Радуйся от пелен Богом избранный,

Радуйся, от утробы матерней на службу Ему предуставленный,

Радуйся, в юности строгость монашеского жития́ показавый,              

Радуйся, Христа всем сердцем возлюбивый,

Радуйся, вся красная мира сего ни во чтоже вменивый,

Радуйся, постом и бдением молитвенным плоть твою удручивый,

Радуйся, волю свою Богови покоривый,

Радуйся, сосу́де Божия благодати,

Радуйся, жилище Духа Святаго, украше́нное чистотою,

Радуйся, народа российскаго молитвенное ограждение,

Радуйся, земли кавказския священное украшение,            

Радуйся, преподобно-исповедниче Феодосие, преславный чудотворче.

 

 

       Кондак 2

Видя Господь душу твою, яко ниву, благовозделанную к плодоносию духовному, уготова ти ангельское житие во Святей горе Афонстей. Там же во смирении и послушании пребывал еси, научая нас любити Единаго Бога и Его ради вся земная презирати, непрестанно вопия Ему: Аллилуиа.

 

     Икос 2

 

Разум небесный тебе даровася, святый отче; от юности твоея не престая помышляти о небеснем, оставил еси дом отчий и стопы своя ко Святей горе Афонстей направивый, тем же ублажаем тя сице:

Радуйся, от младенчества Богом избранный,

Радуйся, молитву к Нему стяжавый,

Радуйся, ангельского жития любителю,

Радуйся, смирения и нестяжания рачителю,

Радуйся, Горы Афонстей чадо богоизбранное,

Радуйся, и́ноческого жития явление всеизрядное,

Радуйся, правило веры и благочестия,

Радуйся, образе кротости и смирения,

Радуйся, слезы духовныя стяжавый,

Радуйся, плачем временным блаженство вечное снискавый,

Радуйся, молитвами бесовския прилоги сокрушивый,

Радуйся, плоть духови покоривый,

Радуйся, преподобно-исповедниче Феодосие, преславный чудотворче.

 

 

    Кондак 3

Силою Всевышняго осененный и укрепляемый, все плотское мудрование отложил еси, и яко воин благоискусный усердное моление к Богу и Матери Его стяжал еси. Глубоким смирением невидимых врагов побеждая, жену бесо́м одержимую исцелил еси и вси видяще дивное чудо с любовию прославили Господа, радостию вопия Ему: Аллилуиа.

 

      Икос 3

Имея тщание о подвизе и́ноческого равноангельного жития, благочестно и богоугодно подвизася, о богоблаженный угодниче Христов, во дни и нощи́ в законе Господне поучаяся; на всякий час умом несмуще́нным и сердцем чистым к Богу и Его Пречистей Матери усердные молитвы возносил еси; Сего ради мы ублажаем тя и радостию вопием:

Радуйся, усердный к Богу и Матери Его молитвениче,

Радуйся, истинного покаяния проповедниче,

Радуйся, свою волю Богови покоривый,

Радуйся, райския сладости на земли вкусивый,

Радуйся, кротость и смирение стяжавый,

Радуйся, беса из жены одержимой, будучи отроком,изгнавый,

Радуйся, козни диавольския победивый,

Радуйся, плотския похоти умертвивый,

Радуйся, скорбящих скорое утешение,

Радуйся, народа православного молитвенное ограждение,

Радуйся, предстателю о нас к Богу и Богородице непостыдный,

Радуйся, силу чудес от Бога явивый,

Радуйся, преподобно-исповедниче Феодосие, преславный чудотворче.

 

 

            Кондак 4

Бурю зависти от братии претерпел еси, прошел весь путь тесный и скорбный, душу свою в незлобии сохранил еси, Небесным ангелом подражая, восходил еси по стезям добродетелей к совершенству духовному, в меру возраста Христова, священство от Бога восприял, поя Ему: Аллилуиа.

       Икос 4

Слышаще и видяще святое житие твое, братия восташа на тя, но ты, отче блаженне, скорби и поношения в кротости и смирении претерпел еси, и сим кратчайшим путем духовных высот достигл еси. Господь же чад Своих прославляя, на свещнице яко светильник тя поставил еси. Мы же с любовию восхваляем тя и вопием ти сице:

Радуйся, Христа всем сердцем возлюбивый,

Радуйся, благое иго Христово на себе восприемый,

Радуйся, совершеннаго послушания исполненный,

Радуйся, заповедей Господних блюстителю верный,

Радуйся, всего себе в жертву Богови принесы ́ й,