича́ем.

Хор (на одном аккорде): Достойно есть яко воистину блажити Тя Богородицу, / Присноблаженную и Пренепорочную и Матерь Бога нашего. / Честнейшую Херувим и славнейшую без сравнения Серафим, / без истления Бога Слова рождшую, //

МАЛАЯ ЕКТЕНИЯ.

Диакон: Паки и паки миром Господу помолимся.

Хор:

(так же и на следующее прошение)

Диакон: Заступи, спаси, помилуй и сохрани нас, Боже, Твоею благодатию.

Диакон: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе и друг друга, и весь живот наш Христу Богу предадим.

Хор:

Иерей: Яко Тя хва́лят вся си́лы небе́сныя, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор:

Чтец глаголет светилен: Свет возсия́й, Го́споди, ду́шу мою очи́сти от вся́кого греха:

Хор (допевает последнюю фразу):

Чтец: Слава Отцу и Сыну и Святому Духу.

Свет возсия́й, Го́споди, ду́шу мою очи́сти от вся́кого греха:

Хор (допевает последнюю фразу):

Чтец: И ныне и присно и во веки веков, Аминь.

Свет возсия́й, Го́споди, ду́шу мою очи́сти от вся́кого греха:

Хор (допевает последнюю фразу):

Чтец: Хвали́те Го́спода с небе́с. Тебе́ подоба́ет песнь Бо́гу. Хвали́те Го́спода с небе́с, хвали́те Его́ в вы́шних. Тебе́ подоба́ет песнь Бо́гу. Хвали́те Его́, вси А́нгели Его́, хвали́те вся Си́лы Его́. Тебе́ подоба́ет песнь Бо́гу.

Псалом 148:

Хвали́те Его́, со́лнце и луна́, хвали́те Его́, вся зве́зды и свет. Хвали́те Его́ Небеса́ небе́с и вода́, я́же превы́ше небе́с. Да восхва́лят и́мя Госпо́дне: я́ко Той рече́, и бы́ша, Той повеле́, и созда́шася. Поста́ви я́ в век и в век ве́ка, повеле́ние положи́, и не ми́мо и́дет. Хвали́те Го́спода от земли́, зми́еве и вся бе́здны: огнь, град, снег, го́лоть, дух бу́рен, творя́щая сло́во Его́, го́ры и вси хо́лми, древа́ плодоно́сна и вси ке́дри, зве́рие и вси ско́ти, га́ди и пти́цы перна́ты. Ца́рие зе́мстии и вси лю́дие, кня́зи и вси судии́ зе́мстии, ю́ноши и де́вы, ста́рцы с ю́нотами да восхва́лят и́мя Госпо́дне, я́ко вознесе́ся и́мя Того́ Еди́наго, испове́дание Его́ на земли́ и на небеси́. И вознесе́т рог люде́й Свои́х, песнь всем преподо́бным Его́, сыново́м Изра́илевым, лю́дем, приближа́ющимся Ему́.

Псалом 149:

Воспо́йте Го́сподеви песнь но́ву, хвале́ние Его́ в це́ркви преподо́бных. Да возвесели́тся Изра́иль о Сотво́ршем eго́, и сы́нове Сио́ни возра́дуются о Царе́ свое́м. Да восхва́лят и́мя Его́ в ли́це, в тимпа́не и псалти́ри да пою́т Ему́. Я́ко благоволи́т Госпо́дь в лю́дех Свои́х, и вознесе́т кро́ткия во спасе́ние. Восхва́лятся преподо́бнии во сла́ве и возра́дуются на ло́жах свои́х. Возноше́ния Бо́жия в горта́ни их, и мечи́ обою́ду остры́ в рука́х их: сотвори́ти отмще́ние во язы́цех, обличе́ния в лю́дех, связа́ти цари́ их пу́ты, и сла́вныя их ручны́ми око́вы желе́зными.

На 6: Сотвори́ти в них суд напи́сан. / Сла́ва сия́ бу́дет всем преподо́бным Его́.

Псалом 150:

Хвали́те Бо́га во святы́х Его́, / хвали́те Его́ во утверже́нии си́лы Его́.

На 4: Хвали́те Его́ на си́лах Его́, / хвали́те Его́ по мно́жеству вели́чествия Его́.

Хвали́те Его́ во гла́се тру́бнем, / хвали́те Его́ во псалти́ри и гу́слех.

Хвали́те Его́ в тимпа́не и ли́це, / хвали́те Его́ во стру́нах и орга́не.

Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тебе́ сла́ва подоба́ет, Го́споди Бо́же наш, и Тебе́ сла́ву возсыла́ем, Отцу́, и Сы́ну, и Свято́му Духу́, ны́не и при́сно, и во ве́ки веко́в, ами́нь.

Чтец: Сла́ва Тебе́, показа́вшему нам свет.

Славословие вседневное.

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя вели́кия ра́ди сла́вы Твоея́. Го́споди, Царю́ Небе́сный, Боже, О́тче Вседержи́телю, Го́споди Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас. Взе́мляй грехи́ ми́ра, приими́ моли́тву на́шу. Седя́й одесну́ю Отца́, поми́луй нас. Я́ко Ты еси́ Еди́н Свят; Ты еси́ Еди́н Госпо́дь, Иису́с Христо́с, во сла́ву Бо́га Отца́, ами́нь.

На всяк день благословлю́Тя и восхвалю́ и́мя Твое́ во ве́ки, и в век ве́ка.

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́мя твори́ти во́лю Твою́, я́ко Ты еси́ Бог мой, я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Сподо́би Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки, ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри: Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

ПРОСИТЕЛЬНАЯ ЕКТЕНИЯ.

Диа́кон: Испо́лним у́тренюю моли́тву на́шу Го́сподеви.

Хор:

(Так же и на следующее прошение)

Диа́кон: Заступи́, спаси́, поми́луй и сохрани́ нас, Бо́же, Твое́ю благода́тию.

Диа́кон: Дне́ всего́ соверше́нна, свя́та, ми́рна и безгре́шна у Го́спода про́сим.

Хор:

Диа́кон: Ангела ми́рна, ве́рна наста́вника, храни́теля душ и теле́с на́ших, у Го́спода про́сим.

Проще́ния и оставле́ния грехо́в и прегреше́ний на́ших у Го́спода про́сим.

До́брых и поле́зных душа́м на́шим и ми́ра ми́рови у Го́спода про́сим.

Про́чее вре́мя живота́на́шего в ми́ре и покая́нии сконча́ти у Го́спода про́сим.

Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и друг дру́га, и весь живо́т наш Христу́Бо́гу предади́м.

Хор:

Иере́й: Яко Бог милости и щедрот и человеколюбия еси и Тебе славу возсылаем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор:

Иере́й: Мир всем.

Хор:

Диа́кон: Главы́ на́ша Го́сподеви прикло́ним.

Хор:

Иере́й: Твое́ бо е́сть, е́же ми́ловати и спаса́ти ны, Бо́же наш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор:

СТИХИРЫ НА СТИХОВНЕ

Глас 2 (стихиры Триоди):

В че́сти сы́й сыновства́,/ Отца́ блага́го несмы́сленный а́з не разуме́х:/ но себе́ сла́вы лиши́х, бога́тство зле́ ижди́в благода́ти./ Недоста́точествуемь же Боже́ственныя пи́щи,/ ласка́тель бы́х скве́рному граждани́ну,/ от него́же по́слан бы́х в душетле́нное его́ село́,/ живы́й блу́дно, пасо́мь бы́х со скоты́,/ и сласте́м рабо́тая не насыща́хся:/ но обра́щься вопию́ благоутро́бному и ще́дрому Отцу́:// на не́бо и пред Тобо́ю согреши́х, поми́луй мя́.

Сти́х: Испо́лнихомся зау́тра ми́лости Твоея́ Го́споди, и возра́довахомся и возвесели́хомся: во вся́ дни́ на́шя возвесели́хомся: за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́,/ и наста́ви сы́ны и́х.

В че́сти сы́й сыновства́,/ Отца́ блага́го несмы́сленный а́з не разуме́х:/ но себе́ сла́вы лиши́х, бога́тство зле́ ижди́в благода́ти./ Недоста́точествуемь же Боже́ственныя пи́щи,/ ласка́тель бы́х скве́рному граждани́ну,/ от него́же по́слан бы́х в душетле́нное его́ село́,/ живы́й блу́дно, пасо́мь бы́х со скоты́,/ и сласте́м рабо́тая не насыща́хся:/ но обра́щься вопию́ благоутро́бному и ще́дрому Отцу́:// на не́бо и пред Тобо́ю согреши́х, поми́луй мя́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с,/ и де́ло ру́к на́ших испра́ви.

Святы́х Твои́х мно́жества мо́лят Тя́ Христе́,/ поми́луй ны́,// я́ко Человеколю́бец.