Коми кыв фин-угор кывъяс семьяын.

(___ час)

V – VII классъясын велöдöмтор мöдпöвъёвтöм.

(___ час)

Синтаксис. Пунктуация. Сёрни культура.

Кывтэчас.

(2 час)

I. Кывтэчас йылысь V классын велöдöмтор мöдпöвъёвтöм.

Кывтэчасын кывъяслöн подчинение йитöд: веськöдлöм (управление), примыкание. Сюрöса кывйыслöн морфологическöй свойствояс серти кывтэчасъяслöн сикасъяс: кадакывъяяс, нимаяс, урчитанаяс.

II. Веськöдлöм йитöд дырйи зависитысь кывсö колана формаö сувтöдны кужöм. Вежöртас серти синонимическöй кывтэчасъясöн сёрниын вöдитчыны кужöм.

 

Прöстöй сёрникузя.

(3 час + 1 час)

I. Сёрникузя йылысь велöдöмтор мöдпöвъёвтöм.

Сёрникузялöн грамматическöй (предикативнöй) подув.

Подлежащöй да сказуемöй костын йитöдлöн аслыспöлöслунъяс. Сёрникузяын кыв арт. Прöстöй сёрникузялöн шуанног (интонация). Логическöй ударение.

II. Логическöй ударениеöн да кыв артöн сёрникузяысь медся тöдчана кывсö торйöдны кужöм; сёрникузя выразительнöя лыддьöм.

III. Архитектурнöй памятникъяс серпасалöм кыдз текст сикас; текстлöн тэчас, сылöн кыв боксянь аслыспöлöслунъяс.

Кык сюрöса члена прöстöй сёрникузяяс.

Сёрникузяса сюрöса членъяс.

(___ час)

I. Подлежащöй йылысь велöдöмтор мöдпöвъёвтöм.

Подлежащöй петкöдланногъяс.

Сказуемöй йылысь велöдöмтор мöдпöвъёвтöм.

Составнöй глагольнöй сказуемöй. Прöстöй да составнöй нима сказуемöй. Подлежащöй да сказуемöй костын тире.

Сёрникузяса сюрöса членъяслöн синтаксическöй синонимъяс, текст артмöдöмын налöн тöдчанлун.

II. Подлежащöй да сказуемöй йитны кужöм; кывтэчасысь артмöм подлежащöй сказуемöйкöд йитны кужöм. Составнöй глагольнöй сказуемöй да составнöй нима сказуемöй артмöдны кужöм, наöн вöдитчыны кужöм.

Подлежащöйлöн да сказуемöйлöн синонимическöй вариантъясöн сёрниын вöдитчыны кужöм.

III. Ас сикт (кар) история йылысь (либö культура памятник йылысь) публицистическöй сочинение.

 

Сёрникузяын содтана членъяс.

(___ час)

I. Содтана членъяс йылысь велöдöмторсö мöдпöвъёвтöм. Веськыд да косвеннöй дополнение. Определение. Приложение кыдз определениелöн сикас; приложение дырйи препинание пасъяс. Вежöртас серти обстоятельстволöн сикасъяс: када, ина, помкаа, мога, нога, условие, уступительнöй.

Öткодялан тэчас (сравнительнöй оборот); сы дырйи препинание пасъяс.

II. Сёрниын определениеöн, сылöн сикас – приложениеöн, разнöй вежöртаса обстоятельствоöн вöдитчыны кужöм.

III. Ораторскöй сёрни, сылöн аслыспöлöслунъяс. Ас сикт (кар, район, республика) йылысь публичнöй выступление.

 

Öти сюрöса члена прöстöй сёрникузяяс.

(___ час)

I. Öти сюрöса члена сёрникузяяслöн чукöръяс. Сказуемöя öти сюрöса члена сёрникузяяс: определенно-личнöйяс, неопределенно-личнöйяс, морттöмъяс. Подлежащöя öти сюрöса члена сёрникузяяс: назывнöйяс.

Öти сюрöса члена да кык сюрöса члена сёрникузяяслöн синонимия; текст артмöдöмын налöн тöдчанлун.

II. Кык сюрöса члена да öти сюрöса члена сёрникузяясöн кыдз синтаксическöй синонимъясöн вöдитчыны кужöм.

Кад да ин петкöдлöм могысь серпасалöмъясын назывнöй сёрникузяясöн вöдитчыны кужöм.

III. Свободнöй тема вылö висьт.

 

Абу тырмана сёрникузяяс.

(1 час)

I. Абу тырмана сёрникузяяс йылысь понятие. Кык морта сёрниын (диалогын) да сложнöй сёрникузяын абу тырмана сёрникузяяс.

II. Абу тырмана сёрникузяяссö öти сюрöса члена сёрникузяысь торйöдны кужöм. Текстысь абу тырмана сёрникузяяссö аддзыны кужöм. Кык морта сёрни артмöдны кужöм.

