Хор: «Святый благоверный княже Петре и княгине Февроние,

Тропарь, глас 8

Яко благочестиваго корене пречестная отрасль был еси, добре во благочестии пожив, блаженне Петре, тако и с супружницею твоею, премудрою Феврониею, в мире Богу угодивше и преподобных житию сподобистеся. С нимиже молитеся Господеви сохранити без вреда отечество ваше, да вас непрестанно почитаем.

Слава, и ныне:

Кондак, глас 8

Мира сего княжение и славу временну помышляя, сего ради благочестно в мире пожил еси, Петре, купно с супружницею твоею премудрою Феврониею, милостынею и молитвами Богу угодивше. Темже, и по смерти неразлучно во гробе лежаще, исцеление невидимо подаваете, и ныне Христу молитеся сохранити град же и люди, иже вас славящих.

 

«Святый благоверный княже Петре и княгине Февроние,

Молите Бога о нас»

Хор: «Святый благоверный княже Петре и княгине Февроние,

Молите Бога о нас»

«Слава Отцу и Сыну и святому Духу»

Хор: «И ныне и присно и во веки веков. Аминь»

 

 

АКАФИСТ

Кондак 1

Избраннии чудотворцы и велицыи угодницы Господни, града нашего заступницы и о душах наших молитвенницы, святии преподобнии Петре и Февроние! Пение похвальное вам приносяще, молим вы усердно: яко имущии дерзновение ко Господу, предстательством вашим от неверия и малодушия нас свободите, да зовем вам радостно: Радуйтеся, святии и преславнии чудотворцы Петре и Февроние.

Икос 1

Ангели земнии и человецы небеснии, блаженнии Петре и Февроние, от юности чистую совесть имущии к Богу, и добре в благочестии и чистоте вкупе пожившии, нам же оставльшии в пример подражания житие ваше богоугодное, емуже чудящеся, зовем вам гласы хвалебными сице:

Радуйтеся, от юности Христа возлюбившии

Радуйтеся, целомудрия хранители

Радуйтеся, Духу Святому души уготовившии

Радуйтеся, разума божественнаго исполненнии.

Радуйтеся, на Небеси и на земли от Господа прославленнии

Радуйтеся, вечное место упокоения обретшии

Радуйтеся, града нашего сокровища пребогатая

Радуйтеся, источницы неистощимии чудес.

Радуйтеся, святии и преславнии чудотворцы Петре и Февроние

Кондак 2

Видев князь Петр в возвратной болезни своей, знамение воли Божией, за неисполнение обета своего, пояти в супруги себе премудрую Февронию, потщася сочетатися с нею браком законным, тако в супружестве целомудренно и богоугодно пожисте, имуще едину мысль во двою телу, еже благоугождати Богу, темже воспеваете Ему ныне со Ангелы песнь: Аллилуиа.

Икос 2

Разумом богопросвещенным свыше одареннии, Петре и Февроние святии, любовь и милосердие к бедным и сирым явисте, обидимым и безпомощным заступницы бысте, и иными многими добродетельми украсили княжение свое земное. Сего ради вопием к вам сице:

Радуйтеся, в боголюбии пожившии

Радуйтеся, благоверие сохраншии

Радуйтеся, безпомощных скории помощницы

Радуйтеся, печальных блазии утешители.

Радуйтеся, любовь к Богу и ближним явившии

Радуйтеся, княжение земное праведно содержавшии

Радуйтеся, христиан похвало и утверждение

Радуйтеся, всея земли Российская заступление.

Радуйтеся, святии и преславнии чудотворцы Петре и Февроние

Кондак 3

Силою благодати Божия укрепляемь, княже Петре, восхотел еси оставити град отечества твоего и княжение Муромское, да не бракоразвестися с премудрою Феврониею по настоянию гордых бояр твоих. Сего ради Бог тя прослави и сотвори, да темиже бояры возвращенный, на престоле княжения своего паки утвердился еси, нам же пример хранения закона Божия показа подвигом твоим, да подражающе тебе в святости хранения соуза брачнаго, воспеваем подвигоположнику Христу: Аллилуиа.

