Апостол к Филипписием, зачало 240.

Бра́тие, сие́ да му́дрствуется в вас, е́же и во Христе́ Иису́се. И́же во о́бразе Бо́жии сы́й, не восхище́нием непщева́ бы́ти ра́вен Бо́гу. Но Себе́ ума́лил, зрак раба́ прии́м, в подо́бии челове́честем быв, и о́бразом обре́теся я́коже челове́к. Смири́л Себе́, послушли́в быв да́же до сме́рти, сме́рти же кре́стныя. Те́мже и Бог Его́ превознесе́, и дарова́ Ему́ и́мя, е́же па́че вся́каго и́мене. Да о и́мени Иису́сове вся́ко коле́но поклони́тся Небе́сных, и земны́х, и преиспо́дних. И всяк язы́к испове́сть, я́ко Госпо́дь Иису́с Христо́с, в сла́ву Бо́га Отца́.

Флп 2:5–11

Аллилуиа, глас 2.

Стих: Воскресни́, Го́споди, в поко́й Твой, Ты и Киво́т святы́ни Твоея́. Стих: Кля́тся Госпо́дь Дави́ду и́стиною и не отве́ржется ея́.

Евангелие Луки, зачало 54.

Во вре́мя о́но, вни́де Иису́с в весь не́кую: жена́ же не́кая и́менем Ма́рфа прия́т Его́ в дом свой. И сестра́ ей бе нарица́емая Мари́я, я́же и се́дши при ногу́ Иису́сову, слы́шаше сло́во Его́. Ма́рфа же мо́лвяше о мно́зе слу́жбе, ста́вши же рече́: Го́споди, не бреже́ши ли, я́ко сестра́ моя́ еди́ну мя оста́ви служи́ти; рцы у́бо ей, да ми помо́жет. Отвеща́в же Иису́с, рече́ ей: Ма́рфо, Ма́рфо, пече́шися и мо́лвиши о мно́зе. Еди́но же есть на потре́бу. Мари́я же благу́ю часть избра́, я́же не оты́мется от нея́. Бысть же егда́ глаго́лаше сия́, воздви́гши не́кая жена́ глас от наро́да, рече́ Ему́: блаже́но чре́во носи́вшее Тя, и сосца́, я́же еси́ ссал. Он же рече́: те́мже у́бо блаже́ни слы́шащии сло́во Бо́жие, и храня́щии е́.

Лк 10:38–42; 11:27–28

Вместо Достойно:

А́нгели, успе́ние Пречи́стыя ви́девше, удиви́шася, / ка́ко Де́вая восхо́дит от земли́ на Не́бо.

Ирмос, глас 1: Побежда́ются естества́ уста́вы / в Тебе́, Де́во Чи́стая: / де́вствует бо рождество́ и живо́т предобруча́ет смерть; / по рождестве́ Де́ва и по сме́рти жива́, / спаса́еши при́сно, Богоро́дице, насле́дие Твое́. И до отдания.

Причастен:

Ча́шу спасе́ния прииму́, / и и́мя Госпо́дне призову́. / Аллилу́иа, трижды.

На трапезе утешение братии. Аще ли будет праздник сей в среду или в пяток, разрешаем точию на рыбу и вино. Аще ли в понедельник, и миряне разрешают на мясо, и сыры и яица. Монаси же точию на рыбу и вино.

Празднуется убо сей праздник девять дней.

 

 

В оглавление.

 

Мѣ́сяца а́вгуста въ 17-й де́нь.

ПОХВАЛЫ,
или́ свяще́нное послѣ́дованіе
на свято́е преставле́ніе
Пресвяты́я Влады́чицы на́шея
Богоро́дицы и Приснодѣ́вы Марíи,
пое́мое въ седьмы́й на́десять де́нь
мѣ́сяца Августа, каждого́дно
въ ски́тѣ Геѳсима́ніи.

Изъ книгъ намѣстника Троицко-Сергіевой Лавры архим. Антонія (Медведева)
[Служба на Успение Богоматери в Гефсиманскомъ ските.
Рукопись № 290 XIX в. (не ранее 1846) из собрания Свято-Троицкой Сергиевой Лавры
(«Дополнительная библиотека»)]

НА ВЕЛИЦѢЙ ВЕЧЕРНИ,

Стихосло́вимъ Блаже́нъ му́жъ, 1-й антифо́нъ. На Го́споди воззва́хъ, ста́вимъ стихо́въ 8, и пое́мъ стихи́ры пра́здника, гла́съ 1:

Сти́хъ: Изъ глубины́ воззва́хъ къ Тебѣ́, Го́споди: Го́споди, услы́ши гла́съ мо́й.

О, ди́вное чу́до! / Исто́чникъ Жи́зни / во гро́бѣ полага́ется, / и лѣ́ствица къ небеси́ гро́бъ быва́етъ. / Весели́ся Геѳсима́ніе, / Богоро́диченъ святы́й до́ме. / Возопіе́мъ вѣ́рніи, / Гавріи́ла иму́ще чинонача́льника: / Благода́тная, ра́дуйся, / съ Тобо́ю Госпо́дь, / подая́й мíрови Тобо́ю ве́лію ми́лость.

Сти́хъ: Да бу́дутъ у́ши Твои́ вне́млющѣ гла́су моле́нiя моего́.

