Октоих, глас 6. В среду на утрени.



Мы поможем в написании ваших работ!


Мы поможем в написании ваших работ!



Мы поможем в написании ваших работ!


ЗНАЕТЕ ЛИ ВЫ?

Октоих, глас 6. В среду на утрени.



На стиховне, глас 6.

О Кресте́ упова́ние име́ю Христе́, / и о не́м хваля́ся вопию́: / Человеколю́бче Го́споди, горды́ню низложи́, // не испове́дающих Тебе́ Бо́га и Челове́ка.

Стих:Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом злая. И при́зри на рабы́ Твоя́, и на дела́ Твоя́,/ и наста́ви сы́ны их.

Иже Кресто́м огражда́еми, / врагу́ противля́емся, / не боя́щеся ко́зней его́ и ла́яния: / я́ко бо го́рдый упраздни́ся, / и попра́н бы́сть си́лою на дре́ве // пригвожде́ннаго Христа́.

Стих:И бу́ди све́тлость Го́спода Бо́га на́шего на нас, и дела́ рук на́ших испра́ви на нас,/ и де́ло рук на́ших испра́ви.

Па́мять му́ченик, ра́дость боя́щимся Го́спода: / пострада́вше бо Христа́ ра́ди / венцы́ от Него́ прия́ша: // и ны́не со дерзнове́нием мо́лятся о душа́х на́ших.

Сла́ва и ны́не, глас то́йже:

Агнца Своего́, Агница Нескве́рная дре́вле / и Непоро́чная Влады́чица, / на Дре́ве Кре́стнем я́ко узре́ Ма́терски восклица́ше, / и дивя́щися вопия́ше: / Ча́до Сладча́йшее, / что́ зре́ние сие́ но́вое и пресла́вное? / Ка́ко со́нм безблагода́тный суди́щу Пила́тову предаде́ Тя,/ и осужда́ет на сме́рть Живота́ вся́ческих? // Но воспева́ю Твое́ неизрече́нное Сло́ве, снизхожде́ние.

Октоих, глас 6. В среду вечера.

На Господи воззвах, глас 6.

Вели́ким та́йнам Бо́жиим служи́телие бы́сте, / Богосло́вцы и Богови́дцы, ученицы́: / и благода́ть исцеле́ний прия́сте, // и все́м челове́ком боле́зни исцеля́ете.

Вели́кое прибе́жище и покро́в душа́м на́шим, / духо́в лю́тых прогна́ние, / вы́ есте́ Богови́дцы апо́столи Госпо́дни: // те́мже ва́с при́сно почита́ем.

От вся́каго обстоя́ния, / и вре́да бесо́вскаго, и прегреше́ний, / и зла́го плене́ния изба́вите, / ве́рою ва́с восхваля́ющих, // Боже́ственнии апо́столи блаже́ннии.

Октоих, глас 6. В среду вечера.

На стиховне, глас 6.

Го́споди, апо́столи спостиго́ша иногда́ у́бо сетьми́ глубину́ морску́ю, / иногда́ же высоту́ ца́рствия уче́ний ра́ди. / Ово у́бо худо́жеством непостижи́мую глубину́ испыта́ша: / о́во же ве́рою неопи́саннаго Твоего́ не́дра достиго́ша, / и ми́ру пропове́даша Безле́тнаго Твоего́ Сы́на.// Те́х моли́твами, и все́х святы́х поми́луй на́с.

Стих:К Тебе́ возведо́х о́чи мои́ Живу́щему на Небеси́. Се я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему,/ до́ндеже уще́дрит ны.

Иногда́ ученицы́ Твои́ Христе́, / в корабли́ обурева́еми вопия́ху: / Учи́телю, спаси́ на́с, погиба́ем. / И ны́не мы́ вопие́м: / Человеколю́бче Спа́се на́ш, // изба́ви на́с от бе́д на́ших, мо́лимся.

Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих:/ и уничиже́ния го́рдых.