 

Сёрникузяын öтсяма членъяс.

(___ час)

I. Öтсяма членъяс йылысь велöдöмторсö мöдпöвъёвтöм. Шуанногöн да öтвывтана, паныд сувтöдана, торйöдана союзъясöн йитöм öтсяма членъяс.

Öтсяма да абу öтсяма определениеяс. Öтсяма членъяслöн радъяс. Öтсяма членъяс костын торйöдан препинание пасъяс. Öтсяма членъяс костын öтувтана кывъяс. Öтувтана кывъяс бердын двоеточие да тире.

II. Öтсяма членъяс дырйи öтувтана кывъяса сёрникузяяс шуанног серти правильнöя лыддьыны кужöм.

III. Литературнöй произведение подув вылын рассуждение.

 

Шыöдчöмъяс, пыртана кывъяс, междометиеяс.

(___ час)

I. Шыöдчöм йылысь велöдöмторсö мöдпöвъёвтöм. Паськöдöм шыöдчöм. Шыöдчöм дырйи торйöдана препинание пасъяс.

Пыртана кывъяс. Пыртана сёрникузяяс. Вставнöй тэчасъяс.

Сёрникузяын междометиеяс.

Пыртана кывъяс, сёрникузяяс дырйи, междометиеяс дырйи торйöдан препинание пасъяс. Öтка да гозъя (парнöй) препинание пасъяс.

Текст артмöдöмын шыöдчöмъяслöн, пыртана кывъяслöн, междометиеяслöн тöдчанлун.

II. Шыöдчöмъяса, пыртана кывъяса, пыртана сёрникузяяса, междометиеяса сёрникузяяс колана шуанногöн лыддьыны, шуны кужöм. Пыртана кыв-синонимъясöн сёрниын вöдитчыны кужöм. Сёрникузяяс, текст юкöнъяс пыртана кывъясöн йитны кужöм.

III. Общественнöя тöдчана тема вылö публичнöй выступление.

 

Сёрникузяса торйöдöм членъяс.

(___ час)

I. Торйöдöм йылысь понятие. Торйöдöм определение да торйöдöм приложение. Торйöдöм обстоятельство. Стöчмöдöм кыдз сёрникузяса торйöдöм членлöн сикас. Торйöдöм содтана членъяс да сёрникузяса стöчмöдысь членъяс дырйи торйöдана препинание пасъяс.

Сёрникузяса торйöдöм членъяслöн синтаксическöй синонимъяс, текст артмöдöмын налöн тöдчанлун.

II. Торйöдöм членъяса да стöчмöдысь членъяса сёрникузяяс правильнöя шуны, лыддьыны кужöм. Торйöдöм членъяса сёрникузяясöн да налöн синтаксическöй синонимъясöн вöдитчыны кужöм.

III. Мортлöн характеристика кыдз текст сикас; татшöм текстлöн тэчас, кывйыслöн аслыспöлöслунъяс.

 

Веськыд да косвеннöй сёрни.

I. Веськыд сёрни йылысь да кык морта сёрни (диалог) йылысь велöдöмтор мöдпöвъёвтöм.

Бокöвöй сёрни (чужая речь) петкöдланногъяс.

Веськыд сёрни пытшкын авторлöн кывъяс. Веськыд сёрниа сёрникузяясын препинание пасъяс.

Косвеннöй сёрни. Цитата. Цитируйтiгöн препинание пасъяс.

Веськыд сёрниа сёрникузяяслöн синтаксическöй синонимъяс, текст артмöдöмын налöн тöдчанлун.

II. Лыддьысигöн, сёрнитiгöн авторлысь кывъяс торйöдны кужöм. Веськыд сёрни косвеннöй сёрниöн вежны кужöм.

III. Кык тöдса мортлöн öткодялан характеристика; татшöм текст тэчöмыслöн аслыспöлöслунъяс.

 

VIII классын велöдöмтор мöдпöвъёвтöм да систематизируйтöм.

(___ час)

Описание (рассуждение) юкöнъяса повествовательнöй сяма сочинение.

 

Велöдчысьясöн VIII классын босьтöм тöдöмлунъяс, кужöмлунъяс, навыкъяс дорö корöмъяс.

 

I. Велöдчысьяс долженöсь тöдны VIII классын велöдöм кыв явлениеяслысь определениеяс, сёрникöд йитчöм определениеяс, пунктуация правилöяс, кужны подулавны ассьыныс вочакывнысö, вайöдавны колана видлöгъяс.