Ди́вны Тво́я та́йны, Богоро́дице: / Вы́шняго престо́лъ / яви́лася eси́, Влады́чице, / и отъ земли́ къ небеси́ преста́вилася eси́ дне́сь. / Сла́ва Твоя́ боголѣ́пная, / богоподо́бными сія́ющи чудесы́. / Дѣ́вы съ Ма́терію Царе́вою, / на высоту́ вознеси́теся. / Благода́тная, ра́дуйся, / съ Тобо́ю Госпо́дь, / подая́й мíрови Тобо́ю ве́лію ми́лость.

Сти́хъ: А́ще беззако́нiя на́зриши, Го́споди, Го́споди, кто́ постои́тъ? Я́ко у Тебе́ очище́нiе е́сть.

Твое́ сла́вятъ успе́ніе / Вла́сти и Престо́ли, / Нача́ла и Госпо́дьства, / Си́лы и Херуви́ми, и стра́шніи Серафи́ми, / ра́дуются земноро́дніи, / о Боже́ственнѣй Твое́й сла́вѣ крася́щеся, / припа́даютъ ца́ріе со Арха́нгелы и Ангелы, и воспѣва́ютъ: / Благода́тная, ра́дуйся, / съ Тобо́ю Госпо́дь, / подая́й мíрови Тобо́ю ве́лію ми́лость.

Сти́хъ: И́мене ра́ди Твоего́ потерпѣ́хъ Тя́, Го́споди, потерпѣ́ душа́ моя́ въ сло́во Твое́: упова́ душа́ моя́ на Го́спода.

Ины стихи́ры изъ Іерусали́мскаго послѣ́дованія, гла́съ 6:

Дне́шній де́нь та́йно / вели́кій псалмопѣ́вецъ прообразова́ше, глаго́ля: / воскресни́, Го́споди, въ поко́й Тво́й, / Ты́ и Киво́тъ святы́ни Твоея́. / И па́ки: предста́, глаго́ля, Цари́ца одесну́ю Тебе́, / ря́сны златы́ми одѣ́яна, преиспещре́на. / Сія́ бо е́сть благослове́нная суббо́та, / се́й е́сть упокое́нія Боже́ственный де́нь, / въ о́ньже почи́ отъ живота́ Ма́терь су́щи Живота́, / смотре́ніемъ е́же на сме́рть, / пло́тію суббо́тствовавшая и преста́вльшаяся, / и на небеса́ возше́дшая, / си́лою И́же изъ Нея́ вопло́щшагося Христа́ Бо́га, / и съ Ни́мъ во вѣ́ки вѣко́въ вѣ́чнующая, / и да́рующая на́мъ живо́тъ вѣ́чный, / съ любо́вію чту́щимъ свято́е Ея́ успе́ніе.

Гла́съ 2. Подо́бенъ: Егда́ отъ дре́ва.

Сти́хъ: От стра́жи у́треннiя до но́щи, от стра́жи у́треннiя да упова́етъ Изра́иль на Го́спода.

Егда́ отъ мíра, Жи́знь су́щи, / ро́ждшая Жи́знь вся́ческихъ, Сы́на Бо́жія во пло́ти, / взе́млема была́ еси́, / восходя́щи во вхо́ды боже́ственныя, небе́сныя, Чи́стая, / тогда́ чу́до сбы́сться, / е́же возгласи́ Ду́хъ Святы́й: / кто́ Сія́, ны́нѣ восходя́щая отъ пусты́ни? / Вся́ же со стра́хомъ вопія́ху: / сла́ва восхожде́нію Твоему́, Любоблага́я.

Сти́хъ: Я́ко у Го́спода ми́лость, и мно́гое у Него́ избавле́нiе: и то́й изба́витъ Изра́иля от всѣ́хъ беззако́нiй его́.

Егда́ во гро́бѣ, Маріа́мъ, / въ Геѳсима́ніи положи́лася еси́ пло́тію, / естества́ Оживотвори́тельнице, / тогда́ вся́ тва́рь, зря́щи Тя́, ужасе́ся; / Творе́цъ же ду́хъ Тво́й, ру́цѣ распросте́ръ, / благода́тнѣ прія́тъ, я́ко должни́къ Сы́нъ. / Еже Безпло́тныхъ чи́ни зря́ще, / со стра́хомъ вопія́ху: / сла́ва восхожде́нію Твоему́, Любоблага́я.

Сти́хъ: Хвали́те Го́спода, вси́ язы́цы, похвали́те Его́, вси́ лю́дiе.

Егда́ тріе́ свяще́нницы, / Ареопаги́тъ о́ный и Іероѳе́й съ Тимоѳе́емъ, / Твое́ боже́ственное уви́дѣша, Всенетлѣ́нная, успе́ніе, / тогда́, сле́зы точа́ще, глаго́лютъ си́це: / ка́ко стерпи́мъ страда́ніе въ мíрѣ? / Въ Тебѣ́ бо, о Дѣ́вая, / Сы́на Твоего́ мнѣ́хомъ зрѣ́ти и утѣша́хомся.

Гла́съ 5. Сти́хъ: Я́ко утверди́ся ми́лость Его́ на на́съ, и и́стина Госпо́дня пребыва́етъ во вѣ́къ.