Крест Тво́й Го́споди, / му́чеником бы́сть ору́жие непобеди́мое: / ви́деша бо предлежа́щую сме́рть, / и прездря́ще бу́дущую жи́знь, / упова́нием е́же на Тя́ укрепля́хуся: // те́х моли́твами поми́луй на́с.

Сла́ва и ны́не, глас то́йже:

Око се́рдца моего́ возпуща́ю к Тебе́ Влады́чице: / не пре́зри ма́лаго моего́ воздыха́ния / в ча́с, егда́ су́дит Сы́н Тво́й ми́ру, // бу́ди ми́ Покро́в и Помо́щница.

В четверток на утрени ирмосы совпадают с воскресными "Яко по су́ху"

Октоих, глас 6. В четверток на утрени.

На стиховне, глас 6.

Бу́рю утиши́вше ле́сти бесо́вския / му́дре в тишину́ апо́столи Христо́ви, / ве́сь ми́р наста́висте в ве́ру правосла́вную, // и ны́не моли́теся о душа́х на́ших.

Стих:Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом злая. И при́зри на рабы́ Твоя́, и на дела́ Твоя́,/ и наста́ви сы́ны их.

Па́мять прему́дрых учени́к Христа́ Царя́ на́шего, / досто́йно пе́сньми почти́м ве́рнии: // ти́и бо Тро́ическую ве́ру в ми́ре пропове́даша.

Стих:И бу́ди све́тлость Го́спода Бо́га на́шего на нас, и дела́ рук на́ших испра́ви на нас,/ и де́ло рук на́ших испра́ви.

Избра́нныя удиви́ и святы́я Бо́г на́ш. / Ра́дуйтеся и весели́теся вси́ раби́ Его́, / ва́м бо угото́ва венцы́ и Ца́рствие Свое́: // но мо́лим вы́, и на́с не забу́дите.

Сла́ва и ны́не, глас то́йже:

Преложе́ние скорбя́щих, / премене́ние боля́щих еси́ Богоро́дице Всепе́тая, / спаси́ гра́д и лю́ди, / бори́мых умире́ние, обурева́емых тишина́, // Еди́на Предста́тельнице ве́рных.

Октоих, глас 6. В четверток вечера.

На Господи воззвах, глас 6.

Долготерпели́ве и Человеколю́бче Бо́же мо́й, / Многоми́лостиве и Ще́дре, / ка́ко претерпе́л еси́ закала́ние и умерщвле́ние на Дре́ве, / за ро́д челове́ческий? // славосло́вим Твое́ благоутро́бие.

Зауше́ния претерпе́л еси́, / и распя́тие Долготерпели́ве, и уничиже́ния, / хотя́ все́х изба́вити лестца́, Еди́не Живода́вче, // и вся́ терпи́ши Преблаги́й.

Возше́л еси́ Па́стырю, на Крест, / и просте́рл еси́ ру́це, вопия́: / прииди́те ко Мне́, и просвети́теся челове́цы, / и́же пре́лестию помрачи́вшиися: / Аз бо Све́т е́смь. // Сла́ва Тебе́ Еди́не Светопода́телю.

Октоих, глас 6. В четверток вечера.

На стиховне, глас 6.

Крест Тво́й Го́споди, / жи́знь и заступле́ние лю́дем Твои́м е́сть: / и на́нь наде́ющеся, / Тебе́ распе́ншагося пло́тию Бо́га на́шего пое́м: // поми́луй на́с.

Стих:К Тебе́ возведо́х о́чи мои́ Живу́щему на Небеси́. Се я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему,/ до́ндеже уще́дрит ны.

Крест Тво́й Го́споди, / ра́й отве́рзе ро́ду челове́ческому: / и от истле́ния изба́вльшеся, / Тебе́ распе́ншагося пло́тию Бо́га на́шего пое́м: // поми́луй на́с.

Стих:Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих:/ и уничиже́ния го́рдых.

Му́ченицы Твои́ Го́споди, / не отверго́шася Тебе́, / ни отступи́ша от за́поведей Твои́х: // те́х моли́твами поми́луй на́с.