II. VIII класс помын велöдчысьяслöн долженöсь лоны татшöм кужöмлунъяс да навыкъяс:

– синтаксис боксянь видлавны кывтэчас, кык сюрöса члена да öти сюрöса члена прöстöй сёрникузяяс, веськыд сёрниа сёрникузяяс;

– лöсьöдны öтсяма членъясöн, торйöдöм членъясöн, пыртана кывъясöн да сёрникузяясöн, шыöдчöмъясöн сьöктöдöм öти сюрöса члена да кык сюрöса члена прöстöй сёрникузяяс;

– вöдитчыны синтаксическöй синонимъясöн;

– тöдны да кужны вöдитчыны велöдöм материал серти гижöд кыв нормаясöн.

Пунктуацияысь. Аддзыны сёрникузяысь вежöртас серти йитчöм (смыслöвöй) юкöнъяс, кодъясöс колö торйöдны препинание пасъясöн, подулавны препинание пасъяссö да сувтöдавны найöс сёрникузяö велöдöм правилöяс серти.

Кужны сувтöдавны öтсяма членъяса, торйöдöм содтана членъяса, стöчмöдысь членъяса сёрникузяясö, веськыд да косвеннöй сёрникузяясö, шыöдчöмъяса, междометиеяса, пыртана кывъяса да сёрникузяяса прöстöй сёрникузяö препинание пасъяс, цитируйтiгöн кужны сувтöдны препинание пасъяс. Сувтöдны подлежащöй да сказуемöй костö –, кор колö – тире.

Орфографияысь. Торъякывъясысь аддзыны велöдöм нин орфограммаяс, подулавны найöс правильнöя гижны велöдöм орфограммаяс вылас торъякывъяссö.

Йитöда сёрниысь. Гöгöрвоöдны текстлысь сикас да стиль. Подробнöя да бöрйöмöн ас кывъясöн висьтавны повествовательнöй текст, кöнi эмöсь ин, памятникъяс серпасалысь юкöнъяс.

Описание-сочинениеяс гижны (тöдса йöзлöн öткодялан характеристика, ин серпасалöм, история либö культура памятник серпасалöм), гижны морально-этическöй тема вылö рассуждение-сочинение. Сöвмöдны сетöм темалы лöсялана, шöр мöвплы да стильлы лöсялана сочинение да изложение гижöм. Аддзыны да бырöдны кывйысь уна сикас тырмытöмтор. Кужны выразительнöя сёрнитны, общественнöя тöдчана проблема серти сёрнитны-выступайтны кывзысьяс водзын.

 

IX КЛАСС

(__ час)

 

Коми кыв кыдз государственнöй кыв.

(1 час)

V – VIII классъясын велöдöмтор мöдпöвъёвтöм.

(___ час)

Сложнöй сёрникузя. Сёрни культура.

Сложнöй сёрникузя.

(1 час)

Союза сложнöй сёрникузя.

Сочинение йитöда сложнöй сёрникузя.

(___ час)

 

I. Сочинение йитöда сложнöй сёрникузя да сылöн аслыспöлöслунъяс. Öтвывтана, паныд сувтöдана, торйöдана сочинение союзъяса сложнöй сёрникузяяс. Сочинение йитöда сёрникузяясын предикативнöй юкöнъяс костас препинание пасъяс.

Сочинение йитöда сложнöй сёрникузяяслöн синтаксическöй синонимъяс, текст артмöдöмын налöн тöдчанлун.

Препинание пасъясöн авторскöй вöдитчöм.

II. Сочинение йитöда сёрникузяяс колана шуанногöн лыддьыны да висьтавны кужöм.

III. Литературнöй текст, спектакль, кинофильм вылö рецензия.

 

Подчинение йитöда сложнöй сёрникузя.

(___ час)

I. Подчинение йитöда сложнöй сёрникузя да сылöн аслыспöлöслунъяс. Сюрöса да придаточнöй сёрникузяяс. Союзъяс да союзнöй кывъяс кыдз придаточнöйлöн сюрöсаыскöд йитан средство. Сюрöса сёрникузяас индана кывъяс. Сюрöса сёрникузя сертиыс придаточнöйыслöн иныс. Сюрöса да придаточнöй сёрникузяяс костас препинание пасъяс.

Придаточнöй сёрникузяяслöн сикасъяс.

Подчинение йитöда сёрникузяясöн вöдитчан сёрни сфераяс.

Некымын придаточнöя подчинительнöй йитöда сложнöй сёрникузяяс; наын препинание пасъяс.

Подчинение йитöда сложнöй сёрникузяяслöн синтаксическöй синонимъяс; текст артмöдöмын налöн тöдчанлун.