Икос 3

Имуще попечение о людех своих, преблаженнии Петре и Февроние, благочестие утверждая и вражду умиротворяя. Темже и Господь, видя таковая подвиги ваша, землю Муромскую плодоносием благослови и мир глубок княжению вашему дарова, подвизая люди благодарственно воспевати вам сице:

Радуйтеся, угодницы Божии, житию святых сопричастницы

Радуйтеся, правителие, люди ко спасению путеводившии

Радуйтеся, благочестия блюстители

Радуйтеся, нестроения и всякаго нечестия искоренители.

Радуйтеся, царей Константина и Елены добродетелей стяжатели

Радуйтеся, князя Владимира и Ольги достойнии преемницы

Радуйтеся, двоице пречестная, лучами чудес сияющии

Радуйтеся, отечества нашего пресветлии светилъницы.

Радуйтеся, святии и преславнии чудотворцы Петре и Февроние

Кондак 4

Буря скорбей и напастей, воздвизаемая злобою мира сего, не ослабили крепкую любовь вашу яже к Богу, Петре и Февроние блаженнии, но паче научи вас благоискусно отражати стрелы искушений диавольских: вы бо облекостесь в броню веры Христовы, в мире преидосте многомятежную пучину житейскаго моря, и достигше тихую пристань спасения, к нейже и нас приведите, да вкупе с вами поем Богу: Аллилуиа.

Икос 4

Слышавши ближнии и дальнии благочестное житие ваше, Петре и Февроние, прославляху человеколюбца Бога, даровавшаго вам крепость на вся дела благая, имиже яко лучами пресветлыми сияете в отечестве нашем, идеже доныне имена и подвиги ваша честны, и воспеваются похвалами сими:

Радуйтеся, двоице пресветлая, Богом благословенная

Радуйтеся, светом жития просиявшии

Радуйтеся, Небесное Царствие стяжавшии

Радуйтеся, смирением вечное блаженство улучившии.

Радуйтеся, путь супружескаго жития верно указующии

Радуйтеся, облацы росоноснии

Радуйтеся, зной страстей и нечестия прогоняющии

Радуйтеся, отечества нашего украшение неотъемлемое.

Радуйтеся, святии и преславнии чудотворцы Петре и Февроние

Кондак 5

Богопросвещеннии светильницы благочестия и предивнии чудотворцы Петре и Февроние, Бога от всея души возлюбившии; темже и Христос, яко солнце и луну пресветлыя, показа вас, преблаженнии, чудес многих зарею просвети всю страну Российскую, прославив нетлением святыя и многоцелебныя мощи ваша, к нимже припадающе, по достоянию ублажаем вас благодарственно вопия Богу: Аллилуиа.

Икос 5

Видевше житие праведное и щедроты ваша, людие муромстии славляху вас, своих правителей милостивых, Петре и Февроние, вы же смирение возлюбившии и гордынею неуязвленнии, и тем показасте нам истинный путь спасения, емуже поучаяся, с любовию вопием вам таковая:

Радуйтеся, славу мира сего ни во что же вменившии

Радуйтеся, смирение Христово возлюбившии

Радуйтеся, заповедей Божиих вернии исполнители

Радуйтеся, учения Евангельскаго приемницы.

Радуйтеся, молитвами от всяких бед нас спасающии

радуйтеся, вся благая прошения исполняющии

Радуйтеся, в недузех страждущих благодатнии врачеве

Радуйтеся, Отечества нашего покровителие.

Радуйтеся, святии и преславнии чудотворцы Петре и Февроние

Кондак 6

Проповедницы веры православныя и ревнители благочестия не токмо словом, но всем житием своим бысте прехвальнии Петре и Февроние; темже и святая Церковь достойне почитает подвиги и труды ваша, имиже трудистеся во славу Бога Вышняго, немолчно воспевая Ему: Аллилуиа.

Икос 6

Возсияв светом добродетельнаго жития вашего, яко звезды пресветлые, преблаженнии Петре и Февроние, многая чудесы даже до сего дня совершающе, и теми зарю безсмертия нам от мощей ваших показующе, да ублажаем вас благохвалениями сицевыми:

Радуйтеся, уставов церковных вернии хранители

Радуйтеся, преданий святоотеческих ревнители

Радуйтеся, суемудрий языческих искоренители

Радуйтеся, суды нелицеприятны людем творившии.