Тебе́, одѣ́ющагося свѣ́томъ, я́ко ри́зою, / Сы́на Бо́жія ро́ждшую, / ли́къ учени́къ Его́ ви́дѣвъ ме́ртву, / во гро́бѣ, мра́ка испо́лненномъ, просте́рту, / благосе́рдный пла́чь воспріи́мъ, рыда́я, глаго́лаше: / увы́ мнѣ́, сладча́йшая Маріа́мъ, / Ю́же въ ма́лѣ имѣ́хъ утѣше́ніе, / и ви́дя Тебе́ мнѣ́хъ, Учи́теля моего́ зрѣ́ти, / но се́, ны́нѣ ви́жду Тя́ / по зако́ну естества́ подъе́мшу сме́рть. / О, ка́ко Тя́ погребу́, Дѣ́во, / или́ ка́ко плащани́цами обвію́? / Кíими же рука́ма прикосну́ся нетлѣ́нному Твоему́ тѣ́лу? / Или́ кíя пѣ́сни воспою́, Твоему́ исхо́ду досто́йныя? / Ка́ко же стерплю́, Госпоже́, / Твое́, ско́рбное ми, отше́ствіе? / Или́ ка́ко безтру́дно понесу́ всетя́жкое сиротство́? / Недоумѣва́ю, блаже́нная Богоро́дице Марíе, / и болѣ́зненнымъ се́рдцемъ соплета́ю пѣснопѣ́нія, / и велича́ю Тя́, Влады́чице, / пѣсносло́влю зача́тіе Твое́, / почита́ю Твое́ боже́ственное рождество́, / чту́ восхожде́ніе Твое́, Дѣ́во. / Ублажа́ю же успе́ніе Твое́ / и всесвято́е погребе́ніе Твое́ со преставле́ніемъ, зовы́й: / Го́споди, сла́ва Тебѣ́.

Сла́ва, и ны́нѣ, гла́съ 1: Богонача́льнымъ манове́ніемъ, / отвсю́ду Богоно́сніи апо́столи, / о́блаки высо́цѣ взима́еми, / доше́дше пречи́стаго и живонача́льнаго Твоего́ тѣ́ла, / любе́зно лобыза́ху. / Превы́шнія же небе́сныя си́лы, / съ свои́мъ Влады́кою прише́дше, / богопрія́тное и пречи́стое тѣ́ло предсыла́юще, / у́жасомъ одержи́ми; / прекра́сно же предъидя́ху, / и неви́димо вопія́ху превы́шнимъ чинонача́ліемъ: / се́ Всецари́ца Богоотрокови́ца пріи́де. / Возми́те врата́ и Сію́ премíрно подъими́те, / Присносу́щаго Ма́терь Свѣ́та, / Тоя́ бо ра́ди всеро́дное человѣ́комъ спасе́ніе бы́сть. / На Ню́ же взира́ти не мо́жемъ, / и То́й досто́йную че́сть возда́ти немо́щно: / Тоя́ бо преизя́щное прехо́дитъ вся́къ у́мъ. / Тѣ́мже, Пречи́стая Богоро́дице, / при́сно съ Живоно́снымъ Царе́мъ, и Рождество́мъ живу́щи, / моли́ся вы́ну сохрани́ти и спасти́, / отъ вся́каго прило́га проти́внаго, / но́выя лю́ди Твоя́: / Твое́ бо предста́тельство стяжа́хомъ, / во вѣ́ки свѣтоявле́нно блажа́ще.

Вхо́дъ.

Проки́менъ, гла́съ 2:

Воскресни́, Го́споди, въ поко́й Тво́й, / Ты́ и Киво́тъ святы́ни Твоея́. Сти́хъ: Кля́тся Госпо́дь Дави́ду и́стиною и не отве́ржется ея́.

Чте́нія три́:

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и А́нгели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Я́ко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому – ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости – стра́хъ Госпо́день, и совѣ́тъ святы́хъ – ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, самогла́сны, гла́съ 1.

Подоба́ше самови́дцамъ Сло́ва и слуга́мъ, / и е́же по пло́ти Ма́тере Его́ успе́ніе ви́дѣти, / коне́чное ели́ко на Не́й та́инство, / я́ко да не то́кмо е́же отъ земли́ Спа́сово восхожде́ніе у́зрятъ, / но и Ро́ждшія Его́ преставле́нію свидѣ́тельствуютъ. / Тѣ́мже, отвсю́ду Боже́ственною си́лою собра́вшеся, / Сіо́на достиго́ша, / и на не́бо иду́щую предсыла́ху, вы́шшую Херуви́мъ, / Ейже и мы́ съ ни́ми покланя́емся, / я́ко моля́щейся о душа́хъ на́шихъ.

Гла́съ 2. Анато́ліево:

Я́же небе́съ вы́шшая су́щи, / и херуви́мъ сла́внѣйшая, / и всея́ тва́ри честнѣ́йшая, / я́же премно́гія ра́ди чистоты́, / Присносу́щнаго Существа́ прія́телище бы́вши, / въ Сыно́внѣ ру́цѣ дне́сь всесвяту́ю предае́тъ ду́шу, / и съ Не́ю исполня́ются вся́ческая ра́дости, / и на́мъ да́руетъ ве́лію ми́лость.