Сла́ва и ны́не, глас то́йже:

Предстоя́щи у Дре́ва иногда́ во вре́мя распя́тия, / Де́ва с де́вственным ученико́м, / и пла́чущи вопия́ше: / увы́ Мне́, ка́ко стра́ждеши, // все́х Христе́ сы́й безстра́стие?

Октоих. В пяток на утрени.

Ирмосы, глас 6.

Песнь 1.

Волно́ю морско́ю / скры́вшаго дре́вле / гони́теля мучи́теля/ под земле́ю скры́ша спасе́нных о́троцы: / но мы́ я́ко отрокови́цы, / Го́сподеви пои́м, // сла́вно бо просла́вися.

Песнь 3.

Тебе́ на вода́х / пове́сившаго всю́ зе́млю неодержи́мо, / тва́рь ви́девши на ло́бнем ви́сима, / у́жасом мно́гим содрага́шеся, // не́сть свя́т ра́зве Тебе, Го́споди, взыва́ющи.

Песнь 4.

На Кресте́ Твое́ Боже́ственное истоща́ние / прови́дя Авваку́м, ужа́сся вопия́ше: / Ты́ си́льных пресе́кл еси́ держа́ву Бла́же,/ приобща́яся су́щим во а́де, // я́ко Всеси́лен.

Песнь 5.

К Тебе́ у́тренюю, / милосе́рдия ра́ди Себе́ истощи́вшему непрело́жно, / и до страсте́й безстра́стно прекло́ньшемуся Сло́ве Бо́жий // ми́р пода́ждь ми́ па́дшему Человеколю́бче

Песнь 6.

Ят бы́сть, / но неудержа́н в пе́рсех ки́товых Ио́на: / Тво́й бо о́браз нося́, / страда́вшаго и погребе́нию да́вшагося, / я́ко от черто́га от зве́ря изы́де: / приглаша́ше же кустоди́и: / храня́щии су́етная и ло́жная, // ми́лость сию́ оста́вили есте́.

Песнь 7.

Неизрече́нное чу́до, / в пещи́ изба́вивый преподо́бныя о́троки из пла́мене, / во гро́бе ме́ртв бездыха́нен полага́ется, / во спасе́ние на́с пою́щих: // Изба́вителю Бо́же, благослове́н еси́.

Песнь 8.

Ужасни́ся боя́йся Не́бо, / и да подви́жатся основа́ния земли́:/ се́ бо в мертвеце́х вменя́ется в Вы́шних Живы́й, / и во гро́б ма́л странноприе́млется: / Его́же о́троцы благослови́те, / свяще́нницы воспо́йте, // лю́дие превозноси́те во вся́ ве́ки.

Песнь 9.

Не рыда́й Мене́ Ма́ти, / зря́щи во гро́бе, / Его́же во чре́ве без се́мене зачала́ еси́ Сы́на: / воста́ну бо и просла́влюся, / и вознесу́ со сла́вою непреста́нно я́ко Бо́г, // ве́рою и любо́вию Тя́ велича́ющия.

Октоих, глас 6. В пяток на утрени.

На стиховне, глас 6.

О Кресте́ упова́ние и́мам, / и о не́м хваля́ся вопию́: / Человеколю́бче Го́споди, // горды́ню низложи́ не испове́дающих Тебе́ Бо́га и Челове́ка.

Стих:Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом злая. И при́зри на рабы́ Твоя́, и на дела́ Твоя́, / и наста́ви сы́ны их.

Иже Кресто́м огражда́еми, / врагу́ противля́емся, / не боя́щеся Того́ кова́рства, ни лови́тельства: / я́ко бо го́рдый упраздни́ся, / и попра́н бы́сть на Дре́ве // си́лою распя́таго Христа́.

Стих:И бу́ди све́тлость Го́спода Бо́га на́шего на нас, и дела́ рук на́ших испра́ви на нас, / и де́ло рук на́ших испра́ви.