Радуйтеся, деяния ваша с милостию соединившии

Радуйтеся, злобу добром препобеждавшии

Радуйтеся, на земли величием чудес блистающии

Радуйтеся, на Небеси со Ангелы Бога славящии.

Радуйтеся, святии и преславнии чудотворцы Петре и Февроние

Кондак 7

Хотяй человеколюбец Господь явити в житии вашем, Петре и Февроние, образ назидания не токмо людем мирским, но и ликом иноческим, внуши вам в старости маститей оставити славу княжения земнаго, и восприяти образ иноческий, в немже добре подвизастеся постом, бдением и молитвою, воспевающе непрестанно Триединому Богу ангельскую песнь: Аллилуиа.

Икос 7

Новую благодать Божию во иночестем пострижении приемше, преподобнии, новыми подвигами украсисте равноангельское житие ваше и тако сугубый плод совершенства духовнаго Христу принесосте. Поминая убо таковую ревность вашу к подвигом духовным, прославляем вас похвалы сими:

Кондак 8

Странное и дивное чудо, егда ты, блаженне Петре, на кончине живота твоего, прошения ради супружницы твоея, святыя Февронии, исходом своим умедлил еси, дондеже сконча она пелену церковную, ею сшиваему, и вкупе с тобою к исходу смертному приспе, и тако неразлучнии в житии, неразлучнии в кончине явистеся, и во един день и час святыя души своя в руце Божии предасте, зовуще присно Владыце Богу: Аллилуиа.

Икос 8

Вси чудяхуся и славляху дивнаго во святых Своих Бога, егда святыя ваша телеса, в разных гробех положенная, чудесно обретошася лежаща в общей гробнице, юже уготовасте себе, в соборней церкви града Мурома, идеже и доныне неразлучно почиваете, чудотворцы святии, неоскудныя источающе исцеления всем, с верою прибегающим к вам и зовущим:

Кондак 9

Вси Ангели и святых лики возрадовася, егда Сам Царь Славы Христос, венцами безсмертия увенча вас и дарова вам благодать молитися Ему со дерзновением о всех ищущих вашего заступления, егоже не лишите и нас грешных, Петре и Февроние достохвальнии, смиренномудренно воспевающих вас Богу: Аллилуиа.

Икос 9

Ветийство человеческое не довлеет к достойному прославлению дивнаго жития вашего, святии чудотворцы Петре и Февроние; кто бо исповесть вся моления, болезни и труды ваша? кто изочтет вся слезы и воздыхания ваша яже к Богу? Обаче мы любовию к вам подвизаеми, дерзаем воспевати вам сия малыя похвалы:

Кондак 10

Спасение вечное унаследовавше богоблаженнии Петре и Февроние, душами вашими во обителех горних неразлучно в Бозе пребываете, святыми же мощами вашими в храме Божием нетленно почиваете, и обильныя исцеления источаете, да чудесы вашими благодатно озаряеми, хвалебно взываем Верховному Творцу чудес Богу: Аллилуиа.

Икос 10

Стену заступления, благоприятныя молитвы ваша к Богу, обретше, святии чудотворцы Петре и Февроние, благодарение Отцу Небесному усердно возсылаем за вся благодеяния Его, вам же, предстателям нашим, сицевое приносим пение:

Кондак 11

Пение молебное приносим вам, угодницы Божии Петре и Февроние, и с любовию припадаем к иконе вашей, прославляя богоугодное житие и подвиги многи. Молимся вам усердно, чудотворцы святии, помозите нам подражати вашим добродетелем, да возможем богоугодно пети Создателю нашему: Аллилуиа.

Икос 11

Света небеснаго исполнен соборный храм града Мурома, егда благоволением Божиим святыя мощи ваша Петре и Февроние, целы и благоуханны обретошася в нем, исцеления неоскудныя источающе недужным и болящим. Сего ради песненно вопием к вам:

Кондак 12

Благодать свыше вам дарованную, познавше, святии чудотворцы Петре и Февроние, с благоговением и любовию покланяемся нетленным и многоцелебным мощем вашим и от них приемлем в недузех исцеление, в скорбех утешение, в бедах благодатную помощь: темже и прославляем вас по достоянию, небесных предстателей и заступников наших, воспевающе хвалы и благодарения Богу: Аллилуиа.