Іоа́нново:

Всенепоро́чная Невѣ́ста / и Ма́ти Благоволе́нія Отча, / Я́же Бо́гу пронарече́нная, / во Свое́ Ему́ жили́ще, несли́тнаго соедине́нія, / дне́сь пречи́стую ду́шу Творцу́ и Бо́гу предае́тъ, / Ю́же безпло́тныхъ си́лы боголѣ́пно подъе́млютъ, / и къ животу́ преставля́ется, / су́щая Ма́ти Живота́, / Свѣща́ непристу́пнаго Свѣ́та, / спасе́ніе вѣ́рныхъ, / и упова́ніе ду́шъ на́шихъ.

Гла́съ 3. Ге́рманово:

Пріиди́те, вси́ концы́ земнíи, / честно́е преставле́ніе Богома́тере восхва́лимъ: / въ ру́цѣ бо Сы́на ду́шу непоро́чную положи́. / Тѣ́мже святы́мъ успе́ніемъ Ея́ мíръ оживотвори́ся, / во псалмѣ́хъ, и пѣ́ніихъ и пѣ́снехъ духо́вныхъ, / со безпло́тными и апо́столы пра́зднуетъ свѣ́тло.

Сла́ва, гла́съ 5: Ѳеофа́ново: Пріиди́те, празднолю́бныхъ собо́ръ, / пріиди́те, и ли́къ соста́вимъ, / пріиди́те, вѣнча́емъ / пѣ́сньми Це́рковь, / упокое́ніемъ Ковче́га Бо́жія. / Дне́сь бо не́бо простира́етъ нѣ́дра, / пріе́мля Ро́ждшую всѣ́ми Невмѣсти́маго, / и земля́, исто́чникъ жи́зни, отдаю́щи благослове́ніе, / украша́ется благолѣ́піемъ. / А́нгели ли́къ составля́ютъ со апо́столы, / ужа́сно взира́юще / отъ живота́ въ живо́тъ преставля́ему, / Ро́ждшую Нача́льника жи́зни. / Вси́ поклони́мся Ей́, моля́щеся: / сро́дна присвое́нія не забу́ди, Влады́чице, / вѣ́рно пра́зднующихъ всесвято́е Твое́ успе́ніе.

И ны́нѣ, гла́съ то́йже: Воспо́йте, лю́діе, / Ма́тери Бо́га на́шего, воспо́йте: / дне́сь бо всесвѣ́тлую ду́шу Свою́ въ пречи́стыя дла́ни, / И́же изъ Нея́ Вопло́щшагося безъ сѣ́мене предае́тъ, / Его́же и мо́литъ непреста́нно, / дарова́ти вселе́ннѣй ми́ръ, и ве́лію ми́лость.

На стихо́внѣ стихи́ры самогла́сны, гла́съ 4:

Пріиди́те, воспое́мъ, лю́діе, / Пресвяту́ю Дѣ́ву Чи́стую, / изъ Нея́же неизрече́нно про́йде, / вопло́щся, Сло́во Отчее, / зову́ще и глаго́люще: / благослове́нна Ты́ въ жена́хъ, / блаже́нное чре́во, вмѣсти́вшее Христа́. / Того́ святы́мъ рука́мъ ду́шу преда́вши, / моли́ся, Пречи́стая, / спасти́ся душа́мъ на́шимъ.

Сти́хъ: Воскресни́, Го́споди, въ поко́й Тво́й, / Ты́ и Киво́тъ святы́ни Твоея́.

Дави́дскую пѣ́снь дне́сь, лю́діе, воспое́мъ Христу́ Бо́гу: / приведу́тся, рече́, Царю́ дѣ́вы въ слѣ́дъ Ея́, / и и́скренняя Ея́ приведу́тся въ весе́ліи и ра́дованіи. / Ибо отъ сѣ́мене Дави́дова, / Ея́же ра́ди мы́ обожи́хомся, / въ ру́цѣ Своего́ Сы́на и Влады́ки, / сла́вно и па́че сло́ва прелага́ется, / Ю́же, я́ко Ма́терь Бо́жію, воспѣва́юще, / вопіе́мъ и глаго́лемъ: / спаси́ на́съ, исповѣ́дающихъ Тя́, Богоро́дицу, / отъ вся́каго обстоя́нія, / и изба́ви отъ бѣ́дъ ду́ши на́ша.

Сти́хъ: Кля́тся Госпо́дь Дави́ду и́стиною, / и не отве́ржется eя́.

Всечестно́е Твое́ успе́ніе, / Пресвята́я Дѣ́ва Чи́стая, / А́нгелъ мно́жества на небеси́, / и человѣ́ческій ро́дъ на земли́, ублажа́емъ, / я́ко Ма́ти была́ еси́ Творца́ всѣ́хъ, Христа́ Бо́га, / Того́ моля́щи не преста́й о на́съ, мо́лимся, / и́же на Тя́ съ Бо́гомъ упова́ніе поло́жшихъ, / Богоро́дице Всепѣ́тая и Неискусобра́чная.