Го́споди, в па́мять святы́х Твои́х / вся́ тва́рь пра́зднует: / Небеса́ ра́дуются со Ангелы, / и земля́ весели́тся с челове́ки. // Те́х моли́твами поми́луй на́с.

Сла́ва и ны́не, глас то́йже:

Пригвозди́хся у́бо я́ко Челове́к на дре́ве, и умертви́хся, / и во гро́бе положе́н бы́х, я́ко сме́ртный: / но я́ко Бо́г во сла́ве, / Ма́ти Чи́стая Де́во, // па́ки востаю́ тридне́вен.

Октоих, глас 6. В пято́к ве́чера.

На стиховне стихи́ры му́чеником с " Го́споди воззва́х"

Му́ченицы Твои Го́споди, / не отверго́шася Тебе, / ни отступи́ша от за́поведей Твоих. // Тех моли́твами поми́луй нас.

Стих:К Тебе́ возведо́х о́чи мои́ Живу́щему на Небеси́. Се я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему,/ до́ндеже уще́дрит ны.

Стих:Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих:/ и уничиже́ния го́рдых.

Страстоте́рпцы му́ченицы, / Небе́снии гра́ждане, / на земли́ пострада́вше, / мно́гия му́ки терпе́ша. / Моли́твами их Го́споди, и моле́нием // всех нас сохрани́.

Слава и ныне, глас тойже.

Кто Тебе́ не ублажи́т, Пресвята́я Дево? / Кто ли не воспое́т Твоего́ Пречи́стаго Рождества́? / Безле́тно бо от Отца́ возсия́вый Сын Единоро́дный, / То́йже от Тебе́, Чи́стыя про́йде, / неизрече́нно вопло́щся: / естество́м Бог Сый / и естество́м быв Челове́к нас ра́ди; / не во двою́ лицу́ разделя́емый, / но во двою́ естеству́ несли́тно познава́емый. / Того́ моли́, Чи́стая, Всеблаже́нная, // поми́ловатися душа́м на́шим.

Октоих, глас 6. В пято́к ве́чера.

Аще ЗАУПОКОЙНАЯ СЛУЖБА

На стиховне, глас 6.

Страда́вшии Тебе ра́ди Христе́, / мно́гия му́ки претерпе́ша, / и соверше́нныя венцы́ прия́ша на Небесе́х, // да мо́лятся о душа́х наших.

Сти́х: Блаже́ни, я́же избра́л / и прия́л еси́ Го́споди.

Му́ченичен: Крест Твой Го́споди, / му́чеником бысть ору́жие непобеди́мое: / ви́дяху бо предлежа́щую сме́рть,/ и предзря́ще бу́дущую жи́знь, / упова́нием е́же на Тя укрепля́хуся: // тех моли́твами поми́луй нас.

Сти́х: Ду́ши и́х / во благи́х водворя́тся.

Ме́ртвен: Нача́ток ми и соста́в / зижди́тельное Твое бысть повеле́ние: / восхоте́в бо от неви́димаго и ви́димаго естества́, / жи́ва мя соста́вити, / от земли́ убо те́ло созда́в, / дал же ми еси́, ду́шу, / Боже́ственным Твоим и животворя́щим вдохнове́нием. / Те́мже Спа́се, рабы́ Твоя́ во стране́ живы́х, // и в кро́вех пра́ведных упоко́й.

Слава и ныне, глас тойже:

Моли́твами ро́ждшия Тя Христе́, / му́ченик Твои́х, и апо́стол, и проро́к, и святи́телей, / преподо́бных, и пра́ведных, и всех святы́х, // усо́пшия рабы́ Твоя́ упоко́й.



Последнее изменение этой страницы: 2016-04-07; Нарушение авторского права страницы; Мы поможем в написании вашей работы!

infopedia.su Все материалы представленные на сайте исключительно с целью ознакомления читателями и не преследуют коммерческих целей или нарушение авторских прав. Обратная связь - 3.235.11.178 (0.017 с.)