Икос 12

Поюще многая и преславная ваша чудеса, велицыи угодницы Божии Петре и Февроние, ублажаем вас, яко целителей, утешителей и помощников от Господа нам дарованных, и молитвенно торжествуем святую память вашу, от любве сердечныя воспевающе вам:

Кондак 13

О святии и преславнии чудотворцы, благовернии княже Петре и княгине Февроние! Приимите милостивно сие похвальное пение от нас недостойных во умилении вам приносимое, и вашим предстательством у Господа испросите нам утверждение в вере, надежде и любве, да сподобимся вкупе с вами и всеми святыми во Царствии Небеснем пети Пресвятей Троице хвалебную песнь: Аллилуиа, Аллилуия, Аллилуия. (трижды)

Икос 1

Ангели земнии и человецы небеснии, блаженнии Петре и Февроние, от юности чистую совесть имущии к Богу, и добре в благочестии и чистоте вкупе пожившии, нам же оставльшии в пример подражания житие ваше богоугодное, емуже чудящеся, зовем вам гласы хвалебными сице:

Кондак 1

Избраннии чудотворцы и велицыи угодницы Господни, града нашего заступницы и о душах наших молитвенницы, святии преподобнии Петре и Февроние! Пение похвальное вам приносяще, молим вы усердно: яко имущии дерзновение ко Господу, предстательством вашим от неверия и малодушия нас свободите, да зовем вам радостно: Радуйтеся, святии и преславнии чудотворцы Петре и Февроние.

Ектенья сугубая (не для мирян)

Свящ.: «Услыши ны Боже, спасителю наш, упование всех концев земли, и сущих в мори далече: и милостив, милостив буди, Владыко, о гресех наших, и помилуй ны. Милостив бо и человеколюбец Бог еси, и Тебе славу возсылаем, Отцу, и Сыну, и Святому Духу, ныне, и присно, и во веки веков».

Молитва

О велицыи угодницы Божии и предивнии чудотворцы благовернии княже Петре и княгине Февроние, града нашего предстатели и хранители, и о всех нас усерднии ко Господу молитвенницы! К вам прибегаем и вам молимся с упованием крепким: принесите за нас грешных святыя молитвы ваша ко Господу Богу и испросите нам у благости Его вся благопотребная душам и телесем нашим: веру праву, надежду благу, любовь нелицемерну, благочестие непоколебимое, в добрых делех преуспеяние, мира умирение, земли плодоносие, воздуха благорастворение, душам и телесем здравие и вечное спасение. Испросите Церкви святей и всей державе Российстей мир, тишину и благоустроение, и всем нам житие благополучное и добрую христианскую кончину. Оградите отечество ваше и вся грады Российския от всякаго зла и вся правоверныя люди, к вам приходящия и иконе покланяющияся, осените благодатным действом благоприятных молитв ваших, и вся прошения их во благо исполните. Ей, чудотворцы святии! Не презрите молитв наших, со умилением вам возносимых, но будите о нас приснии предстатели ко Господу и сподобите нас помощию вашею святою спасение вечное получити и Царствие Небесное унаследовати; да славословим неизреченное человеколюбие Отца, и Сына, и Святаго Духа, в Троице покланяемаго Бога, во веки веков. Аминь.

Величание

Отпуст

Тропарь, глас 8

Яко благочестиваго корене пречестная отрасль был еси, добре во благочестии пожив, блаженне Петре, тако и с супружницею твоею, премудрою Феврониею, в мире Богу угодивше и преподобных житию сподобистеся. С нимиже молитеся Господеви сохранити без вреда отечество ваше, да вас непрестанно почитаем.

Слава, и ныне:

Кондак, глас 8

Мира сего княжение и славу временну помышляя, сего ради благочестно в мире пожил еси, Петре, купно с супружницею твоею премудрою Феврониею, милостынею и молитвами Богу угодивше. Темже, и по смерти неразлучно во гробе лежаще, исцеление невидимо подаваете, и ныне Христу молитеся сохранити град же и люди, иже вас славящих.

 

«Святый благоверный княже Петре и княгине Февроние,

Молите Бога о нас»

хор: «Святый благоверный княже Петре и княгине Февроние,

Молите Бога о нас»

«Слава Отцу и Сыну и святому Духу»