II. Сёрниын подчинительнöй йитöда сёрникузяясöн вöдитчыны кужöм. Торйöдöм содтана членъяса прöстöй сёрникузяясöн да подчинение йитöда сложнöй сёрникузяясöн кыдз синтаксическöй синонимъясöн вöдитчыны кужöм. Ногакывъясöн, ногакывъяс тэчасъяса, шöркывъя тэчасъяса прöстöй сёрникузяясöн да подчинение йитöда сложнöй сёрникузяясöн кыдз синтаксическöй синонимъясöн вöдитчыны кужöм.

III. Делöвöй документъяс (автобиография, заявление).

Академическöй сёрни, сылöн сикасъяс, тэчас, кывйыслöн аслыспöлöслун. Лингвистическöй тема вылö юöртöм.

Союзтöм сложнöй сёрникузя.

(___ час)

 

 

I. Союзтöм сложнöй сёрникузя да сылöн аслыспöлöслунъяс. Союзтöм сложнöй сёрникузялöн юкöнъяс костын вежöртас серти (смыслöвöй) йитöдъяс. Союзтöм сложнöй сёрникузяын препинание пасъяс.

Союзтöм сложнöй сёрникузялöн синтаксическöй синонимъяс, текст артмöдöмын налöн тöдчанлун.

II. Союзтöм сложнöй сёрникузялöн юкöнъяс костысь уна сикас смыслöвöй отношение шуанногöн петкöдлöны кужöм. Союзтöм сложнöй да союзъяса сложнöй сёрникузяясöн кыдз синтаксическöй синонимъясöн вöдитчыны кужöм.

III. Лингвистическöй тема вылö неыджыд статьялöн (статья юкöнлöн) реферат.

Уна сикас йитöда сложнöй сёрникузяяс.

 

I. Разнöй союзъяса да союзтöм йитöда сложнöй сёрникузяяслöн сикасъяс; наын препинание пасъяс. Препинание пасъяслöн йитöдъяс.

II. Уна сикас йитöда сложнöй сёрникузяясöн вöдитчыны кужöм.

III. Лингвистическöй тема вылö статьялöн (статья юкöнлöн) конспект.

 

Кыв йылысь медшöр сведениеяс.

(___ час)

 

Морт олöмын кывлöн тöдчанлун. Кыв кыдз сöвмысь явление. Коми да роч кывъяс костын йитöдъяс. Фин-угор кывъяс костын коми кывлöн ин. Коми гижöд (письменность) артмöм, гижöдлöн тöдчанлун. Коми кыв йылысь наука, сылöн юкöнъяс. Тöдчана коми кыв туялысьяс.

Фонетикаысь, лексикаысь, грамматикаысь, сёрни культураысь велöдöм тöдöмлунъяс систематизируйтöм.

 

Текст признакъяс йылысь, связнöй высказываниелöн тема, шöр мöвп йылысь, текст юкöн йитысь йитöдъяс йылысь, повествование, рассуждение, описание йылысь, сёрни стильяс йылысь тöдöмлунъяс систематизируйтöм.

Общественнöй, морально-этическöй, историко-литературнöй тема вылö публицистика сяма сочинение.

Историко-литературнöй тема вылö доклад либö реферат (öти öшмöс серти).

Лингвистическöй тема вылö статья (книга юр) серти тезисъяс.

Литературно-критическöй статьялöн конспект да тезиснöй план.

 

IX классын босьтöм тöдöмлунъяс, кужöмлунъяс, навыкъяс дорö корöмъяс.

 

I. Велöдчысьяс долженöсь тöдны кыв йылысь медшöр сведениеяс, IX классын велöдöм кыв явлениеяслысь сёрникöд йитчöм понятиеяслысь определениеяс, пунктуация правилöяс, кужны подулавны ассьыныс вочакывъяссö, колана видлöгъяс вайöдöмöн.

II. IX класс помын велöдчысьяслöн долженöсь лоны татшöм кужöмлунъяс да навыкъяс:

– кужны вöчны став сикас разборсö: фонетическöй, словообразовательнöй, морфологическöй, синтаксическöй, стилистическöй;

– лöсьöдны разнöй сикаса сложнöй сёрникузяяс; текст лöсьöдiгöн вöдитчыны содержаниеыслы да стильыслы лöсялана синтаксическöй синонимъясöн;

– гöгöрвоöдны текстлысь сикас да стиль;

– вомгора да гижöда сёрниын вöдитчыны гижöд кыв нормаясöн, сёрнитны гижöд кывйöн.

Пунктуацияысь. Сёрникузяясысь аддзыны вежöртас серти йитчöм юкöнъяс, кодъясöс колö торйöдны препинание пасъясöн, подулавны препинание пасъяс бöрйöмсö, V – IX классъясын велöдöм пунктуационнöй правилöяс серти сувтöдавны препинание пасъяс; аддзавны да бырöдавны пунктуацияысь тырмытöмторъяс; вöчны сёрникузялысь пунктуационнöй разбор.