Сла́ва, и ны́нѣ, гла́съ то́йже: Егда́ изшла́ еси́, Богоро́дице Дѣ́во, / ко изъ Тебе́ Ро́ждшемуся неизрече́нно, / бя́ше Іа́ковъ, бра́тъ Бо́жій и пе́рвый священнонача́льникъ, / Пе́тръ же, честнѣ́йшій верхо́вникъ, / богосло́вовъ нача́льникъ, / и ве́сь боже́ственный апо́стольскій ли́къ, / явле́ннымъ богосло́віемъ пѣсносло́вяще, / Боже́ственное и стра́шное Христа́ Бо́га смотре́нія та́инство, / и живонача́льное и богопрія́тное Твое́ тѣ́ло погре́бше, / ра́довахуся, Всепѣ́тая. / Превы́ше же пресвяты́я и старѣ́йшія а́нгельскія си́лы, / чудеси́ дивя́щеся, / прини́кше дру́гъ ко дру́гу глаго́лаху: / возми́те ваша́ врата́, / и воспріими́те Ро́ждшую небесе́ и земли́ Творца́, / славословле́нми же воспое́мъ честно́е и свято́е тѣ́ло, / вмѣсти́вшее на́ми Неви́димаго и Го́спода. / Тѣ́мже и мы́, па́мять Твою́ пра́зднующе, / вопіе́мъ Ти́, Препѣ́тая: / христіа́нскій ро́гъ вознеси́, и спаси́ ду́ши на́ша.

На благослове́ніи хлѣ́бовъ тропа́рь, гла́съ 1:

Въ рождествѣ́ дѣ́вство сохрани́ла eси́, / во успе́ніи мíра не оста́вила eси́, Богоро́дице, / преста́вилася eси́ къ животу́, Ма́ти су́щи Живота́, / и моли́твами Твои́ми избавля́еши отъ сме́рти ду́ши на́ша. [Три́жды.]

И быва́етъ благослове́ніе хлѣ́бовъ и раздробле́ніе, и, а́ще изво́литъ настоя́тель, чре́зъ діа́коновъ дае́тъ все́й це́ркви.

По возгла́сѣ: Благослове́ніе Госпо́дне на ва́съ.., быва́етъ чте́ніе о Успе́ніи Пресвяты́я Влады́чицы на́шея Богоро́дицы, и а́ще изво́литъ настоя́тель, съ нѣ́кіимъ сокраще́ніемъ, да въ мѣ́ру бу́детъ слу́жба.

НА УТРЕНИ.

По шестопса́лміи и по вели́цѣй ектеніи́ поставля́ется посредѣ́ це́ркве укра́шенный анало́гій, и пѣва́ему: Бо́гъ Госпо́дь и яви́ся на́мъ, исхо́дитъ отъ алтаря́ предстоя́тель, неся́ о́бразъ Успе́нія Пресвяты́я Богоро́дицы, послѣ́дуютъ же ему́ свяще́нницы въ облаче́ніи, и полага́ется о́бразъ на анало́гіи, и раздае́тъ предстоя́тель свѣщи́ бра́тіи, и благословля́етъ діа́кономъ и пономаре́мъ раздая́ти свѣщи́ та́кожде и наро́ду. И пою́тся сіи́ тропари́ изъ Іерусали́мскаго послѣ́дованія, кадя́щу предстоя́телю святы́мъ и о́бразу.

Гла́съ 2. Подо́бенъ: Благообра́зный Іо́сифъ.

Благообра́зныхъ учени́къ ли́къ ны́нѣ Боже́ственный, о Честна́я, / нескве́рное тѣ́ло Твое́ слеза́ми чи́стыми омочи́въ, я́ко арома́ты, / во гро́бѣ, че́стнѣ погреба́я, положи́, / но тридне́вно преста́вилася еси́, Влады́чице, / подаю́щи мíрови Боже́ственную ми́лость.

Сла́ва: Егда́ снизшла́ еси́ къ сме́рти, Живота́ Ма́ти безсме́ртная, / тогда́ а́дъ удиви́ся и ужасе́ся стра́шно, / егда́ же узрѣ́лася еси́ преста́вльшися на небеса́, Маріа́мъ, отъ гро́ба, / вся́ си́лы небе́сныя взыва́ху: / живоно́сная Ма́ти Живота́ на́шего, сла́ва Тебѣ́.

И ны́нѣ: Свяще́ннымъ ученико́мъ, въ Геѳсима́нію тѣ́ло Ма́тере Бо́жія нося́щимъ, / пѣ́снь, ю́же возглаша́ю, прили́чна е́сть. / Сего́ ра́ди Христа́ Ма́тери, / вои́стинну Еди́нѣй Богоотрокови́цѣ, возопíйте: / воста́ни, о Влады́чице, подаю́щи всѣ́мъ ве́лію ми́лость.

Возглаша́етъ канона́рхъ, на гла́съ 5: Благослове́нъ еси́, Го́споди, научи́ мя оправда́ніемъ Твои́мъ. И чте́тъ 1-й сти́хъ 17-я каѳи́смы: Блаже́ни непоро́чніи.

Статія́ пе́рвая.

1. Блаже́ни непоро́чніи въ пу́ть, ходя́щіи въ зако́нѣ Госпо́дни.

Жи́знь, во гро́бѣ положи́лся еси́, Христе́, / и Ма́терь Живота́ полага́ется: / стра́нное видѣ́ніе А́нгеломъ и человѣ́комъ.

2. Блаже́ни испыта́ющіи свидѣ́нія Его́, всѣ́мъ се́рдцемъ взы́щутъ Его́.

Велича́емъ Тя́, Богоро́дице Чи́стая, / и чти́мъ свято́е Твое́ успе́ніе, / и покланя́емся честно́му гро́бу Твоему́.

3. Не дѣ́лающіи бо беззако́нія въ путе́хъ Его́ ходи́ша.

