Сергокалинское местное отделение

Партии "ЕДИНАЯ РОССИЯ"

 

Нушала Гlяхlмадпаша

Ванашимахьилизив акlубси, бусягlят Кьадиркентла шилизи минакайубси Рашидов Гlяхlмадпаша Мажидович бахъал даргантани вала. Ил публицист, педагог ва РФ-ла журналистунала Союзла член сай. Илала бегlти Мажид ва Загьидат ургубаланти сабри. Илдани урчlемал дурхlя абикьур, гlяхlси бяркъ бедиб. Гlяхlмадпаша Дагъиста халкьла поэт Рашид Рашидовла узи сай.

Гlяхlмадпаша дургъбала дусмала урши сай. Къиянтири илала дурхlядеш. Къиянти дурхlядешли ил адамти дигахъес, уркlецlичевсили вирахъес бурсивариб. Виштlали левалли илини бузерила кьадри багьур. Ил багьандан ил цацабехlтиван чевукан ветхlеурну, узули хlериран ветаур. Гlяхlмадпашани ва илала гlямрула гьалмагъ Рашидатли шел дурхlя абикьур, гlяхlси бяркъ бедиб, багьудлумачи бегlбариб.

Чинав узули калун виалра Гlяхlмадпаша жавабкардешличил узусири. Ватlайс къуллукъ барили гlергъи, ил БАМ-лизив, мургьи адилтlуси мягlдайзив, стройкабачив ва цархlилти мераначив узули калун. Гlяхlцад дусмазиб илини Лавашала районна Ташкапурла ва нушала районна Кьадиркентла школабазиб директорла хlянчи бариб. Гlергъити дусмазив ил гlибкьли узуси публицист сай. Дахъал сари илини газетабазир ва сунела 15 жузлизир ахъдурцути темаби. Гlергъиси замана илини сунела жузазир багьудила, медицинала, шила хозяйствола, культурала, рухlла масъулти ахъдурцули сай. Лерти нукьсандешуначи критика бирули сай. Дахъал сари илини ахъдурцути масъулти. Ил гьаман нушала редакциялизи айцlур. Декlар-декlарти белкlани гьаладирхьу. Ил шаласи челябкьличи, адамтала диги чардулхъниличи вирхули сай.

Гьалабван Рашидов Гlяхlмадпаша Мажидович акlубси бархlи сабри. Ил илала творчествола ва гlямрула ахъдеш саби. Гlяхlмадпашас челябкьлализирра гlяхlси арадеш, творчестволизир гьарбизуни диубли дигулра. Гlяхlмадпашани цацахlели сунела цlакьани поэзиялизирра ахтардидирули сай.

Бара гьалавванра Гlяхlмадпаша нушала редакциялизи ацlиб. Илала някълизир сунела сагати кlел жузра лерри: «Сергокъалала районнис 85 дус», «Гьарбизаб гlямрула гьуни гариллис». Цаибил жуз районна тарихличила, район машгьурбарибси адамтачила саби. Киэсил жузлизи сунени гlергъиси замана делкlунти назмурти кадерхахъурли сай. Гlяхlмадпаша, хlед гьарбизуни имцlадиаб. Арадеш, гlяхlдеш хlечил дарх диаб.

Нушала газета бучlантас Гl.Рашидовла чумал назмура гьаладирхьулра:

Багьадур ванашикунт

Багьадур ванашикунт

Дахъдаабая хlуша,

Багьадур ванашикунт

Гьардизаб хlушаб гlямру.

 

Багьадур ванашикунт

Дерхъаб хlушала хъуми.

Багьадур ванашикунт

Лебдеш гьарбизаб хlушаб.

 

Багьадур ванашикунт

Мурадли даабая.

Детерхаб пикрумира

Уркlилиши дашути.

 

Багьадур ванашикунт

Дагьричертили гlямру

Деркlабая хlушани

Улка давлачеббисли

Улка разилибисли.

 

Багьадур ванашикунт

Асилти ванашикунт,

Вирхулра хlушачи ну

Вирхулра набчи кьяйда.

 

Чатlа

Нуни иргъули ирус

Гьалжанала чатlали

Ахъили холал гьуни

Дагъистайзи чарбулхъни.