Орфографияысь. Торъякывъясысь аддзыны велöдöм орфограммаяс, подулавны орфограмма бöрйöмсö, велöдöм орфограммаяс серти правильнöя гижны торъякывъяс, аддзыны да исправляйтны орфографияысь тырмытöмторъяс, вöчны торъякывъяслысь орфографическöй разбор.

Йитöда сёрниысь. Гöгöрвоöдны текстлысь сикас да стиль, лöсьöдны разнöй стильлы лöсялана текстъяс. Öти öшмöс серти дасьтыны да лыддьыны историко-литературнöй тема вылö доклад.

Лöсьöдны неыджыд литературно-публицистическöй статья серти (либö ыджыд статья юкöн серти) коспект либö тезисъяс. Гижны публицистика сяма сочинение. Гижны заявление, автобиография.

Сöвмöдны сочинение гижан сям, сöвмöдны сочинениелысь содержаниесö, кывсö. Ас гижöм текстысь аддзыны да бырöдны кыв боксянь тырмытöмторъяссö. Грамотнöя да свободнöя сёрнитны сетöм тема йылысь. Вомъёрткöд сёрнитiгöн тöд вылын кутны сёрни этикет.

 

Коми кывйысь велöдчысьяслысь тöдöмлунъяс, кужöмлунъяс да навыкъяс донъялöм

I. Велöдчысьяслысь вомгора вочакывъяс донъялöм

Коми кывйысь тöдöмлунъяс донъялöмын медшöрнас лоö вомгора юасьöм. Велöдчысьяслöн тырвыйö вочакывйыс – тайö торъя тема вылö йитöда, логика боксянь сьöрсьöн-бöрсьöн висьталöм, определениеясöн, правилöясöн вöдитчыны кужöм петкöдлöм.

Велöдчысьяслысь вочакывсö донъялiгöн тöд вылын колö кутны: 1) тырвыйö-ö да правильнöя-ö вочавидзöма юалöм вылас; 2) гöгöрвоöма-ö велöдöмторсö; 3) тыр-бура-ö лöсьöдöма вочакывсö кыв боксяньыс.

Вочакывсö «5» вылö позьö донъявны, велöдчысьыс кö: 1) велöдöм материалсö висьталö тырвыйö, кыв (языкöвöй) понятиеясыслы сетö правильнöй вочакывъяс; 2) гöгöрвоö материалсö, ассьыс мöвпъяссö вермö подулавны, тöдöмлунъяснас кужö вöдитчыны практическöя, колана видлöгъяссö кужö вайöдны оз сöмын велöдчан небöгысь, но и асшöра лöсьöдöмаясöс; 3) материалсö висьталö сьöрсьöн-бöрсьöн, гижöд кыв нормаяс серти правильнöя.

«4» дон позьö пуктыны, велöдчысьыслöн вочакывйыс кö лöсялö «5» дон дорö корöмъяслы, но вочакывъяс эм 1-2 тырмытöмтор, кодъясöс ачыс жö и аддзö да бырöдö, да эм 1-2 тырмытöмтор сьöрсьöн-бöрсьöн висьталöмас, висьталöмсö кыв боксянь лöсьöдöм-тэчöмас.

«3» дон позьö пуктыны, велöдчысьыс кö сетöм темасö тöдö, темаыслысь шöр визьяссö гöгöрвоö, но: 1) материалсö висьталö оз тырвыйö, понятиеяслысь определениеяссö (гöгöрвоöдöмъяссö), правилöяссö оз стöча сет; 2) ассьыс мöвпъяссö оз куж пыдiсянь да доказательнöя подулавны, оз куж вайöдны ассьыс видлöгъяс; 3) материалсö висьталö оз сьöрсьöн-бöрсьöн, висьталöмас кö эмöсь кыв боксянь торкалöмъяс, тырмытöмторъяс.

«2» вылö донъялöны, велöдчысьыс кö велöдан материалыслысь унджык юкöнсö оз тöд, определениеяс да правилöяс висьталöмын лэдзö тырмытöмторъяс, кодъяс искажайтöны налысь смыслсö, материалсö висьталö логика боксянь артсö ёна торкалöмöн, материалсö висьталö неувереннöя.

«1» вылö донъялöны, велöдчысьыс кö велöдан материалсьыс нинöм оз тöд, материалсö дзикöдз оз гöгöрво.

 

II. Диктантъяс донъялöм.

 

Диктант – орфографияысь да пунтктуацияысь тöдöмлунъяс прöверяйтöмын медшöр формаясысь öти.