Маріа́мъ, ка́ко умира́еши, Жи́знь вѣ́рныхъ? / ка́ко же гро́бъ вмѣсти́ Твое́ тѣ́ло, / вмѣсти́вшее Невмѣсти́маго всѣ́ми?

4. Ты́ заповѣ́далъ еси́ за́повѣди Твоя́ сохрани́ти зѣло́.

Небе́съ Царя́, Бо́га, ро́ждшая, / въ небе́сное Ца́рство прелага́ешися, Чи́стая, ца́рски.

5. Дабы́ испра́вилися путіе́ мои́, сохрани́ти оправда́нія Твоя́.

Отъ земли́ преста́вилася еси́ / и отъ земли́ ника́коже отлучи́лася еси́, Всесвята́я Богоро́дице, / избавля́ющи ве́сь мíръ отъ бѣ́дъ.

6. Тогда́ не постыжу́ся, внегда́ призрѣ́ти ми́ на вся́ за́повѣди Твоя́.

Вся́ земля́ сла́витъ погребе́ніе Твое́, Христе́, / и пое́тъ, Влады́ко, погреба́льная Пречи́стыя Твоея́ Ма́тери всеблагоговѣ́йно.

7. Исповѣ́мся Тебѣ́ въ пра́вости се́рдца, внегда́ научи́ти ми ся судьба́мъ пра́вды Твоея́.

А́нгели, зря́ще Тя́, Чи́стая, просте́рту ме́ртву, / Живо́тъ мíру возсія́вшую, / соужаса́ющеся, дивля́хуся.

8. Оправда́нія Твоя́ сохраню́, не оста́ви мене́ до зѣла́.

Па́ки по́сланъ бы́сть Гавріи́лъ отъ Бо́га / и Твое́ благовѣству́етъ изше́ствіе, / Пренебе́сная, Нетлѣ́нная, Чи́стая.

9. Въ чесо́мъ испра́витъ юнѣ́йшій пу́ть сво́й? внегда́ сохрани́ти словеса́ Твоя́.

Въ черто́гъ Боже́ственный, Тебе́ Невѣ́сту Бо́жію, / Жени́хъ призыва́етъ, Богоневѣ́сто, / весели́тися при́сно боголѣ́пно.

10. Всѣ́мъ се́рдцемъ мои́мъ взыска́хъ Тебе́, не отри́ни мене́ отъ за́повѣдей Твои́хъ.

До Престо́ла Бо́жія, / идѣ́же свѣ́тъ Тро́ицы стра́шный и непристу́пный, / дости́гла еси́ и почи́ла еси́, Дѣ́во, и́стинно.

11. Въ се́рдцѣ мое́мъ скры́хъ словеса́ Твоя́, я́ко да не согрѣшу́ Тебѣ́.

Преста́вльшися отъ земли́, Бо́гу предста́ла еси́, Богоро́дице, / отъ Бо́га ника́коже отлуче́на бы́вши / николи́же отъ утро́бы ма́тере.

12. Благослове́нъ еси́, Го́споди, научи́ мя оправда́ніемъ Твои́мъ.

Честно́е Твое́ тѣ́ло, Дѣ́во, / тлѣ́нія и во гро́бѣ не увѣ́дѣ, / но съ тѣ́ломъ прешла́ еси́ отъ земли́ къ небеси́.

13. Устна́ма мои́ма возвѣсти́хъ вся́ судьбы́ у́стъ Твои́хъ.

Всесвято́е Твое́ лице́, Пречи́стая, и ме́ртвое я́ко ра́й явля́шеся, / благода́тію и жи́знію ды́шущее взира́ющимъ.

14. На пути́ свидѣ́ній Твои́хъ наслади́хся, я́ко о вся́комъ бога́тствѣ.

Отъ на́съ, ча́дъ Твои́хъ, Ма́ти, / любо́вь на́шу и пѣ́снь исхо́дную пріими́, / приноси́мую изъ глубины́ души́.

15. Въ за́повѣдехъ Твои́хъ поглумлю́ся и уразумѣ́ю пути́ Твоя́.

Отве́рзи, Ма́ти, честны́я Твои́ о́чи / и на ча́дъ со́бранныхъ при́зри, / Твое́ успе́ніе сла́вящихъ че́стно.

16. Во оправда́нніихъ Твои́хъ поучу́ся, не забу́ду слове́съ Твои́хъ.

Отве́рзи уста́ и да́ждь намъ благослове́ніе, Пресвята́я Богоро́дице, / преста́вльшаяся отъ на́съ коне́чнѣ.

17. Возда́ждь рабу́ Твоему́, живи́ мя, и сохраню́ словеса́ Твоя́.

Не оста́ви на́съ ны́нѣ, си́рыхъ, Ма́ти, / отъ земли́ на не́бо ны́нѣ взе́млема, / сопребыва́ти иму́щая Сы́ну и Бо́гу.

18. Откры́й о́чи мои́, и уразумѣ́ю чудеса́ отъ зако́на Твоего́.

Окрестъ одра́ Твоего́ предстоя́ще, / те́плѣ взыва́емъ Тебѣ́, Дѣ́во: / поми́луй, Всесвята́я, спаси́ всѣ́хъ вѣ́рныхъ.

19. Пришле́цъ а́зъ е́смь на земли́, не скры́й отъ мене́ за́повѣди Твоя́.