 

Кlел дусла гlямру сари

Бикlули бирар чатlнас

Сен гlяхlли камдарибти

Илис Аллагьли гlямру

Багьес хlейрулра нуни.

 

Чатlали сунес пукьа

Бирухlели юртлизиб,

Чебаибсири нуни

Сецад къиян кайсулил.

 

Дашира гьалмагъуни

Дирехlе чатlнас пукьни

Имцlадиахъес илди

Нушала Дагъистайзир.

 

Шалал бархlи

Савли ну дуравхъасли

Сагал гьава гьигьбарес

Уркlи пахрули бирцlур

Аллагьли шала бархlи

Наб пешкешбарниличи.

 

Адам вирхес чебиркур

Чевяхlси Аллагьличи

Ламус хlяя калахъес

Сунела гlямрулизир.

 

Чебиркур гьар инсаннис

Чеббикlес сунна гьуни

Гlямрулизиб сунела

Икьалайгьесли бахълис.

 

Бахъ къиянсигу гьуни

Ишбархlила гlямрула

Хlякимтаан нушала

Тамай чlукьабарибси.

 

Дашира гьалмагъуни

Чекасили къиянти

Улка сагабирехlе

Улка шалабирехlе.

Нушала корр

Суратлизив: Гl.М.Рашидов

Юбилей

Ургубала урши

Бикlуливан, гlямрулизиб адамлис се имцlабиалра гlяхlси ахlен, чlянкlли кlел ахlенти: гlякьлу ва гlилму имцlадиалли илала хlурмат ахъбикlар ва дурхъабикlар. Масала, сахаватдеш имцlадиалли анцlбукь мас заябарили, тlутlукьякьябарниличи бетиркур. Адамлизир гъабзадеш, чlумадеш дебали имцlадиалли илди жанивардешличи, зулмуличи шурдулхъан, макру, дукелцlи, масхурти, гъай имцlадиалли вегlла хlурмат кабиркур, берк-берж имцlадаралли илди изайчи шурдулхъули дирар. Тlем бакlахъес беркайзи писдирути зеван гьар секlал цугдикни гlяхlси саби. Уркlилизир вайти хlялани агарси, разиси, хlялалси хъубзарлизир дикlахlелли, чедир гьандушабтигъунти вайти лишанти хlисабхlедирар. Ил сунела игъбарра саби. Илдигъунтазивад ца сай дила иш белкlла игит, бахъал районлантани валуси, Хlурхъила шилизивад дуравхъунси хlябдехl дургъбала бутlакьянчи, машгьурси адам, шантала маслигlятчи Гlямаров Мяхlяммадла (Пашахъала) урши Гlябдусалам Гlямаров. Ил вецlну цара узи-рузила ургав халакаибси сай. Бусягlят илди авал леб: хlябал узира, ца рузира.

Гьаларван Гlябдусалам акlубхlейчирад 80 дус дикиб. Гьай-гьай илини сай акlнила бархlилис хасдарибти халати шадлихъуни хlедариб. Амма ил валутани разидешличил мубараквариб. Мубаракирулра нунира. Сенкlун ил вахъхlила хъубзар, шила ургубализир сунела гlямрула бегlлара гlяхlтигъунти дусми хlялалли узули деркlибси зяхlматчи, гlяхlси, ванаси девличи лайикьли дубурлан сай.