Диктантъяс вылö колö босьтны йитöда текстъяс, кодъяс лöсялöны гижöд кыв нормаяслы, кодъяслöн содержаниеыс гöгöрвоана тайö классын велöдчысьяслы.

Диктантлöн йöрышыс:

V класслы – 90-100 кыв, VI класслы – 100-110 кыв, VII класслы – 110-120 кыв, VIII класслы – 120-150 кыв, IX класслы – 150-170 кыв (кывъяс лыдас пырöны и асшöр, и служебнöй кывъяс).

Контрольнöй словарнöй диктант прöверяйтö сложнöй, прöверитны позьтöм орфограммаяс вылö кывъяс гижны кужанног. Сылöн йöрышыс: V класслы – 15-20 кыв, VI класслы – 20-25 кыв, VII класслы – 25-30 кыв, VIII класслы – 30-35 кыв, IX класслы – 35-40 кыв.

Торъя темаысь тöдöмлунъяс прöверяйтöм могысь гижан диктантын долженöсь лоны тайö тема серти шöр орфограммаяс да пунктограммаяс, а сiдзжö водзджык босьтöм навыкъяс зумыдмöдöм могысь орфограммаяс да пунктограммаяс.

Четверть да велöдчан во помын нуöдан кывкöрталысь (итогöвöй) диктантъяс пыр прöверяйтöны велöдчысьяслысь став велöдöм темаысь тöдöмлунъяссö.

Контрольнöй диктантъяс нуöдöм могысь колö бöрйыны сэтшöм текстъяс, кодъясын тайö темаас должен лоны 2-3 видлöгысь не этшаджык. Водзынджык нин велöдöм орфограммаясысь да пунктограммаясысь пыртöны медшöръяссö: сэтшöмъяссьыс должен лоны 1-3 видлöг.

Прöверяйтан орфограммаяслöн да пунктограммаяслöн лыдыс должен лоны татшöм лыда: V классын – 12 разнöй орфограмма да 2-3 пунктограмма, VI классын – 16 разнöй орфограмма да 3-4 пунктограмма, VII классын – 20 разнöй орфограмма да 4-5 пунктограмма, VIII классын – 24 разнöй орфограмма да 10 пунктограмма, IX классын – 24 разнöй орфограмма да 15 пунктограмма.

Контрольнöй диктант текстö позьö пыртны сöмын сэтшöм выльöн велöдöм орфограммаяс, кодъясöс бура нин вынсьöдöма урокъяс вылын (2-3 урокысь не этшаджык урок вылын).

Диктант донъялiгöн колö исправляйтны, но не чинтыны донсö орфографияысь да пунктуацияысь татшöм тырмытöмторъясысь:

1) торъякыв строкаысь строкаö вуджöдöм;

2) школьнöй программаö пырттöм правилöяс;

3) велöдтöм на правилöяс;

4) прöверитны позьтöм гижаннога торъякывъяс, кодъяс вылын эз на вöв торйöн уджалöма;

5) авторскöй пунктуация петкöдлöм.

Диктант донъялiгöн тöд вылын колö кутны öшыбкаыслысь сикассö. Öшыбкаяссьыс колö торйöдны абу грубöйясöс, мöд ногöн кö, öшыбкаяс, кодъяс оз ёна тöдчöдны грамотность характеризуйтiгöн. Öшыбкаяс лыддигöн кык абу грубöй öшыбка лыддьöны öтиöн.

Абу грубöй öшыбкаяс лыдас пырöны:

1) правилöясысь исключениеяс;

2) абу коми да абу роч собственнöй нимъяс;

3) öти пунктуация пас мöд пунктуация пас пыдди пуктöм.

Донъялiгöн тöд вылын сiдз жö колö кутны, öшыбкаяссö мöдпöвъёвтöм (повторяйтöм) да öти сикаса (однотипнöй) öшыбкаяс.

Öшыбкаяссö кö мöдпöвъёвтöма öти и сiйö жö торъякывйын либö öти кыввужъя торъякывъясын, сiйöс лыддьöны öти öшыбка пыдди.

Öти сикасаöн лоöны öти и сiйö жö правилö вылö öшыбкаяс, правильнöя гижанногсö бöрйöмыс кö йитчöма кывйыслöн грамматическöй да фонетическöй аслыспöлöслуныскöд.

Медводдза куим öти сикас öшыбкасö лыддьöны öти öшыбка пыдди, а став мукöд бöрынджык мунысьсö лыддьöны асшöр öшыбка пыдди.

Контрольнöй диктантын кö эм 5 унджык исправитöм (неправильнöя гижöмасö правильнöя гижöм вылö исправитöм), донсö чинтöны öти балл вылö. Эм кö диктантас куим да унджык исправитöм, оз позь пуктыны «5».