Пріиди́ ны́нѣ, Анно, ста́ни съ на́ми, / нача́льствующи во пра́зднествѣ твоея́ / Святы́я Дще́ре, Богома́тере.

20. Возлюби́ душа́ моя́ возжела́ти судьбы́ Твоя́ на вся́кое вре́мя.

Пріиди́те, дади́мъ сла́ву и хвалу́ Бо́гу, / призва́вшему Сію́ во Свята́я, / я́ко Святу́ю, святы́хъ бо́льшую.

21. Запрети́лъ еси́ го́рдымъ, про́кляти уклоня́ющіися отъ за́повѣдей Твои́хъ.

Ны́нѣ прія́тъ не́бо пресла́вно Цари́цу вселе́нныя и весели́тся, / ца́рствующую зря́ съ Бо́гомъ.

22. Отъими́ отъ мене́ поно́съ и уничиже́ніе, я́ко свидѣ́ній Твои́хъ взыска́хъ.

Бо́гъ сла́вы, Сы́нъ Тво́й, Чи́стая, / со сла́вою, я́ко Ма́терь, прія́тъ Тя́ / и посади́ одесну́ю Себе́.

23. Ибо сѣдо́ша кня́зи и на мя́ клевета́ху, ра́бъ же Тво́й глумля́шеся во оправда́ніихъ Твои́хъ.

Облече́нна и преукра́шенна благода́тію, / ны́нѣ предста́ла еси́ Бо́гу, / я́ко Цари́ца и Ма́ти Бо́жія.

24. Ибо свидѣ́нія Твоя́ поуче́ніе мое́ е́сть, и совѣ́ти мои́ оправда́нія Твоя́.

А́нгели, Дѣ́во, служа́ху на земли́, / А́нгели и ны́нѣ на небесѣ́хъ предстоя́тъ Тебѣ́ раболѣ́пно.

25. Прильпе́ земли́ душа́ моя́, живи́ мя по словеси́ Твоему́.

А́нгельская во́инства, слетѣ́вше, / со стра́хомъ обстоя́ху, / Твое́, Честна́я Влады́чице, преставле́ніе зря́ще.

26. Пути́ моя́ возвѣсти́хъ, и услы́шалъ мя́ еси́, научи́ мя оправда́ніемъ Твои́мъ.

И ны́нѣ у́мныя си́лы, мы́сленно съ на́ми предстоя́ще, пою́тъ, / преставле́ніе сла́вяще Твое́.

27. Пу́ть оправда́ній Твои́хъ вразуми́ ми, и поглумлю́ся въ чудесѣ́хъ Твои́хъ.

Отъ коне́цъ пріидо́ша ученицы́ Христо́вы, / послужи́ти погребе́нію Твоему́, Влады́чице, / и воспѣ́ти Твое́ успе́ніе, Чи́стая.

28. Воздрема́ душа́ моя́ отъ уны́нія, утверди́ мя въ словесѣ́хъ Твои́хъ.

Христо́съ Бо́гъ, Дѣ́во, Ангелы Своя́ / и Боже́ственныя апо́столы посла́ на погребе́ніе Ма́тере сынолѣ́пно.

29. Пу́ть непра́вды отста́ви отъ мене́ и зако́номъ Твои́мъ поми́луй мя́.

Всѣ́ ду́ши святы́хъ пра́отецъ, и проро́къ, и пра́ведникъ снидо́шася, / исхо́дную принося́ще пѣ́снь.

30. Пу́ть и́стины изво́лихъ и судьбы́ Твоя́ не забы́хъ.

Тебе́, Богоро́дице Чи́стая, живу́щую и ны́нѣ по сме́рти, / сла́витъ все́ мно́жество небе́сныхъ и земны́хъ.

31. Прилѣпи́хся свидѣ́ніемъ Твои́мъ, Го́споди, не посрами́ мене́.

Живе́ши и по сме́рти, Живопріе́мный Исто́чниче, / отъ живота́ бо къ животу́ прешла́ еси́, / я́ко ро́ждшая Присноживо́тный Живо́тъ.

32. Пу́ть за́повѣдей Твои́хъ теко́хъ, егда́ разшири́лъ еси́ се́рдце мое́.

Аще и умира́еши, Дѣ́во, ны́нѣ по подо́бію на́шему, / но всѣ́хъ Цари́ца явля́ешися, / я́ко заче́ншая Творца́ вся́ческихъ.

33. Законоположи́ мнѣ́, Го́споди, пу́ть оправда́ній Твои́хъ, и взыщу́ и́ вы́ну.

Аще и сокрыва́ешися во гро́бѣ ма́лѣмъ, Дѣ́во, / но са́мое не́бо Тебѣ́ отве́рзеся, / и на престо́лъ прія́тъ Тебе́ Бо́гъ.

34. Вразуми́ мя, и испыта́ю зако́нъ Тво́й и сохраню́ и́ всѣ́мъ се́рдцемъ мои́мъ.

Изъ нѣ́дръ Отчихъ роди́выйся Бо́гъ / и въ нѣ́дра Твоя́, Непоро́чная, вше́дый, / прія́тъ во объя́тія Тебе́, Чи́стая.

35. Наста́ви мя́ на стезю́ за́повѣдей Твои́хъ, я́ко ту́ю восхотѣ́хъ.

