Гlяхlти багьудлуми – гlямрула хьулчи

(Августла конференцияличибад)

Августла 26 личиб районна Администрацияла заседаниебала заллизиб районна учительтала августла конференция бетерхур. Ил абхьиб ва бузахъи районна Администрацияла бекl Мяхlяммадов Мяхlяммад Хlябибуллаевичли.

Конференцияличив, районнизиб чеабиуси наслулис багьуди лугнила ва челябкьлализиб ил гьалабяхl башахънила мурадуначила бурули, докладличил гъайухъун районна багьудила Управлениела начальник Мяхlяммадхlябиб Муртазгlялиевич Мирзамяхlяммадов.

Сунела докладлизиб Мирзамяхlяммадовли буриб районнизиб багьуди бедлугни гьалабяхl башахънила шайчир акlубти гlяхlти дарсдешуначила, районна багьудила хlянчизартала челябкьлала мурадуначила ва гьачамлис ахlерзили лералти челукьути масъултачила.

Докладчиклира бурили кьяйда, гlергъити дусмазир районнизир школабала ва дурхlнала унхърала бузерила шуртlри къулайдиахъес дахъал хlянчи дарахъили сари, илхlелира 50 миллионничирра имцlали къуруш арцла харждарили. Буралли, багьудила 15 личирра имцlали учреждение капитальный тяхlярли ремонтдарахъиб, предметунала хlябцlалицад кабинет далкьаахъур, школабас ва дурхlнала унхърас хlяжатти ваяхl (партаби, доскаби, спортла гlягlниахълуми, компьютерти) асахъиб. Мурегала шилизиб спортла зал, Сергокъалализиб «Олимпийский» бикlуси дурхlнала ишхlелла даражала анхъ бузерилизи каиб. Краснопартизанскла школа капитальный тяхlярли ремонтбарахъиб. Мургукла шилизир 250 учениклис хасбарибси сагаси школа ва дурхlнала сагаси анхъ дирнила хlянчи детурхули сари. Гъамсигъуна челябкьлализиб Миглакьасимахьилизиб ишхlелла журала сагаси школа барес пикрибарили саби.

Илкьяйдали докладчикли ЕГЭ-ла шайчибси хlянчи районнизиб къулайли тlашбатниличила, школабала бучlантани предметунала шайчирти декlар-декlарти олимпиадабачир, спортла абзаназир Дагъистайзир ва илала дурар гlяхlти чедибдешуни сархниличила буриб. Илкьяйдали докладчик чула бузерилизир лерти нукьсандешуначи тlашизур.

Чула бузериличила, лерти нукьсандешуначила ва челябкьлала кьасаначила бурули, конференцияличиб гъайбухъун районна багьудила профсоюзла райкомла председатель Н.Ш.Гlялиева, Сергокъалала С.Гlябдуллаевла уличилси кlиибил лицейла бехlбихьудла классунала учительница З.Гl.Мирзаева, Мургукла урга даражала шкоалала директор З.Ш.Шагьновазова, Краснопартизанскла урга даражала школала учительница А.Д.Хизриева.

Конференцияла бузерилизир бутlакьяндеш дариб ва гъайрухъун Дагъиста багьудила гьалабяхl башахънила институтла кафедрала заведующая, психологияла гlилмуртала доктор, профессор Дамадаева Анжела Сергеевна. Гъайбухъунтани районна Бекl М.А.Гlямаровла къайгънас баркалла багьахъур.

Конференцияличиб багьуди ва бяркъ дедлугнила шайчибси бузерилизиб декlарбухъунти педагогунира шабагъатлабариб. Сергокъалализивси педогагический бузерила ветеран Абакаров Гlябдусамад Гlяйсаевичлис Сергокъалала районна Хlурматла адамла у бедиб. Краснопартизанскла урга даражала школала дарган мезла ва литературала учительница Хlяжиева Насибат Зайпуллаевна ДР-ла багьудила ва гlилмула Министерствола цаибил даражала дипломличил наградитьрариб. Кlиибил даражала дипломличил наргадитьрариб Сергокъалала Гl.Батирайла уличилси лицейла дарган мезла ва литературала учительница Мяхlяммадова Патlимат Хlяжиевна. «РФ-ла цахlнабси багьудила Хlурматла хlянчизар» бикlути ахъти уми дедиб учительницаби Сурхаева Биканат Рабазановнас, Мяхlяммадова Раисат Сулайбановнас, Мяхlяммадова Сакинат Идрисовнас, Бяхlямадова Муъминат Муртазагlялиевнас.

Нушанира хlурматла умачи лайикьбикибти педагогуни, районна багьудила лебилра хlянчизарти, педагогический бузерила ветеранти, школабала бучlанти ва илдала бегlти, белчlудила сагаси дусличил бархбасахъи, уркlи-уркlилабада мубаркбирулра ва чула асилси бузерилизир челябкьлализирра гlяхlти чедибдешуни, гlямрулизир арадеш, талихl, яшавлизиб эркиндеш, уркlбазир диги ва разидеш камхlедиубли дигулра!

Нушала хасси корр