Диктант донъялöны öти оценкаöн.

«5» вылö донъялöны диктант, сэнi кö абу ни öти öшыбка, а сiдзжö эм кö öти абу грубöй либö öти абу грубöй пунктуационнöй öшыбка.

Диктант «4» вылö донъялöны, сэнi кö эм 2 орфографическöй да 2 пунктуационнöй öшыбка, либö 1 орфографическöй да 3 пунктуационнöй öшыбка, либö 4 пунктуационнöй öшыбка, но абу ни öти орфографическöй öшыбка.

Диктант «3» вылö донъялöны, сэнi кö эм 4 орфографическöй да 4 пунктуационнöй öшыбка, либö 3 орфографическöй да 5 пунктуационнöй öшыбка, либö 7 пунктуационнöй öшыбка, но абу ни öти орфографическöй öшыбка.

V классын позьö пуктыны «3» оценка диктантысь, кöнi эм 5 орфографическöй да 4 пунктуационнöй öшыбка. «3» оценкаыс вермас лоны уджын, кöнi лэдзöма 6 орфографическöй да 6 пунктуационнöй öшыбка, кодъяс пиын эмöсь öти сикаса да абу грубöй öшыбкаяс.

Диктантысь пуктöны «2», сэнi кö эм 7 орфографическöй да 7 пунктуационнöй öшыбка, либö 6 орфографическöй да 8 пунктуационнöй öшыбка, 5 орфографическöй да 9 пунктуационнöй öшыбка, 8 орфографическöй да 6 пунктуационнöй öшыбка.

Диктантын кö лэдзöма зэв уна öшыбка, сiйöс донъялöны «1» вылö.

Комплекснöй контрольнöй уджысь, кытчö пырö диктант да содтöд (фонетическöй, лексическöй, орфографическöй, грамматическöй) задание, колö пуктыны кык оценка, кыкнан сикас уджсьыс торйöн.

Содтöд заданиеяссö донъялöны татшöм ногöн: «5» оценка пуктöны, велöдчысь кö став заданиесö вöчöма правильнöя; «4» оценка пуктöны, велöдчысь кö правильнöя вöчöма заданиеясыслысь ¾ юкöнысь не этшаджык; «3» оценка пуктöны, уджыслысь кö вöчöма джынсьыс не этшаджык правильнöя; «2» оценка пуктöны уджысь, кодлысь абу вöчöма джынсьыс унджык юкöн; «1» оценка пуктöны, велöдчысь кö абу вöчöма ни öти задание.

Контрольнöй словарнöй диктант донъялöны татшöм ногöн: «5» оценка пуктöны диктантысь, кöнi абу ни öти öшыбка; «4» оценка пуктöны диктантысь, кöнi велöдчысь лэдзöма 1-2 öшыбка; «3» оценка пуктöны диктантысь, кöнi велöдчысь вöчöма 3-4 öшыбка; «2» оценка пуктöны диктантысь, кöнi вöчöма 7 öшыбкаöдз. Диктантын кö вöчöма зэв уна öшыбка, пуктöны «1» оценка.

 

III. Изложение да сочинение донъялöм.

Изложение да сочинение – мöвпъяс сьöрсьöн-бöрсьöн правильнöя висьтавны кужöмлунъяс, йитöда сёрни артмöдöм кужöмлунъяс прöверяйтöмын медшöр формаяс.

Подробнöй изложение текстлöн примернöй йöрыш: V классын – 100-150 кыв; VI классын – 150-200 кыв; VII классын – 200-250 кыв; VIII классын – 250-350 кыв; IX классын – 350-450 кыв.

Подробнöй контрольнöй изложение текстлöн йöрышыс VIII да IX классъясын вермас лоны 50 кывйöн ыджыдджык.

Классын гижан сочинениелöн вöзъяна (рекомендуйтана) йöрыш: V классын – 0,5-1,0 лист бок; VI классын – 1,0-1,5 лист бок; VII классын – 1,5-2,0 лист бок; VIII классын – 2,0-3,0 лист бок; IX классын – 3,0-4,0 лист бок.

Тайö индöм йöрышыс примернöй, сы вöсна школьнöй сочинение зависитö и сочинение стильсьыс да жанрсьыс, темасьыс и шöр мöвпсьыс (замыселсьыс), велöдчысьяслöн гижан öдсьыс, налöн общöй развитиесьыс да с.в.

Изложение да сочинение отсöгöн прöверяйтöны:

1) тема восьтны кужöм; 2) стильлы лöсялана, высказывание темалы, моглы лöсялана кыв средствоясöн вöдитчыны кужöм; 3) кыв нормаяс тöдöм, гижан правилöяс тöдöм.

Быд изложение да сочинение донъялöны кык оценкаöн: медводдзасö пуктöны содержаниеысь да сёрни лöсьöдöмысь (оформитöмысь), мöдыс – грамотностьысь: орфография, пунктуация, кыв нормаяс тöдöмысь. Кыкнан оценкасö колö лыддьыны коми кывйысь оценкаöн.

Сочинение да изложение содержаниесö донъялöны татшöм подувъяс серти:

– темаыслы да шöр мöвпыслы лöсялöм;

– темасö восьтöм (пыдiсянь – абу пыдiсянь);

– фактическöй материалыслöн стöчлун;

– висьталöмыслöн сьöрсьöн-бöрсьöн мунöм.

Сочинениеыслысь да изложениеыслысь сёрни боксянь тэчöмсö (оформитöмсö) донъялiгöн тöд вылын колö кутны: кывворыслысь да сёрни грамматическöй тэчасыслысь озырлунсö; стиль боксянь öтувъялунсö, сёрниыслысь выразительностьсö; сёрни боксянь тырмытöмторъясыслысь лыдсö.

Грамотностьсö донъялöны орфографическöй, пунктуационнöй, грамматическöй öшыбкаяс лыд сертиыс.

оценка	оценкалöн шöр подувъяс
содержание да сёрни	грамотность
«5»	1. Уджыслöн содержаниеыс тырвыйö лöсялö темаыслы. 2. Абуöсь фактическöй öшыбкаяс. 3. Содержаниесö восьтöма сьöрсьöн-бöрсьöн. 4. Уджас вöдитчöма озыр кывворöн, уна сикас синтаксическöй тэчасöн. 5. Текстыслы лöсялö стилевöй öтувъялун да выразительность.	Позьö лэдзны: 1 орфографическöй, либö 1 пунктуационнöй, либö 1 грамматическöй öшыбка.
«4»	1. Уджыслöн содержаниеыс тырвыйö лöсялö темаыслы. 2. Эмöсь неыджыд фактическöй тырмытöмторъяс. 3. Мöвпъяс сьöрсьöн-бöрсьöн восьтöмын эмöсь неыджыд торкöмъяс. 4. Сёрниыслöн лексическöй да грамматическöй тэчасыс озыр. 5. Текстыслы лöсялö стилевöй öтувъялун да тырмана выразительность.	Позьö лэдзны: 2 орфографическöй да 2 пунктуационнöй öшыбка, либö 1 орфографическöй да 3 пунктуационнöй öшыбка, либö 4 пунктуационнöй öшыбка, кор абуöсь орфографическöй öшыбкаяс, а сiдз жö 2 грамматическöй öшыбка.
«3»	1. Уджас эмöсь темасьыс кежöмъяс. 2. Медшöр визяс уджыс правильнöй, но сэнi эмöсь торъя фактическöй тырмытöмторъяс. 3. Мöвпсö сьöрсьöн-бöрсьöн висьталöмын эмöсь торъя торкöмъяс. 4. Кывворыс гöль, синтаксическöй тэчасъясыс зэв öти сикасаöсь. 5. Уджыслöн абу стилевöй öтувъялуныс, сёрниыс абу выразительнöй.	Позьö лэдзны: 4 орфографическöй да 4 пунктуационнöй öшыбка, либö 3 орфографическöй да 5 пунктуационнöй öшыбка, либö 7 пунктуационнöй öшыбка, кор абуöсь орфографическöй öшыбкаяс.
«2»	1. Уджыс оз лöсяв темаыслы. 2. Эм уна фактическöй тырмытöмтор. 3. Торкöма мöвпъясыслысь сьöрсьöн-бöрсьöн мунöмсö, абуöсь мöвпъяс костас йитöдъясыс. 4. Зэв гöль кывворыс, уджсö гижöма дженьыдик öти сикаса сёрникузяясöн, кывъяснас вöдитчöма неправильнöя. 5. Торкöма текстыслысь стилевöй öтувъялунсö.	Позьö лэдзны: 7 орфографическöй да 7 пунктуационнöй öшыбка, либö 6 орфографическöй да 8 пунктуационнöй öшыбка, либö 5 орфографическöй да 9 пунктуационнöй öшыбка, либö 8 орфографическöй да 6 пунктуационнöй öшыбка, а сiдз жö 7 грамматическöй öшыбка.
«1»	Содержаниеас 6 унджык тырмытöмтор да 7 унджык тырмытöмтор сёрни лöсьöдöмас.	Уджас 7 унджык орфографическöй, 7 унджык пунктуационнöй, 7 унджык грамматическöй öшыбка.