Бо́гъ погребе́ся, и Ма́ти Бо́жія, / Бо́гъ въ те́мная сни́де, и [совни́де и] Ма́ти Бо́жія.

36. Приклони́ се́рдце мое́ во свидѣ́нія Твоя́, а не въ лихои́мство.

Сы́на, Дѣ́во, и на Крестѣ́ не оста́вила еси́, / сего́ ра́ди и То́й не оста́ви Тя́, / Тебѣ́ ны́нѣ предстоя́ тѣле́снѣ.

37. Отврати́ о́чи мои́, е́же не ви́дѣти суеты́, въ пути́ Твое́мъ живи́ мя.

Гро́бъ Сы́на прославля́еши ма́терски, / и То́й, Дѣ́во, Твое́ свято́е успе́ніе воспрославля́етъ боже́ственнѣ.

38. Поста́ви рабу́ Твоему́ сло́во Твое́ въ стра́хъ Тво́й.

Восхвали́ша Тебе́ вси́ А́нгели Бо́жіи, / егда́ вы́ше небе́съ возшла́ еси́, / и, па́дше, поклони́шася че́стно.

39. Отъими́ поноше́ніе мое́, е́же непщева́хъ, я́ко судьбы́ Твоя́ бла́ги.

Къ Престо́лу прише́дши Всевы́шняго Бо́га, / па́дши, ра́бски поклони́лася еси́ / и предста́ла еси́, зря́щи Бо́га.

40. Се́, возжела́хъ за́повѣди Твоя́, въ пра́вдѣ Твое́й живи́ мя.

О, ра́дости неизрече́нныя! / О, че́сти безмѣ́рныя! / Маріа́мъ со Іису́сомъ, Сы́номъ Свои́мъ, ца́рствуетъ на небеси́ и на земли́.

41. И да пріи́детъ на мя́ ми́лость Твоя́, Го́споди, спасе́ніе Твое́ по словеси́ Твоему́.

Богоро́дице Дѣ́во, преста́вльшися отъ земли́, / су́щихъ на земли́ не оста́ви, / сохраня́ющи покланя́ющихся преставле́нію Твоему́.

42. И отвѣща́ю поноша́ющимъ ми́ сло́во, я́ко упова́хъ на словеса́ Твоя́.

Отъ небесе́, Ма́ти, идѣ́же ны́нѣ обита́еши, / призрѣ́вши на зе́млю, бу́ди благоутро́бна / и поми́луй мíръ, Блага́я.

43. И не отъими́ отъ у́стъ мои́хъ словесе́ и́стинна до зѣла́, я́ко на судьбы́ Твоя́ упова́хъ.

Апо́столи, Богоро́дице Чи́стая, / егда́ пресвято́е тѣ́ло Твое́ ви́дѣша, / припа́дше, поклони́шася че́стно.

44. И сохраню́ зако́нъ Тво́й вы́ну, въ вѣ́къ и въ вѣ́къ вѣ́ка.

Исхо́дныя псалмы́, и пѣ́нія, и пѣ́сни, ли́къ соста́вльше, поя́ху Тебѣ́, / чудя́щеся сла́вѣ Твое́й, Чи́стая.

45. И хожда́хъ въ широтѣ́, я́ко за́повѣди Твоя́ взыска́хъ.

Боголѣ́пнымъ, Дѣ́во, Твои́мъ та́мо сія́ніемъ озаря́еміи, / ра́довахуся, и мня́ху Сы́на Твоего́ зрѣ́ти.

46. И глаго́лахъ о свидѣ́ніихъ Твои́хъ предъ цари́, и не стыдя́хся.

Живонача́льному Твоему́ тѣ́лу / кíими рука́ми ны́нѣ прикосне́мся, Всенепоро́чная, глаго́лаху, / Сло́ва Пита́тельнице, Чи́стая?

47. И поуча́хся въ за́повѣдехъ Твои́хъ, я́же возлюби́хъ зѣло́.

Кíя словеса́, Дѣ́во, Тебѣ́ изрече́мъ ны́нѣ? / Кíя пѣ́сни, Препѣ́тая Влады́чице, принесе́мъ успе́нію Твоему́?

48. И воздвиго́хъ ру́цѣ мои́ къ за́повѣдемъ Твои́мъ, я́же возлюби́хъ, и глумля́хся во оправда́ніихъ Твои́хъ.

Маріа́мъ, Дѣ́во, прія́тное Бо́гу и́мя и существо́, / ка́ко умерла́ еси́, обожи́вшая естество́ сме́ртныхъ?

49. Помяни́ словеса́ Твоя́ рабу́ Твоему́, и́хже упова́ніе да́лъ ми́ еси́.

Ка́ко ви́дѣна была́ еси́ бездыха́нна, / вся́кое дыха́ніе Даю́щаго неизрече́нно ро́ждшая? / О, сбытія́, Дѣ́во, но́ваго!

50. То́ мя утѣ́ши во смире́ніи мое́мъ, я́ко сло́во Твое́ живи́ мя.

Преше́дшая естества́ уста́вы, / ка́ко подклоня́ешися уста́вамъ естества́, Влады́чице, / и сме́рти, я́коже мы́, иску́съ прія́ла еси́?

51. Го́рдіи законопреступова́ху до зѣла́, отъ зако́на же Твоего́ не уклони́хся.