Сунела санигlят хlясибли Гlябдусалам механизатор сай. Ватlа гьалабси чебла асилдешличил ахъили гlергъи Гlябдусаламли шила хозяйствола механизацияла школа «шула» кьиматуначил белчlун. Гьаланачи ил сай хlерируси Сергокъалала шила «Сергокъала» совхозлизив трактористли, гlур комбайнёрли узи. Гехlел дус трактортала бригадирли калун, урегал дус техникализибад урехи хlебирахънила шайчивси инженерли узи. Ил 10 дус хlяжланкlи дашахъуси звенала звеньевойлира узули калун. Илхlели диахъубти сархибдешуни багьандан Гlябдусалам Дагъиста шила хозяйствола Министерстволи мургьила сягlятличил, арцла премияличил шабагъатлаварибсири. Хlурматла грамоталичил наградитьварибсири. Ил 10-11 ибти шелдуслихъунала коммунист бузерила гьавкья сайри. Къантlли буралли, илини гьанбушибси гьабкья хозяйстволизиб 52 дус хlянчи бариб. Гlябдусаламли дигиличил гьанбуршули сай итхlели сунечил барх бузули калунти асилти механизаторти, баракатла адамти, гlямру гlибратличил деркlибти дубурланти Бяхlямадов Мяхlяммадсягlидла, Мяхlяммадов Хайруллагьла, Тlагьиров Исмягlилла, Исмягlилов Ибрагьимла, Халимбеков Азила ва цархlилтала уми. Илдани чула шила ургубализир мургьила хатl датур. Чинабу ишбархlи илдигъунти асилти хъубзурти? Агара. Эгер илдигъунти хъубзурти нушачиб бахъал лебти биалри ишбархlи декь дурхъадикlули, адамтала гlямру дургlехlедикlи, цlахси жагабилзути бахъхlебикlи…. Гьачам «Сергокъала» совхозла директор Султlанмут Муртазагlялиевра ялчи комитетла председатель Гlисаев Набигуллагьра саби-ургаб гъай-гъайбиуб:

- Гьавкья механизатор Гlямаров, совхозлис бакlили путёвка лебну, курортличи ватиулра, - викlар ялчи комитетла председатель директорлизи.

- Юх! Ил курортдичи ватаэс асухlебирар, - викlар директор.

- Сен хlерхьуси? – кьабулхlейкиб Гlисаев.

- Арши садиули сари, урусуни бикlуливан «мал золотник – да дорог». Рахли се биалра биэс… Арши чини иршу?

Марлира 1983 ибил дуслизир дарибти забли арши аркдисахъун. Илди чlябарличи кадаилри. Комбайнёрти биалли илди диршес хlейрар или гlелумбизур. Гlябдусалам ишав цlакьли пикриухъун. Илини «Сибиряк» комбайнала мотовила гьалабяхl битlакlиб, жатка башмакуначи кабаайчи гlяшбатур, кадисунти шиличибяхl къаршили иршули детахълуми хlедиахъубли арши диршиб. Совхозла дирекцияли ил шабагъатлаварибсири.

Дахъал дусмазив сабухъчевли ва халаси къайгъиличил узули кални багьандан Гlябдусалам Гlямаровлис 1999 ибил дуслизиб Дагъистан Республикала урибси механизаторла хlурматла у бедибсири. Илала дахъал дусмала бузери кьиматлабирули, илис МТЗ-80 журала траторра савгъатлис бедибсири. Ил бузерила ветеран сай.

Сунела жагьси замана Гlябдусалам совхозла комсомолтала гьавкьяна вирусири. Совхозла механизаторти - коммунистунала первичная организацияла секретарьли 10 дус калунсири. Ил гlяхlси спортсменра вири. Илис футбол, лыжаби, гимнастика дигахъи. Гlергъити 15 дус пенсияличив виалра ил акьули хlевъар. Се биалра пайдаласи бирули вяшикlар.

Чедибра гьанбушили кьяйда, илини сай акlубхlейчирад 80 дус дикни шалгlеббухъунси июль базла цаличиб дурадеркlиб. Илини сунела гlямрула лаг ванзаличил, ризкьиличил бархбасунси бузериличил, бархьдеш, диги черяхlдирули, гьими-кьяс тяйдили далтули ихъули сай. Илис шадлихъличиб динда «гъайбухъахъесра» дигахъу.

Гlябдусаламли ва илала гlямрула гьалмагъ Гlябидатли шел дурхlя абикьур, илди чула гlямрула гьуйчиб саби. Дудешла хlурмат ахъли калахъес илдира чекабизурли саби.

Гlябдусалам, хlед гьатlира гlяхlцад дусмазир арадеш, гlяхlдеш, разидеш дулгулра! Бизиси беркалара бирахъес, хlела дяхlла шалали хlерра рикlахъес хlела мякьлар хlела Гlябидатра каммариаб!

Айдимир Каймаразов