Слава Отцу и Сыну и Святому Духу.

Струю́ живу́ю име́я лия́нием Ду́ха, в души́, Богому́дре,/ источи́л еси́, о́тче, ре́ки уче́ний, Це́рковь напоя́ющия,/ благоче́стно тя честву́ющую.

И ныне и присно и во веки веков, Аминь.

Богоро́дичен: Всю Тя освяща́ет Святы́й,/ от Твоея́ пло́ти заи́мствовавый пло́ть Себе́, Богоро́дице,/ во святы́х Госпо́дь живы́й, Бог наш.

Песнь 8

Чтецы: Благослови́те, вся дела́ Госпо́дня, Го́спода, / по́йте и превозноси́те Его́ во ве́ки.

Благослови́те, А́нгели Госпо́дни, Небеса́ Госпо́дня, Го́спода, / по́йте и превозноси́те Его́ во ве́ки.

Благослови́те, во́ды вся, я́же превы́ше Небе́с, вся си́лы Госпо́дни, Го́спода, / по́йте и превозноси́те Его́ во ве́ки.

Благослови́те, со́лнце и ме́сяц, зве́зды небе́сныя, Го́спода, / по́йте и превозноси́те Его́ во ве́ки.

Благослови́те, всяк дождь и роса́, вси ду́си, Го́спода, / по́йте и превозноси́те Его́ во ве́ки.

Благослови́те, огнь и вар, студь и зной, Го́спода, / по́йте и превозноси́те Его́ во ве́ки.

(Канон Минеи):

Хор ирмос глас 4:

Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Чтецы:

Стих: Благослови́те, ро́сы и и́ней, ле́ди и мраз Го́спода, / по́йте и превозноси́те Его́ во ве́ки.

Дрема́ние небреже́ния, блаже́нне, от ве́ждей душе́вных отри́нув,/ пра́ведным прили́чным ны́не усну́л еси́ сном/ и ко дню невече́рняго Све́та преше́л еси́.

Стих: Благослови́те, сла́ны и сне́зи, но́щи и дни́е, Го́спода, / по́йте и превозноси́те Его́ во ве́ки.

Дрема́ние небреже́ния, блаже́нне, от ве́ждей душе́вных отри́нув,/ пра́ведным прили́чным ны́не усну́л еси́ сном/ и ко дню невече́рняго Све́та преше́л еси́.

Стих: Благослови́те, свет и тьма, мо́лния и о́блацы, Го́спода, / по́йте и превозноси́те Его́ во ве́ки.

Мо́лниями слове́с твои́х попали́л еси́ хвра́стную е́ресь, приснопа́мятне,/ и ве́рныя просвети́л еси́ еди́ну че́сти Тро́ицу начерта́ньми,/ во Еди́нице су́щую Естества́.

Стих: Благослови́те, земля́, го́ры и хо́лми и вся, прозяба́ющая на ней, Го́спода, / по́йте и превозноси́те Его́ во ве́ки.

Освяти́в себе́ поще́ньми, ме́ртву тебе́ ра́ди Бы́вшу/ ты безкро́вно же́ртвовал еси́, я́ко святи́тель Боже́ственный,/ я́ко та́ин неизрече́нных служи́тель, Кири́лле.

Стих: Благослови́те, исто́чницы, моря́ и ре́ки, ки́ты и вся, дви́жущаяся в вода́х, Го́спода,/ по́йте и превозноси́те Его́ во ве́ки.

Богоро́дичен: Изба́вльшеся кля́твы прама́терния Тобо́ю, Чи́стая Богома́ти,/ Благослове́нная Влады́чице,/ благослови́м, Деви́це препросла́вленная, пресвято́е рождество́ Твое́, Всечи́стая.

(1-й трипеснец Триоди):

Стих: Благослови́те, вся пти́цы небе́сныя, зве́рие и вси ско́ти, Го́спода, / по́йте и превозноси́те Его́ во ве́ки.

Кресто́м нача́ла победи́вый, и вла́сти те́мныя, Светода́вче, егда́ прии́деши со вла́стию суди́ти ми́ру всему́, да не моя́ Сло́ве объяви́ши та́йная, да мно́гое Твое́ прославля́ю благоутро́бие.

Стих: Благослови́те, сы́нове челове́честии, / да благослови́т Изра́иль Го́спода, / по́йте и превозноси́те Его́ во ве́ки.

Суди́мь Судия́ пред суди́щем ста́л еси́, осужда́я вражду́ Кресто́м Твои́м, долготерпели́ве правосу́де. Те́мже осужде́ния ве́чнаго изба́ви, стра́хом зову́щыя и превознося́щыя Твое́ человеколю́бие.

Стих: Благослови́те, свяще́нницы Госпо́дни, раби́ Го́спода, / по́йте и превозноси́те Его́ во ве́ки.

Поста́ огне́м обостри́вшеся де́ти благочести́вии, возвыше́ный дре́вле пла́мень, Боже́ственною росо́ю угаси́ша вои́стинну. и мы́ постя́щеся, пе́щи все́х страсте́й угаси́м, я́ко да гее́нскаго избе́гнем пла́мене.

Стих: Благослови́те, ду́си и ду́ши пра́ведных, / преподо́бнии и смире́ннии се́рдцем, Го́спода, / по́йте и превозноси́те Его́ во ве́ки.

Богоро́дичен: Из Тебе́ Бо́жия му́дрость хра́м Себе́ созда́вши, воплоти́ся неизрече́нным снизхожде́нием, Отрокови́це неискусобра́чная: Ты́ бо еди́на от все́х родо́в избра́нна еси́ нетле́нная, нетле́ннаго в жили́ще Сло́ва.

(2-й трипеснец Триоди):

Стих: Благослови́те, Ана́ния, Аза́рия, Мисаи́л, Го́спода, / по́йте и превозноси́те Его́ во ве́ки.

Нося́й вся́ сло́вом, мене́ ра́ди вся́ терпи́ши, зауше́ния, и оплева́ния, и распя́тие Христе́: хвалю́ вели́чия Твоего́ человеколю́бия во вся́ ве́ки.

Стих: Благослови́те, Апо́столи, проро́цы и му́ченицы Госпо́дни, Го́спода, / по́йте и превозноси́те Его́ во ве́ки.

Закала́ешися Христе́ я́ко А́гнец, прободе́н в ре́бра Твоя́, да мя́ овча́ заблу́ждшее спасе́ши от се́ти диа́воли, и до́брей твое́й огра́де причте́ши во ве́ки.

Благослови́м Отца́ и Сына́ и Свята́го Ду́ха, Го́спода.

Тро́ичен: Божество́ еди́но Тро́ице, неразде́льное Естество́, разде́льно же Ли́цы, присносу́щная держа́во, О́тче, Сы́не, и Ду́ше Святы́й, Тя́ песносло́вим во вся́ ве́ки.

И ны́не и при́сно и во ве́ки веко́в, ами́нь.

Богоро́дичен: Богороди́тельнице Чи́стая, небе́сная две́ре, спаси́тельная врата́, все́х христиа́н мольбу́ приими́, Тебе́ блажа́щих во вся́ ве́ки.

Стих: Сла́ва Тебе́, Бо́же наш, сла́ва Тебе́.

О Кресте́ Твое́м Христе́, свяще́нницы хва́лятся, и́ноки укрепля́ются, вся́кий просвеща́ется ве́рный: сподо́би мя́ сего́ ви́дети, и поклони́тися, и пе́ти во ве́ки.

Хор: